logo

ҳуқуқ

ПУРСИШУ ПОСУХ

Ба саволҳои воридшуда Ғуфрон Бойматов, узви мушовараи адвокатҳои вилояти Суғд, Ҳайдаршоҳ Азимов, адвокати ташкилоти ҷамъиятии «Идораи ҳуқуқи инсон ва риояи қонуният» дар вилояти Хатлон, Ганҷибек Музаффарбеков, сардори раёсати адлияи Вилояти Мухтори Кӯҳистони Бадахшон ва Кароматулло Ҳазратқулов, муовини мудири маслиҳатхонаи ҳуқуқии шаҳри Душанбе – 1 ҷавоб мегӯянд.

- Модарам аз хориҷи кишвар барои фурӯхтан ва ё ихтиёрдорӣ намудани манзили истиқоматиамон ба номи ман ваколатнома фиристод. Оё ман ҳуқуқ дорам, ки дар асоси санади мазкур хонаамонро фурӯшам?
 Шаҳриёр, сокини ноҳияи Ҳисор.

 - Мувофиқи Қонуни Ҷумҳурии Тоҷикистон «Дар бораи нотариати давлатӣ» бидуни соҳибмулк ва ё соҳиби амвол харидуфурӯш танҳо бо роҳи ваколатнома сурат мегирад. Агар дар ваколатномаи ба номи шумо фиристодаи модаратон сабт гардида бошад, ки танҳо бо ҳуқуқи бегона кардани манзили истиқоматӣ, он вақт метавонед бе ягон мушкилӣ манзили зистатонро фурӯшед.
Зимнан таъкид карданием, ки тибқи моддаи 210 - и Кодекси граждании Ҷумҳурии Тоҷикистон ваколатнома аз ҷониби як шахс ба шахси дигар додани ваколати хаттӣ барои намояндагӣ дар назди шахси сеюм дониста мешавад. Ваколатдиҳанда метавонад ваколатномаро бевосита барои аҳд бастани намоянда ба шахси сеюми дахлдор низ диҳад.


- Аз ман як нафар қарздор мебошад. Маблағи гирифтаашро бо баҳонаҳои гуногун баргардондан намехоҳад. Ман дар асоси забонхати додааш бо аризаи даъвоӣ ба суд муроҷиат кардам. Дар суд пеш аз қабули ариза квитансияи боҷи судӣ талаб карданд ва ман маҷбур боҷи судӣ супурдам. Бигӯед, ки мувофиқи қонунҳои амалкунанда кӣ бояд боҷи судиро супорад: даъвогар ё ҷавобгар?
Иброҳим Ғафуров, сокини шаҳри Душанбе.

- Ба маълумоти шумо мерасонем, ки ҳар як аризаи даъвоии қарзӣ ё молумулкӣ бо замимаи боҷи судӣ қабул карда мешавад. Дар мавриди он ки боҷи судиро даъвогар месупорад ё ҷавобгар, гуфтанием: ҳар касе, ки аризаи даъвоӣ пешниҳод мекунад, бояд боҷи судӣ супорад. Дар ҳолати мазкур шумо ҳуқуқ доред, ки зимни баргардондани қарзатон аз ҷавобгар маблағи супурдаи боҷи судиро низ талаб намоед. Гузашта аз ин, дар асоси моддаи 100 Кодекси мурофиавии граждании Ҷумҳурии Тоҷикистон суд ба тарафе, ки ба манфиати ӯ ҳалнома қабул шудааст, аз ҳисоби тарафи дигар ҳамаи хароҷоти судии вобаста ба баррасии парвандаро ҷуброн менамояд.


- Автомошини шахсиамро дар асоси ваколатнома фурӯхтам. Харидор нисфи пулро доду ваъда кард, ки боқимондаашро як ҳафта пас медиҳад. Аз байн се моҳ гузашт, вале аз ӯ дарак нест. Арзамро ба кӣ гӯям?
Бузургмеҳр, сокини ноҳияи Рӯдакӣ.

