logo

ҳуқуқ

НАЙРАНГҲОИ САОДАТ ШАРИФЗОДА

• Умедвор будем, ки дар суд ҳақро ба ҳақдор мерасонад. Вале баръакси ҳол шуд.
• …«туъмаи қаллобиҳои Саодат Шарифзода» танҳо мо нестем. Чанд каси дигар ба доми тазвири ӯ афтодааст.

Ибтидои солҳои 90 - уми асри гузашта, баробари тағйири замон ва ё гузариш ба сохти нав мо ба фаъолияти соҳибкорӣ пардохтем. Ба ин манзур дар асоси қонунҳои амалкунанда мағозаи аз фаъолият бозмондаи «Ситора» - ро дар маркази шаҳри Хуҷанд хусусӣ кардем. Ин иқдом агар аз як сӯ ба роҳ мондани фаъолияти бозоргонии мо буд, аз сӯи дигар дар таъмини аҳолӣ бо молу маҳсулот ва баровардани ниёзҳои зарурии харидорон хидмат мекард.
Нақшаву барномаҳои корамон бо маром дар ин самт идома дошт, вале баъд аз як тараҳҳуми некхоҳона корҳои тиҷоратии мо печида гардид. Ба нафаре хайрхоҳӣ кардему ба доми фиреб афтодем. Масъала ин аст, ки соли 1997 сокини шаҳри Хуҷанд бо номи Саодат Шарифзода омада, аз мо хоҳиш кард, ки дар ҳамин мағоза гӯшае барояш ҷудо кунем, то ба савдо машғул шавад. Ноогоҳона хоҳиши ӯро ба ҷо овардем, вале аз ниятҳои ғаразноки ӯ ғофил мондем. Барояш ҷойи муносиби савдо ҷудо карда худро ба дарди сар гирифтор намудем. Ӯ баъд аз чанд вақти фаъолияти иҷоравӣ, фикри соҳибии ин мағозаро карда, оҳиста - оҳиста моро ба доми фиреб кашид.
Ӯ дар пайи амалӣ намудани нақшаҳояш (соҳибӣ кардан ба мағозаи «Ситора») ба мо қавл дод, ки дар иваз барои пайдо намудани нуқтаи мувофиқе аз ягон гӯшаи шаҳр ба мо мусоидат мекунад. Ба ӯ бовар кардем. Вале ин ҳама назарфирибие беш набудааст. Ногуфта намонад, ки вай ба мо мағозаи «Олами бачагон» - ро аз маркази савдои «Нур», «Маслиҳатгоҳи занона» - и шаҳр ва ҳатто қитъаи заминро аз назди тарабхонаи «Дӯстмуҳаммад» - у «Арт-галлерея» пешниҳод мекарду вақтро кашол медод.
Дертар бошад, қаллобию фиребгарии Саодат Шарифзода боз ҳам рӯшантар гардид. Соли 2004 мо дар назди МТМУ №6, гимназияи «Ганҷ» - ро таъсис додем. Ваъда дод, ки ба ивази мағозаи «Ситора» барои хусусгардонии бинои мувофиқ аз маркази шаҳр, ки тибқи қонун барои хусусигардонӣ пешбинӣ шудааст,  кӯмак мекунад. Лекин чун мағозаи «Ситора» - ро   шарикам Ҳасанов Муродҷон бо розигии худ  ба номи ман (Файзулло ФАЙЗИЕВ)  гузаронд, боз ҳам найрангҳои Саодат Шарифзода   идома ёфтанд.
Вақте аз ваъдаҳои беиҷрои Саодат Шарифзода дилгир шуда, ба ӯ бовар намонд, хоҳиш кардем, ки мағозаро холӣ кунад. Ӯ дар ҷавоб бешармона гуфт: «Ин мағоза аз ман аст ва онро холӣ намекунам!»…
Моро ба ҷуз муроҷиат кардан ба мақомоти дахлдор илоҷе намонд. Аз ШВКД шаҳри Хуҷанд сар карда, то Раёсати корҳои дохила ва прокуратураи вилоят арз кардем. Мутаассифона, ба ҷои қаллобро ба ҷавобгарӣ кашидан, ҷавоби расмӣ ирсол карданд, ки: «Дар таркиби амали Саодат Шарифзода ягон аломати ҷиноят дида намешавад!».
Тавсия доданд, ки ба суд муроҷат кунем. Умедвор будем, ки дар суд ҳақро ба ҳақдор мерасонанд. Вале баръакси ҳол шуд. Барои он ки суханонам беасос набошанд, аз ҳалномаи суди шаҳри Хуҷанд, 22 ноябри соли 2013, иқтибос меорем:
«Даъвои Файзиев Файзулло Мамадҷонович бо ҷавобгарии Саодат Шарифзода, Шарипова Каромат Абудваҳҳобовна, Ғафурова Наимахон Абдусатторовна, Ғафурова Фарида Абдусатторовна, Исмоилов Акбар Эгамбердиевич  ва Дадобоев Бахтиёр бо талаботи даъвогӣ дар бораи кӯчонидан аз мағоза бе додани манзили истиқоматии дигар рад карда шавад.
