logo

иҷтимоиёт

ҲАР ГУЛУ ГИЁҲИ ВАТАН ДОРУСТ!

Ба гуфтаи олимони гиёҳшинос, дар Тоҷикистон беш аз 1,5 ҳазор гиёҳи шифобахш мавҷуд аст, ки айни замон 40 - 50 намуди он барои истеҳсоли дору истифода мешавад. Зарфиятҳои мавҷуда ва истифоданашударо ба инобат гирифта, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳибкорон ва масъулони соҳаро ба эҳёи саноати дорусозӣ ва ташхиси дору ҳидоят намуданд. Дар ин замина, роҳбарони вазоратҳои тандурустӣ ва ҳифзи иҷтимоии аҳолӣ, саноат ва технологияҳои нав ва мақомоти дигари масъули ҷумҳурӣ, бо назардошти имкониятҳои фаровони табиӣ ва ашёи хом, доир ба рушди саноати дорусозӣ супориш гирифтанд.

Соҳибистиқлолӣ ба рушди соҳа замина гузошт
Султон Бекмуродзода, сардори Хадамоти назорати давлатии фаъолияти фармасевтӣ, бар ин назар аст, ки солҳои охир дар ҷумҳурӣ истеҳсолоти маводи доруворӣ ба пешравиҳо ноил гаштааст.
- Ба шарофати такмили қонунгузорӣ соҳибкорони ватанӣ дар бозори фармасевтии мамлакат мавқеъ пайдо карданд. Дар мавзеъҳои наздик ба манбаъҳои ашёи аввалия ва бозори истеъмолӣ коргоҳҳои хурди истеҳсолӣ сохта шуданд. Ҳоло ширкатҳои «Кӯҳҳои Тоҷикистон», «Ёрии Аввал», «Фароз», «Шаҳром 2010», «Авитсенна», ширкати муштараки тоҷикистонию эронии «Ориё Сурангмедикал ЛТД», маркази таълимӣ - истеҳсолии дорусозии коллеҷи тиббии ҷумҳуриявии Душанбе, «Вежа Фармасевтикалс», «Ясмина Мед», «Тиб барои шумо», «Сино - 2013», «Муъмин», «Амон - Ш», «Аввалин», «Мину фарм», ҶСК «Фароз», «Сафар фарма», «Сахо К», «Салом» ва «Казфарма» маҳсулоти доруворӣ, омехтаи гиёҳҳои шифобахш, маҳлули антисептикӣ, маснуоти санитарию гигиенӣ ва тиббӣ истеҳсол менамоянд, ки чанде аз онҳо ба хориҷи мамлакат низ фурӯхта мешаванд. Дар ин корхонаҳо зиёда аз 200 номгӯй маводи доруворӣ истеҳсол мешавад, ки ин беш аз 10 дарсади талаботи мамлакат ба маҳсулоти тиббиро ташкил медиҳад. Ин раванд тадриҷан ривоҷ ёфта истодааст.
Аслиддин Имомзода, мудири озмоишгоҳи минтақавӣ дар вилояти Хатлон, бар ин андеша аст, ки аз ҷиҳати сифат маҳсулоти ватанӣ аз маҳсулоти воридотӣ ягон камӣ надорад, танҳо тарғибу ташвиқи онҳоро дуруст ба роҳ мондан даркор аст. Бо ҳамин роҳ метавонем номгӯй ва миқдори маҳсулоти истеҳсолшавандаро зиёд намуда, воридоти онҳоро коҳиш диҳем.
Ғолиб Отахонов, директори ҶДММ «Тиб барои шумо», мегӯяд, ки ширкати онҳо 91 номгӯй маводи дорувории навъҳои тазриқии давоӣ, аз қабили новокаин, витаминҳои гуногун, ҳалкунандаҳо, маҳлулҳои инфузионӣ (глюкоза, хлориди натрий, фуратсиллин), маҳлулҳои спиртӣ (йод, бриллианти сабз, маҳлули антисептикӣ), малҳамҳо, ҳабҳо, маводи таъйиноти тиббиро дар асоси гиёҳҳои доруии мамлакат истеҳсол мекунад ва талабот ба онҳо зиёд мебошад. Аз гиёҳҳои шифобахш 18 номгӯй маводи доруӣ омода шуда, дастраси муштариён мегардад. Инчунин, 3 намуди маводи дорувориро ба Қирғизистон, Қазоқистон ва кишварҳои дигар содирот менамоем.

