logo

мулоқотҳо

Қабули эътимоднома аз сафирони нав

4 октябр Президенти кишвар Эмомалӣ Раҳмон аз сафирони навтаъини 12 давлати ҷаҳон эътимоднома қабул намуд.
Ба Сарвари давлати Тоҷикистон Эмомалӣ Раҳмон сафирони фавқулода ва мухтори Ҷумҳурии Федеролии Олмон Холгер Грен, Федератсияи Русия Игор Лякин-Фролов, Давлати Қатар Алӣ ибни Муборак ал-Муҳандӣ, Шоҳигарии Ҳошимии Урдун Наваф Халиф Ал-Сарайреҳ, Шоҳигарии Белгия Мишел Петерманс, Ҷумҳурии Чехия Гинек Пейха, Ҷумҳурии Финляндия Никлас Линдквист, Конфедератсияи Швейтсария Мауро Райна, Япония Такаюки Коикэ, Шоҳигарии Тайланд Чарн Ҷулламон, Ҷумҳурии Филиппин Доминго Лусенарио ва Муғулистон Жагирин Сухээ эътимодномаҳои худро тақдим намуданд.
Президенти кишвар Эмомалӣ Раҳмон онҳоро бо таъин шуданашон ба ин мақом табрику таҳният гуфта, изҳори боварӣ намуд, ки барои таҳким ва рушду густариши муносиботи кишварҳои худ бо Тоҷикистон саҳми намоён мегузоранд.

