logo

иқтисод

ПАНҶАКЕНТ. СИМОИ НАВИ ДИЁРИ КУҲАН

Ислом ЗИЁЗОДА,
раиси шаҳри Панҷакент

Ҳар субҳу шом вақте аз кӯчаҳои шаҳр мегузарам ё ба ҷамоатҳои деҳот меравам, беихтиёр нахустин сафари Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Панҷакент пеши назарам меояд.
Сарвари давлат дар боғи канори роҳи мавзеи машҳури Қавола бо мардум мулоқот оростанд. Тоҷикистон ҳанӯз дар банди кашмакашҳо буд, вале Сарвари давлат бо умеди қавӣ ба ояндаи нек дар бораи пойдории сулҳу салоҳи комил, ободкорию созандагӣ сухан мекарданд ва ин боварию умед кулли сокинони  ин куҳандиёри тоҷиконро ба меҳнати созанда, ба сарҷамъӣ  атрофи Ҳукумат раҳнамун месохт.
Ҳоло бо гузашти солҳо ба ободию шукуфоии Панҷакент ва ҳама манотиқи мамлакат нигариста, ба ин итминони  Пешвои муаззами миллат бори дигар тан медиҳам.
Тӯли солҳои баъди Иҷлосияи тақдирсози 16 - уми Шӯрои Олии Ҷумҳурии Тоҷикистон, ки ҳоло ба 25 - умин солгарди баргузории он омодагӣ  мебинем, Панҷакент симои худро куллан дигар намуд ва ҳамаи инро  мо натиҷаи сиёсати созандаю хирадмандонаи Пешвои миллат медонем. Ба фаъолият пардохтани  корхонаи муштараки «Зарафшон», ки ҳоло дар соҳаи саноати маъдани кӯҳии мамлакат, ғанӣ гардондани буҷети шаҳр саҳми бориз дорад, бунёди даҳҳо иншооти таъиноти гуногун ба ифтихори  1150 - солагии устод Абуабдуллоҳи Рӯдакӣ, зиёда аз ин, таҷдиди роҳи Айнӣ - Душанбе ва бунёди хати баландшиддати барқ, ки ҳоло сохтмонаш идома меёбад, ба Феҳристи мероси фарҳанги ҷаҳонии ЮНЕСКО ворид гардидани ёдгории беназири 5500 - солаи шаҳраки бостонии Саразм маҳз бо дастур ва фотиҳаи неки Пешвои миллат амалӣ  гашта, ба рушди ҳама соҳаҳои иқтисоди шаҳр заминаи боэътимод гузоштаанд.
Таҳлилҳо ҳокӣ бар онанд, ки шаҳр рӯ ба рушд дорад ва истеҳсоли маҳсулоти саноатӣ ва кишоварзӣ афзуда, сатҳу сифати  хизматрасонӣ боло меравад. Ин буҷети шаҳрро ғанӣ гардонда,  барои ҳалли  масъалаҳои иҷтимоӣ замина мегузорад.
Давоми нуҳ моҳи соли равон нақшаи қисми даромади буҷет 127,4 фоиз  таъмин гардид, ки ин 38, 4 миллион сомонӣ аз воридоти маблағ ба буҷети соли гузашта бештар аст. Ин имконият фароҳам овард, ки имсол дар деҳаҳои дурдасттарини Ҳафтрӯд, ки дар канори Ҳафткӯли машҳур воқеъ аст ва Рукнобод мактабҳои нав, барои оилаҳои аз офати табиӣ зиёндидаи деҳаи Амондара 10 манзили истиқоматӣ бунёд намоем. Ба ифтихори Соли ҷавонон сохтмони Маркази ҷавононро бо тарҳи зебо ва гулгашт, ки он ҷо муҷассамаи Шоири халқии Тоҷикистон, устод Лоиқ Шералӣ бо намои нав ҷой мегирад, оғоз намудем. Воқеан, соли гузашта бо маблағгузории буҷети шаҳр дар назди осорхонаи ҷумҳуриявии таърихӣ - кишваршиносии ба номи Абуабдуллоҳи Рӯдакӣ чунин гулгашти зебо бо айвонҳои мунаққаши кандакорӣ ва фаввораҳои хуштарҳ сохта шуданд, ки ҳоло ба ҷойи дӯстдоштаи сокинон ва меҳмонон табдил ёфтааст.
Соли равон ду бинои хуштарҳи истиқоматӣ, ки дар қабати якумашон марказҳои савдо, коргоҳҳои дӯзандагию қаннодӣ ҷойгиранд, бо ҷалби сармояи соҳибкорон мавриди истифода қарор гирифт. Зимнан, ҳамкории давлат ва бахши хусусӣ, мусоидати ҳамаҷониба ба рушди соҳибкорӣ, ки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳангоми мулоқот бо соҳибкорони мамлакат таъкид намуданд, аз самтҳои муҳими фаъолияти мақомоти иҷроияи маҳаллии ҳокимияти давлатии шаҳранд.
