logo

суханрониҳо

Суханронии Эмомалӣ Раҳмон, Сарвари давлати Тоҷикистон, дар Анҷумани кишоварзии Тоҷикистону Ҳиндустон, шаҳри Душанбе, 13 июли соли 2015

Ҷаноби Олӣ, Сарвазири муҳтарами Ҷумҳурии Ҳиндустон
Нарендра Моди,
Меҳмонони олиқадр,
Хонумҳо ва ҷанобон,
Бори дигар сарфарозам дар ҳузури гиромии шумо меҳмони азизи Тоҷикистон Ҷаноби Олӣ Нарендра Модиро самимона хайрамақдам бигӯям.
Ба ҷаҳониён маълум аст, ки пайвандҳои ду кишвари мо бар қаробати таърихӣ ва фарҳангии мардумони куҳанбунёд ва арзишҳои оламшумуле, ки аз баҳри беканори одоби мондагор, фалсафаи инсондӯстӣ ва ҷаҳонбинии ростину фарохи аҷдоди мо маншаъ мегиранд, асос меёбад.
Маҳз дар чунин рӯҳияи самимӣ мо ин субҳ бо Ҷаноби Олӣ Нарендра Моди маҷмӯи васеи масъалаҳои дуҷониба, минтақавӣ ва байналмилалиро баррасӣ кардем ва бори дигар тааҳҳудоти худро барои андешидани тадбирҳои лозим ҷиҳати табдили муносибатҳои дуҷониба ба шарикии стратегии гуногунҷанба дар ростои манфиатҳои мутақобили мардумони кишварҳоямон таъкид намудем.
Бо дарназардошти ҳамсоягии наздики кишварҳои мо дар дурнамои наздик робитаҳои тиҷоратию иқтисодӣ миёни Тоҷикистон ва Ҳиндустон бояд ҷавобгӯи иқтидори ҳамкориҳои мо бошанд.
Аз ин лиҳоз, ба ҳамраисони Комиссияи муштараки Тоҷикистону Ҳиндустон оид ба ҳамкориҳои тиҷоратӣ, иқтисодӣ ва илмию техникӣ дастур дода шуд, ки дар ҷаласаи навбатии худ, ки дар соли ҷорӣ дар шаҳри Душанбе бояд баргузор гардад, стратегияи рушди муносибатҳои тиҷоратӣ ва сармоягузориро таҳия намоянд ва ҷиҳати мусоидат ба ҳамкории доираҳои соҳибкорӣ қадамҳои мушаххасро муайян созанд.
Дар суҳбате, ки мо имрӯз бо Ҷаноби Олӣ доштем, ба аҳамияти кишоварзӣ дар иқтисодиёти ҳарду кишвар ва зарурати тавсеаи ҳамкориҳо дар ин самт таваҷҷуҳи махсус зоҳир гардид.
Пӯшида нест, ки Ҳиндустон дар бахши кишоварзӣ, аз ҷумла, пажӯҳиш, рушд ва коркарди маҳсулоти кишоварзӣ ва таъмини амнияти озуқаворӣ пешравиҳои қобили таваҷҷуҳ дорад. Таҷрибаи ин кишвар шоистаи омӯзиш аст ва бисёре аз кишварҳои ҷаҳон аз сиёсати кишоварзии Ҳиндустон пайравӣ мекунанд.
Аз ин лиҳоз, мо аз ҳама гуна иқдомҳои судманду муштарак ҷиҳати рушди ҳамкориҳо бо Ҳиндустон дар соҳаи кишоварзӣ, бахусус, ҷалби бештари ширкатҳои Ҳиндустон ба соҳаи коркарди маҳсулоти кишоварзӣ, ворид намудани фанновариҳои нав ва усулҳои пешрафтаи тадқиқотӣ дар ин соҳаи ҳаётан муҳими иқтисодиёти миллӣ истиқбол мекунем.
Анҷумани имрӯза, ки бо ҳузури намояндагони ниҳодҳои давлатӣ, коршиносони марказҳо ва созмонҳои тадқиқотӣ, ширкатҳои хусусӣ ва соҳибкорони бонуфуз доир мегардад, маҳз барои расидан ба чунин ҳадафи наҷиб созмон дода шуд. Умедворам, ки натиҷаҳо ва созишномаҳое, ки дар рафти анҷуман ҳосил мешаванд, мавриди иҷрои амалии ҳар ду ҷониб қарор хоҳанд гирифт.
Ҳамкориҳо дар ин соҳа бевосита ҷузъи тадбирҳои муассири Ҳукумат дар самти таъмини амнияти озуқавории кишвар ва расидан ба яке аз се ҳадафи стратегии рушди миллӣ мебошад.
Мехостам таъкид намоям, ки Ҷумҳурии Тоҷикистон барои ба роҳ мондани ҳамкориҳои мутақобилан судманд миёни ду кишвар имкониятҳои васеи иқтисодӣ дорад. Ҳоло дар Тоҷикистон тарҳу лоиҳаҳое ба маблағи ҳафтуним миллиард доллари амрикоӣ амалӣ шуда истодаанд. Қонунгузории кишвари мо зиёда аз чил номгӯи кафолату имтиёзҳоро дар иртибот ба андозбандӣ ва фаъолияти гумрукӣ муқаррар намудааст.
Шароити мусоиди иқлим ва табиати мамлакат, ки дорои офтобу оби фаровон, инчунин, водиҳои ҳосилхез барои парвариши меваю сабзавот ва маҳсулоти босифат мебошад, барои рушди минбаъдаи соҳаи кишоварзӣ имконияти ҳамаҷониба фароҳам овардааст.
Вақтҳои охир дар кишвар дар асоси барномаҳои махсуси давлатӣ комплекси агросаноатӣ, аз ҷумла, сабзавоткорӣ ва боғдорӣ рушд ёфта, содироти меваҳои тару тоза ва хушк ба кишварҳои дигар рӯ ба афзоиш аст.
Роҳандозии ҳамкориҳои васеи байналмилалӣ дар арсаҳои мазкур ва инчунин бунёди корхонаҳои муштарак дар соҳаҳои коркарди маҳсулоти кишоварзӣ, коркарди пашм ва пӯст, пахтакорӣ, боғдорӣ ва сабзавоткорӣ, чорвопарварӣ, занбӯрпарварӣ ва азхудкунии заминҳои нав ниёз ба ҷалби технологияи инноватсионӣ ва сармоя доранд.
Аз ин лиҳоз, соҳаҳои мазкур ва инчунин коркарду нигаҳдории маҳсулоти кишоварзӣ ба хотири афзоиши иқтидори содиротии кишвар аз ҳисоби маҳсулоти аз лиҳози экологӣ пок ва корхонаҳои муштараки нассоҷӣ бояд дар ояндаи наздик аз ҷумлаи самтҳои афзалиятноки муносибатҳои Тоҷикистону Ҳиндустон бошанд.
Умедворам, ки дар ростои талошҳои муштарак ба тавсеаи ҳамкориҳои ду кишвар такони тоза хоҳем бахшид.
Ба ҳамаи шумо саломатӣ, хушнудӣ ва комёбиҳои рӯзафзун орзумандам.

