logo

мулоқотҳо

Эмомалӣ Раҳмон Фоиза Абуннаҷоро қабул кард

26 январ  Президенти  Ҷумҳурии  Тоҷикистон  Эмомалӣ Раҳмон вазири ҳамкориҳои байналмилалии Ҷумҳурии Мисри Араб хонум Фоиза Абуннаҷоро, ки ба ҳайси сарвари қисмати мисрии Комиссияи муштараки байниҳукуматӣ оид ба ҳамкории иқтисодӣ, техникӣ ва илмӣ ба шаҳри Душанбе ташриф овардааст, ба ҳузур пазируфт.
Дар вохӯрӣ масъалаи густариши ҳамкории Тоҷикистону Миср баррасӣ гашт. Изҳори боварӣ шуд, ки Комиссияи муштараки байниҳукуматӣ оид ба ҳамкории иқтисодӣ, техникӣ ва илмӣ барои татбиқи босамари заминаи боэътимоди қарордодию ҳуқуқии Тоҷикистону Миср ва дарёфти роҳҳои истифода аз имконоти  фаровони  ҳамкорӣ корҳои назаррасро анҷом медиҳад.
Густариши ҳамкорӣ дар соҳаҳои тиҷорат, сармоягузорӣ, гидроэнергетика, саноати сабук ва хӯрокворию дорусозӣ, истихроҷи канданиҳои фоиданок, молия ва фаъолияти бонкӣ, кишоварзӣ ва хоҷагии об, маориф, тандурустӣ, илму фарҳанг ва туризм воситаи муҳими таҳкиму тавсеаи  муносибатҳои Тоҷикистону Миср маънидод гашт.
Ҳамкорӣ дар соҳаи гидроэнергетика, аз ҷумла дар роҳи сохтмони нерӯгоҳҳои обӣ дар болои дарёҳои Тоҷикистон аз самтҳои асосии ҳамкории иқтисодии ду кишвари дорои захираҳои фаровони обию энергетикӣ номида шуд.
Тасмим гирифта шуд, ки Нораку Асвон - ин шаҳрҳои энергетикҳои Тоҷикистону Миср бародаршаҳр эълон карда шаванд.
Дар вохӯрӣ ҳамчунин оид ба муносибатҳои ду кишвар дар чаҳорчӯби Созмони конфронси исломӣ ва дигар созмонҳо гуфтугӯ сурат гирифт.
Хонум Фоиза Абуннаҷо изҳор дошт, ки иқдоми Президенти Тоҷикистон оид ба «Соли бузургдошти Имоми Аъзам» эълон намудани соли 2009 боиси хушнудии роҳбарият ва мусулмонони Ҷумҳурии Мисри Араб шуд.
ӯ ҳамчунин иттилоъ дод, ки Президенти Ҷумҳурии Мисри Араб Ҳуснӣ Муборак кинофилми бадеии бисёрсериягии кинематографистони мисрӣ - «Имом Абӯҳанифаи Нӯъмон» - ро ба ҳайси тӯҳфа ба роҳбарият ва мардуми Тоҷикистон ирсол намуд.
Сардори давлат Эмомалӣ Раҳмон ин тӯҳфаро саҳми арзандаи Ҷумҳурии Мисри Араб дар роҳи муаррифии ҳаёт ва фаъолияти Имоми Аъзам ба мардуми Тоҷикистон маънидод карда, изҳор дошт, ки он дар кӯтоҳтарин мӯҳлат ба тоҷикӣ гардонда ва манзури бинандагони телевизиони тоҷик карда мешавад.

