logo

ҳуқуқ

БОРИ КАҶ БА МАНЗИЛ НАМЕРАСАД

Ва ё чи гуна кормандони Кумитаи андоз ҳангоми ришваситонӣ дастгир шуданд.


Сармутахассиси Раёсати санҷиши андозҳои Кумитаи андози назди Ҳукумати Ҷумҳурии Тоҷикистон  Ҳалим Касиров, бо ҷурми гирифтани пора, аз ҷониби мақомоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон боздошт шуд.

Тавре аз дафтари матбуоти агентӣ ба «Ҷумҳурият» хабар доданд, номбурда 20 декабри соли 2013 зимни гузарондани санҷиши маҷмӯии андоз дар яке аз ҷамъиятҳои масъулияташ маҳдуд баъзе камбудиҳоро ошкор сохта, пеши худ мақсад гузошт, ки аз ин вазъияти мусоид истифода барад. Ӯ бо чунин андешаи табаҳкорона барои дар санади санҷишӣ кам нишон додани маблағи ҷарима, аз роҳбари он 10 ҳазор  доллари амрикоӣ ба сифати пора талаб намуда, 7 феврали соли 2014 дар шаҳри Душанбе  5000 доллари онро гирифтааст.
Сипас, 13 феврали соли 2014 ҳангоми муроҷиати сармуҳосиби ҷамъият ба Ҳ. Касиров оид ба гирифтани санади санҷишӣ, дувумӣ  5 ҳазор доллари боқимондаро низ аз вай талаб карда, барои то рӯзи дигар оварда додани он шарт гузоштааст. Аммо, ин дафъа ӯ ба муродаш комёб нагардид. Зеро дар урфият мегӯянд, ки бори каҷ ба манзил намерасад.
Дар доираи гузарондани амалиёти фаврӣ - тафтишотӣ 14 феврали соли 2014 Ҳалим Касиров ҳангоми гирифтани маблағи боқимонда дар кӯчаи Н. Махсуми шаҳри Душанбе дастгир ва 5000 доллари ИМА ҳамчун далели шайъӣ аз ӯ гирифта шуд. Дар ҳамин ҳол, рӯзи дигар зимни гузарондани амалиёти тафтишотӣ аз манзили истиқоматиаш, воқеъ дар шаҳри Ваҳдат, кӯчаи Н. Шарифов, хонаи 17, панҷ ҳазор доллари қаблан ба сифати пора гирифтааш пайдо ва мусодира гардид.
Оид ба ҳолати мазкур 14 феврали соли 2014 нисбат ба Ҳалим Касиров бо аломатҳои моддаи 319 қисми 4 банди “в” Кодекси ҷиноятии Ҷумҳурии Тоҷикистон (аз ҷониби шахси мансабдор шахсан бо роҳи тамаъҷӯӣ гирифтани пора барои иҷрои амали муайян ба манфиати порадиҳанда) , парвандаи ҷиноятӣ оғоз шуда, тафтишоти пешакӣ идома дорад.
Зимнан, кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон боз як ҷинояти коррупсионии вобаста ба дар ду ҳолат гирифтани пора аз ҷониби як шахси мансабдорро ошкор карданд. Баррасии аризаи шикоятии соҳибкор Р. Мирзокаримов муқаррар намуд, ки мутахассиси шуъбаи хизматрасонӣ ба андозсупорандагони Раёсати андози шаҳри Душанбе Ҷумахон Холов дар асоси фармоиши роҳбарияти раёсати мазкур моҳи августи соли 2013 фаъолияти соҳибкории Р. Мирзокаримовро мавриди санҷиш қарор додааст. Мавсуф ҳамчун шахси мансабдор, бо суиистифода аз мақоми хидматиаш, барои дар санади санҷишӣ ба манфиати охирон пинҳон ва кам карда нишон додани пардорхтҳои ҳатмии андоз, аз ӯ 50 000 сомонӣ ба сифати пора талаб намуда, гирифтааст.
Ҷумахон Холов ҳаракатҳои ҷиноят-коронаи худро идома дода, ба шаҳрванд Р. Мирзокаримов шарт мегузорад, ки барои аз нав мавриди санҷиш қарор надодани фаъолияти соҳибкориаш худи ҳозир 5 ҳазор доллари амрикоӣ оварда диҳад. Соҳибкор ноилоҷ 1000 доллари бо худ доштаашро 3 феврали соли равон ба ҳайси пора ба Ҷ. Холов додааст. Ин миқдор маблағи пора корманди Раёсати андози шаҳри Душанберо қонеъ нагардонд ва аз соҳибкор 4000 доллари дигарро қотеона талаб кард.
Ин ҳолат шаҳрванд Р. Мирзокаримовро водор намуд, ки бегоҳии ҳамон рӯз бо аризаи шикоятӣ нисбат ба ҳаракатҳои ғайриқонунии Ҷумахон Холов ба мақомоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон муроҷиат намояд.
4 феврали соли 2014 дар натиҷаи гузарондани амалиёти фаврӣ - тафтишотӣ дар ҳудуди кӯчаи Маяковскийи шаҳри Душанбе мутахассиси шуъбаи хизматрасонӣ ба андозсупорандагони Раёсати андози шаҳри Душанбе Ҷумахон Холов дар вақти аз Р. Мирзокаримов гирифтани  4000 доллари амрикоӣ дастгир шуд. Оид ба ҳодисаи мазкур нисбат ба гумонбаршуда Ҷ. Холов бо аломатҳои банди «в» қисми 4 моддаи 319 - и Кодекси ҷиноятии Ҷумҳурии Тоҷикистон (ҷавобгарии ҷино-ятиро барои аз ҷониби шахси мансабдор гирифтани пора бо роҳи тамаъҷӯӣ муқаррар намудааст), парвандаи ҷиноятӣ оғоз карда шуд.
Мутаассифона, кормандони мақомоти Кумитаи андози назди Ҳукумати Ҷумҳурии Тоҷикистон дар моҳи январ низ чанд ҷинояти коррупсионӣ содир карданд. Аз ҷумла, кормандони Агентии назорати давлатии молиявӣ ва мубориза бо коррупсия 14 январ сармутахассиси Нозироти андози ноҳияи Ҳисор Бобохон Хисайновро зимни гирифтани пора ба маблағи 850 доллар ва 21 январ корманди Нозироти андози ноҳияи Исмоили Сомонии шаҳри Душанбе Ҳайдар Зинатовро ҳангоми гирифтани пора ба маблағи 500 доллари амрикоӣ дастгир карданд.
Ин дар ҳолест, ки ахиран Абдуфаттоҳи Ғоиб, директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон, дар нишасти матбуотӣ аз ҷой доштани амалҳои коррупсионӣ миёни кормандони ҳифзи ҳуқуқ ва сохторҳои қудратии кишвар изҳори нигаронӣ кард. Роҳбарияти агентӣ дар ин бора далелҳои зиёдеро дар ихтиёри хабарнигорон гузоштанд, ки тибқи он амалҳои коррупсионӣ дар миёни кормандони Кумитаи андоз нисбат ба дигар сохторҳо бештар сабт гардида, 42 ҳолати даст задан ба ришваситониро ташкил медиҳад

