logo

сиёсат

МАНФИАТҲОИ МИЛЛӢ. ҲИФЗИ СОДИҚОНАИ ОНҲО ҚАРЗИ ШАҲРВАНДИИ ҲАР ФАРДИ ХУДОГОҲ МАҲСУБ МЕЁБАД

Мирзошоҳрух АСРОРӢ,
муовини якуми раиси Шӯрои
марказии Ҳаракати ҷамъиятии ваҳдати миллӣ
ва эҳёи Тоҷикистон, раиси комиҷроияи Ҳаракат

Ба имзо расидани Созишномаи умумии истиқрори сулҳ ва ризоияти миллӣ аз муҳимтарин воқеаҳои ҳаёти ҷамъиятиву сиёсӣ, дилхоҳтарин армуғоне буд, ки онро нуздаҳ сол муқаддам, пас аз панҷ соли ҷанги фалокатбори дохилӣ, маҳрумияту нокомиҳо Пешвои ҷонсупори миллат, Сарвари давлати Тоҷикистон муҳтарам Эмомалӣ Раҳмон тақдими мардуми азияткашидаи тоҷик намуд.

Рӯзи 27 июни соли 1997 фурудгоҳи шаҳри Душанбе аз пиру барно, марду зан, чеҳраҳои шукуфону дидаҳои пурнур мавҷ мезад. Мардум Сарвари муаззами кишварро пас аз имзои санади сарнавиштсоз, кафолатномаи раҳоӣ аз ҷанги бунёдсӯз дар шаҳри Маскав бо оғӯшҳои кушода, бо гулдастаҳо истиқбол мекарданд…
Сокинони мамлакат, ҳаммиллатон, ҳазорон нафар дӯстонамонро дар саросари олам он шабу рӯз рӯҳияи идона ва шодию нишот фаро гирифта буд, ки бесабаб нест. Санади сулҳу созиш умедҳои барбодрафтаро ба рӯзгори тинҷу осудаю Тоҷикистони озоду мустақил дигарбора эҳё намуд ва кишвару миллатро аз вартаи нобудӣ раҳо бахшид. Ҷанги тӯлоние, ки дар идомаи он ҳазорон нафар одамони бегуноҳ куштаю захмӣ гардида, корхонаю иншоот, манзилҳои мардум сӯзондаю валангор шуда буданд, хотима ёфт. Барои раҳоӣ аз гуруснагию  қаҳтие, ки бар асари нооромиҳо дар баъзе манотиқи кишвар ба миён омада буд, умеди наҷот пайдо гардид.
Имзои Созишномаи умумии истиқрори сулҳ ва ризоияти миллӣ пеши роҳи ҳамаи ин тамоюлҳои ногуворро, ки Тоҷикистони азизи моро амалан ба вартаи фоҷиаи бузурги миллӣ мекашонданд, гирифт. Равандҳои нави наҷотбахш оғоз гардиданд.
Мардуми кишвар бошанд, ба ҳаёти осоишта ва ободию созандагиҳо рӯ оварданд. Вале, чуноне медонем, расидан ба сулҳу амнияти сартосарӣ, ба ин рӯзи мурод ва саодату хушбахтӣ кори саҳлу осон набуд. Ин сулҳ, воқеан ҳам, чуноне Лоиқ Шералии зиндаёд он шабу рӯзҳо гуфта буд, «сулҳи деринтизор»-е гардид, ки барои ҳосил шуданаш заҳмату талошҳои чандинсола ба кор рафтаанд, басо шабҳое аз паи гуфтушунидҳо саҳар шудаанд ва басо лаҳзаҳои қаноатмандӣ ва ноумедию дилмондагӣ дар ҷараёни онҳо сипарӣ гардидаанд, ки самарааш ҳамин номаи наҷоти миллат гардидааст.
Акнун таҷрибаи сулҳи тоҷикон аз ҷониби маҳофили байналмилалӣ чун намунаи нодири рафъи оқилонаи низоъҳои дохилӣ шинохта шуда, мавриди омӯзишу пайравӣ қарор дорад, ки ин таҷриба, барҳақ, маҳсули ҳунар ва заковати Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шумор меравад. Муҳимтарин сабақе, ки аз таҷрибаи сулҳи мо бармеояд, таъмини ваҳдати миллист. Барои ҳамин бесабаб нест, ки Сарвари мамлакат муҳтарам Эмомалӣ Раҳмон ваҳдати миллиро баробари истиқлолият барои давлатдории навини тоҷикон азизу муқаддас мешуморанд.
Воқеият гувоҳ аст,  ки мо дар ҷодаи таҳкими ваҳдати миллӣ давоми солҳои соҳибистиқлолӣ иқдомоти бузургеро амалӣ гардондем. Агар дар соҳаи сиёсат бигирем, инҳо таъмини озодиҳои демократӣ, интихоботи шаффофу ошкоро, озодии баён ва матбуоти озод, фаъолияти озоди сиёсӣ ва диндорӣ, бисёрҳизбият, волоияти ҳуқуқу озодиҳои инсон ва амсоли онҳо мебошанд, ки ҳамагӣ заминаҳоро барои таъмини ваҳдати миллӣ қавӣ мегардонанд.
Дар бахши иқтисодию иҷтимоӣ ҳам дигаргуниҳои азим ба вуқӯъ пайвастанд, ки симои шаҳру ноҳияҳои моро билкул дигар карда, ваҳдати миллиамонро таҳким бахшиданд. Тавассути роҳҳо ба ҳам васл намудани тамоми манотиқи кишвар, таъмини рушди баробари саноатию аграрии онҳо, таҳкими равобити гуногунҷанбаи иқтисодию хоҷагии миёни шаҳру ноҳияҳо аз ҳамон ҷумлаанд, ки дар ташаккули ваҳдати миллиамон хидмат хоҳанд кард. Акнун касе гуфта наметавонад, ки мо имрӯз дар дохили кишвар бозори муштараки иқтисодию хоҷагӣ надорем.
Дар зимн мехоҳам боз як пораеро аз суханони Пешвои муаззами миллатамон муҳтарам Эмомалӣ Раҳмон иқтибос орам, ки он метавонад шиор ва барномаи ҳаёти ҳар як сокини бедордили ин Ватан бошад: «Ҳифзи содиқонаи манфиатҳои милливу давлатӣ, аз тамоми манфиатҳои дигар болотару афзал донистани манофеи давлат ва миллат, саъю талоши пайгирона ба хотири таҳкими пояҳои давлати соҳибистиқлоли миллӣ, чун неъмати бебаҳо ҳифз кардани соҳибихтиёрии Ватан, сулҳу суботи иҷтимоӣ, амнияти давлат ва ҷомеа, ваҳдати миллӣ ва тақвияти иқтидори иқтисодии давлат вазифаи ҷонӣ ва қарзи виҷдониву имонии ҳар яки мову шумо-аъзои Ҳукумат, вакилони мардумӣ, роҳбарону масъулони идораҳо ва ташкилоту муассисаҳо, хизматчиёни давлатӣ ва умуман, тамоми халқи Тоҷикистон мебошад».
Дар роҳи нишондодаи Пешвои миллатамон гом бардошта, мо рӯзгори пурсаодати хеш, фарзандону наберагон, ваҳдати ҷовидонаи миллатамонро таъмин хоҳем кард.
 


