logo

иҷтимоиёт

ХАТЛОН. СОМОНАҲОИ СУДҲОИ ВИЛОЯТ ФАЪОЛ НЕСТАНД. ЧАРО?

Таъмини дастрасӣ ба иттилоот, ба шахс ё ниҳоди дахлдор сари вақт супурдани санадҳо ҷузъи умдаи кори мақомоти судӣ арзёбӣ гардад ҳам, он дар вилояти Хатлон дар баъзе ҳолатҳо сарфи назар мешавад.
Агар рӯйхати мурофиаҳои судӣ насб мешуд...
Зимни пайгирии мавзӯъ мо рӯйхати мурофиаҳои судии дар ҳамон рӯзҳо баррасишавандаро ба ҷуз аз суди вилояти Хатлон дигар дар ягон эълонтахтаҳои судҳои шаҳру навоҳии минтақаи Қӯрғонтеппа пайдо карда натавонистем. Ҳайратангез ин аст, ки қабл аз наззораи дохили биноҳо аз ҷониби муаллифи матлаб ҳама раисони судҳо аз ҷой доштани он гуна рӯйхат дар лавҳаҳои иттилоотиашон хабар медоданд.
Ин дар ҳолест, ки ба қавли муовини аввали раиси суди вилояти Хатлон Темур Бойзода, онҳо дастури Суди Олиро ба инобат гирифта, раисони судҳои ҳамаи шаҳру ноҳияҳоро барои насби чунин рӯйхатҳо муваззаф карда буданд. Мавсуф зикр кард, ки агар рӯйхат дар ҷойи намоён овезон бошад, шаҳрвандон бо сарсонӣ дари ҳар як судяро накӯфта, вобаста ба кай ва аз тарафи кадом судя баррасӣ шудани парвандаи мавриди таваҷҷуҳашон зуд маълумот пайдо карда метавонанд.
Интизорие, ки  57 рӯз давом кард
Мувофиқи кодексҳои мурофиавии ҷиноятӣ ва маъмурию граждании Ҷумҳурии Тоҷикистон, баъд аз эълони ҳукм, ҳалнома ё таъйиноти судӣ нусхаи бо асл баробари он бояд дар давоми 5 шабонарӯз ба дасти тарафҳо супурда шавад. Дар сурати сари вақт дастрас нагардидани санадҳои мазкур маҳкумшуда, ҳимоятгар ё хешу табори ӯ, даъвогар ва дигар ҷонибҳои ба парванда расман дахлдор метавонанд доир ба ин хунукназарии раисикунандаи мурофиа ба мақомоти марбута шикоят баранд. Дар робита ба ин, кулли мусоҳибон, яъне раисони судҳои аксар шаҳру навоҳии вилоят кӯшиданд, то моро мутмаин созанд, ки дар мақомоти зери роҳбарии онҳо ягон дафъа ҳолати вайрон кардани муҳлати муайяншуда ба мушоҳида нарасидааст.
Аммо адвокати маслиҳатхонаи ҳуқуқии шаҳри Қӯрғонтеппа Фарҳод Тоиров ҳангоми суҳбат бо мо аз як ҳолати нақзи ҳуқуқи зерҳимояаш аз тарафи суди ноҳияи Абдураҳмони Ҷомӣ, ки боиси ташвиши зиёд гардидааст, ёдовар шуд.
- Суди ноҳия 28 - уми сентябри соли 2016 вобаста ба парвандаи граждании ба даъвои Нуқра Эмомқулова ва Маҳсиддиновҳо алоқаманд, бо мақсади рӯёндани қарз ҳалнома баровард. Вале он пас аз 37 рӯз фақат иқтибос аз ҳалнома ба дасти зерҳимояи ман супурда шуд. Мо аз болои рафтори кормандони суди ноҳияи Абдураҳмони Ҷомӣ ба суди вилояти Хатлон, Суди Олӣ ва Дастгоҳи иҷроияи Президент шикояти пешакӣ бурдем. Аҷиб ин аст, ки дар асоси ҳамон шикояти пешакӣ бо як мактуби раиси суди ноҳияи Абдураҳмони Ҷомӣ, аз 8 декабри соли 2016, парвандаро ба суди вилоят ирсол карданд, ки ин хилофи талаботи Кодекси мурофиавии граждании Ҷумҳурии Тоҷикистон аст. Бо гузашти 57 рӯз ниҳоят ба мо муяссар шуд, ки нусхаи пурраи ҳалномаро бигирем.
Ҳалли мушкилот ба манфиати кор аст
Ҳукумати мамлакат бо тасвиби “Тартиби талаботи ягона барои веб - сайт ва шабакаи маҳдуди баҳисобгирии мақомоти идораи давлатӣ” ҳанӯз соли 2011 кулли ниҳодҳоро муваззаф карда буд, ки ба низоми ҳукумати электронӣ гузаранд ва ба хотири иттилоотонии зудҳангоми мардум сомонаҳои расмӣ таъсис диҳанд, ки мақомоти судӣ истисно нестанд. Агар судҳои ноҳияҳои Абдураҳмони Ҷомӣ, Вахш, Бохтар ва чандтои дигар ҳанӯз ҳам сомонаи худро фаъол накарда бошанд, пас сомонаҳои гурӯҳе аз ноҳияҳо аз рӯзи ифтитоҳ то кунун ягон маълумот надоранд. Фаъолтарин сомонаҳо аз суди вилоят (www.sudikhatlon.tj) ва шаҳри Кӯлоб (www.sudikulob.tj) мебошанд, ки навгониҳои моҳи феврали соли 2017 дар онҳо ҷой дода шудаанд. Қисмати ками сомонаҳо, ба ҷуз иттилооти нимаи аввали соли 2016, дигар чизе барои хондан нагузоштаанд.
Паҳлуи дигари масъала ин аст, ки дар сомонаҳо ба рафти баррасии парвандаҳо равшанӣ андохта нашуда, пешниҳоди рӯйхати онҳо ба ёди касе наомадааст. Номи қаблии ноҳияи Ҷалолиддини Балхӣ низ дар сомонаи мақоми татбиқкунандаи қонун - суди ноҳия (www.sudijrumi.tj) ҳанӯз иваз нашудааст.
Он мушкилоте, ки зикрашон дар боло рафт, дар доираи ду барномаи ислоҳоти судӣ-ҳуқуқӣ, ки муҳтавои асосиашон аз таъмини қонунияту адолат ва такмили кори мақомоти судӣ иборат аст, мебоист давоми солҳои 2011 - 2017 пурра рафъ гарданд. Вале, чуноне аз натиҷаи тадқиқи мо бармеояд, дар судҳои вилояти Хатлон ҳанӯз ҳам баъзе камбудию норасоиҳо ҷой доранд. Ҳалли саривақтии ин мушкилот аз ҷониби мақомоти судӣ танҳо ба манфиати кор аст. 
Зокир ҲАСАН, “Ҷумҳурият”


