logo

ҳуқуқ

А. АБДУРАҲИМОВ: «ҲАДАФИ МО РОҲ НАДОДАН БА ҚОНУНШИКАНИСТ»

Роғун. Солҳост, ки дар дилу дидаи мардум ҷой дорад. Ҳанӯз онро дар замони шӯравӣ бунёд карда буданд. Ҳар кас бори нахуст ба Роғун ояд, аз дидани чунин шаҳри зебо бо биноҳои баландошёна ба ҳайрат меафтад. Зеро он дар домана ва иҳотаи кӯҳҳо воқеъ гардида, гӯё порае аз шаҳрро ба кӯҳистон интиқол дода бошанд. Дар ин ҷо корҳои барқарорсозӣ ва омодагии сохтмони аср – Неругоҳи барқи обии Роғун давом дорад. Аз ин ҷо рӯди Вахш ва теппаҳои азими масолеҳи сохтмонӣ, аз қабили қуму рег ва хок, ки барои бунёди садди он таҳия намудаанд, таваҷҷуҳи бинандаро ба худ ҷалб месозанд. Бунёди НБО- и Роғун умеду ормони ҳар як тоҷику тоҷикистонист.
Воқеан шаҳр хеле зебову озода буда, тамоми кӯчаву гулгаштҳо бо дарахтони гуногуну ниҳолҳои ороишӣ ва гулбуттаҳо, ки аз нафаси гарму ҳаётбахши баҳор муғҷаҳояшонро во кардаанд, ба кас ҳаловату масаррат мебахшанд.


Ба мақсади огоҳӣ аз раванди татбиқи қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ва «Дар бораи танзими анъана ва ҷашну маросимҳо дар Ҷумҳурии Тоҷикистон» бо Асомуддин Абдураҳимов, раиси суди шаҳри Роғун, ҳамсуҳбат шудем.

- Асомуддин Бобохонович, мақсад, аҳамият ва татбиқи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» аз назари шумо?
- Бешубҳа, қонуни мазкур дар қонунгузории Ҷумҳурии Тоҷикистон рӯйдоди муҳим аст. Мақсади асосии он дар рӯҳияи худшиносиву худогоҳӣ, эҳтиром ба Ватан ва арзишҳои милливу умумибашарӣ тарбия намудани кӯдакону наврасон, ҳамзамон ҳифзи ҳуқуқу манфиатҳои қонунии онҳо мебошад. Раванди зиндагӣ талаб менамояд, ки ҳар як узви ҷомеа босаводу бофарҳанг, ватандӯст, худогоҳ ва нексиришт ба воя расад. Падару модар ва омӯзгор вазифадоранд, ки кӯдакро ҳамчун инсони комил тарбия намоянд.
Бояд зикр кард, ки татбиқи қонуни мазкур ҳар як падару модарро водор месозад, ки барои таълиму тарбияи фарзанд масъул бошад, зеро саҳлангорӣ ва бетарафӣ дар ин самт ба инкишофи ҷисмониву маънавии ӯ халал ворид месозад.

- Бигӯед, ки риояи қонуни мазкур дар шаҳри Роғун чӣ сон ба роҳ монда шудааст?
- Вобаста ба риояи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» дар суди шаҳри Роғун чорабиниҳои зиёд андешида шудааст. Аз ҷумла дар соли 2013 ва ду моҳи соли равон мувофиқи нақшаи кории суди шаҳри Роғун бо сокинони ҷамоатҳои деҳот ва шаҳрак оид ба моҳият ва риояи қонуни мазкур зиёда аз 60 суҳбату вохӯрӣ баргузор гардид. Дар ин вохӯриҳо махсус таъкид шуд, ки тарбия ва таълими насли наврас раванди масъулиятталаб ва ҷиддӣ буда, тақдири кӯдак ва насли ояндаи ҷомеа аз он вобастагӣ дорад. Аз ин рӯ таълиму тарбияи кӯдакон бояд дар мадди назари аввали волидон, омӯзгорон, муассисаҳои таълимию тарбиявӣ ва аҳли ҷомеа қарор гирад. Волидон ва омӯзгорон вазифадоранд, ки бештар ба тарбияи ақлонӣ ва инкишофи зеҳнии кӯдакон таваҷҷуҳи хос зоҳир намоянд. Ҳолатҳои кор аз он шаҳодат медиҳанд, ки на ҳамаи падару модарон масъулияти худро хуб дарк менамоянд.