Баёни ақида (0)    Санаи нашр: 26.06.2016    №: 125    Мутолиа карданд: 369

21.11.2018


Аз таркиш дар Кобул беш аз 50 нафар ҳалок шуд

Ӯзбекистон нахустин намоишгоҳ-ярмаркаи байналмилалии содиротӣ мегузаронад

Могерини: «Иттиҳоди Аврупо «артиши аврупоӣ» ташкил карданӣ нест»

Табобати гепатити С дар Беларус аз арзонтарин дар Аврупост

Ҷаҳон дар як сатр

ДУШАНБЕ. Таҷлили нахустин ҷашни занони соҳибкор

ДЕВАШТИЧ. Тантанаи Рӯзи Президент

Иштироки мунтахаби футболи бонувон дар CAFA

20.11.2018


СУҒД. Оғози сохтмони раёсати маориф

ЛЕВАКАНТ. Конфронси илмӣ - назариявӣ ба ифтихори Иҷлосияи XVI

"Парасту" дар Тоҷикобод

Сарони кишварҳои Осиёи Марказӣ барои машварат дар Тошканд ҷамъ меоянд

Финляндия ҷонибдори ҳузури Россия дар Шӯрои Аврупо

Вазорати маорифи Афғонистон 30 ҳазор занро ба кор мегирад

Баррасии рушди инклюзивии иқтисоди қитъа дар Гвинея Папуаи Нав

Ҷаҳон дар як сатр

АНВАР ЮНУСОВ СОҲИБИ КАМАРБАНДИ WBF

"СОРО КОМПАНИЯ" ҒОЛИБИ ЛИГАИ КАСБИИ ФУТЗАЛИ ТОҶИКИСТОН

19.11.2018


ДЕВАШТИЧ. Авҷи созандагиҳо дар Ҷамоати деҳоти Яхтан

Артиши Сурия охирин истеҳкоми «ДИ» дар ҷануби кишварро зери назорат гирифт

Дар ҳама минтақаҳои Ӯзбекистон «мактаби президентӣ» месозанд

Роҳандозии барномаи махсуси давлатии ипотекӣ барои дӯзандагони Қирғизистон

Киштии зериобии «Сан Хуан» - ро дар уқёнуси Атлантика ёфтанд

Ҷаҳон дар як сатр

Кулишов: «Марзҳои ИДМ бо таҷҳизоти муосир таъмин карда мешаванд»

Дар Тоҷикистон омӯзгори забони англисӣ барои таблиғи «ДИ» 19 сол гирифт

Қазоқистон мубориза бо машруботро сахттар мекунад

Фоидаи туризм ба кадом шаҳри дунё бештар аст?

Ҷаҳон дар як сатр

"ИСТИҚЛОЛ" бори аввал барои Ҷоми чемпионҳои КФО мубориза хоҳад бурд

Омодагии тими миллӣ ба марҳилаи интихобии Ҷоми ҷаҳон – 2022

УСМОН ТОШЕВ САРМУРАББИИ НАВИ ДАСТАИ МУНТАХАБ

15.11.2018


Ҳамоиш бахшида ба Рӯзи Президент

Нурдинҷон Исмоилов ба Тоҷикистон меояд


Дар сомонаҳои дигари Тоҷикистон хонед