logo

иқтисод

ҚУБОДИЁН. САҲМИ ОН ДАР РУШДИ ИҚТИСОДИ МИЛЛӢ МЕАФЗОЯД

Саидумрон АБДУРАҲМОНЗОДА,

раиси ноҳияи Қубодиён, узви Маҷлиси миллии

Маҷлиси Олии Ҷумњурии Тоҷикистон

 

 

Қубодиёни куҳанбунёд ҷузъи таърихи қадимаи тоҷикон буда, тибқи маъхазҳои таърихӣ мафҳуми Қубодиён ба номи асосгузори сулолаи Каёниён - Кайқубод мансуб аст ва аз рӯи маълумоти баъзе сарчашмаҳо дорои таърихи сеюнимҳазорсола мебошад.
Эмомалӣ РАҲМОН

Истиқлолияти давлатӣ ҳамчун падидаи муқаддасу муҳими давлатдорӣ барои рушди ҳамаи соҳаҳои хоҷагии халқи мамлакат хишти асос гузошт. Бо касби Истиқлолияти давлатӣ орзуву омоли деринаи мардум ҷомаи амал пӯшид. Ин ҷашни таърихӣ, ки пас аз ҳазор сол насибамон гашт, барои мурдуми тоҷик озодӣ ва баҳри имрӯзу ояндаи худ мубориза бурданро омӯзонд. Нобасомониву нооромиҳои дар ин давра баамаломада, мардумро ҳушёртар ва аз ҷиҳати сиёсӣ зирактар намуданд. Маҳз ба шарофати Истиқлолияти давлатӣ тоҷикону тоҷикистониҳо дарк карданд, ки Ватани аҷдодиро метавон танҳо бо дастони худ ободу зебо гардонд. Сокинони ноҳияи Қубодиён низ бо шукргузорӣ аз кишвари соҳибистиқлол ва пойдории ваҳдати миллӣ ба таҷлили ин санаи таърихӣ омодагии ҷиддӣ дида истодаанд.
 Самараи ҳамин меҳру муҳаббат нисбат ба сарзамини аҷдодист, ки имрӯз сатҳи зиндагии сокинони ноҳия ба маротиб беҳтар гардида, кӯчаву гулгаштҳо симои дигар гирифтаанд. Маҳз бо дастгирию ғамхориҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Қарори Ҳукумати мамлакат, аз 30 декабри соли 2015, таҳти № 797 «Барномаи рушди иҷтимоию иқтисодии ноҳияи Қубодиён барои солҳои 2016-2020» бо ҷалби 103 лоиҳа ва маблағи умумии 108655,0 ҳазор сомонӣ тасдиқ гардид. Амалӣ гардидани ин барнома имкон медиҳад, ки иқтидорҳои маҳаллӣ ба кор даромада, рушди устувори иқтисодиёти ноҳия таъмин, ҷойҳои нави корӣ таъсис ва сатҳи зиндагии мардум боз ҳам беҳтар гардад.
Қубодиён дар рушди устувори иқтисоди миллӣ саҳми муносиб мегузорад. Истеҳсоли маҳсулоти кишоварзӣ соли сипаришуда 664,6 миллион сомониро ташкил дод. То 31 майи соли ҷорӣ кишоварзони ноҳия ба хориҷи кишвар 3208 тонна меваю сабзавот содир карданд ва ният доранд, ки онро то охири мавсим ба 4500 тонна расонанд.
Саҳми соҳибкорони маҳаллӣ дар рушди устувори ноҳия низ хеле назаррас аст. Ду сол пеш дар Ҷамоати деҳоти ба номи У. Назаров аз ҷониби соҳибкор Мурод Тоҷиев бо дастгирии Муассисаи давлатии «Фонди дастгирии соҳибкорӣ» - и назди Ҳукумати Ҷумҳурии Тоҷикистон корхонаи хишти «Сафар Мурод» ба маблағи 500 ҳазор сомонӣ мавриди истифода қарор гирифт.
Дар Ҷамоати деҳоти Тахти Сангин соҳибкор Карим Гулаҳмадов бо дастгирии муассисаи мазкур корхонаи истеҳсоли маҳсулоти меваю сабзавоти ҶДММ «Насими Раҳим» - ро ба маблағи 500 ҳазор сомонӣ бунёд кард. Соҳибкор Зоҳиршоҳ Исмоилов дар Ҷамоати деҳоти ба номи И. Ниёзов ба маблағи 1 миллиону 800 ҳазор сомонӣ корхонаи коркарди пашм, тибит, торак ва пат сохт. Ҳоло дар Ҷамоати деҳоти «20 – солагии Истиқлол» бунёди корхонаи истеҳсоли маҳсулоти меваю сабзавот ба маблағи 670 ҳазор сомонӣ, бо таъсиси 51 ҷойи кори доимӣ, аз ҷониби соҳибкор Алламурот Менглиқулов ба нақша гирифта шудааст.
 Маҳз бо дастгирию ғамхориҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон корхонаи ҶСП “Аввалин ”фаъолияти хешро дар самти парвариш ва коркарди ширинбия аз соли 2010 дар асоси Ёддошти тафоҳум байни Ҳукумати Ҷумҳурии Тоҷикистон ва ширкати “Коки системз Ко. ЛТД” давлати Ҷопон дар Ҷамоати деҳоти Навобод ба роҳ мондааст. Корхона ба маблағи 3 миллион доллари ИМА бунёд ёфта, барои истеҳсоли дору (табобати бемориҳои ҷигар) маҳсулоти нимтайёр омода месозад. Дар сурати фаъолияти шабонарӯзӣ корхона имкон дорад, ки то 2000 тонна решаи ширинбияро солона коркард намуда, то 200 тонна экстракт истеҳсол намояд. ҶПС “Аввалин” 1442 гектар заминро истифода бурда, барои парвариш, ҷамъоварӣ ва коркарди решаи ширинбия дар маҷмӯъ 500 нафар сокинони маҳаллӣ бо ҷойи кори мавсимӣ ва 68 нафар доимӣ таъмин гардиданд. Инчунин, соли 2013 дар ҷамоати мазкур дар заминаи корхонаи ҶСП “Аввалин”, ҶДММ “Ориё-М” таъсис дода шуд, ки аз пазандозҳои тозаи ширинбия брикетҳои сӯзишвории аз ҷиҳати экологӣ бехатару тоза ва дорои қобилияти гармидиҳии баланду устувор тайёр карда мешавад.