 – Шумо дар ин ҳолат ба суди маҳалли зисти ҷавобгар бо аризи даъвоӣ ҷиҳати талаб карда гирифтани маблағи боқимонда муроҷиат кунед. Ва ё ба идораи нотариалие, ки ваколатнома додаед, дар бораи беэътибор донистани он ариза пешниҳод намоед.


- Шавҳарам Б. Набиев, ки дар раёсати Хадамоти оташнишонии вилояти Хатлон кор мекард, бар асари бемории дил аз олам даргузашт. Акнун духтарамон, ки донишҷӯи Донишгоҳи миллии Тоҷикистон мебошад, аз ёриҳои падар бенасиб монду шароити таҳсилаш вазнин шуд. Оё, мувофиқи қонунҳои амалкунанда, ӯ метавонад аз давлат ёрипулӣ ва ё нафақа гирад?
 Раъно Набиева, сокини ноҳияи Бохтар.

- Мувофиқи моддаи 36 - и Қонуни Ҷумҳурии Тоҷи-кистон «Дар бораи таъминоти нафақаи шаҳрвандон» муҳассилини омӯзишгоҳҳои касбӣ - техникӣ, мактабҳои олию миёнаи махсус ҳуқуқ доранд, ки то хатми таҳсил, вале то ба синни 23 расидан, бо нафақа бинобар бесаробон мондан, таъмин шаванд. Аз ин рӯ, шумо метавонед бо пешниҳоди ҳуҷҷатҳои зарурӣ ба мақомоти ҳифзи иҷтимоӣ ва таъмини нафақа муроҷиат намоед.


- Соли 2004 писарам бо сабаби беморӣ дар хона вафот кард. Пас аз чанд соли маргаш, зарурат пеш омаду ба мақомоти САҲШ - и шаҳри Қӯрғонтеппа муроҷиат намуда, хоҳиш кардам, ки хатти вафоти писарамро диҳанд. Ба ман гуфтанд, ки фавти фарзанди шумо дар китоби сабт дарҷ нашудаасту барои бақайдгирӣ аз муассисаи тиббӣ ҳуҷҷат биёред. Дар чунин ҳолат ба куҷо муроҷиат намоям?
 Ҳайдар Гулаҳмадов,
сокини шаҳри Қӯрғонтеппа.

 - Ба шумо маслиҳат медиҳем, ки ҷиҳати муқаррар кардани ҳолати фавти писаратон аз ҳамсояҳои дар маросими дафн ширкатдошта забонхат гирифта, тибқи моддаи 267, Кодекси мурофиавии граждании Ҷумҳурии Тоҷикистон бо ариза ба суд муроҷиат намоед. Баъди муқаррар гаштан, ҳалномаи судро ба шуъбаи САҲШ-и шаҳри Қӯрғонтеппа пешниҳод карда, дар асоси он шаҳодатномаи вафоти писаратонро бигиред.


- Писари ман чанд сол боз дар Федератсияи Русия кору зиндагӣ мекунад. Вай мехоҳад, ки дар ҳамон ҷо бо шаҳрванди Тоҷикистон хонадор шавад.
Барои бастани ақди никоҳ ба Тоҷикистон омадан шарт аст?
Исмоилбек, нафақахӯр аз ноҳияи Ишкошим.

- Не, ҳатмӣ нест, чунки ақди никоҳ байни шаҳрвандони Ҷумҳурии Тоҷикистон, ки берун аз ҳудуди он ба сар мебаранд, дар намояндагиҳои дипломатӣ ва консулгариҳои Тоҷикистон дар кишварҳои хориҷӣ баста мешавад.


- Дар ҳолати ихтисор намудани воҳидҳои корӣ, дар ин ё он корхона, муассиса, ташкилот…, ба кӣ бештар имтиёз дода мешавад?
Таҳмина, сокини ноҳияи Дарвоз.

