logo

ҳуқуқ

ТАСАРРУФИ ЗАМИН. КӢ ДАР ТАТБИҚИ ҚОНУН МОНЕА ЭҶОД МЕКУНАД?

30 апрели соли 2016 Қарори Ҳукумати Ҷумҳурии Тоҷикистон №201, «Дар бораи гирифтан ва ба мақомоти иҷроияи маҳаллии ҳокимияти давлатии шаҳри Кӯлоби вилояти Хатлон додани қитъаҳои замин» ба тасвиб расид. Тибқи қарор ҳудуди 333,71 гектар замин барои ташкили қитъаҳои замини наздиҳавлигӣ  ба фонди манзили мақомоти иҷроияи шаҳр гузаронда шуд. Бо қарори комиссияи ҷамъиятӣ №20 аз ҳисоби заминҳои ба фонди манзилгузаштаи тарҳҳои 66, 68, 66а ва 59 - и харитаи заминистифодабарии хоҷагии ба номи Сафаралӣ Зарифови Ҷамоати деҳоти Кӯлоб ба 64 нафар эҳтиёҷманд ба масоҳати 5 - садякӣ қитъаи замин ҷудо гардид.
Мутаассифона, ҳангоми тақсимот кор ранги дигар гирифта, 7  нафар эҳтиёҷманд аз замин «бенасиб» монданд. Ин дар ҳолест, ки ҳамаи онҳо дар даст қарори раиси шаҳр дар бораи додани  қитъаи заминро доранд. Масъулон мӯҷиби асосии ба вуқӯъ омадани ин ҳолатро аз тарафи як гурӯҳ сокинони деҳаи Чорбоғ хилофи қонун тасарруф кардану бо симтӯрҳо маҳкам намудани тарҳҳои замини 66, 68 - и харитаи заминистифодабарӣ арзёбӣ мекунанд.
- Мутахассисони Кумитаи идораи замини шаҳри Кӯлоб дар ҳамбастагӣ бо ниҳодҳои зирабт қабл аз тақсимоти заминҳои холии деҳаи мазкур бо нафароне, ки худсарона заминро гирифтаю истифода мебаранд, вохӯрӣ намуда, зиддиқонунӣ будани кирдорашонро фаҳмонданд. Ва ба ҳар яки онҳо дастури хаттӣ доданд, то дар муҳлати 3 рӯз заминро аз симтӯрҳои кашидаашон озод кунанд, - тазаккур дод Рустам Бобохонов, раиси кумита.
Алъон феҳристи расмие дар даст дорем, ки ному насаби 8 нафар аз забткорон дар он дарҷ шудааст. Аз ин сарчашма маълум гардид, ки сокинон Зуҳуршо Холов масоҳати 5,25 Зебо Саидова 5 Раҳматулло Мирсаидов 8,3   Назрулло Амонов 10 Райҳонбӣ Исоева 14   Мисқолбӣ Шарифова 9,6  садяк, Зокир Маҳмадов 9,2 Илҳом Ҷурақулов 6,2 садяки заминро азхуд кардаанд.
Оё дар ҳақиқат эшон ба ғасби замин даст задаанд ё ин заминҳо моли қонунии онҳост? Барои посухи дақиқ гирифтан ба суол хабарнигори «Ҷумҳурият» бо чанд тан аз онҳо мусоҳиб гардид.
- Аз соли 2007 инҷониб гирди заминро, ки дар рӯ ба рӯи ҳавлии зистамон мустақар аст, бо симтӯр рахна карда, истифода мебарем. Дар он ҷо дарахт шинондем, захираи ҳезуми зимистонаамон аз ҳамин ҳисоб мешавад. Ғайр аз ин, сабзавот мекорем. Баъди чандин сол заминҳоро ҷудо намуда, ба дигар ашхос доданд. Замини моро низ гирифтанианд. Кунун маҷбур доранд, то заминро ба ашхоси қарордор диҳем. Ҳарчанд кӯшиш дорем, ки заминҳоро ба худамон қарор карда диҳанд, аммо ҷавоби рад гирифтем. Мегӯянд, ки аз ягон гӯшаи шаҳр заминатон медиҳем, аммо розӣ нестем, - гуфт Райҳонбӣ Исоева, сокини Чорбоғ.