Даъвои муқобилии Саодат Шарифзода бо ҷавобгарии Файзиев Файзулло Мамадҷонович, Ҳасанов Мурод Иброгимович бо талаботи даъвогӣ дар бораи боэътибор донистани шаҳодатномаи соҳибмулкӣ ва шартномаи ҳадя, боэътибор донистани шартномаи иҷора ва эътирофи ҳуқуқи моликият ба қисми бинои мағоза қонеъ карда шавад...».
Суди шаҳри Хуҷанд дар ҳайати раисикунанда У. Мустафоқулов ҳангоми қабули ҳалнома кадом санадҳои ҳуқуқиро асос гирифтааст, барои ҳуқуқшиносон комилан нофаҳмост.
Ёдовар мешавем, ки «туъмаи қаллобиҳои Саодат Шарифзода» танҳо мо нестем. Чанд каси дигар ба доми тазвири ӯ афтодааст.  Масалан, Саодат Шарифзода моҳи июли соли 2012  ба шаҳрванд У. Н. Носиров бардурӯғ худро соҳибмулки КСМ №6  ноҳияи Ҷаббор Расулов муаррифӣ кардаасту тариқи сохта иддао намудааст, ки мехоҳад узели бетонтайёркуниро чун оҳанпора фурӯшад. Ҳол он ки вай роҳбари корхона набуда, танҳо бо роҳи ҷустуҷӯ он узели бетониро пайдо кардааст. Ҳанӯз ҳуҷҷати ғайридавлатикунониаш тайёр нашуда, бо роҳи фиреб ба роҳбари КСМ №6 М. Тоҷибоев гуфтааст, ки «ҳуҷҷати хусусишавии узели бетонӣ» - ро дар Вазорати мелиоратсия ва захираҳои об тайёр кардааст.
Ҷонибҳо узели бетонтайёркуниро ба маблағи 101,850 сомонӣ савдо мекунанд ва дертар ин миқдор маблағро аз У. Н. Носиров гирифта бошад ҳам, маблағи корхонаро, ки 51 ҳазору 410 сомонӣ аст, пардохт накардааст. Ҳамзамон маълум гардид, ки Саодат Шарифзода ягон хел ҳуҷҷати хусусигардониро оид ба узели бетонӣ надорад. Роҳбари корхона М. Тоҷибоев барои рӯёндани ин миқдор маблағи корхона ба қавле «шири аз модар хӯрдааш ба даҳонаш омад» - у ахиран маҷбур шуд, ба мақомоти корҳои дохилӣ муроҷиат кунад.
Мақомоти ҳифзи ҳуқуқ Саодат Шарифзодаи қаллобро ба ҳабс гирифтанд ва ӯ то рӯзи баргузории мурофиаи судӣ паси панҷара менишаст. Барои исботи гуфтаҳоямон боз ҳам иқтибосеро аз ҳалномаи суди ноҳияи Ҷаббор Расулов, аз 20 феврали соли 2013 – ум, меорем:
«…Аз маводҳои парвандаи ҷиноятӣ бармеояд, ки судшаванда Саодат Шарифзода аз 16 январи соли 2013 то имрӯз дар ҳабси пешакӣ нигоҳ дошта шудааст… Бо дастрасии моддаҳои 332, 333, 334, 335, 336, 338, 339, 341, 342, 343, 344 ва 351-и КМҶ Ҷумҳурии Тоҷикистон суд ҳукм кард:
Саодат Шарифзода бо моддаи 247 қисми 4 банди «б» Кодекси ҷиноятии  Ҷумҳурии Тоҷикистон гунаҳкор дониста шуда, ба ӯ мувофиқи ҳамин модда ҷазо дар намуди ҷарима ба андозаи 1500  (як ҳазору панҷсад) нишондиҳанда барои ҳисобҳо, 60 (шаст) ҳазор сомонӣ ба фоидаи давлат бо мусодираи молу мулк бо маҳрум кардан аз ҳуқуқи ишғоли фаъолияти муайян (соҳибкории инфиродӣ) ба муҳлати 2 сол таъйин карда шавад.
Чораи пешгирӣ нисбат ба Шарифзода Саодат Абдуваҳоббовна дар намуди нигоҳ доштан дар ҳабс бекор карда шуда, охирон аз толори суд озод карда шавад…»
Тавре ки дар урфият мегӯянд, «он чи аён аст, ҳоҷат ба баён нест». Аммо, ҳайратовар он аст, ки Саодат Шарифзода бо кадом роҳ бошад, ба мулоқоти Президенти мамлакат бо соҳибкорони ҷавон роҳ ёфт. Воқеан, суд зинаи охирини барқарор намудани адлу инсоф аст. Аниқтараш, мардум барои додхоҳӣ ба ин даргоҳ меоянду дар бархе мавридҳо ноумед мешаванд. Зеро пӯшида нест, ки на ҳамаи судяҳо ва ё кормандони судҳо ба дарди мардум бархӯрди қонуниву муносиб нишон медиҳанд. Нороҳатии мо аз ин аст, ки суди шаҳри Хуҷанд ҳукми ноодилона баровардаасту суди вилоятӣ ба ҷои пуштибони ҳақиқату адолат шудан, зерсохтори худро ҳифз карда, ҳукмро «одилона» мегӯяд. Агар имрӯз таъмини адолату ҳақиқат чунин бошад, пас эътимоди мардум ба мақомоти ҳифзи ҳуқуқ, ба салоҳияту беғаразии  онҳо то куҷо боқӣ мемонад.

