logo

иқтисод

«САОДАТ» - ТОЗАГӢ ОМИЛИ МУҲИМИ ЭЪТИМОДИ МАРДУМ

Ҳангоми ворид шудан ба майдони хоҷагии зотпарварии «Саодат», ки дар ноҳияи Хуросони вилояти Хатлон воқеъ аст, аввалин дидании ҷолибу хотирмон, ки касро болидарӯҳ менамояд, покизагии роҳу раста ва умуман ҳудуди он мебошад. Ҳайати 120 - нафараи хоҷагӣ бо эҳсоси баланди масъулият дарк мекунанд, ки дар ин ҷо ғизои аз ҳама фоидабахш - шир, ки хурду калон ба он ниёз доранд, истеҳсол мешавад ва тозагӣ омили муҳими ба даст овардани эътимоди  мардум аст. Ҳадафи асосии тан ба заҳмат додану маблағу неруи зиёд сарф кардани ҳайати кормандон пеш аз ҳама ба хотири таъмин намудани истеъмолкунандагон бо ғизои хушсифат мебошад. Онҳо барои истеҳсоли шири табиӣ ва аз ҷиҳати экологӣ тоза ҳеҷ чизро дареғ намедоранд ва намехоҳанд, ки барои доротар шудан аз шири хушки сунъии арзон маҳсулот истеҳсол карда, ҳам худро фиреб диҳанду ҳам зомини қисмати мардум гарданд.

Хоҷагӣ се сол пеш бо мақсади парвариши беҳтарин зоти чорво, ки ҷубронкунандаи ҳама хароҷот ва таъмингари даромад бошад, таъсис ёфта буд ва дар муддати андак ба комёбии назаррас ноил гардид.  Дастовардҳои хоҷагӣ аз соҳибтаҷриба будан ва аз дастгоҳҳои муосири чехӣ хуб истифода бурдани чорводорон гувоҳӣ медиҳанд. Дар хоҷагӣ говҳои навъи беҳтарини ҷаҳон «Сементал»-и олмонӣ ва «Голштен»-и амрикоӣ парвариш карда мешаванд. Гови «Сементал» барои истеҳсоли гӯшту шир буда, равғанокии  шираш зиёд, гови «Голштен» баръакс, ширию гӯштӣ ва дар таркиби шираш сафедаи бисёр аст. Вале миқдори хӯроке, ки ҳар ду зот истеъмол мекунад, қариб як хел аст ва ҳар кадоме дар се навбати ҷӯшиш аз 40 то 60 литр шир медиҳад. Ҳар рӯз дар коргоҳ аз 225 сар гови ҷӯшо ҳашт тонна шир истеҳсол карда, мешавад ва аз ин миқдор як тоннаашро дар коргоҳ кор карда, сокинони вилояти Хатлонро бо маҳсулоти гуногуни ширӣ таъмин менамоянд ва боқимондаашро ба заводи шири шаҳри Душанбе месупоранд.
Дар ин заҳматобод, ки аксари корҳо ба тарзи автоматӣ иҷро карда мешаванду барои таъмини рушди соҳа боз 315 сар буққаву ғуноҷин ва гӯсолаҳои навзоду семоҳа парвариш меёбанд. Дар се моҳ вазни гӯсолаҳо ба 110-120 кг мерасад. Барои бордоркунии сунъӣ  аз кишвари Олмон зиёда аз 1000 нутфа овардаанд, ки то лаҳзаи даркорӣ дар ҷои махсус нигоҳ дошта мешаванд. Зотпарварон метавонанд, ки бо чунин усули кор дигар хоҷагиҳои  мамлакатро низ бо чорвои хушзоти ширию гӯштӣ таъмин намоянд. Пеш аз ҳама ба ғанӣ гардондани таркиби хӯрок, ки асоси маҳсулнокист, эътибори ҷиддӣ медиҳанд. Ғизое, ки омода мекунанд, дар таркибаш ҷав, ҷуворӣ, офтобпараст, силос, сенаж, юнучқаи хушк дорад, ки ин ҳама аз зироатҳои парвардаи худи онҳост. Аз дигар коргоҳҳои ватанӣ сабӯс, кунҷора, намак ва оҳак мехаранд.
Хоҷагӣ дар ихтиёр 322 гектар майдони обӣ дорад, ки дар он зироати хӯроки чорво парвариш мешавад. Ҳамчунин хоҷагидорон тавассути шартномаи тарафайн аз майдонҳои иҷоравӣ баҳра бурда, дар маҷмӯъ аз чорсад гектар  2700 тонна силос ва 1200 тонна тарбеда ва юнучқаву коҳ захира менамоянд, ки барои таъмини чорво барзиёд аст.
Дар соли аввали ташкили хоҷагӣ барои пешбурди корҳо ва расидан ба натиҷаҳои хуб аз хориҷи кишвар мутахассисон даъват мешуданд. Дар рафти кор хоҷагидорон ҳис карданд, ки дар ин  ҷо кадом асрори ногуфтаву тадбири наандешида ниҳон аст. Пайдост, ки ягон соҳибкор ва манфиатҷӯ ба решаи дарахти сармояи худ теша намезанад ва намехоҳад, ки бозори гарми худро сард кунад. Ин андеша  зотпарваронро водор кард, ки барои ҳалли масъалаи дерошкор  роҳи дигари пеш бурдани корро дарёбанд. Рӯи ниёз ба олимон ва кордонҳои ватанӣ оварданд. Онҳо тавассути такя ба илми муосир ва ҳамкорӣ бо донишмандони соҳавии кишвар дар як муддати кӯтоҳ натиҷаҳои истеҳсолиашонро афзунтар карда, ҳамкорони хориҷии худро дар ҳайрат гузоштанд.    
Баъд аз ошно шудан ба бахшҳои мухталифи хоҷагӣ ва эҳсос кардани болидарӯҳии чорводорон  танҳо ба як хулоса омадан мумкин аст. Ҳар коре, ки аз таҳти дил ва бо умеди ояндаи нек аст, файзу баракати дигар дорад. Онҳое, ки ба хотири рушди ин ё он соҳа тан ба заҳмат дода, дар пешрафти Ватан ва осудагии мардум  саҳм мегиранд, худро неруманд пиндошта, хастагиро эҳсос намекунанд. Агар чунин   низоми кор, ки дар хоҷагии зотпарварии «Саодат» ба ҳукми анъана даромадааст, дар дигар хоҷагию коргоҳҳои мамлакат бошад, диёри афсонавии мо ба кишвари пешрафтаи ҷаҳон табдил хоҳад ёфт.

