logo

сиёсат

МУЛОҚОТИ САРВАРИ ДАВЛАТ БО РОҲБАРОНУ МУТАХАССИСОНИ НЕРУГОҲ ВА СОКИНОНИ ШАҲРИ РОҒУН

5 август, дар рӯзи дуюми сафари корӣ ба шаҳри Роғун, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пас аз шиносоӣ бо рафти корҳои барқарорсозӣ дар Неругоҳи барқи обии Роғун ва суҳбати гарму созанда бо коргарони матиниродаи ин иншооти муҳим дар як макони зебову дилфиреби шаҳр бо роҳбарону мутахассисони неругоҳ ва сокинони шаҳри Роғун мулоқоти самимӣ доир кард.

Дар оғоз Сарвари давлат Эмомалӣ Раҳмон ҳамаи иштирокчиёни мулоқот ва дар симои онҳо кулли сокинони шаҳри Роғунро бо ҷашни бузурги умумимиллии дарпешистода - 25 - солагии Истиқлолияти давлатии Ҷумҳурии Тоҷикистон табрику муборакбод гуфта, ба онҳо саодати зиндагиро орзу намуд.
Президенти Ҷумҳурии Тоҷикистон Эмомалӣ Раҳмон дар бораи дастовардҳои мамлакат давоми солҳои соҳибистиқлолӣ андеша ронда, ҳамаи комёбиҳоро аз хоҳишу талошҳои мардум ва татбиқи сиёсати созандаи роҳбарияти давлату Ҳукумати мамлакат маънидод кард.
Вобаста ба ҳадафҳои стратегии Ҷумҳурии Тоҷикистон, аз ҷумла ноил гардидан ба истиқлолияти комили энергетикӣ ва аҳамияти бунёди Неругоҳи барқи обии Роғун Сарвари давлат Эмомалӣ Раҳмон таъкид дошт, ки истифодаи захираҳои ғании гидроэнергетикӣ, бахусус бунёди Неругоҳи барқи обии Роғун роҳи асосии расидан ба истиқлолияти энергетикии Тоҷикистон аст.
“Мақсади асосии мо тақвияти пайгиронаи рушди босуботи иқтисодии Тоҷикистон ва дар ин асос баланд бардоштани сатҳи некуаҳволии мардум мебошад, таъкид намуд Эмомалӣ Раҳмон ва афзуд, ки “маҳз тавассути таъмини истиқлолияти энергетикӣ, ҳифзи амнияти озуқаворӣ ва баровардани мамлакат аз бунбасти коммуникатсионӣ дар давраи гузариш мо метавонем рушди устувори иқтисодиёти кишварро таъмин намоем”.
Пешвои миллат Эмомалӣ Раҳмон зикр намуд, ки дар солҳои соҳибистиқлолӣ барои тараққиёти энергетика дар кишвар 32 лоиҳаи давлатии сармоягузорӣ бо ҷалби зиёда аз 12 миллиард сомонӣ татбиқ карда шудааст. Ҷиҳати расидан ба истиқлолияти энергетикӣ аз ҳисоби маблағҳои буҷетӣ ва сармояи хориҷӣ 36 миллиард сомонӣ равона гардида, танҳо соли ҷорӣ барои пешрафти соҳа 4 миллиард сомонӣ ҷудо карда мешавад.
Дар ин давра бунёди лоиҳаи бузурги байнидавлатии хати интиқоли барқи баландшиддати CASA - 1000 оғоз гардида, татбиқи як қатор лоиҳаҳои муҳиме, ки аҳамияти минтақавӣ доранд, аз ҷумла сохтмони лӯлаи гази Осиёи Марказӣ - Ҷумҳурии Мардумии Чин дар назар аст.
Сарвари давлат Эмомалӣ Раҳмон бо қаноатмандӣ изҳор дошт, ки дар идомаи тадбирҳои муҳиму мушаххас барои расидан ба истиқлолияти энергетикӣ айни ҳол аз ҷониби Ҳукумати кишвар корҳои лоиҳакашии неругоҳҳои барқи обии “Шӯроб”, “Нуробод - 1”, “Нуробод - 2”, “Айнӣ”, “Фондарё”, “Санобод” ва “Себзор” идома дошта, сохтмони хатҳои интиқоли барқ ва бунёду барқарорсозии зеристгоҳҳои барқии банақшагирифташуда ба итмом расонида мешаванд. Дар баробари ин, таҷдиду барқарорсозии неругоҳи Норак идома дошта, корҳои таҷдиду барқарорсозии неругоҳҳои Гулистон ва Сарбанд шурӯъ гардидаанд.
Барои расидан ба ҳамаи ин ҳадафҳо Президенти Ҷумҳурии Тоҷикистон Эмомалӣ Раҳмон Ҳукумати мамлакат, роҳбарони вазорату идораҳои давлатӣ ва дигар мутахассисонро вазифадор намуд, ки корҳои созандагиро дар вақти муайяншуда ва бо сифати баланди ҷавобгӯ ба талаботи стандартҳои байналмилалӣ иҷро намоянд.
Сарвари давлат Эмомалӣ Раҳмон ба азму иродаи сохтмончиёни Неругоҳи барқи обии Роғун баҳои баланд дода, онҳоро ба иҷрои босифати кори пуршараф ва таърихӣ ҳидоят кард.
Дар ҳамин ҷо пас аз анҷоми суханронии Сарвари давлат Эмомалӣ Раҳмон коргарону мутахассисони Неругоҳи барқи обии Роғун ва сокинони шаҳри Роғун баромад карда, ба Пешвои миллат Эмомалӣ Раҳмон барои ғамхорӣ, ташаббусҳои созанда ва талошҳо баҳри таъмини зиндагии шоистаи мардум изҳори сипос намуданд.
 