Масоҳати замини забткардаи ҳамсуҳбати дигари мо Раҳматулло Мирсаидов 10  садякро ташкил медиҳад. Ӯ изҳор кард, ки атрофи заминро ҳанӯз чанд сол қабл симтӯр гирифта, обчакорӣ мекунад. «Ҳозир заминамро ба номи писарам Ҷамшед Мирсаидов ва келинам қарор карда гирифтаам. Ду қарори раиси шаҳрро дорам. Ҳамаашро қонунӣ намудам», - гуфт ӯ. Чандон ки қарори № 20 - ро аз назар гузарондем, исми Р. Мирсаидовро пайдо накардем. Худи Мирсаидов низ «ду қарор»-и гуфтаашро пешкаш накард. Таҳқиқ собит сохт, ки воқеан ашхоси фавқуззикр алайҳи қонунгузории кишвар амал карда, ба ғасби замин даст задаанд. Ҳеҷ ҳуҷҷате надоранд, ки  қонунан соҳиби замин будани онҳоро тасдиқ кунад. Бо вуҷуди ин, соҳибони қонунии заминро намегузоранд, то омада дар қитъаи заминашон хона созанд. Ба гуфтаи масъулон, пеш аз шурӯи тақсимот онҳоро даъват карданд, то заминро бидуни саркашӣ холӣ намоянд. Сокинон низ розӣ шудаанд. Санади аз тарафи комиссия 29-уми июли соли 2016 тартибдодашуда бозгӯӣ мекунад, ки касе аз ҷонибҳо дар бартафсозии қонунвайронкунии вобаста ба замин мухолифат накардааст. Аммо, иттифоқан, ҷамоатчиён аз райъашон гашта, «замин»-ашонро ба «дандон» доштаанд.
- Феълан мақомоти прокуратура дар ин масъала тафтишот оғоз намуда, чораҷӯӣ мекунад. Борҳо ба ғасбгарон огоҳӣ додем, то симтӯрҳояшонро канда гиранду заминро тоза кунанд, аммо нописандӣ доранд. Ба онҳо пешниҳод кардем, ки агар шумо ба замин муҳтоҷед, пас аз дигар гӯшаи шаҳр қонунӣ ҷудо карда медиҳем, вале рад карданд. Ҳеҷ порчаи замини ғасбкардаро ба онҳо набахшидаем. Дурӯғ мегӯянд, ягон нафар аз забткорон қарори раиси шаҳрро надоранд, - гуфт Пӯлод Ҳафизов, муовини раиси шаҳр ва раиси комиссияи ҷамъиятӣ. - Агар як нафар аз онҳоро қарор карда, заминашро бидиҳем, фардо дигар нафарон ба забти замин даст задаю пушти дари мақомоти иҷроия қарорпурсӣ меоянд. Ин пурра бар зарари кор аст. Аз дигар ҷиҳат, 7 нафар ниёзманд қарор рӯи дасту безамин мондаанд. Заминҳоро холӣ карда, ба онҳо медиҳем.
Муддати панҷ моҳ аст, ки кашмакашҳо идома доранд. Агар одилонаю воқеъбинона назар афканем, ғайр аз Кумитаи идораи замини шаҳр ягон мақомоти зидахл алайҳи ин «дастаи қонуншиканон» тадбирандешӣ накардааст. Бо роҳи зӯрӣ ғасб кардани замин ягона амали зиддиқонунии 8 нафар иқоматкунандаи Чорбоғ нест, балки онҳо то имрӯз заминҳои давлатро солҳо бе иҷозат истифода карда, андозашро низ напардохтаанд. Дар қайди нозироти андоз нестанд. «Яхи» ниҳодҳои зидахл то кунун нашикастааст, то пайи бартарафсозии ин ҳама ҳуқуқвайронкунӣ шаванд. Ҳама муҳри хомӯшӣ ба лаб зада, аз дур тамошо доранд. Эҳтиёҷмандони замин бошанд, моҳҳост қарорҳо зери китфу пушти дари идороту ташкилоти дахлдор сарсону саргардонанд. Касеро парвое нест. Агар нисбати забткорон парванда оғоз шуда бошад, наход, ки дар панҷ моҳи комил ба анҷом нарасад? Чӣ асрорест дар ин асно? Дар ҳоле ки ҳудуди заминҳо бо девор не, балки бо симтӯрҳои муқаррарӣ баста шудаанду дохилашон дарахти ар-ар доранд, ҳамагӣ ду рӯз барои ҳамвор карданашон кифоя асту бас. Танҳо масъулият лозиму гомҳои устувору ҷасурона дар роҳи татбиқи қонун.
Ёқуби СОДИҚ, «Ҷумҳурият»   