Д. РӮЗИЕВ, «Ҷумҳурият»


Баёни ақида (0)    Санаи нашр: 20.02.2014    №: 36    Мутолиа карданд: 658

20.11.2018


СУҒД. Оғози сохтмони раёсати маориф

ЛЕВАКАНТ. Конфронси илмӣ - назариявӣ ба ифтихори Иҷлосияи XVI

"Парасту" дар Тоҷикобод

Сарони кишварҳои Осиёи Марказӣ барои машварат дар Тошканд ҷамъ меоянд

Финляндия ҷонибдори ҳузури Россия дар Шӯрои Аврупо

Вазорати маорифи Афғонистон 30 ҳазор занро ба кор мегирад

Баррасии рушди инклюзивии иқтисоди қитъа дар Гвинея Папуаи Нав

Ҷаҳон дар як сатр

АНВАР ЮНУСОВ СОҲИБИ КАМАРБАНДИ WBF

"СОРО КОМПАНИЯ" ҒОЛИБИ ЛИГАИ КАСБИИ ФУТЗАЛИ ТОҶИКИСТОН

19.11.2018


ДЕВАШТИЧ. Авҷи созандагиҳо дар Ҷамоати деҳоти Яхтан

Артиши Сурия охирин истеҳкоми «ДИ» дар ҷануби кишварро зери назорат гирифт

Дар ҳама минтақаҳои Ӯзбекистон «мактаби президентӣ» месозанд

Роҳандозии барномаи махсуси давлатии ипотекӣ барои дӯзандагони Қирғизистон

Киштии зериобии «Сан Хуан» - ро дар уқёнуси Атлантика ёфтанд

Ҷаҳон дар як сатр

Кулишов: «Марзҳои ИДМ бо таҷҳизоти муосир таъмин карда мешаванд»

Дар Тоҷикистон омӯзгори забони англисӣ барои таблиғи «ДИ» 19 сол гирифт

Қазоқистон мубориза бо машруботро сахттар мекунад

Фоидаи туризм ба кадом шаҳри дунё бештар аст?

Ҷаҳон дар як сатр

"ИСТИҚЛОЛ" бори аввал барои Ҷоми чемпионҳои КФО мубориза хоҳад бурд

Омодагии тими миллӣ ба марҳилаи интихобии Ҷоми ҷаҳон – 2022

УСМОН ТОШЕВ САРМУРАББИИ НАВИ ДАСТАИ МУНТАХАБ

15.11.2018


Ҳамоиш бахшида ба Рӯзи Президент

Нурдинҷон Исмоилов ба Тоҷикистон меояд

Мулоқоти Зубайдулло Зубайдзода бо Амал Муҷрин ал - Ҳамад

Конференсияи гиромидошти Бобоҷон Ғафуров

Путин ва Абэ дар асоси қатъномаи соли 1956 гуфтушунид хоҳанд кард

Таҳлилгарони Nomura сустшавии суръати рушди иқтисоди ҷаҳониро пешгӯӣ намуданд

Frontex: ба Аврупо омадани гурезаҳо 31 дарсад коҳиш ёфт

Назарбоев соли 2019-ро Соли ҷавонон эълом дошт

Ҷаҳон дар як сатр

14.11.2018


Вусъати корҳои ободонӣ дар ноҳияи Восеъ


Дар сомонаҳои дигари Тоҷикистон хонед