logo

сиёсат

ИЗҲОРОТИ МАТБУОТӢ дар фарҷоми музокироти ҳайатҳои Ҷумҳурии Тоҷикистон ва Ҷумҳурии Исломии Афғонистон, шаҳри Душанбе, 10 майи соли 2016

Муҳтарам намояндагони воситаҳои иттилооти умумӣ,
Хонумҳо ва ҷанобон,
Имрӯз мо дар чаҳорчӯбаи мулоқоту музокироти созанда амалан ҳама арсаҳо ва соҳаҳои ҳамкории ду кишвари дӯст ва масоили муҳими минтақавӣ ва байналмилалӣ, аз ҷумла вазъи кунунии Афғонистонро баррасӣ намудем.
Масъалаҳои тақвият ва таҳкими бештари муносибатҳои неки ҳамҷавории ду кишвар ва дастёбӣ ба сатҳи навин ва пешрафтаи ҳамкории ҳамаҷонибаи онҳо дар меҳвари муколамаи сатҳи олӣ ва музокироти расмӣ қарор доштанд.
Сафари нахустини расмии Раисҷумҳури Ҷумҳурии Исломии Афғонистон дар марҳалаи муҳими рушди ҳамёрии ду кишвар дар доираи ҳамкориҳои минтақавӣ ҷараён мегирад.
Талошҳои муштараку ҳадафмандонаи мо ҷиҳати оғози корҳои сохтмонӣ дар тарҳи минтақавии CASA - 1000, ки маросими ифтитоҳи он ду рӯз пас дар Тоҷикистон доир мегардад, рамзи возеҳи ин гуфтаҳо мебошад. Мутмаинем, ки татбиқи пайгиронаи ин тарҳи дорои аҳамияти ҳаётан муҳим ба таъмини пешрафту ободӣ ва рӯзгори осудаи мардумони кишварҳои мо мусоидати ҷиддӣ ва ниҳоят муассир хоҳад кард.
Дар мулоқоту музокироти мо ҳамчунин ба дарёфти роҳҳо ва василаҳои татбиқи лоиҳаҳои афзалиятноке, ки ба тавсеаи имкониятҳои зербиноӣ ва транзитиву нақлиётии минтақавӣ роҳ мекушоянд, таваҷҷуҳи хос зоҳир гардид. Ҳар ду ҷониб бар он аст, ки татбиқи чунин лоиҳаҳо ҳамкории дуҷониба ва минтақавиро ба сатҳи комилан нав бардошта, омили таъмини субот ва пешрафти кишварҳоямон ва тамоми минтақа хоҳад гашт.
Дар музокирот мавзӯоти амниятӣ ва таҳаввулоти ҷории сиёсӣ муфассалан баррасӣ гардиданд. Дар ин ҷода талоши фаъол ва содиқонаи ҳамаи кишварҳои минтақа ва шарикони онҳо дар чаҳорчӯби як стратегияи возеҳ ва ҳадафманд комилан зарур дониста шуд. Ҳар ду ҷониб зарурати тақвияти равобити марзӣ ва таъмини амнияти онро таъкид намуд.
Мо пайгирона талош хоҳем кард, ки тавассути эҷоди шароити мусоид марзи ду кишварро ба марзи субот, дӯстӣ ва ҳамкорӣ табдил диҳем. Зимни баррасии мавзӯоти амният ва суботи минтақавӣ зарурати муборизаи усулӣ бо терроризм, экстремизм, қочоқи маводи мухаддир ва дигар шаклҳои ҷинояткории муташаккили фаромиллӣ таъкид гардид. Ҳамкорӣ ва ҳамоҳангии сатҳи минтақавӣ ва байналмилалӣ дар ин самт аз ҷониби мо чун амри ҳаётӣ маънидод шуд.
Рӯйдодҳои охир дар минтақаҳои мухталифи ҷаҳон нишон медиҳанд, ки терроризм, экстремизм ва қочоқи маводи мухаддир ба хатарҳои азимтарини олами муосир табдил ёфтаанд. Майдони фаъолияти даҳшатноку нафратовари терроризм торафт фарох гардида, қувват гирифтани он вазъиятро боз ҳам мураккабтар гардонидааст.
Мо борҳо изҳор карда будем, ки яке аз манбаъҳои асосии маблағгузории терроризми байналмилалӣ даромад аз муомилоти ғайриқонунии маводи мухаддир мебошад. Аз ин лиҳоз, мубориза алайҳи муомилоти ғайриқонунии маводи мухаддир бояд чун ҷузъи ҳатмии мубориза бо неруҳои терроризм ва экстремизм шинохта шавад.
Ҷониби Тоҷикистон хоҳони мусоидати бештари иҷтимоиву ҷомеаи байналмилалӣ ба Афғонистон мебошад.  Миёни ҷонибҳо мубодилаи озоди афкор дар бораи роҳҳо ва василаҳои таъмини сатҳи босамар ва навини ҳамкории иқтисодӣ, тиҷоратӣ, сармоягузорӣ ва техникӣ сурат гирифт.
Мо зарурати густариши равобити фарҳангиву илмӣ ва дар ин замина муоширати васеи адибон, фарҳангиён ва донишмандони ду кишвари дӯстро таъкид намудем. Ҳар ду ҷониб аҳамияти густариши пайгиронаи ҳамкории минтақавиро таъкид кард.
Ҷониби Тоҷикистон аз нақши афзояндаи Афғонистон дар умури минтақа истиқбол гирифта, ҷиҳати идомаи ҳамёрии густурда бо он дар арсаи байналмилалӣ, аз ҷумла дар чаҳорчӯбаи Созмони Милали Муттаҳид, Созмони ҳамкории исломӣ, Созмони ҳамкории Шанхай ва дигар ниҳодҳои ҳамкориҳои бисёрҷониба, омодагии худро изҳор менамояд.
Ҷонибҳо иброз доштанд, ки хостори рафъи мушкилоту бархӯрдҳо дар ҷаҳони ислом ва таъмини сатҳи навини ҳамкории кишварҳои исломӣ ҳастанд.
Мо бар онем, ки таҳкими низоми байналмилалӣ дар асоси усул ва меъёрҳои пазируфташудаи ҳамагонӣ бо нақши марказии Созмони Милали Муттаҳид ба нафъи кишварҳои минтақа ва тамоми ҷаҳон мебошад.
Мехоҳам таъкидан зикр намоям, ки мулоқоту музокироти мо дар фазои ҳусни ният, самимият ва эҳтироми мутақобил ҷараён гирифта, мавқеи ҷонибҳо дар мавриди масоил ва мавзӯоти мавриди таваҷҷуҳи тарафайн ягона ё наздик мебошад.
Дар марҳалаи кунунӣ Тоҷикистону Афғонистон амалан манфиатҳои зиёди муштарак доранд, ки ҷавҳари онҳоро таъмини амнияту субот ба манзури эҷоди заминаи пешрафти ду кишвар ва тамоми минтақа ташкил медиҳад.
Ҷониби Тоҷикистон аз сафари нахустини расмӣ ва дӯстонаи Раисҷумҳури Ҷумҳурии Исломии Афғонистон ибрози қаноатмандӣ намуда, онро иқдоми муҳим дар таҳким ва рушди муносибатҳои дӯстонаи ду кишвар арзёбӣ менамояд.
Мо даъвати Раисҷумҳури Ҷумҳурии Исломии Афғонистон Ҷалолатмаоб Муҳаммад Ашраф Ғаниро ҷиҳати боздиди ҷавобии расмӣ аз кишвари дӯсти Афғонистон бо камоли сипос қабул намудем.
Муҳлати анҷоми ин сафар тавассути роҳҳои дипломатӣ мушаххас хоҳад шуд.