Соҳибназари МУҲАММАДҒОИБ


Баёни ақида (0)    Санаи нашр: 26.04.2016    №: 80    Мутолиа карданд: 596

15.02.2019


ШАМШЕРБОЗӢ. ИШТИРОКИ ВАРЗИШГАРОНИ МО ДАР ЧЕМПИОНАТИ КУШОДИ ОСИЁИ МАРКАЗӢ

ҶАҲОН ДАР ЯК САТР

Дар Душанбе ташкили низоми муттаҳидаи мудофиаи зиддиҳавоӣ баррасӣ шуд

Дар чор сол муомилоти мол байни Тоҷикистону Ӯзбекистон 19 маротиба афзуд

Медведев: «Таҳримоти ИМА ба иқтисоди Россия таъсири чандон бузург расонда наметавонад»

Пентагон. ИМА аз Афғонистон ҳамроҳи иттифоқчиёнаш меравад

13.02.2019


2018. Сиёсати хориҷии Тоҷикистон пурбарор буд

КОРРУПСИЯ. 2047 ҷиноят ошкор гардид

САНОАТ. Беш аз 10 миллиард сомонӣ маҳсулот содирот шуд

САРМОЯИ МУСТАҚИМ. Воридот дар ҳоли афзоиш аст

ОБ. Таъминоти аҳолӣ рӯ ба беҳбудӣ дорад

АВҶИ ОБОДКОРИҲО ДАР ШАҲРИ ТУРСУНЗОДА

12.02.2019


АКАДЕМИЯИ ИЛМҲО АЗ КАШФИЁТИ НАВ ТО САНОАТИ ДОРУСОЗӢ

КӮЛОБ. Содироти 825 тонна маҳсулоти кишоварзӣ

ДАНҒАРА. Саноатикунонӣ вусъат мегирад

ФУРУДГОҲҲОИ БАЙНАЛМИЛАЛӢ. Сатҳи хизматрасонӣ рӯ ба беҳбудӣ дорад

ДДК. Авлавият ба сатҳи касбият ва таълим

САДА. Тантанаи ҷашни миллӣ дар ноҳияи Шамсиддини Шоҳин

11.02.2019


ВАЗОРАТИ ФАРҲАНГ. 2018 - соли муваффақиятҳо буд

КУМИТАИ РУШДИ САЙЁҲӢ. Беш аз 1 миллион сайёҳ ба Тоҷикистон омад

МТС. Ҳамкориҳо бо Ӯзбекистон густариш меёбанд

ВМКБ. Гумрукчиён ба буҷет 16,9 миллион сомонӣ ворид карданд

ҲИСОР. Саҳми назарраси соҳибкорон дар ободонии шаҳр

НОҲИЯИ РӮДАКӢ. Ҳаҷми истеҳсоли маҳсулот ба 1 миллиард сомонӣ расид

ВАРЗОБ. Таваҷҷуҳи сайёҳон ба нуқтаҳои истироҳатӣ афзудааст

08.02.2019


Вазорати меҳнат, муҳоҷират ва шуғли аҳолӣ. Музди миёнаи меҳнат - 1220 сомонӣ

КУМИТАИ ТЕЛЕВИЗИОН ВА РАДИО. Сифати кори шабакаҳо беҳтар мешавад

КҲФМГ. Офатҳои табиат 34 миллион самонӣ хисорот овард

Саноатикунонӣ дар Шаҳринав

Меъёри бозтамвил ба 14 дарсад поён фаромад

ШАҲРИ ВАҲДАТ. Иҷрои барзиёди андози иҷтимоӣ

ТАНЗИМ. Қонуншиканӣ коҳиш ёфтааст

СОҲИЛ. Корҳои мустаҳкамсозӣ вусъат меёбанд

ДДСТДТ. Авлавият ба рушди ҳунарҳои мардумӣ


Дар сомонаҳои дигари Тоҷикистон хонед