Дар дорухати табибон номи доруҳои ватанӣ сабт намешавад
Чун ба дорухати тавсиянамудаи табибон назар мекунем, ҳама давоҳои навишташуда истеҳсоли Ҳиндустону Покистон, Русия ва Олмон мебошанд. Имрӯзҳо бештари мардум аз мавҷуд будани доруҳои ватанӣ огоҳӣ надоранд. Онҳо намедонанд, ки дар кишвар доруи табобатӣ истеҳсол карда мешавад ё не.
Таваралӣ Ёқубов, сардори шуъбаи стандартонии КВД «Экспертиза ва озмоиши маҳсулоти фармасевтӣ ва тиббӣ» - и Хадамоти назорати фармасевтӣ, гуфт, ки ҳоло дар мафкураи муштариён беҳтар будани маводи дорувории воридотӣ аз маҳсулоти дохилӣ мустаҳкам ҷой гирифтааст. Духтурон ба беморон доруҳои хориҷиро тавсия медиҳанд ва худ аз ин нафъ мебинанд, яъне аз ширкатҳои дорурасон ҳақ мегиранд. Бемор гумон мекунад, ки дар ҳақиқат, маводи дорувории хориҷӣ беҳтар аз ватанист. Ҳол он ки сифати доруи ватанӣ нисбат ба маҳсулоти хориҷӣ аз ҳар ҷиҳат беҳтар аст. Баъзан арзиши аслии доруи истеҳсоли ватанӣ қиматтар меафтад ва он ба рақобати бозор тоб оварда наметавонад. Мо пешниҳод дорем, ки ба истеҳсолкунандагони маводи доруворӣ сабукиҳо (имтиёзҳо) дода шаванд. Тоҷикистон барои истеҳсоли дору аз нарасидани мутахассисон ва техника ягон мушкилӣ надорад. Агар барои роҳ ёфтани доруҳо аз гиёҳҳои шифобахш ба бозори фармасевтии дохилӣ ба соҳибкорон сабукиҳо (хусусан дар мавриди андозбандӣ) пешбинӣ шаванд, бовар дорам, ки маҳсулоти худӣ ҷойи дигар доруҳои воридотиро гирифта метавонад.

Аммо…
Баланд будани тарифи андозҳо, гаронии фоизи қарзҳои бонкӣ, маҳдуд будани муҳлати баргардондани қарзҳои бонкӣ, ба талаботи рӯз ҷавобгӯй набудани тафаккури соҳавии мутахассисон, бо кундӣ татбиқ гардидани равзанаи ягонаи муроҷиати соҳибкорону ширкатҳои фармасевтӣ ба муассисаю мақомоти ваколатдор аз мушкилоти соҳаанд. Инчунин, моил набудани табибон ба тавсия додани давоиёти ватанӣ мушкили асосии рушд наёфтани истеҳсолоти фармасевтӣ маҳсуб меёбанд.
Барои дастгирӣ ва имтиёз додан ба соҳибкорон мутахассисон чунин омилҳоро, назири маҳдуд кардани воридоту содироти рустаниҳои давоӣ ва омехтаи онҳо, рушд додани воридоти маводи бандина ва гигиенӣ (аз қабили пахтаи тиббӣ, дока, маҳлулу малҳамҳо ва маводи сермасрафе, ки имконияти дар дохил ба роҳ мондани истеҳсолоташон мавҷуд аст), кам кардани андоз аз воридоти маводи аввалияи тиббӣ, тарғиби бештари маҳсулоти ватанӣ ва бартарӣ додани онҳо барои дастрасӣ ба истеъмолкунандагонро пешниҳод менамоянд.
Ҳамаи ин боис мегардад, ки неруи тавлидотӣ дар мамлакат афзун ва мутахассисони соҳа бо ҷои кор таъмин шаванд. Ҳамзамон, назорат аз болои сифат, судмандӣ, бехавфии дору беҳтар ба роҳ монда шавад. Истеҳсоли доруи ватанӣ ба иқтисод ва соҳаи тандурустии мамлакат таъсири мусбат мерасонад ва дар оянда бо муҳайё гардидани шароит ба бозорҳои хориҷа роҳ ёфтани маҳсулоти «Made in Tajikistan» имконпазир мешавад.
Шаҳбоз АБРОР,
«Ҷумҳурият»


