logo

ҳуқуқ

ТАҚАЛЛУБ ДАР МАЪЛУМОТНОМАИ № 086

Ба хабарнигори рӯзномаи «Ҷумҳурият» дар минтақаи Кӯлоб иттилое расид, ки гӯиё аз ҷониби иддае аз ходимони Маркази саломатии №1 шаҳри Кӯлоб маълумотномаи тиббии шакли № 086 бидуни роҳандозии ташхис сохтакорона ба ивази маблағ ба корафтодагон дода мешавад. Нахуст барои возеҳ ва собитнамоии саҳеҳияти маълумот санҷиш гузарондем.

Ҷавонеро (номаш дар ҳолати зарурӣ ифшо мешавад) баҳри гирифтани маълумотнома ба Маркази саломатӣ роҳӣ кардем. Баробари даромадан зане ӯро сӯи хеш хонда, «ба шумо чӣ лозим?» - гӯён пурсид. Вай корманди марказ  будааст. Вақте огоҳ мешавад, ки мақсади гирифтани маълумотномаи шакли № 086  дорад, оҷилан аз куҷое як нусха варақаи ин намуди санадро оварда,  бе талаби шиноснома, шифоҳӣ ному насабу суроғаашро суол карда, ба сиёҳкунии варақа мепардозад. Дар қисмати пушти қоғаз се навъи муҳр бо нигоштаҷоти «Маркази саломатии шаҳри Кӯлоб, барои варақаҳо ва R-графия»  нақш шудаанд. Ҷавон, ки барои озмоиш равона гардида буд, санаи таваллуду ҷойи истиқоматашро носаҳеҳ иброз  медорад. Мутаассифона, корманди марказ маълумоти аз забони «корафтода» шунидаро бе пурсиши такрорӣ рӯи қоғаз меорад. Ахиран, дар чанд нуқтаи гувоҳнома имзоҳои зоҳиран мухталифро мегузорад. Аз ҳама таассуфовараш, дар ниҳояти кор мегӯяд:
- 15 сомонӣ мешавад.
- Апаҷон, ман 10 сомонӣ дорам, - изҳор мекунад ҷавон.
- Илоҷаш нест! Мувофиқи қоида, шумо бояд аз муоинаи табибони бемориҳои чашм, узвҳои даруна, ҷарроҳ, гӯшу гулую бинӣ ва дигар мутахассисон гузаред, - маълумотномаро рӯи даст гирифта шарҳ медиҳад корманд. – Ғайр аз ин, шуморо лозим меомад, ки рентген кунед, таҳлили умумии хун ва пешоб гузаронед. Ана, бинед, кулли ин амалиёт дар маълумотнома аллакай иҷро шудаанд. Комилан омодааст. Муҳри дигар беморхонаҳоро низ дорад. Мо барои задани ин муҳрҳо пул медиҳем.
Аммо ин хонум ошкор намекунад, ки ба кӣ пул медиҳанд. Исми корманди марказ бигзор зери парда бимонад. Мо барои 15 сомонӣ шаъни ӯро паст заданӣ нестем. Вале, чунин ба назар мерасад, ки дар ин тақаллубкорӣ нафаре ҳаст ӯро мададрасон. Агар чунин набошад, пас муҳри маркази саломатӣ дар коғази  холӣ аз куҷо омад?
Бобохон Абдураҳмонов, сардухтури маркази мазкур, баробари нигаристан ба маълумотномаи аз ҷониби зердасташ «фурӯхташуда», онро сирф сохтакорӣ маънидод кард. Гуфт: «Ин формаи № 086 қалбакист. Маротибаҳои бешумор ба кормандони марказ таъкид мекунам, ки даст ба чунин кирдор назананд. Бигзор ҳар нафаре, ки бошад, роҳи қонуниашро истифода кунад. Яъне, тамоми ташхиси заруриро гузашта, сипас чунин ҳуҷҷатро дастрас намояд. Пардохти маблағи муайян, ки онро Қарори Ҳукумати Ҷумҳурии Тоҷикистон таҳти № 600 муқаррар намудааст, ҳатмист. Баъди супурдани маблағ ба мизоҷ чек медиҳем. Бехабару пинҳонӣ аз ман ба маблағи ночиз аснодро тайёр карда мефурӯшанд. Ин проблема на танҳо Кӯлоб, балки ҷумҳуриро фаро гирифтааст.
То ҳол ҳеҷ нафаре, шахсан назди сардухтур дар мавриди пулситонии табибону ҳамширагони марказ бар ивази маълумотномаи  № 086 муроҷиат накардааст. Маблағи муқаррарии ташхисҳое, ки бояд ашхоси бо азми гирифтани маълумотнома аз назари  мутахассисон гузаранд, қариб сад сомонист. Биноан,  роҳҳои осону арзонро меҷӯянд». Ба суоли «Дар маълумотномаҳои сохта муҳри Маркази саломатии № 1 шаҳри Кӯлоб чӣ тавр пайдо шудааст?» гуфт:
- Муҳр ба марказ мутааллиқ аст. Берангии он шубҳабарангез аст. Шояд касе  пинҳонӣ муҳрро истифода бурдааст. Имзоро ман нагузоштаам. Муҳрҳои дигарро шояд сохта бошанд.
Маълумотномаи шакли № 086 аз зумраи ҳуҷҷатҳоест, ки солимии фардро бозгӯӣ мекунад. Қаблан вақти ҳуҷҷатгузории довталабони мактаби таҳсилоти олии касбӣ ин санад ҷойи вижа дошт. Аммо имсол он аз феҳристи номгӯи ҳуҷҷатгузории Маркази миллии тестӣ лағв шудааст. Масъулон  мӯҷиби бардошта шудани онро дар қалбакӣ  буданаш арзёбӣ мекунанд. Зеро дилхоҳ шахси носолиму ҷарроҳишуда тавассути ин қоғаз нуқси худро пинҳон дошта метавонад.
Маҳбуба Шарифова, сардухтури Маркази бемориҳои чашми шаҳри Кӯлоб, гуфт, ки нуқси чашм танҳо бо роҳи ташхис муайян мешавад. Бидуни ташхис маълумотномаи солимӣ додан кори хуб нест. Ба ҷуз табибони чашм касе ҳуқуқи ташхису хулосабарориро надорад.
Ба низоми муайян даровардан, ҷилавгирӣ аз тақаллуби маълумотномаи № 086 вазифаи ҷонии Вазорати тандурустӣ ва ҳифзи иҷтимоии аҳолии мамлакат, шуъбаи Агентии назорати давлатии молиявӣ ва мубориза бо коррупсия дар минтақаи Кӯлоб, мақомоти прокуратураи шаҳри Кӯлоб ва ниҳодҳои дигари зирабт маҳсуб меёбад. Роҳи баррасии барои сокинон сабукиовару барои давлат манфиатоварро бояд ҷуст.   