- Омилҳои содиршавии ҳуқуқвайронкунӣ кадоманд ва соли гузашта чанд парванда баррасӣ шуд?
-  Дар баъзе маврид волидон ва муас-сисаҳои таълимӣ ба таълиму тарбияи кӯдакон таваҷҷуҳ ва аҳамияти зарурӣ намедиҳанд, ки ин яке аз омилҳои асосии содиршавии ҳуқуқвайронкунӣ мегардад.
Соли 2013 аз ҷониби суди шаҳри Роғун 15 парвандаи ҳуқуқвайронкунии маъмурӣ вобаста ба вайрон кардани қонуни мазкур, аз ин 5 парванда дар мурофиаҳои сайёри судӣ дар ҷамоатҳои деҳот ва шаҳрак бо иштироки аҳли ҷамъият баррасӣ шуд. Зимни баррасии парвандаҳо диққати асосӣ ба баланд бардоштани масъулияти падару модар дар тарбияи фарзандон ҷалб гардид. Ба мардум моҳияти қонун ва татбиқи он фаҳмонда шуд. Мувофиқи талаботи қисми 2 моддаи 5 қонуни мазкур вазифаи падару модар фароҳам овардани шароити моддӣ, молиявӣ, маънавӣ ва равонӣ дар таълиму тарбияи фарзанд мебошад. Мутаассифона, баъзе падару модарон нисбат ба вазифа ва уҳдадориҳои худ фориғболӣ намуда, фарзандони худро назорат намекунанд. Аз ин рӯ, онҳо ба оворагардию ҷиноят даст мезананд. Чунончи, 15 майи соли 2013 дар маҷлиси сайёри судӣ дар толори Ҷамоати шаҳраки Обигарм парвандаи ҳуқуқвайронкунии маъмурӣ нисбат ба З. Маҳмадова баррасӣ гардид. Мавсуф дар мурофиаи судӣ иқрор шуд, ки дар рафти тафтишоти пешакӣ перомуни кирдори ҷиноятии писараш, яъне ба дуздии амволи ғайр даст заданаш огоҳ гаштааст. Шароити зиндагиаш хуб буда, шавҳараш дар муҳоҷирати меҳнатӣ дар Русия мебошад.
Ба З. Маҳмадова барои содир кардани ҳуқуқвайронкунии маъмурӣ бо моддаи 90 Кодекси ҳуқуқвайронкунии маъмурӣ ҷазои ҷарима ба андозаи ду нишондиҳанда барои ҳисобҳо таъйин карда шуд.
Ҳамчунин парвандаи ҳуқуқвайронкунии маъмурии Ш. Холова дар маҷлиси ошкорои судӣ дар толори суди шаҳри Роғун баррасӣ гардид. Номбурда бар хилофи талаботи моддаи 8 - и Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» вазифаҳои худро дар фароҳам овардани шароити моддӣ, молиявӣ ва равонӣ дар таълиму тарбияи дурусти фарзандаш Ш. Холов иҷро накардааст. Дар натиҷаи чунин бемасъулиятӣ писари ӯ 13 декабри соли гузашта аз маркази дилхушии «Ҷавонон», ки ба соҳибкор М. Сияҳмардов тааллуқ дорад, дарёфт шудааст. Мувофиқи талаботи моддаи 8- и қонуни мазкур падару модар уҳдадоранд шабона ба марказҳои дилхушӣ рафтани фарзандони то бистсолаашонро манъ намоянд. Ба Ш. Холова барои содир кардани ҳуқуқвайронкунии маъмурӣ бо моддаи 90 - и Кодекси ҳуқуқвайронкунии маъмурӣ ҷазои ҷарима ба андозаи ду нишондиҳанда барои ҳисобҳо таъйин гардид.