 Масъалаи муҳайё намудани ҷойҳои нави корӣ дар маркази таваҷҷуҳи мақомоти иҷроияи маҳаллии ҳокимияти давлатии ноҳия қарор дорад. Танҳо дар панҷ соли охир 16442 ҷойи нави корӣ ташкил шудааст. Дар ин давра баҳри иҷрои ҳадафҳои пешбинишуда корхонаи яхмосбарории «Зарифа», ду коргоҳи коркарди қуму шағал, ҶДММ «Истеҳсол» ва «Бахтулло» ба истифода дода шуданд.
 Дар ҷараёни сафари кории Асосгузори сулҳу ваҳдати миллӣ-Пешвои миллат Эмомалӣ Раҳмон 7 октябри соли 2014 санги асоси бинои идораи маориф, муассисаи таҳсилоти миёнаи умумии № 54 ва мактаб - интернати ноҳия гузошта шуда, айни ҳол сохтмони онҳо идома дорад. Имрӯз баҳри таъмини шароити мусоид барои таълиму тарбияи наврасону ҷавонон дар ноҳия 67 муассисаи таълимӣ фаъолият дорад. Бо назардошти талаботи аҳолӣ дар заминаи муассисаҳои таълимӣ дар ин давра 167 синфхонаи иловагӣ бо 4175 ҷойи нишаст ба истифода дода шудааст.
 Бунёди муассисаҳои нави тандурустӣ ва бо таҷҳизоти муосири тиббӣ таъмин намудани онҳо, баланд бардоштани сатҳу сифати хизматрасонии тиббӣ, таблиғу ташвиқи тарзи ҳаёти солим вазифаи аввалиндараҷаи мақомоти иҷроияи маҳаллии ҳокимияти давлатӣ ва кормандони соҳаи тандурустии ноҳияи Қубодиён мебошад. То имрӯз ҳамаи шуъбаҳои сохтори госпиталии ноҳия таъмири асосӣ шуда, шуъбаҳои бемориҳои ишемиявии дил ва урологӣ ташкил гардиданд. Дар ин давра ҳафт маркази саломатӣ бунёд ва бо таҷҳизоти замонавиву нақлиёти санитарӣ таъмин гашт. Соли ҷорӣ дар деҳаҳои Ҳаваскор ва Навбаҳор бунгоҳҳои тиббӣ мавриди истифода қарор гирифтанд.
Боиси ифтихору сарбаландии ҳар як сокини ин куҳандиёр аст, ки дар ноҳия 16 ёдгории таърихӣ, аз қабили Тахти Сангин, Қалъаи Мир, Теппаи Шоҳ, Тахти Қубод, Сафедмазор ва Куҳандиз мавҷуд мебошанд. Маҷмааи Тахти Сангин дар замони Искандари Мақдунӣ бино гардида, ҷузъи «Ганҷинаи Амударё» маҳсуб мешавад. Аз ин хотир, маҷмааи мазкур дар баробари дигар ёдгориҳои таърихиву меъмории кишвар ба «Барномаи давлатии ҳифзи мероси таърихиву фарҳангӣ барои солҳои 2012-2020» дохил шудааст, ки тибқи нақша корҳои барқарорсозии он соли 2017 оғоз меёбанд.
 Бо мақсади эҳёи осори пурғановати гузаштагон бо Қарори Ҳукумати Ҷумҳурии Тоҷикистон 1000 - солагии мутафаккири тоҷику форс Носири Хусрави Қубодиёнӣ таҷлил гардида, пайкараи ӯ дар маркази ноҳия қомат афрохт. Баҳри эҳёи фарҳанги миллӣ, рушди ҳунарҳои мардумӣ корхонаи қолинбофии «Бибиҳалима» фаъолият карда истодааст.
 Хотирнишон месозем, ки маркази маъмурии ноҳия бо дастгирии бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, 3 марти соли равон, расман мақоми шаҳраки Қубодиёнро гирифт. Ҳамзамон, ба хотири дар оянда ба яке аз марказҳои зебову шукуфон ва дорои кулли шароити шоистаи вилояти Хатлон табдил ёфтани ин шаҳраки навтаъсис, ҳудуди он аз ҳисоби ду деҳоти дигари ноҳия васеъ шуд.
Хулоса, Истиқлолияти давлатиро ҳамчун марҳалаи дурахшону пурифтихори фарҳангу тамаддуни миллӣ, авҷи камолоти давлатдорӣ, даврони ташаккули неруи зеҳнӣ ва замони муаррифии Тоҷикистон чун кишвари соҳибистиқлол метавон арзёбӣ намуд. Зеро хурдтарин дастовард, комёбӣ ва нишоту озодӣ бо истиқлолу ваҳдати миллӣ тавъам буда, арҷгузорӣ ва ҳифзи ин арзишҳои бузург вазифаи ҷониву виҷдонии ҳар як фарди худшиносу худогоҳ аст.
 