Баёни ақида (0)    Санаи нашр: 8.08.2016    №: 158    Мутолиа карданд: 387

15.02.2019


ШАМШЕРБОЗӢ. ИШТИРОКИ ВАРЗИШГАРОНИ МО ДАР ЧЕМПИОНАТИ КУШОДИ ОСИЁИ МАРКАЗӢ

ҶАҲОН ДАР ЯК САТР

Дар Душанбе ташкили низоми муттаҳидаи мудофиаи зиддиҳавоӣ баррасӣ шуд

Дар чор сол муомилоти мол байни Тоҷикистону Ӯзбекистон 19 маротиба афзуд

Медведев: «Таҳримоти ИМА ба иқтисоди Россия таъсири чандон бузург расонда наметавонад»

Пентагон. ИМА аз Афғонистон ҳамроҳи иттифоқчиёнаш меравад

13.02.2019


2018. Сиёсати хориҷии Тоҷикистон пурбарор буд

КОРРУПСИЯ. 2047 ҷиноят ошкор гардид

САНОАТ. Беш аз 10 миллиард сомонӣ маҳсулот содирот шуд

САРМОЯИ МУСТАҚИМ. Воридот дар ҳоли афзоиш аст

ОБ. Таъминоти аҳолӣ рӯ ба беҳбудӣ дорад

АВҶИ ОБОДКОРИҲО ДАР ШАҲРИ ТУРСУНЗОДА

12.02.2019


АКАДЕМИЯИ ИЛМҲО АЗ КАШФИЁТИ НАВ ТО САНОАТИ ДОРУСОЗӢ

КӮЛОБ. Содироти 825 тонна маҳсулоти кишоварзӣ

ДАНҒАРА. Саноатикунонӣ вусъат мегирад

ФУРУДГОҲҲОИ БАЙНАЛМИЛАЛӢ. Сатҳи хизматрасонӣ рӯ ба беҳбудӣ дорад

ДДК. Авлавият ба сатҳи касбият ва таълим

САДА. Тантанаи ҷашни миллӣ дар ноҳияи Шамсиддини Шоҳин

11.02.2019


ВАЗОРАТИ ФАРҲАНГ. 2018 - соли муваффақиятҳо буд

КУМИТАИ РУШДИ САЙЁҲӢ. Беш аз 1 миллион сайёҳ ба Тоҷикистон омад

МТС. Ҳамкориҳо бо Ӯзбекистон густариш меёбанд

ВМКБ. Гумрукчиён ба буҷет 16,9 миллион сомонӣ ворид карданд

ҲИСОР. Саҳми назарраси соҳибкорон дар ободонии шаҳр

НОҲИЯИ РӮДАКӢ. Ҳаҷми истеҳсоли маҳсулот ба 1 миллиард сомонӣ расид

ВАРЗОБ. Таваҷҷуҳи сайёҳон ба нуқтаҳои истироҳатӣ афзудааст

08.02.2019


Вазорати меҳнат, муҳоҷират ва шуғли аҳолӣ. Музди миёнаи меҳнат - 1220 сомонӣ

КУМИТАИ ТЕЛЕВИЗИОН ВА РАДИО. Сифати кори шабакаҳо беҳтар мешавад

КҲФМГ. Офатҳои табиат 34 миллион самонӣ хисорот овард

Саноатикунонӣ дар Шаҳринав

Меъёри бозтамвил ба 14 дарсад поён фаромад

ШАҲРИ ВАҲДАТ. Иҷрои барзиёди андози иҷтимоӣ

ТАНЗИМ. Қонуншиканӣ коҳиш ёфтааст

СОҲИЛ. Корҳои мустаҳкамсозӣ вусъат меёбанд

ДДСТДТ. Авлавият ба рушди ҳунарҳои мардумӣ


Дар сомонаҳои дигари Тоҷикистон хонед