logo

иҷтимоиёт

МУШКИЛИ ПОЧТА ДАР ЧИСТ?

Ё ЧАРО РӮЗНОМАҲО БА СЕ НОҲИЯ ДЕР МЕРАСАНД?
Дар гӯшаҳои алоҳидаи вилояти Хатлон дурии роҳ, надоштани автомашинаҳои хидматӣ ва камбуди молиявӣ дасти кормандони шуъбаҳои алоқаи почтаро бобати сари вақт ба муштариён расондани матбуоти даврӣ кӯтоҳ кардааст.

Бо аспи шахсӣ дар хидмати халқ
Зерсохторҳои Корхонаи фаръии КВД “Почтаи тоҷик” дар вилояти Хатлон дар як ҳафта беш аз 60 номгӯи рӯзномаю маҷаллаҳои ҷумҳуриявию маҳаллиро дар вилоят паҳн мекунанд, ки вазни холиси якрӯзаашон беш аз 1100 килограмм аст. Аксари нашрияҳо ҳафтае як маротиба ба табъ мерасанд, вале “Ҷумҳурият”, “Садои мардум” ва “Имрӯз News” аз панҷ то седафъаӣ чоп мешаванд. Мақсад, агар хаткашон ба ҳудуди фаъолияти хеш ҳафтае панҷ рӯзи корӣ сафар накунад, албатта, муҳтавои ҷарида, махсусан “Ҷумҳурият”, куҳнаву нодаркор мегардад. 
Таҳқиқи бевоситаи мо нишон дод, ки ба истиснои ноҳияҳои алоҳида - Ховалинг, Шамсиддини Шоҳин, Вахш дар дигар ҷойҳо дастраснамоии матбуоти даврӣ нек ба роҳ монда шудааст. Аммо, чаро кори шуъбаҳои алоқаи се ноҳияе, ки зикрашон рафт, ба талабот ҷавобгӯ нест? Дар посух ба ин суол муовини директори Корхонаи фаръии КВД “Почтаи тоҷик” дар вилояти Хатлон Зоиршо Мирзоев чунин гуфт:
“Якчанд деҳа аз марказҳои маъмурӣ хеле дур ҷойгир шудаанд. Шуъбаҳои алоқа автомашинаи махсуси хидматӣ надоранд, то ҳамарӯза он масофаро ба осонӣ тай кунанд”.
 - Ба баъзе деҳаҳои дурдасти кӯҳистон рӯзномаю маҷаллаҳоро дар як ҳафта се маротиба бурда метавонем, - мегӯяд Нуралӣ Убайдов, сардори Маркази алоқаи почтаи ноҳияи Ховалинг. - Ман собиқаи кории 29 - сола дорам. Азбаски солҳои пеш тавассути почтаҳо амалиёти бештар сурат мегирифт, колхозу совхозҳои собиқ ба мо асп медоданд ва ҷавашро ҳам таъмин мекарданд. Ҳозир ягон нақлиёт надорем. Таксиронҳо барои то мактаби “Оби Дара” - и Ҷамоати деҳоти Лоҳутӣ рафтану омадан 40 сомонӣ талаб мекунанд.
- Ба Ҷамоати деҳоти “Машъал” муросилоти почтавию рӯзномаҳоро ҳафтае ду маротиба бурда метавонему халос, - иброз кард Алишер Ҷӯраев, сардори Маркази алоқаи почтаи ноҳияи Вахш. - Зеро бархе деҳаҳо аз маркази ҷамоат 60 - 80 километр дур ҷойгиранд. Хаткашон аспи шахсиашро кор мефармояд. Роҳ, ки дур аст, на ҳар кас бо мо кор кардан мехоҳад.
Умеда Собирова, сардори Корхонаи фаръии КВД “Почтаи тоҷик” дар вилояти Хатлон, изҳор намуд, ки ниҳоди онҳо бинобар мавҷуд набудани даромади иловагӣ бидуни ёрии мақомоти иҷроияи маҳаллии ҳокимияти давлатии шаҳру ноҳияҳо наметавонад мушкилоти марбут ба нақлиётро дар 176 шуъбаи алоқаи почта ҳал намояд. “Барои ҳалли ҳамин мушкилот давоми шаш соли охир Хадамоти алоқаи почтаи Ҳукумати Ҷумҳурии Тоҷикистон идораи вилоятиро бо се автомашинаи боркашу сабукрав таъмин кард. Аз ин лиҳоз, мо ҳамеша шумораҳои фардоинаи кулли рӯзномаҳоро аз матбааҳои пойтахти мамлакат як рӯз пеш аз тақсимот ба вилоят ворид мекунем”, - афзуд Умеда Собирова.   

