logo

иқтисод

ШОҲРОҲ. АГАР СИФАТ ХУБ БОШАД...

Шоҳроҳи Душанбе – Кӯлоб –Дарвоз – Хоруғ – Мурғоб – Қулма пайвандгари пойтахти Тоҷикистон бо шаҳру ноҳияҳои ВМКБ ва кишварҳои Чину Қирғизистон мебошад. Дар харита он бо аломати М 41 нишон дода шудааст. Он ҳамлу нақли дохилӣ ва байналмилалиро таъмин намуда, ҷиҳати аз бунбасти коммуникатсионӣ баромадани Тоҷикистон нақши муҳим дорад. Ғайр аз ин, ҳамасола садҳо сайёҳи хориҷӣ аз кишварҳои дуру наздик бо ин роҳ сафар менамояд, ки барои иқтисодиёти кишвар муфид арзёбӣ мегардад. 

Қисмати роҳи Душанбе – Хоруғ ҳанӯз соли 1940 давоми 110 рӯз сохта шуда буд. Ин қисмат яке аз роҳҳои қадимаи корвонӣ буда, ба Шоҳроҳи бузурги абрешим дохил мешуд. Соли гузашта маҷаллаи маъруфи ҷуғрофии National Geographic шоҳроҳро ба даҳгонаи роҳҳои беҳтарини ҷаҳон шомил намуд. 
Ба гуфтаи Хушназар Абдураҳимов, сармуҳандиси муассисаи давлатии идораи хоҷагии роҳҳои ВМКБ, тибқи барномаи рушди комплексӣ то соли 2025 таҷдиди тамоми роҳҳои аҳамияти байналмилалидоштаи вилоят тарҳрезӣ гардидааст. Барои таҷдиди роҳи автомобилгарди Душанбе – Кӯлоб – Хоруғ – Қулма, хосса қитъаи Қалъаихумб то сарҳади ноҳияи Рӯшон, дар назар дошта шудааст, ки маблағи он 1 миллиарду 300 миллион сомониро дар бар мегирад. Вале ҳоло, бинобар ёфт нашудани маблағгузор, сохтмон оғоз наёфтааст.
Боиси қаноатмандист, ки роҳҳои дорои аҳамияти байналмилалии кишвар давра ба давра таҷдиду навсозӣ шуда истодаанд. Даҳаи аввали моҳи сентябр сохтмони қитъаи Шамсиддин Шоҳин – Шоҳон дар роҳи автомобилгарди Кӯлоб – Қалъаихумб ба охир расид. Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳи автомобилгарди Шамсиддин Шоҳин – Шоҳон дар шоҳроҳи Кӯлоб – Хоруғро бо буридани лентаи рамзӣ расман ифтитоҳ намуд. Мутобиқи талабот дар ин қитъаи роҳи мошингард зиёда аз 1600 аломати роҳ насб гардид. Қисмати роҳи Шамсиддин Шоҳин – Шоҳон идомаи бунёди шоҳроҳи мошингард ба самти шарқии мамлакат буда, дорои аҳамияти бузурги иқтисодиву иҷтимоӣ ва стратегӣ мебошад. Бо таҷдиду навсозии ин қитъаи роҳ рафтуомади доимии сокинон дар тамоми фасли сол таъмин гардида, интиқоли молу маҳсулот афзоиш хоҳад ёфт.
Масъулони сохтмони роҳ иброз доштанд, ки ҳадаф аз бозсозӣ ба стандартҳои ҷаҳонӣ мутобиқ намудани роҳи байналмилалӣ, таъмини бехатарӣ, зудҳаракатӣ ва паст кардани сатҳи камбизоатӣ бо роҳи таъмини ҷойҳои нави корӣ мебошад.