- Мақсад аз гузарондани мурофиаҳои ошкоро ва сайёри судӣ дар ҷамоатҳои деҳот чист?
- Ҳадафи асосии мо пешгирӣ ва роҳ надодан ба қонуншиканиҳост. Инчунин фаҳмондани уҳдадориҳои ҳар як падару модар дар таълиму тарбияи фарзанд аст. Ин масъала азалан ба зиммаи волидон гузошта шудааст ва онҳо бояд онро ихтиёран ҳамчун вазифа иҷро намоянд. Дар ҳолате ки падару модар аз иҷрои уҳдадории худ оид ба таълиму тарбияи фарзандон саркашӣ мекунанд, яъне уҳдадориҳояшонро иҷро намекунанд ё ба таври дахлдор иҷро наменамоянд, дар натиҷа рафтори фарзандони онҳо боиси вайрон кардани ҳуқуқи дигарон ва тартиботи ҷамъиятӣ мегардад. Дар чунин ҳолат иҷрои уҳдадориҳои онҳо дар зери маҷбурияти давлатӣ амалӣ мешавад ва ҷавобгарии ҳуқуқӣ ба миён меояд. Дар қонуни мазкур маҳз ду тарафи ҳамин як масъала – масъулияти падару модар барои таълиму тарбияи фарзандон дар назар аст.

- Иҷрои меъёрҳои Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» чӣ сон ба роҳ монда шудааст ва баррасии парвандаҳо дар ин самт чиро нишон дод?
- Мақсади қабул ва мавриди амал қарор додани қонуни мазкур ҳифзи арзишҳои асили фарҳанги миллӣ, паст кардани сатҳи камбизоатӣ ва гирифтани пеши роҳи хароҷоти зиёдатӣ мебошад.
Омӯзиш ва баррасии парвандаҳои ҳуқуқвайронкунии маъмурӣ дар масъалаи баргузории ҷашну маросимҳо нишон дод, маърифати ҳуқуқии шахсоне, ки даст ба чунин ҳуқуқвайронкунии маъмурӣ задаанд, паст буда, аз тарафи масъулони ин соҳа корҳои фаҳмондадиҳӣ вобаста ба риоя ва иҷрои меъёрҳои қонуни мазкур ба таври назаррас дар байни аҳолӣ гузаронда нашудааст. Мувофиқи талаботи моддаи 14-и Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» шахсони азодор метавонанд маросими солро ба таври ихтиёрӣ бо иштироки то 100 нафар бо додани як таом дар моҳи шарифи Рамазон ва ё рӯзи иди Қурбон ва вақти дигаре, ки ба баргузории соли фавтида мувофиқат мекунад, гузаронанд. Аммо дар баъзе ҳолатҳо соҳибони майит меъёри муқарраргардидаро аз мадди назар дур карда, ба қонуншиканӣ роҳ медиҳанд.
Чунончи, 12 июли соли гузашта дар маҷлиси кушодаи сайёри судӣ дар деҳаи Сесангаи Ҷамоати шаҳраки Обигарми шаҳри Роғун парвандаи ҳуқуқвайронкунии маъмурӣ нисбат ба М. Гиёев баррасӣ шуд. Мавсуф дар маросими соли ҳамсараш ба мардум ду намуди таом – шӯрбо ва палов пешкаш карда, ба меҳмонони даъватшуда нону кулча ва рӯймолча ҳадя кардааст. М. Гиёев бо моддаи 481 Кодекси ҳуқуқвайронкунии маъмурии Ҷумҳурии Тоҷикистон гунаҳгор дониста шуда, ҷазои ҷарима ба андозаи 50 нишондиҳанда барои ҳисобҳо таъйин гардид.
Ё худ, дар мурофиаи сайёри судӣ дар деҳаи Майдони Нави шаҳри Роғун парвандаи ҳуқуқвайронкунии маъмурӣ нисбат ба А. Нуров баррасӣ шуд. Мавсуф бар хилофи моддаи 9, банди 1 ва моддаи 14, бандҳои 1 ва 3-и қонуни мазкур аз соати 10 то 1530 дақиқа дар хонаи истиқоматиаш хатнасури фарзандонашро бо баргузории базму додани таом ва сартарошон, бе шартномаи тарафайн гузарондааст. Ӯ аз кирдори содиркардаи худ изҳори пушаймонӣ кард.
Ба М. Нуров мувофиқи талаботи моддаи 481 Кодекси ҳуқуқвайронкунии маъмурӣ ҷазои ҷарима ба андозаи сад нишондиҳанда барои ҳисобҳо таъйин шуд.
Тибқи муқаррароти моддаи 5 қонуни мазкур ҷиҳати амалӣ намудани он дар назди мақомоти иҷроияи ҳокимияти давлатии вилоятҳо, шаҳру ноҳияҳо ва ҷамоатҳои шаҳраку деҳоти кишвар комиссияҳои доимӣ таъсис дода шудааст. Аз ин рӯ, ба кормандони мақомоти корҳои дохилӣ, комиссияҳои маҳаллӣ ва дигар масъулони соҳа зарур аст, ки нақшаву чорабиниҳо тартиб дода, мунтазам бо аҳолӣ суҳбату вохуриҳо доир намоянд.

