logo

фарҳанг

НАВРӮЗУ БАҲОРИ ШОИР

Сарзамини ҳамешабаҳори сарсабзу хуррам ва биҳиштосои Тоҷикистон шояд шоире надошта бошад, ки масту мафтун аз бӯйи хушу муаттари гулу нағмасароии булбул, бо илҳом аз дашту дамани сабзпӯш ва садои роҳатбахшу гӯшнавози чашмасорон ва фусункориҳои табиати афсонавӣ арӯси сол – баҳори нозанин, аввалин пайки он – Наврӯзи оламафрӯзро дар рубоие, дубайтие, дар шеъре васф накарда бошад.
Шоири зиндаёд Ғоиб Сафарзода, низ дар боби баҳору Наврӯз насуруда наметавонист. Хоса бар он ваҷҳ, ки худ дар остонаи омади фасли баҳор, соли 1940 - ро дар оғӯши кӯҳсорон, дар деҳаи Муллоҷони дараи Шикоргаҳи Ховалинг дида бар олами ҳастӣ кушуда ва давраи наврасиро ҳамон ҷо гузарондааст. Ва илҳоми шоирии ӯ ҳам, бешак, аз ҳамон даврони кӯдакию наврасӣ  манша баргирифтаву дар қалби ӯ завқу шавқи гулчинию гулпарастӣ, зебоипарварӣ, табиатдӯстӣ, баҳорхоҳӣ ва Наврӯзпарастӣ маъво гирифтаанд. Шеъри зебои «Қимати гул»-ро, ки ҳанӯз соли 1961 эҷод шуда, аз ин қабил аст:
Маро мебурд қалби кӯчаки ман
Ба сайри кӯҳсорон дар  баҳорон.
Маро мебурд шавқу завқ карда,
Ки гул чинам, гули хушбӯю хандон.

Давидан доштам аз кӯҳ бар кӯҳ
Барои чидани гулдастае ман,
Барои зеби даври тоқии худ.
Барои абрувонро об додан.

Аз байн солҳо мегузаранд, рангу бӯйи гулҳо барои шоир қимати дигар, қимати арзишмандтаре пайдо менамоянд ва ӯ гулдастаи зебое барои он гуле туҳфа мебарад, ки ёри ҳаётӣ интихоб карданашро орзу дорад:
Ана он рӯзҳо чун бод рафтанд,
Гул акнун рангу бӯйи тоза дорад.
Ба монанди бари рухсораи ёр
Тароватбахш рӯйи тоза дорад.

Ана он рӯзҳо чун бод рафтанд,
Ба дастам боз як гулдаста дорам.
Ба қалби беқарору дидаи шавқ
Ба истиқболи ҷонон раҳсипорам.

Барои он, ки ёбам ҳамраҳи умр,
Бубошам умрҳо дилбастаи гул.
Барои хонаеро нур додан
Гузорам бар кафи гул дастаи гул.

 Агар чунин намебуд, магар ӯ метавонист хандидани гулҳоро андар кӯҳҳо бубинад ва дилпурона, ин қадар шоирона, балки ошиқона бисарояд:

Гулҳо ба бари кӯҳу камар механданд,
Дар партави хуршеди саҳар механданд.
Дилбохтагони ташнаи бодаи ишқ
Сармаст зи бӯсаҳои  тар механданд.

Шоир он қадар масту муштоқи омадани баҳор аст ва он андоза шоду масрур аст ва онро ончунон интизорӣ кашидааст,  ки ҳатто ягона гулаки рӯйида дар назараш атрофро зебу зинату шукӯҳ бахшидааст. То ба ҳадде, ки бар асари ин барфро рашк месӯзонад ва об мешаваду сарозер мешорад:

Бишкуфт гули нахуст андар бари кӯҳ,
Афзуд ба ранги нав шукӯҳу фари кӯҳ.
Чун барф бидид, кӯҳ бо гул хандид,
Аз рашк шуд обу рехт баъд аз сари кӯҳ.