Кор ҳаст, идора не?
Ба қавли Зоиршо Мирзоев дар фаъолияти онҳо мушкилоти фавқ, мутаассифона, намунаи ягона нест.
- Аз сабаби таҷдид шудани колхозу совхозҳо ва ба тавозуни хоҷагиҳо гузаштани биноҳои шуъбаҳои алоқаи почта феълан 61 шуъбаи алоқа бинои расмӣ надорад, - гуфт ӯ. - Кормандон фаъолияташонро дар хонаҳои худ ва дар биноҳои “Тоҷиктелеком”-у ҷамоатҳо амалӣ мекунанд, ки ин хилофи талаботи соҳа аст. 
Дар мавриди бо иншоот таъмин намудани муассисаҳои мавриди таҳлил дар сархати чоруми моддаи 25 - и Қонуни Ҷумҳурии Тоҷикистон “Дар бораи алоқаи почта” аз 9 августи соли 2003 чунин омадааст: “Мақомоти ҳокимияти иҷроия дар маҳалҳо вазифадоранд ташкилотҳои давлатии алоқаи почтаро дар биноҳои истиқоматӣ ё дигар биноҳое, ки ба меъёрҳои технологӣ мувофиқанд, ройгон ҷойгир намоянд”. 
Ба гуфтаи ҳамсуҳбати мо, садорати корхонаи онҳо ин муқаррароти қонунро чандин маротиба ба таври шифоҳию хаттӣ бо раисони шаҳру навоҳии вилоят дар миён гузоштаанд, аммо аз натиҷаи мусбат ҳанӯз дарак нест.

Мукотибақуттиҳо куҷо шуданд?
Мушкили дигар дар бобати сари вақт дастрас кардани нашрияҳоро инҷониб муддати мадидест, ки мустақиман мушоҳида дорад. Намедонам чаро, дар аксар биноҳои чандқабатаи вилоят мукотибақуттиҳо ё худ қуттиҳои почтавӣ канда партофта шудаанд. Ҳангоми сохтани биноҳои истиқоматии нав низ насби он дар назари дастандаркорон як кори беҳуда менамояд.
- Дар вилоят рӯзномаву маҷаллаҳои беш аз чор ҳазор нафар ба хонаҳояшон бурда мешавад, - иброз дошт Маҳмадалӣ Хидиров, сардори шуъбаи муросилот ва хоҷагидории Корхонаи фаръии КВД “Почтаи тоҷик” дар вилояти Хатлон. - Дар сурати набудани мукотибақуттӣ мо маҷбурем, ки то 5-уму 9-ум ошёна бароем. Ва, агар соҳибхонаро пайдо накардем, маҷбур рӯзи дигар меоем. Барои хаткашонҳо, ки аксарияташон миёнаумру пиронсоланд, ин кори осон нест. 

Шахсияти ватандӯстро мо созем ё дигарон?
Ҳамаи ин мушкилот, ки хоси дигар марказҳои алоқаи почтаи ҷумҳурӣ низ ҳаст, оё метавонанд дар масири шаклгирии шахсияти комил, ҳоло дар мисоли хатлониҳо, таъсири манфӣ расонанд? Дилшод Назирмадов, устоди кафедраи рӯзноманигории Донишгоҳи давлатии Кӯлоб ба номи А. Рӯдакӣ, мегӯяд, ки ин аз эҳтимол дур нест. “Дар кӯҳистон деҳаҳое ҳастанд, ки ҳатто хати барқ надоранд. Биноан, на ҳама аз тамошои барномаҳои телевизионӣ ва истифодаи шабакаи ҷаҳонии  интернет бархӯрдоранд. Матбуоти даврӣ барои сокинони ин гуна мавзеъҳо воситаи муассиртарини воқиф шудан аз навгониҳои ҳаёт маҳсуб меёбад”, - изофа кард ӯ.

