logo

иҷтимоиёт

Ӯ ҲАНӮЗ ДАР ИБТИДОИ РОҲ АСТ

Заррина Яминова тибқи квотаи президентӣ таҳсилкардаи Донишгоҳи технологии Тоҷикистон (бо дипломи аъло) буда, фаъолияти меҳнатияшро бо тахассуси муҳандис-технологи саноати сабук аз ҳамин боргоҳи таълим  оғоз кардааст.  

Эътибори духтари ҷавонро мушкилоти мавҷудаи ин соҳаи муҳими иқтисодӣ ба худ ҷалб карда, рағбаташро дар самти азхуд намудани техникаву технологияи навтарин даҳчанд афзуд.
Толиби ҷодаи илм Заррина Яминова таҳти назари Аскар Ишматов, доктори илмҳои техникӣ, дар мавзӯи «Коркарди партовҳои абрешимӣ» таҳқиқ бурда, феҳристҳои лозимаро бо мавзӯи интихобияш қиёс намуда, аз таҷрибаи ҳампешагони мумтоз пайваста меомӯзад.  
Қимати рисолаи мазкур аз он иборат аст, ки бо татбиқи пешниҳодҳои технологияи нави коркарди партовҳои абрешимӣ дар истеҳсолоти ватанӣ дигаргуниҳои мусбат арзи ҳастӣ намуда, масоили фоидабахшро ба миён меоварад. Мушкили ҳосил кардани ресмонҳои муштарак ва тавлиди оҳар дар ин гуна абрешимҳо, бешубҳа, ба болоравии сифат ва паст кардани арзиши аслии коркарди матоъҳо мусоидат хоҳанд кард.
Заррина Яминова бо далелҳо нишон медиҳад, ки баҳри равнақи нассоҷӣ тӯли даҳ соли охир бобати коркарди абрешим пастшавии истеҳсоли пилла 1,5 баробар, абрешими хом 1,4 ва истеҳсоли матои абрешимӣ наздики 10 маротиб поин рафтааст. Афзун бар ин, коҳишёбии сифати пилла дар нуқоти истеҳсоли он равшан ба мушоҳида мерасад. Мутаассифона, танҳо даҳ дарсади пилла ҷавобгӯ ба навъи якум буда, боқимондаи он навъҳои дувум ва савумро ташкил медиҳанд. 
Паҳлуи дигари навоварии Заррина Яминова ҳамқадам бо рушди пурвусъати илму техника равшантар зуҳур мекунад. Вай бо ин васила коркарди самараноки партовҳои абрешимӣ, ҳосил намудани ресмони муштарак аз пахтаву абрешим, тайёр кардани ширеш барои оҳарсозии ресмонҳо аз ин гуна партовҳоро ба роҳ монданист. Албатта, ин иқдом худ аз худ ба даст намеояд.
Сароғоз олимаи ҷавон назарияи соҳаро ҷиддӣ азбар намуда, дар татбиқи ихтирояш хусусиятҳои физикию кимиёӣ ва технологии ширеши серитсинро комилан омӯхта, тарзи ҳосил намудани хокаи номбурдаро аз партовҳои абрешимӣ ва моддаи карбоксилметилселюлоза дақиқан илмӣ нишон додааст. 
Соли 2014 барои Заррина Яминова махсус маҳсуб меёбад. Вай баробари ихтироъкорӣ мақолаҳои пурмуҳтаво нигошта,   дар 17 конфронси минтақавӣ, ҷумҳуриявӣ ва байналмилалӣ фаъолона ширкат карда маърӯза намудааст. Натиҷаи ҳамин ҷустуҷӯҳо буд, ки дар намоиши ҷумҳуриявии «Навовари беҳтарини сол» ва  Намоишгоҳи аввалини Форуми ихтироъкорони ҷумҳурӣ - «Аз ихтироъ ба инноватсия» бо дипломҳои дараҷаи 1-и Вазорати маориф ва илми Ҷумҳурии Тоҷикистон ва Муассисаи давлатии Маркази миллии патенту иттилооти Вазорати рушди иқтисод ва савдо сарфароз гардидааст. Инчунин, ихтирооташ дар Комбинати  «Нассоҷии тоҷик» (солҳои 2012, 2014) татбиқ шуда, соҳиби 4 санади амалӣ мебошад.
Ӯ муаллифи 4 патенти ихтирооти ҷумҳуриявӣ, 2 патенти АвруОсиё буда,  бештар аз 20 мақолаи илмияш дар матбуоти даврии кишвар, изофа бар ин, дар мамолики Австрия, Чехия, Қазоқистон, шаҳрҳои Махачқалъа ва Ивановои Федератсияи Русия ба табъ расидаанд. Ҷавондухтари тоҷик аз дастовардҳояш саргарм нашуда, бо маслиҳатҳои устодаш профессор Аскар Ишматов баҳри ихтирои нав кӯшиши зиёд ба харҷ медиҳад. 
Заррина Яминова бо таҳқиқи арзишмандаш дар Озмуни байналмилалии «Бонувони ихтироъкори ҷаҳон», ки дар Кореяи Ҷанубӣ (соли 2016) сурат гирифт, кулли иштирокдоронро тасхир гардонд. Вай   коркарди технологияи ҳосил кардани ресмони муштарак аз пахтаю абрешим ва тарзи тавлиди ширешу хокаи серитсин аз партовҳои онро бо асноди илмӣ таҳлил намуда, сазовори «Нишони нуқра KIWIE» гардид. Ҳамоиши мазкур таҳти раёсати ҳакамони сахтгир миёни 400 нафар довталаб аз 25 давлати дунё дар мақоми олӣ гузашта буд.
Муҳимтар аз ин, татбиқи ихтирои Заррина Яминова ба иқтисодиёти солонаи мамлакатамон ба маблағи 96 512 сомонӣ фоида оварда, дар самти беҳдошти экологӣ ва ҳифзи муҳити зист мушкилоти зиёдеро аз байн мебарад.
Заррина Яминова мехоҳад, ки тавассути навовариҳояш дар пешрафти иқтисодиёти Ватани маҳбубамон ҳиссаи арзишманд гузорад. Ӯ ҳанӯз дар ибтидои роҳ аст.