 


Баёни ақида (0)    Санаи нашр: 15.07.2015    №: 143    Мутолиа карданд: 425

19.04.2019


Вохӯрии Сироҷиддин Муҳриддин бо Жан - Батист Лемуан

Пойтахт ба таҷлили Рӯзи Ғалаба омодагӣ мебинад

Масоили рушди соҳаи маориф матраҳ гардид

Дар Донишгоҳи давлатии Данғара конфронси ҷумҳуриявӣ доир мешавад

Душанбе варзишгарони 15 кишварро ба ҳам меорад

Ҷаҳон дар як сатр

18.04.2019


ҶОМИ АФК. Пирӯзии "Хуҷанд" ва мусовии "Истиқлол"

МУЪМИНОБОД. 221 иншоот дар се сол

РАШТ. Боғистон доман паҳн мекунад

17.04.2019


БУҶЕТИ ДАВЛАТӢ . Ба қонун иловаҳо ворид шуданд

ДМТ. Як нишасти муҳим

Хонандагони Душанбе пешсафи олимпиадаҳои ҷумҳуриявӣ

Армуғон барои дӯстдорони ҷуғрофия

ҶОМИ ОСИЁ. Паҳлавонони тоҷик соҳиби 5 медал

Ҷаҳон дар як сатр

16.04.2019


Вохӯрии Саидзода Зоҳир Озод бо Аскар Таҷибаев

Баррасии масоили мубрам

Ҳамоиш бахшида ба оғози расмии Солҳои рушди деҳот, сайёҳӣ ва ҳунарҳои мардумӣ

Калонтарин тайёра дар дунё ба ҳаво хест

Дар Қазоқистон онлайн-қаллобон фаъол мешаванд

Дар СММ аз манфиати лоиҳаи «Камарбандҳо ва роҳҳо» сухан рафт

Аз таркиш дар Афғонистон ҳафт кӯдак ҳалок гашт

Филмҳои ду коргардони тоҷик барои Фестивали кинои мусалмонӣ интихоб шуданд

Ҷаҳон дар як сатр

БОКС. Иштироки варзишгарони тоҷик дар Чемпионати Осиё

12.04.2019


Бо иштироки Сарвазири мамлакат дар шаҳри Кӯлоб як қатор иншоот ба истифода дода шуд

Ҷаласаи Шӯрои ҳамоҳангсозони миллии давлатҳои аъзои СҲШ

Форуми байналмилалии рушди сармояи инсонӣ доир мегардад

ЧЕМПИОНАТИ ОСИЁ – 2019 ОИД БА ФУТЗАЛ. Рақибони Тоҷикистон муайян гаштанд

"Кашшофи падидаҳои наврас"

НОҲИЯИ РӮДАКӢ . Сафи соҳибкорони ватандӯст меафзояд

НУРОБОД . Эҳтиром ба шахсиятҳои таърихӣ

Ҷаҳон дар як сатр

11.04.2019


"Тоҷикон" ба забони ӯзбекӣ нашр шуд


Дар сомонаҳои дигари Тоҷикистон хонед