Баёни ақида (0)    Санаи нашр: 14.04.2017    №: 77    Мутолиа карданд: 326

19.09.2018


ТОҶИКИСТОН ВА ӮЗБЕКИСТОН. Аввалин тамринҳои муштараки низомӣ

Таъсиси 57 корхонаи нав

Намоиши дастовардҳо ба муносибати Рӯзи шаҳри Хуҷанд

Зуҳро Саидова – соҳиби шоҳҷоиза

Таҳаммул аз амалҳои террористӣ норавост

Баргузории ҳамоиши маъмурони роҳи оҳани кишварҳои СҲШ дар Ӯзбекистон

Дар Ироқ 27 ҳазор нафар аз об заҳролуд гашт

Тӯли 40 соли ислоҳот дар Чин ҷои кор 346 дарсад афзуд

Остона ҳамоиши ҳаштуми глобалии туризми шаҳриро пазироӣ мекунад

Ҷаҳон дар як сатр

18.09.2018


САМБО. Дурахши варзишгари навраси тоҷик дар Аврупо

Иди асал дар Душанбе

КӮЛОБ. Боз ду меҳмонхонаи нав ба истифода дода шуд

Ҷаҳон дар як сатр

ӮЗБЕКИСТОН. Оғози машқҳои низомии муштарак

Теъдоди қурбонии тӯфони «Мангхут» аз 60 нафар гузашт

Дифои Вазорати ҳуқуқи инсони Покистон аз ҳуқуқи занҳо

Таҳсили фосилавӣ ба ҳар хонандаи ҷопонӣ дастрас шуд

Дар Остона ба хариди партов шурӯъ карданд

17.09.2018


НОҲИЯИ РӮШОН. Сарҳадбонон соҳиби бинои наву замонавӣ шуданд

Баргузории фестивали шаҳрии эҷодиёти кӯдакон

“КӮКНОР-2018”. Мусодираи беш аз 550 килограмм маводи нашъаовар дар Хатлон

ФУТБОЛ. "Хуҷанд" ба пеш баромад

11.09.2018


ДУШАНБЕ МИЗБОНИ СОҲИБКОРОНИ ҶАҲОН

ДЕВАШТИЧ. БУНЁДКОРИҲОИ НОҲИЯ НАМУНАИ ИБРАТАНД

МАРЗ. Боздошти қочоқбарон

КӮЛОБ. ИФТИТОҲИ БОҒЧАИ НАВ

05.09.2018


БӮСТОН. Бунёди чор иншооти нав

ФУТБОЛ. Дар Тоҷикистон мусобиқаҳои байналмилалӣ доир мегарданд

Ориф Алвӣ 13-умин президенти Покистон интихоб гашт

Дар Арабистони Саудӣ барои маводи тахрибӣ дар интернет зиндонӣ мекунанд

Дар Гуҷарат сохтмони баландтарин ҳайкали дунё анҷом меёбад

Ҳиндустон барномаи нави кайҳониро амалӣ месозад

04.09.2018


Боздиди Сарвазири мамлакат аз иншооти гармидиҳии шаҳри Душанбе


Дар сомонаҳои дигари Тоҷикистон хонед