 - Мувофиқи моддаи 47 Кодекси меҳнати Ҷумҳурии Тоҷикистон дар сурати баробар будани тахассус ва ҳосилнокии меҳнат афзалият, аз ҷумла ба инҳо дода мешавад:
Ба кормандоне, ки дар оила ду ва ё зиёда аз он хӯранда доранд, дар ҳамон ташкилот солҳои зиёд кор мекунанд, аз истеҳсолот ҷудо нашуда тахассуси худро дар муассисаҳои олӣ ва касбӣ баланд бардоштаанд, ҷароҳати меҳнатӣ гирифтаанд, иштирокчии Ҷанги Бузурги Ватанӣ ва шахсони ба онҳо баробаркардашуда мебошанд.


- Бародараму занашро, баъди муроҷиати чандинкаратаашон, дар манзили истиқоматиам ба қайд гузоштам. Қариб як сол мешавад, ки онҳо дар Федератсияи Русия қарор доранд. Ҳаққи хизмати коммуналӣ ва обро ба ҷойи бародараму ҳамсараш ман пардохт менамоям. Бигӯед, ки бо кадом роҳ онҳоро аз қайди манзили истиқоматиам барорам?
 С. Сафаров, шаҳри Қайроққум.

 - Дар асоси моддаи 51 - и Кодекси манзили Ҷумҳурии Тоҷикистон бо сабаби аз муҳлати муқарраршуда (шаш моҳ) бештар истиқомат накардани шахс, аз ҳуқуқи истифодаи хонаи истиқоматӣ маҳрум шудани ӯ бо тартиби судӣ ҳал карда мешавад.
Шумо ҳуқуқ доред бо аризаи даъвоӣ ба суд дар бораи маҳрум кардан аз ҳуқуқи истифодаи манзили истиқоматӣ муроҷиат кунед. Пас аз дастрас гардидани ҳалномаи суд барои аз қайди манзили зистатон баровардани бародаратону ҳамсараш ба мақомоти дахлдор санадҳои лозимиро пешниҳод намоед.


- Роҳбари корхона дар назди ҳамкорон маро бо алфози қабеҳ дашном дода, обрӯ ва эътиборамро паст зад. Дар ин бора ба мақомоти милитсия хаттӣ муроҷиат кардам. Ҷавоб гардонданд, ки «бинобар дар ҳаракатҳои роҳбари корхона мавҷуд набудани аломатҳои таркиби ҷиноят оғози парвандаи ҷиноятӣ рад карда шуд». Магар барои паст задани шаъну эътибори коргар дар қонунгузорӣ ҷавобгарӣ пешбинӣ нашудааст?
Г. Шодиева, сокини шаҳри Хуҷанд.

 - Дар кирдори содирнамудаи роҳбари корхонае, ки номашро зикр накардед, аломатҳои таркиби ҷиноятӣ дар моддаи 136 Кодекси ҷиноятии Ҷумҳурии Тоҷикистон пешбининамуда ба назар мерасад. Ин ҷиноят таҳқир, яъне беадабона, бо алфози қабеҳ паст задани обрӯ ва эътибори шахси дигар ном дошта, барои содир намудани ин кирдор ҷавобгарии ҷиноятӣ пешбинӣ гардидааст. Дар асоси қисми якуми моддаи 24 Кодекси мурофиавии ҷиноятии Ҷумҳурии Тоҷикистон вобаста ба хусусият ва дараҷаи вазнинии ҷинояти содиршуда айбдоркунӣ дар суд бо тартиби хусусӣ эътироф гардидааст. Бинобар ин, дар мақомоти милитсия оғози парвандаи ҷиноятӣ рад шуда ва шояд ба шумо тавсия ҳам дода бошанд, ки «ба мақомоти судӣ муроҷиат намоед». Дар ин ҳолат шумо ҳуқуқ доред, ки бо дастрасии қисми 2 - и моддаи 24 Кодекси мурофиавии ҷиноятии Ҷумҳурии Тоҷикистон бо тариқи айбдоркунии хусусӣ ба суд шикоят намоед.

Зимнан, агар хонандагони гиромӣ пурсише доранд, метавонанд бо нишонии pursish@mail.ru ё бо телефони 238-54-16 ба мо муроҷиат кунанд.