Ҳаққо, омадани баҳорро пеш аз дигарон, ба пиндори ғолиб, аввалтар аз ҳама шоирону ошиқон, ононе, ки баҳорро самимона дӯст медоранд ва парастиш мекунанд, интизорӣ мекашанду баҳорро эҳсос менамоянд. Ғоиб Сафарзода низ шоири нозуктабъу рангинхаёл ва ошиқи сармасту дилдодаи баҳору Наврӯз буд, садои пойи Наврӯзро ҳатто аз пушти дар, аз парзании кабӯтару чаҳ-чаҳи мурғакон бо тамоми вуҷуди  худ эҳсос мекунад, ки барояш мужда меоваранд:

Имрӯз зи пушти дар садо мешунавам,
Парвози кабӯтари сабо мешунавам.
Бархез, ки бар дари ту Наврӯз омад,
Аз чаҳ-чаҳи мурғи хушнаво мешунавам.


Маҳтовбӣ МИРЗОЕВА,
омӯзгори Донишгоҳи
давлатии Кӯлоб
ба номи Абуабдуллоҳи Рӯдакӣ


Баёни ақида (0)    Санаи нашр: 10.03.2016    №: 48    Мутолиа карданд: 541

18.01.2019


Таҳдидҳои асосӣ ба иқтисоди ҷаҳонӣ номбар шуданд

Гумонбари омодасозии ҳамла ба Қасри сафед ба даст афтод

Дар Чин қаллобонро барои фиреб ҳабси абад карданд

29 миллион сом зарари собиқадорони сохта

Ҷаҳон дар як сатр

17.01.2019


Тамдиди шартномаи ФФТ бо "Сомон Эйр"

60 ДАРАҶА ХУНУКӢ ВА ДАВИ 50 - КИЛОМЕТРАИ ЭКСТРЕМАЛИ МОЛДАВӢ

16.01.2019


Пирӯзии мунтахаби Тоҷикистон бар Эрон

ҶАҲОН ДАР ЯК САТР

Роҳандозии моратории дусола дар Тоҷикистон

Нақшаи Brexit дар парламенти Британия рад карда шуд

Кремл роҳи ҳалли буҳрони Украинаро пешниҳод намуд

Ифтитоҳи онлайн-донишгоҳ барои гурезаҳо дар Италия

15.01.2019


Ҷаласаи ҷамъбастӣ таҳти раёсати муовини Сарвазири мамлакат

Вохӯрии Сироҷиддин Муҳриддин бо Абдулазиз Комилов

Ёдгор Файзов: «Соли 2018 соли таҳкими волоияти қонун дар Бадахшон буд»

ХУҶАНД. 1548 медали варзишгарон дар як сол

ҶАҲОН ДАР ЯК САТР

Созишномаи сулҳ – мавзӯи асосии мулоқоти Путин ва Абэ хоҳад шуд

Савдои хориҷии Чин соли 2018 натиҷаи рекордӣ нишон дод

Дар Алмаато гурӯҳи хориҷиёни террорист боздошт шуд

То соли 2024 аҳолии Қирғизистон бо оби ошомиданӣ пурра таъмин мешавад

10.01.2019


Дар Саразм осорхона ва меҳмонхонаи замонавӣ бунёд мешаванд

Вохӯрии Парвиз Давлатзода бо Владимир Норов

Ҷаласаи Шӯрои кор бо ҷавонон

“ГАНҶИ СУХАН” – маҳфили адибпарвар

РӮШОН. Ифтитоҳи маркази дуошёнаи савдо

Муҳаммад Салоҳ – беҳтарин футболбози Африқо

ҶАҲОН ДАР ЯК САТР

Самарқанд мизбони нахустмулоқоти «Ҳиндустон – Осиёи Марказӣ»

Баргардондани 47 шаҳрванди Қазоқистон аз Сурия

Остона ба гузарондани Ҳамоиши ҷаҳонии туризми шаҳрӣ омодагӣ мегирад

Дар Беларус бори нахуст ҳукми қатл содир шуд

09.01.2019


Таҷлили 110 - солагии аллома Бобоҷон Ғафуров


Дар сомонаҳои дигари Тоҷикистон хонед