www.president.tj

Сафирони нав баъд аз дидор ва супурдани эътимодномаҳои худ ба Эмомалӣ Раҳмон, Президенти Ҷумҳурии Тоҷикистон, бо хабарнигорон вориди гуфтугӯ шуданд, ки дурнамои фаъолият ва таҳкими ҳамкории кишварҳояшон бо Тоҷикистон меҳвари ин суҳбат буд. Аз ҷумла, Игор Лякин - Фролов, сафири фавқулода ва мухтори Федератсияи Русия дар Тоҷикистон, итминон дод, ки дар густариши равобити ду кишвар аз тамоми имконоти мавҷуд истифода хоҳад кард. Ӯ изҳор дошт, ки Президенти Тоҷикистон низ ба ин нукта таъкид намуда, ба мо дар ин самт барору комёбӣ хост.
Сафир, ҳамчунин гуфт, ки иҷрои дастури Владимир Путин - Президенти Федератсияи Русияро дар мавриди таҳкими ҳамгироии шарикони стратегӣ меҳвари фаъолияти худ қарор дода, ҷиҳати дар сатҳи нав ба роҳ мондани ҳамкориҳои судманди Тоҷикистону Русия, бахусус дар бахши иқтисоду тиҷорат талош меварзад.
Игор Лякин - Фролов таъкид кард, ки Федератсия Русия Тоҷикистонро шарики стратегӣ ва иттифоқчии наздики худ ҳисобида, аз ҷараёни муколамаҳои сиёсии ҳар ду ҷониб қаноатманд аст.
- Ман хушҳолам, ки ба ҳайси сафири фавқулода ва мухтори Ҷопон дар Тоҷикистон ба иҷрои вазифа шурӯъ мекунам. Бори сеюм аст, ки ба кишвари шумо меоям. Дар ҳар сафар ман тозакориҳоеро ба мушоҳида гирифтам ва инак мебинам, ки Тоҷикистон хеле ободу зебо шуда, рушди назаррасе касб кардааст.
Ин матлабро Такаюки Коикэ, сафири навтаъини Ҷопон дар Тоҷикистон, баён намуда, ба дурнамои неки ҳамкориҳои ду кишвар ва ироаи ёриҳои бештар ба Тоҷикистон ибрози хушбинӣ кард.
Дар ҳамин ҳол, Гинек Пейха, сафири фавқулода ва мухтори Ҷумҳурии Чехия дар Тоҷикистон, кишвари моро шарики боэътимоди Чехия арзёбӣ намуд. Ӯ бо ёдоварӣ аз он ки ҳанӯз солҳои 70 – 80 - уми асри гузашта мутахассисони чехӣ дар Тоҷикистон фаъолият мекарданд, изҳор дошт, ки миёни ду кишвар аз қабл заминаҳои хубӣ ҳамкорӣ вуҷуд доранд.
Сафири Чехия аз баҳои Сарвари давлати Тоҷикистон ба раванди ҳамкориҳои Тоҷикистону Чехия  истиқбол намуда, қавл дод, ки барои расидан ба муваффақиятҳои бештари равобити ҳасана талош хоҳад кард. Ба андешаи сафир, ду кишвар метавонанд дар риштаи иқтисоду истеҳсолот ҳамкориҳои афзалиятнок дошта бошанд. Ҳамчунин ӯ аз омодагии Чехия ҷиҳати кумак ба рушди соҳаи саноати Тоҷикистон, истихроҷ ва коркарди захираҳои нафту газ ва дорусозӣ хабар дод.
- Сафари Президенти Ҷумҳурии Тоҷикистон Эмомалӣ Раҳмон ба Ҷумҳурии Финландия, ки як сол муқаддам иттифоқ афтода буд, миёни кишварҳои мо заминаҳои нави ҳамкорӣ эҷод кард.
Ин нуктаро Никлас Линдквист, сафири фавқулода ва мухтори Финландия дар Тоҷикистон, таъкид намуда, изҳор дошт, ки то ин замон ҳамкориҳои ду кишвар қобили тавсиф набуданд. Мавсуф дар навбати аввал муаррифии бештари Тоҷикистону Финландия ба ҳамдигарро рисолати худ дониста, изҳори умед кард, ки бо истифода аз захираҳои мавҷудаи ҳамкорӣ дар рушди муносиботи дуҷониба, бахусус бахши саноату савдо, нақше аз худ боқӣ хоҳад гузошт.
Зимнан, Жагирин Сухээ, сафири фавқулода ва мухтори Муғулистон дар Тоҷикистон, сатҳи кунунии ҳамкориҳои ду давлатро ситоиш кард. Муғулистон кишварест, ки соли 1992 дар канори аввалин давлатҳо Истиқлолияти давлатии Тоҷикистонро ба расмият шинохта, равобити дипломатӣ барқарор намудааст. Бино ба натиҷагирии Жагирин Сухээ, зарфи 20 соли охир Тоҷикистону Муғулистон ба робитаҳои судманд дар бахшҳои гуногун даст ёфта, дар арсаи ҳамкориҳои байналмилалӣ, аз ҷумла дар доираи Созмони Милали Муттаҳид ва дигар созмонҳои бонуфузи ҷаҳонӣ муваффақ шудаанд.
Сафир иттилоъ дод, ки кишвараш дар садади таъсиси Маркази таҳқиқоти рушди кишварҳоест, ки роҳи баромад ба баҳрро надоранд. Ба бовари ӯ, ин тасмим метавонад, роҳи баромадани чунин давлатҳо ба баҳрро матраҳ намуда, дар рушди алоқа ва роҳу коммуникатсия мусоидат намояд. Жагирин Сухээ таъкид кард, ки дар сурати муваффақ шудан ба таъсиси чунин марказ аз Тоҷикистон даъват хоҳад шуд, ки дар ин самт бо Муғулистон бипайвандад.
Доминиго Лусенарио, сафири фавқулода ва мухтори Ҷумҳурии Филиппин дар Тоҷикистон, дар ҷамъи хабарнигорон изҳор дошт, ки қабл аз супурдани эътимодномаи худ ба Президенти Ҷумҳурии Тоҷикистон бо роҳбарияти вазоратҳои корҳои хориҷӣ, рушди иқтисод ва савдо, Палатаи савдо ва саноати мамлакат дидору мулоқот анҷом додааст. Ӯ аз натиҷаи ин гуфтугӯҳо изҳори қаноатмандӣ намуда, гуфт, ки маҳз дар ин суҳбатҳо роҳҳои минбаъдаи ҳамкории кишвараш бо Тоҷикистон муайян шудааст.
Чарн Ҷулламон, сафири Шоҳигарии Тайланд дар Тоҷикистон, аз таҳаввулоти тоза дар муносиботи ду кишвар ҳарф зад. Ӯ сафари Эмомалӣ Раҳмон ба Шоҳигарии Тайланд ва боздиди Йинглак Шинаватра, Сарвазири ин кишварро, аз Тоҷикистон пурмаҳсул ва таконбахши равобити дуҷониба арзёбӣ намуд. Ӯ ба роҳ мондани парвози мустақими ҳавопаймоҳо миёни Душанбеву Бангкокро, ки моҳи декабр дар назар аст, истиқбол кард.
Ҳамчунин сафирони фавқулода ва мухтори Ҷумҳурии Федеролии Олмон  Холгер Грен, Давлати Қатар Алӣ ибни Муборак ал-Муҳандӣ, Шоҳигарии Ҳошимии Урдун Наваф Халиф Ал-Сарайреҳ, Шоҳигарии Белгия Мишел Петерманс, Конфедератсияи Швейтсария Мауро Райна дар суҳбат бо хабарнигорон аз сатҳи муносиботи кишварҳои худ бо Тоҷикистон изҳори қаноатмандӣ намуда, ба дурнамои равобити ҳасана изҳори хушбинӣ карданд.

