logo

фарҳанг

Сайфиддин НАЗАРЗОДА: “МО ДАР ОМОДАСОЗИИ КАДРҲО МУШКИЛ ДОРЕМ”

Дар шаҳри Санкт - Петербурги Русия Анҷумани байналмилалии фарҳангӣ, ки аз ҷониби Вазорати фарҳанги Русия ва ҳукумати Санкт-Петурбург ба муносибати 70 - умин солгарди таъсиси ЮНЕСКО доир гардид.
Ҷумҳурии Тоҷикистонро дар ин Анҷуман профессор Сайфиддин Назарзода, директори Китобхонаи миллии Тоҷикистон, намояндагӣ кард. Баъди бозгашт аз сафар аз Сайфиддин Назарзода дар суҳбат бо А. Раҳим, хабарнигори “Ҷумҳурият” ҳамоишро созанда ва муфид арзёбӣ карда, аз ҷумла гуфт: “Дар радифи чандин масоили мубраму баҳсии фарҳангӣ Анҷумани чорум низ як бахши муҳим дар бораи китобу китобхона дошт, ки бо номи “Китоб ва хониш дар қаламрави ИДМ” дар шакли мизи мудаввар баргузор шуд. Дар доираи ҳамин анҷуман 18 - умин Ҷаласаи умумии аъзои Ассамблеяи АвруОсиёии китобхонаӣ доир гашт.
Маҳфилҳо зери шиори “Аз соли фарҳангӣ ба кишвари китобхон” доир гардиданд, ки хеле рамзист. Хуб мешуд, ки дар ҷумҳурии мо ҳам намунаи ин гуна чорабиниҳо дар сатҳи ҷумҳуриявӣ, вилоятӣ ва ноҳиявӣ дар назар гирифта шавад. Месазад, ки яке аз солҳоро “Соли китобхонаи деҳот” номгузорӣ намоем. Китобхонаҳои деҳот бо китобхонаҳои мактаб бояд ба як маркази маърифатӣ барои ҷавонон табдил ёбанд.

- Дар барномаи Анҷуман аз Ассамблеяи китобхонаи АвруОсиё ёд мешавад. Ин чӣ ниҳод аст?
- “Ассамблеяи китобхонаи АвруОсиё” як ниҳоди ғайритиҷоратии ҳамкор барои ҳамаи китобхонаҳои кишварҳои ИДМ мебошад. Муфидтарин фаъолиятҳои ин ниҳод дастгирии толорҳои хониши маҷозӣ ва дастрасӣ ба диссертатсияҳои илмии Китобхонаи давлатии Русия аст. Ҳамчунин корҳои зиёде дар такмили ихтисос ва табодули таҷриба, такмили қонунгузориҳо вобаста ба корҳои китобдорӣ, татбиқи баъзе тарҳҳои муфид, нашри маҷалла бо номи “Вестник библиотечной Ассамблеи Евразии” - ро низ анҷом дод. Ин маҷалла дар тӯли мавҷудияти худ бештар аз 460 матлаб интишор намудааст, аз ҷумла 11 мақолаи он аз Тоҷикистон, навиштаи мутахассисону пажӯҳишгарони мост.

- Зимнан дар бораи китобхонаҳои электронӣ. Дар ҷойе хонда будам, ки директори генералии китобхонаи давлатии Русия А. Вислий мегуфт, ки ҳамоно китобхонаи электронӣ алтернативаи китобхонаи анъанавӣ шуда наметавонад. Назари Шумо, метавонад китобхонаи электронӣ ҷойи китобхонаи анъанавиро бигирад?
- Ин ҷо чанд нуктаи бебаҳс ҳаст, ки китобхонаи эектронӣ наметавонад дар айни замон бо китобхонаи анъанавӣ рақобат кунад. Аввалан, ҳоло ҳам ба чопи рақамӣ омода кардани ҳамаи он китобҳои илмӣ аз имкон берун аст, он чӣ дар китоб интишор меёбад, на ҳамеша дар чопи рақамӣ мешавад, ҷо кард. Албатта, мо ният дорем, ки вақтҳои наздик як пажӯҳиши фарогир дар мавриди китобҳои дархостмешуда гузаронем, то аниқтар бидонем, ки имрӯз талабот ба кадом китобҳо бештар аст. Вале аз ҳоло метавонам гӯям, ки имрӯз ҳам бештари хонандагони китобхона зиёдтар адабиёти илмӣ талаб мекунанд ва мехонанд, чун аксари аъзои китобхона донишҷӯён, хонандагони макотиби таҳсилоти миёна ва устодону кормандони илманд. Талабот ба адабиёти бадеӣ камтар аз адабиёти илмист.
Ва нуктаи дигар ҳам дар иртибот ба авлавият доштани китобхона ҳаст. Масалан, мақсад танҳо хондани кадом китобе бошад, пас, албатта, онро метавон ба осонӣ аз интернет пайдо кард ва мутолиа намуд. Вале боз ҳам агар ҳадаф он бошад, ки мавзӯи мавриди назар ва нашрҳои гуногуни он аз назар гузаронида шавад, пас хонанда онро танҳо аз китобхона метавонад дарёфт кунад. Зеро дар бойгонии ҳар китобхона китобҳои нодире мавҷуданд, ки онҳо замоне ҳамагӣ як маротиба чоп шудаанд. Ҳамаи онҳоро ҷо кардан ба системаи электронӣ кори чандон осону сода нест.
Ғайр аз ин, Китобхонаи миллӣ соҳиби бойгонии азими дастхатҳои қадима аст ва барои ошноӣ ва баҳрабардорӣ аз онҳо хонанда бояд ҳатман ба китобхона ояд.

