logo

иҷтимоиёт

СЕЛ. РАФЪИ ОҚИБАТҲОИ ОН ДАР РӮДАКӢ ВА ПАНҶАКЕНТ ИДОМА ДОРАД

Дар натиҷаи обхезӣ ва ярч, ки рӯзҳои охир дар ҳудуди кишвар ба амал омаданд, сокинони шаҳри Панҷакент, ноҳияҳои Рӯдакӣ ва Дарвоз хисороти калон диданд.

Тибқи иттилои Кумитаи ҳолатҳои фавқулода ва мудофиаи граждании назди Ҳукумати ҷумҳурӣ шаби 11 ба 12 майи соли равон, соати 3:40 дар натиҷаи боронҳои бошиддат дар деҳаҳои Адолат, Файзоба, Дарёобод, Садоқат, Комсомол -1, Комсомол-2 - и Ҷамоати деҳоти Зайнабобод ва деҳаҳои Коргар, Ҳоҷиён, Элок, Истиқлол, Косибони Ҷамоати деҳоти Мирзо Турсунзодаи ноҳияи Рӯдакӣ сел омада, тақрибан 2,5 ҳазор хоҷагӣ ва қитъаҳои наздиҳавлигӣ зери обу лой монд.
Бино ба гуфтаи  Ориф Нозимов, котиби матбуоти кумита, худи ҳамон шаб даста ва гурӯҳҳои наҷотдиҳӣ ба ҷойи ҳодиса сафарбар шуда, то субҳи 12 май 800 нафар сокинонро ба ҷойи бехатар кӯчонданд. Ба хотири пешгирӣ аз талафоти ҷонӣ то соати 13-и 12 май боз 700 нафар cокини деҳаҳои деҳоти Мирзо Турсунзода бо ҷойҳои бехавф таъмин гаштанд.
Барои бартарафсозии оқибатҳои ҳолати баамаломада ва ёрӣ ба оилаҳои зарардида, дар ҷойи ҳодиса дастаҳои наҷотдиҳии Кумитаи ҳолатҳои фавқулода ва мудофиаи граждании назди Ҳукумати ҷумҳурӣ ба сокинони ду Ҷамоати деҳоти ноҳияи Рӯдакӣ зери роҳбарии ситоди фаврӣ ёрии амалӣ расонда истодаанд. Хушбахтона, талафоти ҷонӣ ба қайд гирифта нашуд. Дар деҳоти Зайнабобод ва Мирзо Турсунзода комиссияҳои ҳолатҳои фавқулода шабонарӯзӣ фаъолият дошта, ҳаҷм ва дараҷаи хисоротро муайян менамоянд. То имрӯз 406 манзили истиқоматӣ аз назар гузаронда шуда, муайян гашт, ки 6 хона пурра ва 36 - тои дигар қисман хароб гардида, 195 иншооти ёрирасон зарар диданд. Дар ҷойи рахнашавии соҳили дарёи Элок корҳои соҳилмустаҳкамсозӣ идома доранд.
Ёдрас месозем, ки 9 май  дар шаҳри Панҷакент бар асари борони шиддатнок аз сойи Зебон сел омада, ба Ҷамоати деҳоти Халифа Ҳасан, деҳаҳои Шӯрча, Савр, Қӯштеппа,  Шкат, Дашти Қозӣ, Кишттӯдак, Амондара, маҳаллаҳои Сойи Мисрак, Зардолузор, майдонҳои кишт ва як қатор муассисаҳои шаҳр хисорот расонд. Мутаассифона, дар натиҷаи ин офат, талафоти ҷонӣ ҷой дошт.
Тибқи ҳисоботи пешакии комиссияи ҳолатҳои фавқулода иншооти муҳими хоҷагии халқи Панҷакент, аз ҷумла 27 км роҳи мошингард, 3 пул, 6 км хатти интиқоли неруи барқ, 7 трансформатор, 2 км хатҳои алоқа, 63 км каналҳои магистралӣ, 4 км селпарто, 1 истгоҳи насосӣ ва иншооти гидротехникӣ, 400 метр хати оби нӯшиданӣ зарари ҷиддӣ диданд. Дар маҷмӯъ 603 гектар майдони кишт, боғу токзор, 76 гектар замини наздиҳавлигӣ, 146 сар чорво нобуд гардида, 14 хона пурра ва 6 – то қисман вайрон шуданд.
Бино ба гуфтаи Ориф Нозимов, баробари сар задани офат ситоди доимоамалкунанда ва роҳбарияти Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба ҷойи ҳодиса гурӯҳҳои наҷотдиҳӣ ва бартарафнамоиро сафарбар намуда, ба зарардидагони шаҳр даҳ номгӯй ҷиҳози зарурӣ аз қабили хайма, кӯрпаву болишт, фонус, зарфи обгирӣ ва ғайра расонд.
Айни ҳол корҳои барқарорсозии иншооти хоҷагии халқ ва поксозии кӯчаю ҳавлиҳо таҳти роҳбарияти мақомоти иҷроияи маҳаллии ҳокимияти давлатии шаҳр дар сатҳи баланд ба роҳ монда шудааст.
Кумитаи ҳолатҳои фавқулода ва мудофиаи гаржданӣ огоҳ менамояд, ки боридани борону сел дар шаҳру ноҳияҳои мамлакат то 18 май идома меёбад. Дар ин рӯзҳо эҳтимоли боришоти зиёд, шамолҳои сахт, баланд шудани сатҳи оби дарёҳо ва раъду барқ вуҷуд дорад, ки метавонанд боиси канда шудани хатҳои неруи барқ, хароб гардидани боми хонаҳои истиқоматӣ, иншооти иҷтимоӣ, фаромадани ярч, сангрезиҳо ва афтидани дарахтон гарданд.
Ш. ҚУРБОН, Ҷумҳурият»,
ХУЛКАР ҚУРБОНХОЛОВА,
сокини ноҳияи Рӯдакӣ