Шуъбаи ҳуқуқи рӯзномаи «Ҷумҳурият»


Баёни ақида (0)    Санаи нашр: 17.04.2014    №: 71    Мутолиа карданд: 799

19.07.2019


ПАЛАТАИ ҲИСОБ. 88,З миллион сомонӣ зарари молиявӣ ошкор гашт

УМЕД БОБОЗОДА: "Аксари муроҷиатҳо оид ба адолати судиянд"

Кӯдакони аз Ироқ овардашуда ба зиндагии муқаррарӣ бармегарданд

"EXPO 2019 BEIJING". Гӯшаи Тоҷикистонро беш аз як миллион нафар тамошо кард

НИГАРОНӢ. Ҷудошавии 6065 оила дар ним сол

18.07.2019


ХАДАМОТИ ЗИДДИИНҲИСОРӢ. Болоравии нархи барқ ба қарзи он марбут аст

Азим Иброҳим Ким Тэ Сонгро ба ҳузур пазируфт

Ба ташкили корхонаҳои муштарак ҳавасмандӣ зоҳир гардид

Ҳамоиши «Ваҳдат – омили ягонагӣ ва суботи ҷомеа» доир шуд

Ҳамкорӣ бо Қатар густариш меёбад

Саридораи геология. 2810 харитаи геологӣ рақамӣ шуд

121 шахси масъул ба ҷавобгарии маъмурӣ кашида шуд

Роҳи нави сесатҳаи Душанбе ба истифода дода мешавад

Президенти Қазоқистон Шӯрои миллии эътимоди ҷомеаро созмон дод

Дар Ӯзбекистон аввалин IT-технопарк бунёд мегардад

Ҷаҳон дар як сатр

17.07.2019


Музокироти ҳайатҳои расмии Тоҷикистон ва Корея

КУМИТАИ МУҲИТИ ЗИСТ. Нигаронӣ аз набудани партовгоҳҳо дар деҳот

ПРОКУРАТУРАИ ГЕНЕРАЛӢ. 5774 гектар қитъаи замин ба ҳолати аввала баргардонда шуд

ИЗЗАТУЛЛО САТТОРӢ: "Истеҳсоли гӯшти мурғ 9 маротиба зиёд мегардад"

ВАЗОРАТИ АДЛИЯ. Хулосаи ҳуқуқӣ ба 1936 лоиҳаи санадҳои меъёрии ҳуқуқӣ

ТАЭКВОН – ДО. Муниса медали тилло ба даст овард

Суръати рушди ММД Тоҷикистон миёни кишварҳои ИДМ баландтарин шуд

Тоҷикистон ба сохтмони лӯлаи гази «Осиёи Марказӣ — Чин» шурӯъ мекунад

Дар ҷанубу ғарби Чин аз хушксолӣ 7,4 миллион нафар зарар дид

Ҷаҳон дар як сатр

Нашрияи расмии Ҷумҳурии Тоҷикистон – рӯзномаи «Ҷумҳурият» якҷо бо мақомоти иҷроияи ҳокимияти давлатии вилояти Хатлон бахшида ба Ҷашни 30 - солагии Истиқлолияти давлатии Ҷумҳурии Тоҷикистон таҳти унвони «ТОҶИКИСТОН – ХОНАИ УМЕДИ МО» озмун эълон менамояд.

16.07.2019


ХАДАМОТИ АЛОҚА. Корти ID симкорти муштариро ба расмият медарорад

ЭНЕРГЕТИКА. 2,5 миллиард сомонӣ қарзи дебитории "Барқи тоҷик" муаммои ҳалталаб боқӣ мемонад

15.07.2019


Сарвазири Корея ба Тоҷикистон меояд

Баррасии масъалаҳои ҳамгироии САҲА, СҲШ ва ИА дар минтақаи Осиёи Марказӣ

Нахустин шумораи маҷаллаи «Осиё ва Аврупо» аз чоп баромад

ДТТ. Изҳори нигаронӣ аз вазъи бо кор таъмин шудани хатмкардаҳо

ТИБ. 288 номгӯи доруи ғайристандартӣ ошкор шуд


Дар сомонаҳои дигари Тоҷикистон хонед