Файзулло ФАЙЗИЕВ,
сокини шаҳри Хуҷанд,
Мақсудҷон БОЛТУЕВ,
сокини Ҷамоати деҳоти ба номи Ҳайдар Усмонови ноҳияи Бобоҷон Ғафуров


PS: Хабарнигорони мо дар вилояти Суғд ҷиҳати омӯзиши масъла ва рӯшан намудани нукоти матлаб бо судяҳои суди шаҳри Хуҷанд Шуҳратзода Улуғбек ва Раҳимзода Хусрав, ки парвандаро дар мурофиаи судӣ баррасӣ карданд, вориди гуфтугӯ шуданд.
Судя Шуҳратзода Улуғбек зимни суҳбат арз кардааст, ки  баҳси ба миёномада бар асоси талаботи қонунгузорӣ баррасӣ шудааст. Дар эълони ҳукми суд низ амали хилофи қонун дида намешавад. Дар ҳамин ҳол, Хусрав Раҳимзода, судяи дигари шаҳри Хуҷанд бо ибрози ин нукта, ки масъалаи мавриди назар ба манфиати давлат ҳал шудааст, аз шарҳи бештар худдорӣ кардааст.
 


Баёни ақида (0)    Санаи нашр: 3.04.2015    №: 69    Мутолиа карданд: 1150

21.01.2019


Фестивали байналмилалии «Наврӯз – мероси фарҳангии сайёҳӣ» баргузор хоҳад шуд

"Парасту - 2019" – ҷашнвораи ҷумҳуриявии театрҳои касбӣ

ҶАҲОН ДАР ЯК САТР

Баргузории ҷашнвораи байналмилалии «Рӯзи барф» дар Калуга

Дар Арабистони Саудӣ ҷалби бонувон ба корҳои ҷамъиятӣ меафзояд

Соли 2018 прокуратураи Қазоқистон ба буҷети кишвар $90 миллион талофӣ кард

Дар Тошканд хазинаи қадима ёфт шуд

Дороии 26 шахси сарватмандтарини дунё ба даромади 3,8 миллиард ниёзманд баробар аст

18.01.2019


Таҳдидҳои асосӣ ба иқтисоди ҷаҳонӣ номбар шуданд

Гумонбари омодасозии ҳамла ба Қасри сафед ба даст афтод

Дар Чин қаллобонро барои фиреб ҳабси абад карданд

29 миллион сом зарари собиқадорони сохта

Ҷаҳон дар як сатр

17.01.2019


Тамдиди шартномаи ФФТ бо "Сомон Эйр"

60 ДАРАҶА ХУНУКӢ ВА ДАВИ 50 - КИЛОМЕТРАИ ЭКСТРЕМАЛИ МОЛДАВӢ

16.01.2019


Пирӯзии мунтахаби Тоҷикистон бар Эрон

ҶАҲОН ДАР ЯК САТР

Роҳандозии моратории дусола дар Тоҷикистон

Нақшаи Brexit дар парламенти Британия рад карда шуд

Кремл роҳи ҳалли буҳрони Украинаро пешниҳод намуд

Ифтитоҳи онлайн-донишгоҳ барои гурезаҳо дар Италия

15.01.2019


Ҷаласаи ҷамъбастӣ таҳти раёсати муовини Сарвазири мамлакат

Вохӯрии Сироҷиддин Муҳриддин бо Абдулазиз Комилов

Ёдгор Файзов: «Соли 2018 соли таҳкими волоияти қонун дар Бадахшон буд»

ХУҶАНД. 1548 медали варзишгарон дар як сол

ҶАҲОН ДАР ЯК САТР

Созишномаи сулҳ – мавзӯи асосии мулоқоти Путин ва Абэ хоҳад шуд

Савдои хориҷии Чин соли 2018 натиҷаи рекордӣ нишон дод

Дар Алмаато гурӯҳи хориҷиёни террорист боздошт шуд

То соли 2024 аҳолии Қирғизистон бо оби ошомиданӣ пурра таъмин мешавад

10.01.2019


Дар Саразм осорхона ва меҳмонхонаи замонавӣ бунёд мешаванд

Вохӯрии Парвиз Давлатзода бо Владимир Норов

Ҷаласаи Шӯрои кор бо ҷавонон

“ГАНҶИ СУХАН” – маҳфили адибпарвар


Дар сомонаҳои дигари Тоҷикистон хонед