Баёни ақида (0)    Санаи нашр: 17.05.2016    №: 93    Мутолиа карданд: 498

19.09.2018


ТОҶИКИСТОН ВА ӮЗБЕКИСТОН. Аввалин тамринҳои муштараки низомӣ

Таъсиси 57 корхонаи нав

Намоиши дастовардҳо ба муносибати Рӯзи шаҳри Хуҷанд

Зуҳро Саидова – соҳиби шоҳҷоиза

Таҳаммул аз амалҳои террористӣ норавост

Баргузории ҳамоиши маъмурони роҳи оҳани кишварҳои СҲШ дар Ӯзбекистон

Дар Ироқ 27 ҳазор нафар аз об заҳролуд гашт

Тӯли 40 соли ислоҳот дар Чин ҷои кор 346 дарсад афзуд

Остона ҳамоиши ҳаштуми глобалии туризми шаҳриро пазироӣ мекунад

Ҷаҳон дар як сатр

18.09.2018


САМБО. Дурахши варзишгари навраси тоҷик дар Аврупо

Иди асал дар Душанбе

КӮЛОБ. Боз ду меҳмонхонаи нав ба истифода дода шуд

Ҷаҳон дар як сатр

ӮЗБЕКИСТОН. Оғози машқҳои низомии муштарак

Теъдоди қурбонии тӯфони «Мангхут» аз 60 нафар гузашт

Дифои Вазорати ҳуқуқи инсони Покистон аз ҳуқуқи занҳо

Таҳсили фосилавӣ ба ҳар хонандаи ҷопонӣ дастрас шуд

Дар Остона ба хариди партов шурӯъ карданд

17.09.2018


НОҲИЯИ РӮШОН. Сарҳадбонон соҳиби бинои наву замонавӣ шуданд

Баргузории фестивали шаҳрии эҷодиёти кӯдакон

“КӮКНОР-2018”. Мусодираи беш аз 550 килограмм маводи нашъаовар дар Хатлон

ФУТБОЛ. "Хуҷанд" ба пеш баромад

11.09.2018


ДУШАНБЕ МИЗБОНИ СОҲИБКОРОНИ ҶАҲОН

ДЕВАШТИЧ. БУНЁДКОРИҲОИ НОҲИЯ НАМУНАИ ИБРАТАНД

МАРЗ. Боздошти қочоқбарон

КӮЛОБ. ИФТИТОҲИ БОҒЧАИ НАВ

05.09.2018


БӮСТОН. Бунёди чор иншооти нав

ФУТБОЛ. Дар Тоҷикистон мусобиқаҳои байналмилалӣ доир мегарданд

Ориф Алвӣ 13-умин президенти Покистон интихоб гашт

Дар Арабистони Саудӣ барои маводи тахрибӣ дар интернет зиндонӣ мекунанд

Дар Гуҷарат сохтмони баландтарин ҳайкали дунё анҷом меёбад

Ҳиндустон барномаи нави кайҳониро амалӣ месозад

04.09.2018


Боздиди Сарвазири мамлакат аз иншооти гармидиҳии шаҳри Душанбе


Дар сомонаҳои дигари Тоҷикистон хонед