P. S:
Вақте ки ин матлаб омодаи нашр мегардид, аз Донишгоҳи технологии Тоҷикистон иттилоъ доданд, ки Заррина Яминова аз санҷишҳои пешакии рисолаи номзадияш дар мавзӯи «Коркарди партовҳои абрешимӣ» дар Донишкадаи нассоҷии ба номи А. Н. Косигини шаҳри Ивановои Федератсияи Русия муваффақона гузашт.            
Сипеҳри ҲАСАНЗОД, журналист


Баёни ақида (0)    Санаи нашр: 20.04.2017    №: 81    Мутолиа карданд: 531

06.12.2019


Боздиди Рустами Эмомалӣ аз варзишгоҳи «Миллий»

Хуҷанд. Бунёди корхонаи истеҳсоли телевизор, яхдон ва кондитсионер

Масъалаи моҳияти сармояи инсонӣ дар рушди инноватсионӣ мавриди баррасӣ қарор гирифт

Пекин аз Вашингтон кам кардани боҷи молҳои чиниро дархост намуд

ОПЕК истихроҷи нафтро метавонад кам созад

Дар мактабҳои Қазоқистон гузариш ба алифбои лотиниро мавқуф гузоштанд

Коррупсияро дар Қирғизистон тавассути рақамисозӣ бартараф карданианд

Ҷаҳон дар як сатр

05.12.2019


Беш аз ду тонна доруворӣ ба коми оташ рафт

Фестивали филм ва мусиқии Руминия дар Тоҷикистон

Боздиди Рустами Эмомалӣ аз шаҳри Самарқанд

Дар Афғонистон шоҳасари Бобоҷон Ғафуров “Тоҷикон” чоп шуд

Макрон изҳороти НАТО оид ба «таҳдиди русӣ» - ро зери шубҳа гузошт

Боздошти муовини собиқ сарвари «ДИ» Ал - Бағдодӣ дар Ироқ

Андрей шевченко дар мураббигӣ низ муваффақ аст

Ҷаҳон дар як сатр

04.12.2019


Тақвияти ҳамкориҳо дар мубориза бар зидди терроризму экстремизм матраҳ гардид

Ҷаласаи гурӯҳи корӣ оид ба таҳияи намоишгоҳ бахшида ба мероси муштараки фарҳангии Роҳи абрешим баргузор шуд

Китоби Президенти Тоҷикистон Эмомалӣ Раҳмон дар Теҳрон рӯнамоӣ мешавад

Мирзиёев раиси шаҳри Душанбе Рустами Эмомалиро ба ҳузур пазируфт

Департаменти давлатӣ: «ИМА Россияро маблағгузори терроризм намешуморад»

Ҳукумати Албания хисороти заминҷунбии мудҳишро ҳисоб намуд

Москва ва Киев созишномаи 10 – солаи таҳвили нафтро ба имзо расонданд

Ҷаҳон дар як сатр

03.12.2019


Дар пойтахт барӯйхатгирии аҳолӣ ва фонди манзил гузаронда мешавад

Дар майдони «Дӯстӣ» арчаи солинавӣ қомат меафрозад

«Лолаи тиллоӣ» синамогарони тоҷикро ба ҳам овард

Дар Британия намояндагии маҳфили “Ҷавонони дар хориҷи кишвар таҳсилдошта” ифтитоҳ ёфт

Россия ва Беларус қисме аз ваколатҳоро ба ҳукумати ягона медиҳанд

Олимон суду зиёни қаҳванӯширо ном бурданд

Ҷаҳон дар як сатр

САМБО. Медали биринҷии Сорбон дар Қазоқистон

02.12.2019


Дар Бишкек кишварҳои аъзои СААД 15 санад ба имзо расонданд

Эрдуғон кишварҳои арабро ба ёрии Албания даъват намуд


Дар сомонаҳои дигари Тоҷикистон хонед