* * *
Хонум Фоиза Абуннаҷо, вазири ҳамкориҳои байналмилалии Ҷумҳурии Мисри Араб, пас аз дидору гуфтугӯ бо Эмомалӣ Раҳмон, Президенти Ҷумҳурии Тоҷикистон, ба хабарнигорон гуфт, ки ӯ ва ҳайати ҳамроҳонаш,  дар сатҳи вазорату кумитаҳо, ҷиҳати иштирок дар ҷаласаи нахустини Комиссияи муштараки байниҳукуматӣ оид ба ҳамкории иқтисодӣ, техникӣ ва илмӣ ба Душанбе ташриф оварданд.
Ман ба Ҷаноби Олӣ, мӯҳтарам Эмомалӣ Раҳмон салом ва паёми бародарашон Муҳаммад Ҳусни Муборак, Президенти Ҷумҳурии Мисри Арабро расонда, дар бораи натиҷаҳои ҷаласаи нахустини комиссияи муштарак, ки субҳи ҳамин рӯз дар Вазорати рушди иқтисод ва савдо баргузор шуд, иттилоъ додам. Дар ҷаласа ду Ёддошти тафоҳум дар бахшҳои иттилоот ва варзиш ба имзо расид.
Вазири ҳамкориҳои байналмилалии Миср тазаккур дод, ки дар ҷараёни сафари расмии Эмомалӣ Раҳмон, Сардори давлати Тоҷикистон, ба Ҷумҳурии Мисри Араб дар моҳи феврали соли 2007 шаш  санади ҳамкорӣ ба тасвиб расида буд ва ба ин тартиб заминаи ҳуқуқӣ барои густариши ҳамкориҳо миёни ҳар ду кишвар дар бахшҳои гуногун фароҳам омад.
-Мо бо Эмомалӣ Раҳмон дар бораи рушди ҳамкориҳо, ба вижа дар бахшҳои гидроэнергетика, кишоварзӣ, саноати сабук, дорусозӣ ва фарҳанг гуфтугӯи судманд доштем.  Тасмим гирифтем, ки  ҷониби Миср дар бунёди нерӯгоҳҳои барқи обии Тоҷикистон ширкат меварзад. Бо ин мақсад ҷониби Тоҷикистон чанд лоиҳаи мавриди назарро мушаххасан пешниҳод намуд, ки онҳоро масъулони Вазорати энергетика ва обёрии Миср мавриди омӯзиш қарор медиҳанд. Мувофиқа ҳосил шуд, ки шаҳрҳои Асвони Миср ва Нораки Тоҷикистон бародаршаҳр эълон карда шаванд.
Сардори давлати мо ва мусулмонони Мисри Араб аз иқдоми Эмомалӣ Раҳмон, Президенти Ҷумҳурии Тоҷикистон, дар бораи «Соли бузургдошти Имоми Аъзам» эълон кардани соли 2009 хеле шод гаштанд,- иброз дошт Фоиза Абуннаҷо.-Ба ин хотир,  ба Тоҷикистон ҷиҳати шинохти бештари рӯзгор ва мероси ин фақеҳи бузург филми бисёрсериягии телевизионии «Имом Абӯҳанифаи Нӯъмон»-ро ҳадя овардем. Мо аз он ифтихор дорем, ки пайрави мазҳаби фиқҳии Имоми Аъзам мебошем.
Ман чанд лаҳза пеш ҳадяи ҷониби Мисрро ба соҳиби ташаббус, Президенти кишвари шумо, Эмомалӣ Раҳмон супурдам. Бо ҳидояти ӯ ин филм ба забони тоҷикӣ тарҷума шуда, тавассути телевизион пешкаши мардуми тоҷик мегардад.
Хонум Абуннаҷо ҳамчунин аз тарҷума ва чопи китоби Эмомалӣ Раҳмон, Президенти Ҷумҳурии Тоҷикистон, бо номи «Тоҷикон дар оинаи таърих» дар шаҳри Қоҳира-пойтахти Ҷумҳурии Мисри Араб хабар дод ва гуфт, ки мисриён аз ин китоби пурарзиш бо хушнудӣ истиқбол карданд.

Додоҷон Рӯзиев, «Ҷумҳурият»


Баёни ақида (0)    Санаи нашр:    №:    Мутолиа карданд: 776

19.06.2019


Дар Кӯлоб Фестивали ҷумҳуриявии дӯстии ҷавонон баргузор шуд

Баррасии вазъ ва дурнамои ҳамкориҳо

Боздид аз Муассисаи давлатии «Боғи миллии Ваҳдат”

ПАНҶАКЕНТ. Омодагиҳо ба ҷашни фархунда

Писарбачаи тоҷик дар Хабаровск дӯсташро аз чоҳи оби ҷӯш наҷот дод

Тоҷикистону Беларус: «Муҳокимаи тақвияти ҳамкориҳои низомӣ»

Си Ҷинпин азми сафари Ҷумҳурии Халқии Демократии Корея дорад

Ҷаҳон дар як сатр

12.06.2019


ХУҶАНД. "Зирвеко" ба фаъолият мепардозад

Муаррифии асари Си Ҷинпин «Дар бораи идоракунии давлатӣ»

Баргузории конфронси сайёҳӣ дар Рашт

Масоили низоми бонкӣ матраҳ гардид

Дар Чин аз обхезии тобистона 6,75 миллион нафар зарар дид

Дар Ӯзбекистон рӯйхати идҳои касбиро Рӯзи китобдор афзуд

Дар Ҷопон ба солхӯрдаҳо шаҳодатномаи вижаи ронандагӣ медиҳанд

Сокини Британия дар лотерея Ј123 миллион бурд намуд

Ҷаҳон дар як сатр

11.06.2019


Песков: «Путин ба Тоҷикистон ва Қирғизистон сафар мекунад»

Иштироки роҳбарони 11 кишвар дар ҳамоиши Бишкек

Президенти Қазоқистон аз хусуси роҳҳои ҳалли мушкилоти иҷтимоӣ ҳарф зад

Ҷаҳон дар як сатр

ФАРХОР. Бонувон ба ҳунаромӯзӣ ҳавасманд мешаванд

"Куллиёт" - и Миробид Саййидои Насафӣ

04.06.2019


Лукашенко: "Эмомалӣ Раҳмонро оммаи мардум интизор аст"

Бунёдкорони роботтехникаи Россия ва Чин дар Владивосток ҷамъ омаданд

Ҷаҳон дар як сатр

Машварати сиёсии вазоратҳои корҳои хориҷии Тоҷикистон ва Белгия

Муаррифии портали хизматрасониҳои электронӣ барои андозсупорандагон

Дар ноҳияи Рашт конфронси минтақавӣ баргузор мегардад

ФУТБОЛ. Ду бозии рафиқона бо мунтахаби Ӯзбекистон

03.06.2019


Дар Тоҷикистон баландтарин афзоиши теъдоди сайёҳон ба қайд гирифта шуд

Гармои тоқатфарсо дар Ҳиндустон

Тасдиқи барнома оид ба бозомӯзии касбии кормандони соҳаи маориф

Иди саиди Фитр 5 июн таҷлил мешавад


Дар сомонаҳои дигари Тоҷикистон хонед