Фирӯзи РАҲМОНИЁН,
«Ҷумҳурият»


Баёни ақида (0)    Санаи нашр: 8.10.13    №: 132    Мутолиа карданд: 1000
29.09.2020


ТОҶИКОН ВА ӮЗБЕКОН: ДӮСТӢ БИМОНАД ҶОВИДОН

РАШТ. ҲАМКОРИҲОИ МАҚОМОТ БО СОҲИБКОРОНИ ВАТАНДӮСТ САМАР МЕДИҲАНД

ХУҶНД. ВУСЪАТИ БУНЁДКОРИҲО ДАР ТАРАБХОНАИ «ФОРЕЛ»

ТОҶИКИСТОН. 87,4 ДАРСАДИ БЕМОРОНИ КОРОНАВИРУС ШИФО ЁФТАНД

25.09.2020


ТОҶИКИСТОН. 8 ҲАЗОРУ 296 СИРОЯТШУДАИ КОРОНАВИРУС ШИФО ЁФТ

СУҒД. ЭҲЁИ КОРХОНАҲОИ АЗ ФАЪОЛИЯТ БОЗМОНДА

КӮҲИСТОНИ МАСТЧОҲ. ОМОДАГӢ БА ИНТИХОБОТ ДАР САТҲИ БАЛАНД ҶАРАЁН ДОРАД

23.09.2020


НОҲИЯИ АЙНӢ. ҲАВЗА ВА УЧАСТКАҲО ОМОДА ШУДААНД

ХОРУҒ. ОЯНДАРО АЗ ИМРӮЗ БОЯД СОХТ

АВАО. ЯК ҲАМОИШИ МУҲИМ

ХУҶАНД. ШИНОСОИИ РАҶАББОЙ АҲМАДЗОДА АЗ КОРХОНАИ “ФАЙЗИ РАСУЛ”

СУҒД. ҶАМЪОВАРИИ ПАХТА ВУСЪАТ МЕГИРАД

22.09.2020


НОҲИЯИ ФИРДАВСӢ. ҲАВЗАИ № 1 ОМОДА МЕШАВАД

ВОХӮРИИ НОМЗАДҲО БА МАНСАБИ ПРЕЗИДЕНТӢ БО СОКИНОНИ ХАТЛОН

ТОҶИКИСТОН. АЗ КОРОНАВИРУС БОЗ 44 БЕМОР ШИФО ЁФТ

«ОИНИ НОЗ»

ТОҶИКОБОД ВУСЪАТИ ТОЗА МЕГИРАД

SARS-CoV-2. ШАШ ШАКЛИ ЗУҲУРИ ОН МУҚАРРАР ГАШТ

НАМОЯНДАҲОИ ДУШАНБЕ ВА ТОШКАНД ИМКОНИЯТИ ИФТИТОҲИ РОҲҲОИ НАВРО БАРРАСӢ НАМУДАНД

ҶАҲОН ДАР ЯК САТР

21.09.2020


БАРРАСИИ МАСОИЛИ МУБОРИЗА АЛАЙҲИ ҶИНОЯТКОРИҲО

ДУРНАМОИ МУНОСИБАТҲО МАТРАҲ ГАРДИД

ҶАЛАСАИ НАВБАТИИ СИТОДИ ВИЛОЯТӢ ОИД БА ПУРЗӮР НАМУДАНИ ТАДБИРҲОИ ЗИДДИЭПИДЕМИЯВӢ

ОЗМУН БАРОИ ДАРЁФТИ СТИПЕНДИЯИ ПРЕЗИДЕНТИ ҶУМҲУРИИ ТОҶИКИСТОН

ТОҶИКИСТОН. 86,7 ДАРСАДИ БЕМОРОНИ COVID – 19 ШИФО ЁФТАНД

МАРЗҲОИ ӮЗБЕКИСТОН АЗ АВВАЛИ МОҲИ ОКТЯБР БОЗ МЕШАВАНД

ҶАҲОН ДАР ЯК САТР

17.09.2020


ТОҶИКИСТОН. АЗ COVID – 19 БОЗ 45 БЕМОР ШИФО ЁФТ

РОҒУН БА ИНТИХОБОТ ОМОДА АСТ!

ИНТИХОБОТИ ПРЕЗИДЕНТӢ. БА НОМЗАДҲО ШАҲОДАТНОМА СУПУРДА ШУД

16.09.2020


ТОҶИКИСТОН. 86,5 ДАРСАДИ ГИРИФТОРОНИ КОРОНАВИРУС ШИФО ЁФТАНД

ФАЙЗОБОД. ЧОРАБИНИИ СИЁСӢ ДАР САТҲИ БАЛАНД ХОҲАД ГУЗАШТ

ҶОМИ ТОҶИКИСТОН. ҶУФТҲОИ ДАВРИ НИМФИНАЛ МУАЙЯН ГАРДИДАНД

ИНТИХОБОТ. ВУСЪАТИ КОРҲОИ ОМОДАГӢ ДАР НОҲИЯИ РӮДАКӢ

ҶАВОНОН – ПАЙРАВОНИ ПЕШВОИ МИЛЛАТ. ҲАМОИШИ ИЛМӢ - СИЁСӢ ДАР АКАДЕМИЯИ ИДОРАКУНИИ ДАВЛАТӢ


Дар сомонаҳои дигари Тоҷикистон хонед