Баёни ақида (0)    Санаи нашр: 04.10.2017    №: 207    Мутолиа карданд: 899

17.01.2019


Тамдиди шартномаи ФФТ бо "Сомон Эйр"

60 ДАРАҶА ХУНУКӢ ВА ДАВИ 50 - КИЛОМЕТРАИ ЭКСТРЕМАЛИ МОЛДАВӢ

16.01.2019


Пирӯзии мунтахаби Тоҷикистон бар Эрон

ҶАҲОН ДАР ЯК САТР

Роҳандозии моратории дусола дар Тоҷикистон

Нақшаи Brexit дар парламенти Британия рад карда шуд

Кремл роҳи ҳалли буҳрони Украинаро пешниҳод намуд

Ифтитоҳи онлайн-донишгоҳ барои гурезаҳо дар Италия

15.01.2019


Ҷаласаи ҷамъбастӣ таҳти раёсати муовини Сарвазири мамлакат

Вохӯрии Сироҷиддин Муҳриддин бо Абдулазиз Комилов

Ёдгор Файзов: «Соли 2018 соли таҳкими волоияти қонун дар Бадахшон буд»

ХУҶАНД. 1548 медали варзишгарон дар як сол

ҶАҲОН ДАР ЯК САТР

Созишномаи сулҳ – мавзӯи асосии мулоқоти Путин ва Абэ хоҳад шуд

Савдои хориҷии Чин соли 2018 натиҷаи рекордӣ нишон дод

Дар Алмаато гурӯҳи хориҷиёни террорист боздошт шуд

То соли 2024 аҳолии Қирғизистон бо оби ошомиданӣ пурра таъмин мешавад

10.01.2019


Дар Саразм осорхона ва меҳмонхонаи замонавӣ бунёд мешаванд

Вохӯрии Парвиз Давлатзода бо Владимир Норов

Ҷаласаи Шӯрои кор бо ҷавонон

“ГАНҶИ СУХАН” – маҳфили адибпарвар

РӮШОН. Ифтитоҳи маркази дуошёнаи савдо

Муҳаммад Салоҳ – беҳтарин футболбози Африқо

ҶАҲОН ДАР ЯК САТР

Самарқанд мизбони нахустмулоқоти «Ҳиндустон – Осиёи Марказӣ»

Баргардондани 47 шаҳрванди Қазоқистон аз Сурия

Остона ба гузарондани Ҳамоиши ҷаҳонии туризми шаҳрӣ омодагӣ мегирад

Дар Беларус бори нахуст ҳукми қатл содир шуд

09.01.2019


Таҷлили 110 - солагии аллома Бобоҷон Ғафуров

GLOBE SOCCER AWARDS. Беҳтаринҳоро муайян кард

ҶАҲОН ДАР ЯК САТР

Дар Пекин музокироти тиҷоратии ИМА ва Чин мегузарад

Эрдуғон пирӯзӣ бар террористони «Давлати исломӣ» - ро эълом дошт

Разведкаи Сурия дар ҳафт сол 80 саркардаи исломиро нест кард


Дар сомонаҳои дигари Тоҷикистон хонед