Баёни ақида (0)    Санаи нашр: 21.12.2016    №: 250-251    Мутолиа карданд: 3517

19.06.2019


Дар Кӯлоб Фестивали ҷумҳуриявии дӯстии ҷавонон баргузор шуд

Баррасии вазъ ва дурнамои ҳамкориҳо

Боздид аз Муассисаи давлатии «Боғи миллии Ваҳдат”

ПАНҶАКЕНТ. Омодагиҳо ба ҷашни фархунда

Писарбачаи тоҷик дар Хабаровск дӯсташро аз чоҳи оби ҷӯш наҷот дод

Тоҷикистону Беларус: «Муҳокимаи тақвияти ҳамкориҳои низомӣ»

Си Ҷинпин азми сафари Ҷумҳурии Халқии Демократии Корея дорад

Ҷаҳон дар як сатр

12.06.2019


ХУҶАНД. "Зирвеко" ба фаъолият мепардозад

Муаррифии асари Си Ҷинпин «Дар бораи идоракунии давлатӣ»

Баргузории конфронси сайёҳӣ дар Рашт

Масоили низоми бонкӣ матраҳ гардид

Дар Чин аз обхезии тобистона 6,75 миллион нафар зарар дид

Дар Ӯзбекистон рӯйхати идҳои касбиро Рӯзи китобдор афзуд

Дар Ҷопон ба солхӯрдаҳо шаҳодатномаи вижаи ронандагӣ медиҳанд

Сокини Британия дар лотерея Ј123 миллион бурд намуд

Ҷаҳон дар як сатр

11.06.2019


Песков: «Путин ба Тоҷикистон ва Қирғизистон сафар мекунад»

Иштироки роҳбарони 11 кишвар дар ҳамоиши Бишкек

Президенти Қазоқистон аз хусуси роҳҳои ҳалли мушкилоти иҷтимоӣ ҳарф зад

Ҷаҳон дар як сатр

ФАРХОР. Бонувон ба ҳунаромӯзӣ ҳавасманд мешаванд

"Куллиёт" - и Миробид Саййидои Насафӣ

04.06.2019


Лукашенко: "Эмомалӣ Раҳмонро оммаи мардум интизор аст"

Бунёдкорони роботтехникаи Россия ва Чин дар Владивосток ҷамъ омаданд

Ҷаҳон дар як сатр

Машварати сиёсии вазоратҳои корҳои хориҷии Тоҷикистон ва Белгия

Муаррифии портали хизматрасониҳои электронӣ барои андозсупорандагон

Дар ноҳияи Рашт конфронси минтақавӣ баргузор мегардад

ФУТБОЛ. Ду бозии рафиқона бо мунтахаби Ӯзбекистон

03.06.2019


Дар Тоҷикистон баландтарин афзоиши теъдоди сайёҳон ба қайд гирифта шуд

Гармои тоқатфарсо дар Ҳиндустон

Тасдиқи барнома оид ба бозомӯзии касбии кормандони соҳаи маориф

Иди саиди Фитр 5 июн таҷлил мешавад


Дар сомонаҳои дигари Тоҷикистон хонед