Мунаввари САФАР,  «Ҷумҳурият» 


Баёни ақида (0)    Санаи нашр: 13.03.2014    №: 50    Мутолиа карданд: 711

21.02.2019


ХУҶАНД. Оғози сохтмони бинои нави «Тоҷикстандарт»

ФУТБОЛ. Тақвими бозиҳои тими мунтахаби олимпии кишвар муайян гардид

Табибон аз Тотористон бо ҳампешаҳои тоҷики худ мубодилаи таҷриба мекунанд

Роҳандозии лоиҳаҳои инноватсионӣ дар Қазоқистон

Дар Ҳиндустон 13 иштирокдори тӯй зери чархи мошини боркаш монд

Сӯхтор сабабгори марги ҳафт кӯдак дар Канада

Ҷаҳон дар як сатр

19.02.2019


МАКТАБИ ДАВЛАТДОРИИ ЭМОМАЛӢ РАҲМОН. ЯК ҲАМОИШИ МУҲИМ

Баррасии масъалаҳои рушди сайёҳӣ

Вохӯрии Низомиддин Зоҳидӣ бо Мазен Шамия

Дурнамои рушди муносибатҳо матраҳ гардид

ҶОМИ КУШОДАИ АВРУПО. Муҳаммадризо Қувватов медали биринҷӣ ба даст овард

Авҷи ниҳолшинонӣ

Саҳми соҳибкорон дар ободии деҳот

Ҳамкории тиҷоратию иқтисодии Чин ва Россия густурдатар мегардад

Сарвар Дониш: «Музокироти сулҳ бидуни ҳукумат қурбе надорад»

«Туҳфаи шоҳона» - и Арабистони Саудӣ ба шаҳрвандони Покистон

Дар Қазоқистон маркази амнияти иттилоотӣ ифтитоҳ меёбад

Сокини навраси Шимкент ду нафарро аз сӯхтор наҷот дод

Ҷаҳон дар як сатр

18.02.2019


Боздиди Азим Иброҳим аз ҷараёни корҳои сохтмонӣ

ВКД Ҷиноятҳо 83,6 дарсад ошкор шуданд

Вазорати молия. Барои дастгирии буҷет маблағи бештар ҷалб хоҳад гашт

«BISHKEK OPEN – 2019». Дурахши каратэ-дочиёни навраси тоҷик

«МОҲИЯТ ВА ТАЪЙИНОТИ МАТБУОТИ МАҲАЛЛӢ»

РОҒУН. Ободонӣ вусъат меёбад

АНДОЗ. Нақша 100, 6 дарсад иҷро гардид

ТОҶИКИСТОНУ ӮЗБЕКИСТОН. Гардиши савдо ду баробар афзуд

Тоҷикистон миёни кишварҳои ИДМ ба афзоиши баландтарини ММД муваффақ гашт

Дар Тошканд конфронси байналмилалӣ оид ба Осиёи Марказӣ баргузор мегардад

Қасри сафед: "Музокироти тиҷоратӣ дар Пекин ба пешравӣ мусоидат кард"

Трамп мехоҳад ҷангиёни «Давлати исломӣ» - ро ба Аврупо барои суд кардан баргардонад

Кумитаи амнияти иттилоотии Қазоқистон беш аз 90 сомонаи хавфнокро ошкор сохт

Ҷаҳон дар як сатр


Дар сомонаҳои дигари Тоҷикистон хонед