Тибқи иттилои Валӣ Махсумов, сармуҳандиси Маркази татбиқи лоиҳаҳои «Шоҳон – Зиғар»-и Вазорати нақлиёт, татбиқи лоиҳаи «Сохтмони роҳи автомобилгарди Кӯлоб – Қалъаихумб», қитъаи  Шамсиддин Шоҳин – Шоҳон асосноккунии техникиву иқтисодии лоиҳа, сохтмони 40 километр роҳи автомобилгард бо иншооти сунъӣ, аз ҷумла, 10 пул бо дарозии умумии  1121 метр, харидории техникаву таҷҳизоти роҳдорӣ, хизмати мушовирӣ ва санҷиши аудитиро дар бар гирифт. Сохтмон моҳи декабри соли 2011 оғоз ёфта, бо назардошти муҳлати тамдидшуда моҳи сентябри соли ҷорӣ ба итмом расид.
Ба гуфтаи В. Махсумов, нигоҳдории роҳ баъди анҷоми корҳои сохтмонӣ аҳамияти асосӣ дорад, бинобар ин дар доираи лоиҳаи мазкур харидани техникаву таҷҳизот барои нигоҳдории роҳ ба назар гирифта, барои интихоби таҳвилгар озмуни байналмилалӣ баргузор шуд, ки дар он ширкати маҳаллии ҶДММ «Мумтоз» ғолиб омад. Таҳвилгар дар семоҳаи аввали соли гузашта ба муассисаҳои давлатии нигоҳдории роҳҳои автомобилгарди шаҳри Кӯлоб техникаву таҷҳизоти заруриро ворид намуд.
Бояд гуфт, ки роҳи мошингарди Кӯлоб – Қалъаихумб бо дарозии умумии 168 км барои пайвасти ин ноҳияҳо нақши муҳим дорад. Қитъаҳои он, аз ҷумла Кӯлоб - Шамсиддин Шоҳин бо дарозии 32 км ва  Шкев – Қалъаихумб бо дарозии 26 км азнавсозиро талаб мекунанд. Маблағи умумии лоиҳа 114 миллион доллари ИМА-ро ташкил медиҳад.
Президенти мамлакат Эмомалӣ Раҳмон барои оғози корҳои сохтмонӣ дар ин роҳ санги асос гузоштанд.
Феълан лоиҳаи созишномаи қарзӣ байни Бонки исломии рушд ва Вазорати  молияи Ҷумҳурии Тоҷикистон ба имзо расидааст. Созишномаҳои дигари қарзӣ дар ҳоли баррасӣ қарор доранд. Инчунин, ба Фонди Абу – Дабӣ  ҷиҳати пешниҳоди лоиҳаи созишномаи қарзӣ дархост ирсол шуд.
Дар доираи лоиҳа корҳои хокканӣ, хобондани лӯлаҳои обгузар, ҷӯйборҳои бетонӣ, сохтани пойдеворҳо, зерқабати роҳ, гузоштани таҳкурсӣ ва мумфаршсозии роҳ дар назар дошта шудаанд.
Маврид ба зикр аст, ки маҳз дар солҳои Истиқлолияти давлатӣ аз ҳисоби маблағгузориҳои хориҷӣ ва дохилӣ аз соли 2008 то 2016 барои беҳтар сохтани роҳҳои Бадахшон ва таъмини рафтуомади озод, рушди ин минтақаи кишвар лоиҳаҳои зиёди сармоягузорӣ амалӣ шудаанд. Инҳо роҳҳои Мурғоб – Қулма, Шоҳон – Зиғар (марҳилаи 1,2,3), Шкев – Зиғар, пулҳо дар ноҳияҳои Ишкошим, Дарвоз, Ванҷ, Шамсиддин Шоҳин, шаҳри Хоруғ, нақбҳои «Озодӣ», «Дӯстӣ», «Хатлон», пулҳои байналмилалии байни Тоҷикистону Афғонистон дар мавзеъҳои Тем, Рӯзвай, Ишкошим, Ванҷ мебошанд.
Бо итминон метавон гуфт, ки бо беҳтар шудани сатҳу сифати роҳҳо ба кишвари транзитӣ табдил додани Тоҷикистон имконпазир гашта, рушди бемайлони ҳамлу нақли дохилию байналмилалӣ ва рушди соҳаи сайёҳӣ таъмин хоҳад шуд.
Шаҳноз ҚУРБОН,
«Ҷумҳурият»