Ёқуби СОДИҚ, «Ҷумҳурият»


Баёни ақида (0)    Санаи нашр: 29.04.2015    №: 87    Мутолиа карданд: 700

15.02.2019


ШАМШЕРБОЗӢ. ИШТИРОКИ ВАРЗИШГАРОНИ МО ДАР ЧЕМПИОНАТИ КУШОДИ ОСИЁИ МАРКАЗӢ

ҶАҲОН ДАР ЯК САТР

Дар Душанбе ташкили низоми муттаҳидаи мудофиаи зиддиҳавоӣ баррасӣ шуд

Дар чор сол муомилоти мол байни Тоҷикистону Ӯзбекистон 19 маротиба афзуд

Медведев: «Таҳримоти ИМА ба иқтисоди Россия таъсири чандон бузург расонда наметавонад»

Пентагон. ИМА аз Афғонистон ҳамроҳи иттифоқчиёнаш меравад

13.02.2019


2018. Сиёсати хориҷии Тоҷикистон пурбарор буд

КОРРУПСИЯ. 2047 ҷиноят ошкор гардид

САНОАТ. Беш аз 10 миллиард сомонӣ маҳсулот содирот шуд

САРМОЯИ МУСТАҚИМ. Воридот дар ҳоли афзоиш аст

ОБ. Таъминоти аҳолӣ рӯ ба беҳбудӣ дорад

АВҶИ ОБОДКОРИҲО ДАР ШАҲРИ ТУРСУНЗОДА

12.02.2019


АКАДЕМИЯИ ИЛМҲО АЗ КАШФИЁТИ НАВ ТО САНОАТИ ДОРУСОЗӢ

КӮЛОБ. Содироти 825 тонна маҳсулоти кишоварзӣ

ДАНҒАРА. Саноатикунонӣ вусъат мегирад

ФУРУДГОҲҲОИ БАЙНАЛМИЛАЛӢ. Сатҳи хизматрасонӣ рӯ ба беҳбудӣ дорад

ДДК. Авлавият ба сатҳи касбият ва таълим

САДА. Тантанаи ҷашни миллӣ дар ноҳияи Шамсиддини Шоҳин

11.02.2019


ВАЗОРАТИ ФАРҲАНГ. 2018 - соли муваффақиятҳо буд

КУМИТАИ РУШДИ САЙЁҲӢ. Беш аз 1 миллион сайёҳ ба Тоҷикистон омад

МТС. Ҳамкориҳо бо Ӯзбекистон густариш меёбанд

ВМКБ. Гумрукчиён ба буҷет 16,9 миллион сомонӣ ворид карданд

ҲИСОР. Саҳми назарраси соҳибкорон дар ободонии шаҳр

НОҲИЯИ РӮДАКӢ. Ҳаҷми истеҳсоли маҳсулот ба 1 миллиард сомонӣ расид

ВАРЗОБ. Таваҷҷуҳи сайёҳон ба нуқтаҳои истироҳатӣ афзудааст

08.02.2019


Вазорати меҳнат, муҳоҷират ва шуғли аҳолӣ. Музди миёнаи меҳнат - 1220 сомонӣ

КУМИТАИ ТЕЛЕВИЗИОН ВА РАДИО. Сифати кори шабакаҳо беҳтар мешавад

КҲФМГ. Офатҳои табиат 34 миллион самонӣ хисорот овард

Саноатикунонӣ дар Шаҳринав

Меъёри бозтамвил ба 14 дарсад поён фаромад

ШАҲРИ ВАҲДАТ. Иҷрои барзиёди андози иҷтимоӣ

ТАНЗИМ. Қонуншиканӣ коҳиш ёфтааст

СОҲИЛ. Корҳои мустаҳкамсозӣ вусъат меёбанд

ДДСТДТ. Авлавият ба рушди ҳунарҳои мардумӣ


Дар сомонаҳои дигари Тоҷикистон хонед