Сафи рӯзномахонҳо кай меафзояд?
Дар ҳошияи андешаҳои ин устоди донишгоҳ зикр карданием, ки масъулон бояд нақши матбуоти даврии ватаниро дар ташаккули андешаи миллӣ нодида нагиранд. Ва, ҳамзамон, ба василаи дигар фаъолон муваффақ бар он шаванд, ки сафи рӯзномахонҳо афзояд. Донишро беҳуда “чароғи равшан” нагуфтаанд. Хирадманд аст, ки даст ба ободкорӣ мезанад. Агар сарватмандон аз ашхоси хоҳишманд дар як сол як маротиба зимни обунашавӣ мадади хешро дареғ надоранд, гӯё барои худ як садақаи ҷория карда бошанд. Чунки хонандаи рӯзнома, яъне ҷӯяндаи ахбору мақола ҳам як толиби илм аст. Вале, мутаассифона, дар истинод ба таҳлилҳои коршиносон дар як вилояти калонтарини кишвар - Хатлон, ки нуфузи аҳолиаш бидуни кӯдакону пирон наздик ба 2 миллион аст, ба 25-30 нафар як рӯзномаю маҷалла рост меояду бас. Оё ин дар шароити ҷанги иттилоотӣ ва афзоиши мағзшӯии ҷавонон кофист? Масъулон сари ин масъала чаро андеша намекунанд?

Зокир ҲАСАН, “Ҷумҳурият”


Баёни ақида (0)    Санаи нашр: 16.07.2016    №: 137    Мутолиа карданд: 535

15.02.2019


ШАМШЕРБОЗӢ. ИШТИРОКИ ВАРЗИШГАРОНИ МО ДАР ЧЕМПИОНАТИ КУШОДИ ОСИЁИ МАРКАЗӢ

ҶАҲОН ДАР ЯК САТР

Дар Душанбе ташкили низоми муттаҳидаи мудофиаи зиддиҳавоӣ баррасӣ шуд

Дар чор сол муомилоти мол байни Тоҷикистону Ӯзбекистон 19 маротиба афзуд

Медведев: «Таҳримоти ИМА ба иқтисоди Россия таъсири чандон бузург расонда наметавонад»

Пентагон. ИМА аз Афғонистон ҳамроҳи иттифоқчиёнаш меравад

13.02.2019


2018. Сиёсати хориҷии Тоҷикистон пурбарор буд

КОРРУПСИЯ. 2047 ҷиноят ошкор гардид

САНОАТ. Беш аз 10 миллиард сомонӣ маҳсулот содирот шуд

САРМОЯИ МУСТАҚИМ. Воридот дар ҳоли афзоиш аст

ОБ. Таъминоти аҳолӣ рӯ ба беҳбудӣ дорад

АВҶИ ОБОДКОРИҲО ДАР ШАҲРИ ТУРСУНЗОДА

12.02.2019


АКАДЕМИЯИ ИЛМҲО АЗ КАШФИЁТИ НАВ ТО САНОАТИ ДОРУСОЗӢ

КӮЛОБ. Содироти 825 тонна маҳсулоти кишоварзӣ

ДАНҒАРА. Саноатикунонӣ вусъат мегирад

ФУРУДГОҲҲОИ БАЙНАЛМИЛАЛӢ. Сатҳи хизматрасонӣ рӯ ба беҳбудӣ дорад

ДДК. Авлавият ба сатҳи касбият ва таълим

САДА. Тантанаи ҷашни миллӣ дар ноҳияи Шамсиддини Шоҳин

11.02.2019


ВАЗОРАТИ ФАРҲАНГ. 2018 - соли муваффақиятҳо буд

КУМИТАИ РУШДИ САЙЁҲӢ. Беш аз 1 миллион сайёҳ ба Тоҷикистон омад

МТС. Ҳамкориҳо бо Ӯзбекистон густариш меёбанд

ВМКБ. Гумрукчиён ба буҷет 16,9 миллион сомонӣ ворид карданд

ҲИСОР. Саҳми назарраси соҳибкорон дар ободонии шаҳр

НОҲИЯИ РӮДАКӢ. Ҳаҷми истеҳсоли маҳсулот ба 1 миллиард сомонӣ расид

ВАРЗОБ. Таваҷҷуҳи сайёҳон ба нуқтаҳои истироҳатӣ афзудааст

08.02.2019


Вазорати меҳнат, муҳоҷират ва шуғли аҳолӣ. Музди миёнаи меҳнат - 1220 сомонӣ

КУМИТАИ ТЕЛЕВИЗИОН ВА РАДИО. Сифати кори шабакаҳо беҳтар мешавад

КҲФМГ. Офатҳои табиат 34 миллион самонӣ хисорот овард

Саноатикунонӣ дар Шаҳринав

Меъёри бозтамвил ба 14 дарсад поён фаромад

ШАҲРИ ВАҲДАТ. Иҷрои барзиёди андози иҷтимоӣ

ТАНЗИМ. Қонуншиканӣ коҳиш ёфтааст

СОҲИЛ. Корҳои мустаҳкамсозӣ вусъат меёбанд

ДДСТДТ. Авлавият ба рушди ҳунарҳои мардумӣ


Дар сомонаҳои дигари Тоҷикистон хонед