Баёни ақида (0)    Санаи нашр: 23.06.2016    №: 122-123    Мутолиа карданд: 705

15.02.2019


ШАМШЕРБОЗӢ. ИШТИРОКИ ВАРЗИШГАРОНИ МО ДАР ЧЕМПИОНАТИ КУШОДИ ОСИЁИ МАРКАЗӢ

ҶАҲОН ДАР ЯК САТР

Дар Душанбе ташкили низоми муттаҳидаи мудофиаи зиддиҳавоӣ баррасӣ шуд

Дар чор сол муомилоти мол байни Тоҷикистону Ӯзбекистон 19 маротиба афзуд

Медведев: «Таҳримоти ИМА ба иқтисоди Россия таъсири чандон бузург расонда наметавонад»

Пентагон. ИМА аз Афғонистон ҳамроҳи иттифоқчиёнаш меравад

13.02.2019


2018. Сиёсати хориҷии Тоҷикистон пурбарор буд

КОРРУПСИЯ. 2047 ҷиноят ошкор гардид

САНОАТ. Беш аз 10 миллиард сомонӣ маҳсулот содирот шуд

САРМОЯИ МУСТАҚИМ. Воридот дар ҳоли афзоиш аст

ОБ. Таъминоти аҳолӣ рӯ ба беҳбудӣ дорад

АВҶИ ОБОДКОРИҲО ДАР ШАҲРИ ТУРСУНЗОДА

12.02.2019


АКАДЕМИЯИ ИЛМҲО АЗ КАШФИЁТИ НАВ ТО САНОАТИ ДОРУСОЗӢ

КӮЛОБ. Содироти 825 тонна маҳсулоти кишоварзӣ

ДАНҒАРА. Саноатикунонӣ вусъат мегирад

ФУРУДГОҲҲОИ БАЙНАЛМИЛАЛӢ. Сатҳи хизматрасонӣ рӯ ба беҳбудӣ дорад

ДДК. Авлавият ба сатҳи касбият ва таълим

САДА. Тантанаи ҷашни миллӣ дар ноҳияи Шамсиддини Шоҳин

11.02.2019


ВАЗОРАТИ ФАРҲАНГ. 2018 - соли муваффақиятҳо буд

КУМИТАИ РУШДИ САЙЁҲӢ. Беш аз 1 миллион сайёҳ ба Тоҷикистон омад

МТС. Ҳамкориҳо бо Ӯзбекистон густариш меёбанд

ВМКБ. Гумрукчиён ба буҷет 16,9 миллион сомонӣ ворид карданд

ҲИСОР. Саҳми назарраси соҳибкорон дар ободонии шаҳр

НОҲИЯИ РӮДАКӢ. Ҳаҷми истеҳсоли маҳсулот ба 1 миллиард сомонӣ расид

ВАРЗОБ. Таваҷҷуҳи сайёҳон ба нуқтаҳои истироҳатӣ афзудааст

08.02.2019


Вазорати меҳнат, муҳоҷират ва шуғли аҳолӣ. Музди миёнаи меҳнат - 1220 сомонӣ

КУМИТАИ ТЕЛЕВИЗИОН ВА РАДИО. Сифати кори шабакаҳо беҳтар мешавад

КҲФМГ. Офатҳои табиат 34 миллион самонӣ хисорот овард

Саноатикунонӣ дар Шаҳринав

Меъёри бозтамвил ба 14 дарсад поён фаромад

ШАҲРИ ВАҲДАТ. Иҷрои барзиёди андози иҷтимоӣ

ТАНЗИМ. Қонуншиканӣ коҳиш ёфтааст

СОҲИЛ. Корҳои мустаҳкамсозӣ вусъат меёбанд

ДДСТДТ. Авлавият ба рушди ҳунарҳои мардумӣ


Дар сомонаҳои дигари Тоҷикистон хонед