Баёни ақида (0)    Санаи нашр: 11.05.2016    №: 90    Мутолиа карданд: 444

18.01.2019


Таҳдидҳои асосӣ ба иқтисоди ҷаҳонӣ номбар шуданд

Гумонбари омодасозии ҳамла ба Қасри сафед ба даст афтод

Дар Чин қаллобонро барои фиреб ҳабси абад карданд

29 миллион сом зарари собиқадорони сохта

Ҷаҳон дар як сатр

17.01.2019


Тамдиди шартномаи ФФТ бо "Сомон Эйр"

60 ДАРАҶА ХУНУКӢ ВА ДАВИ 50 - КИЛОМЕТРАИ ЭКСТРЕМАЛИ МОЛДАВӢ

16.01.2019


Пирӯзии мунтахаби Тоҷикистон бар Эрон

ҶАҲОН ДАР ЯК САТР

Роҳандозии моратории дусола дар Тоҷикистон

Нақшаи Brexit дар парламенти Британия рад карда шуд

Кремл роҳи ҳалли буҳрони Украинаро пешниҳод намуд

Ифтитоҳи онлайн-донишгоҳ барои гурезаҳо дар Италия

15.01.2019


Ҷаласаи ҷамъбастӣ таҳти раёсати муовини Сарвазири мамлакат

Вохӯрии Сироҷиддин Муҳриддин бо Абдулазиз Комилов

Ёдгор Файзов: «Соли 2018 соли таҳкими волоияти қонун дар Бадахшон буд»

ХУҶАНД. 1548 медали варзишгарон дар як сол

ҶАҲОН ДАР ЯК САТР

Созишномаи сулҳ – мавзӯи асосии мулоқоти Путин ва Абэ хоҳад шуд

Савдои хориҷии Чин соли 2018 натиҷаи рекордӣ нишон дод

Дар Алмаато гурӯҳи хориҷиёни террорист боздошт шуд

То соли 2024 аҳолии Қирғизистон бо оби ошомиданӣ пурра таъмин мешавад

10.01.2019


Дар Саразм осорхона ва меҳмонхонаи замонавӣ бунёд мешаванд

Вохӯрии Парвиз Давлатзода бо Владимир Норов

Ҷаласаи Шӯрои кор бо ҷавонон

“ГАНҶИ СУХАН” – маҳфили адибпарвар

РӮШОН. Ифтитоҳи маркази дуошёнаи савдо

Муҳаммад Салоҳ – беҳтарин футболбози Африқо

ҶАҲОН ДАР ЯК САТР

Самарқанд мизбони нахустмулоқоти «Ҳиндустон – Осиёи Марказӣ»

Баргардондани 47 шаҳрванди Қазоқистон аз Сурия

Остона ба гузарондани Ҳамоиши ҷаҳонии туризми шаҳрӣ омодагӣ мегирад

Дар Беларус бори нахуст ҳукми қатл содир шуд

09.01.2019


Таҷлили 110 - солагии аллома Бобоҷон Ғафуров


Дар сомонаҳои дигари Тоҷикистон хонед