Баёни ақида (0)    Санаи нашр: 03.10.2017    №: 206    Мутолиа карданд: 621

15.02.2019


ШАМШЕРБОЗӢ. ИШТИРОКИ ВАРЗИШГАРОНИ МО ДАР ЧЕМПИОНАТИ КУШОДИ ОСИЁИ МАРКАЗӢ

ҶАҲОН ДАР ЯК САТР

Дар Душанбе ташкили низоми муттаҳидаи мудофиаи зиддиҳавоӣ баррасӣ шуд

Дар чор сол муомилоти мол байни Тоҷикистону Ӯзбекистон 19 маротиба афзуд

Медведев: «Таҳримоти ИМА ба иқтисоди Россия таъсири чандон бузург расонда наметавонад»

Пентагон. ИМА аз Афғонистон ҳамроҳи иттифоқчиёнаш меравад

13.02.2019


2018. Сиёсати хориҷии Тоҷикистон пурбарор буд

КОРРУПСИЯ. 2047 ҷиноят ошкор гардид

САНОАТ. Беш аз 10 миллиард сомонӣ маҳсулот содирот шуд

САРМОЯИ МУСТАҚИМ. Воридот дар ҳоли афзоиш аст

ОБ. Таъминоти аҳолӣ рӯ ба беҳбудӣ дорад

АВҶИ ОБОДКОРИҲО ДАР ШАҲРИ ТУРСУНЗОДА

12.02.2019


АКАДЕМИЯИ ИЛМҲО АЗ КАШФИЁТИ НАВ ТО САНОАТИ ДОРУСОЗӢ

КӮЛОБ. Содироти 825 тонна маҳсулоти кишоварзӣ

ДАНҒАРА. Саноатикунонӣ вусъат мегирад

ФУРУДГОҲҲОИ БАЙНАЛМИЛАЛӢ. Сатҳи хизматрасонӣ рӯ ба беҳбудӣ дорад

ДДК. Авлавият ба сатҳи касбият ва таълим

САДА. Тантанаи ҷашни миллӣ дар ноҳияи Шамсиддини Шоҳин

11.02.2019


ВАЗОРАТИ ФАРҲАНГ. 2018 - соли муваффақиятҳо буд

КУМИТАИ РУШДИ САЙЁҲӢ. Беш аз 1 миллион сайёҳ ба Тоҷикистон омад

МТС. Ҳамкориҳо бо Ӯзбекистон густариш меёбанд

ВМКБ. Гумрукчиён ба буҷет 16,9 миллион сомонӣ ворид карданд

ҲИСОР. Саҳми назарраси соҳибкорон дар ободонии шаҳр

НОҲИЯИ РӮДАКӢ. Ҳаҷми истеҳсоли маҳсулот ба 1 миллиард сомонӣ расид

ВАРЗОБ. Таваҷҷуҳи сайёҳон ба нуқтаҳои истироҳатӣ афзудааст

08.02.2019


Вазорати меҳнат, муҳоҷират ва шуғли аҳолӣ. Музди миёнаи меҳнат - 1220 сомонӣ

КУМИТАИ ТЕЛЕВИЗИОН ВА РАДИО. Сифати кори шабакаҳо беҳтар мешавад

КҲФМГ. Офатҳои табиат 34 миллион самонӣ хисорот овард

Саноатикунонӣ дар Шаҳринав

Меъёри бозтамвил ба 14 дарсад поён фаромад

ШАҲРИ ВАҲДАТ. Иҷрои барзиёди андози иҷтимоӣ

ТАНЗИМ. Қонуншиканӣ коҳиш ёфтааст

СОҲИЛ. Корҳои мустаҳкамсозӣ вусъат меёбанд

ДДСТДТ. Авлавият ба рушди ҳунарҳои мардумӣ


Дар сомонаҳои дигари Тоҷикистон хонед