  - Тавре дарёфтем, дар баробари дигар масоили муҳим масъалаҳои бозомӯзии кадрҳо ва умуман такмили ихтисос низ баҳс шуд. Магар ин масъала хеле мушкилоте дорад, ки муҷиби баҳси як Анҷумани байналмилалӣ шудааст?
- Бале, он чӣ аз баҳсҳо дарёфтам, қариб ҳамаи кишварҳои узви ИДМ, ҳатто Русия, ба мушкилоти кадрӣ дар соҳаи китобхонаҳо мувоҷеҳанд. Ва ин табиист, чун китобхонаи муосир аз китобхонаҳои чанд соли пеш фарқ мекунад. Як фарқият ворид шудани технологияи нав мебошад, ки рушди системаи коммуникатсионӣ фазои китобхонаҳоро иҳота кардааст. Дигар ин, ки тадриҷан китобхонаҳои электронӣ рушд мекунанд, вале онҳо низ алҳол аз ҳамин китобхонаҳои анъанавӣ идора мешаванд, чун бойгонии аслӣ ин ҷост. “Барномаи рушди Китобхонаи миллии Тоҷикистон барои солҳои 2015 - 2020” ба ин мусоидат мекунад.
Масъалаи дигаре, ки муҳим медонем, ин омодагии назариявию амалии мутахассисон аст. Тибқи анъана ва мувофиқ ба нақшаҳои омӯзишӣ ғолибан ба таълими назариявӣ, таърихӣ ва методӣ таваҷҷуҳ мешавад, вале масъалаҳои технологӣ ва амалӣ дуюминдараҷа ҳисобида мешавад. Мутаассифона, ба мутахассисони ҷавон донишҳои назариявӣ намерасанд ва дар иҷрои корҳои амалӣ мушкилӣ мекашанд. Таҷрибаҳо нишон доданд, ки хатмкунандагони муассисаҳои миёнаи китобдорӣ дар қиёс ба хатмкунандагони макотиби олии китобдорӣ бештар ҷанбаҳои технологӣ ва амалиро меомӯзанд, аз ин рӯ мутахассисони маълумоташон миёна аз дигарон малакаи беҳтар доранд. Ва ин то ҳадде обрӯ, худбоварӣ, ташаббуси мутахассиси дорои маълумоти олиро паст мекунад. Яъне, мо ин гуна мушкилро дар омодасозии кадрҳо дорем.

 


Баёни ақида (0)    Санаи нашр: 5.01.2016    №: 2    Мутолиа карданд: 748

23.04.2019


ДЗЮ – ДО. Медали нуқраи Темур Раҳимов аз Чемпионати Осиё

Тиб. Муваффақияти камназири ҷарроҳони рус

Пирӯзии Зеленский дар интихоботи Украина

Фоҷиа дар Шри-Ланка Теъдоди қурбониён ба 300 нафар расид

Лукашенко Россияро ҳомии истиқлолияти Беларус номид

Ёрии низомию техникии Қазоқистон ба Тоҷикистон

Ҷаҳон дар як сатр

22.04.2019


НИММАРАФОНИ БАЙНАЛМИЛАЛИИ ДУШАНБЕ. Фенти Тилахан дар мақоми аввал

Ваҳдат ҳусни тоза мегирад

ХОРУҒ. Бунёди бинои шабакаи ёрии таъҷилӣ

19.04.2019


Вохӯрии Сироҷиддин Муҳриддин бо Жан - Батист Лемуан

Пойтахт ба таҷлили Рӯзи Ғалаба омодагӣ мебинад

Масоили рушди соҳаи маориф матраҳ гардид

Дар Донишгоҳи давлатии Данғара конфронси ҷумҳуриявӣ доир мешавад

Душанбе варзишгарони 15 кишварро ба ҳам меорад

Ҷаҳон дар як сатр

18.04.2019


ҶОМИ АФК. Пирӯзии "Хуҷанд" ва мусовии "Истиқлол"

МУЪМИНОБОД. 221 иншоот дар се сол

РАШТ. Боғистон доман паҳн мекунад

17.04.2019


БУҶЕТИ ДАВЛАТӢ . Ба қонун иловаҳо ворид шуданд

ДМТ. Як нишасти муҳим

Хонандагони Душанбе пешсафи олимпиадаҳои ҷумҳуриявӣ

Армуғон барои дӯстдорони ҷуғрофия

ҶОМИ ОСИЁ. Паҳлавонони тоҷик соҳиби 5 медал

Ҷаҳон дар як сатр

16.04.2019


Вохӯрии Саидзода Зоҳир Озод бо Аскар Таҷибаев

Баррасии масоили мубрам

Ҳамоиш бахшида ба оғози расмии Солҳои рушди деҳот, сайёҳӣ ва ҳунарҳои мардумӣ

Калонтарин тайёра дар дунё ба ҳаво хест

Дар Қазоқистон онлайн-қаллобон фаъол мешаванд

Дар СММ аз манфиати лоиҳаи «Камарбандҳо ва роҳҳо» сухан рафт

Аз таркиш дар Афғонистон ҳафт кӯдак ҳалок гашт

Филмҳои ду коргардони тоҷик барои Фестивали кинои мусалмонӣ интихоб шуданд

Ҷаҳон дар як сатр


Дар сомонаҳои дигари Тоҷикистон хонед