Ҳоло соҳаи бору мусофиркашонӣ, тиҷорат, таъмини бозори истеъмолии шаҳр, қисмати бештари сохтмони иншооти гуногун бар дӯши соҳибкорон аст ва ҳиссаи онҳо дар  ғанӣ  гардондани  буҷети  шаҳр  сол то сол меафзояд. Бо ҷалби сармояи соҳибкорон бунёди 17 иншооти таъйиноти гуногун тарҳрезӣ шуда, то охири сол онҳо мавриди истифода қарор мегиранд.
Дар мулоқот бо намояндагони 7700 соҳибкори шаҳр мо вазъи соҳаро ҷиддан таҳлил намуда, бори дигар таъкид доштем, ки мақомоти иҷроияи ҳокимияти давлатии шаҳр омода аст ҳар иқдоми онҳоро, хосса дар ҳалли масоили иҷтимоӣ, ҳамаҷониба ҷонибдорӣ ва ба ҳалли мушкилоти ҷойдошта мусоидат намояд.
Дар иқтисоди шаҳр саҳми соҳаи саноат, хосса корхонаи муштараки «Зарафшон», калон аст. Дар ҷамъбасти нуҳ моҳи соли равон бори нахуст ҳаҷми истеҳсоли маҳсулоти саноатӣ  ба беш аз 1,1 миллиард сомонӣ расида, афзоиш нисбат ба ҳамин давраи соли гузашта 124, 5 фоизро ташкил дод.
Чанд сол муқаддам Пешвои миллат дар мулоқот бо сокинони шаҳр ба ҳосили  майдони картошка таваҷҷуҳ карда, барои зиёд намудани истеҳсоли ин маҳсулоти муҳими ғизоӣ дастур дода буданд.    
 Соли гузашта истеҳсоли картошка ба беш аз 72,9 ҳазор тонна ва то ин муддати соли равон ба 66,7 ҳазор тонна расонда шуд. Соли оянда  майдони кишти картошка дар ҳама шаклҳои хоҷагидорӣ ба панҷ ҳазор гектар расонда, Панҷакент  ба  яке аз минтақаҳои асосии истеҳсоли ин зироат  дар мамлакат табдил хоҳад ёфт. Дар ин росто, сохтори кишти зироат бозбинӣ шуда, майдони кишти ҷаву гандум ва зироатҳои дигар, ки дар иқлими мо ҳосили баланд намедиҳанд, кам карда мешавад. Дар баробари ин, мо ба зиёд намудани истеҳсоли меваю ангур, сабзавот , бунёди боғҳо, хосса боғҳои интенсивӣ, гармхонаю сардхонаҳо эътибори ҷиддӣ медиҳем. Ҳоло дар шаҳр беш аз 5000 хоҷагии деҳқонӣ ба истеҳсоли маҳсулоти кишоварзӣ машғуланд.
Панҷакент бо ёдгориҳои беназири таърихӣ, аз қабили шаҳраки бостонии Саразм, Панҷакенти қадим, оромгоҳи устод Рӯдакӣ, манзараҳои нотакрори табиӣ, аз ҷумла Ҳафткӯлу Кӯли Калон, мавриди таваҷҷуҳи сайёҳон қарор гирифтааст. Ҳоло дар шаҳр 11 ширкат ба пазироии  сайёҳони хориҷӣ машғул буда, солҳои охир бо бунёди меҳмонхонаҳо, нуқтаҳои хӯроки умумӣ, ташкили хатсайрҳои кӯҳӣ инфрасохтори соҳа беҳ мегардад. Мутмаинам, ки соҳа дар оянда як манбаи ғанигардонии буҷет ва муҳайё кардани ҷойҳои нави корӣ мешавад.  
Тавассути бунёди коргоҳҳои хурди атласу адрасбофӣ, истеҳсоли маҳсулоти хӯрока, ислоҳоти соҳаи кишоварзӣ, ташкили хоҷагиҳои нави деҳқонӣ ва рушди соҳибкорӣ дар нуҳ моҳ  беш аз ҳазор ҷойи нави корӣ муҳайё  карда шуд.
Чанде пеш гурӯҳи кории Ҳукумати мамлакат дар ҳайати вакилони Маҷлиси намояндагони Маҷлиси Олии Ҷумҳурии Тоҷикистон ва адибону олимон ҷиҳати тарғиби тағйиру иловаҳо ба Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» аз Панҷакент боздид намуда, дар шаҳр ва ҳама ҷамоатҳои деҳот бо мардум мулоқот карданд. Хулосаи ин ҳайати бонуфуз он буд, ки сокинони шаҳри Панҷакент иқдоми Пешвои миллатро сидқан ҷонибдорӣ мекунанд ва барои татбиқи он талош меварзанд.
Хуллас, имрӯз сокинони Панҷакент бо шукргузорӣ ва ифтихор аз фазои сулҳу  субот ва созандагӣ дар Ватани азиз ба 25 - умин солгарди Иҷлосияи таърихии 16 – уми  Шӯрои Олии мамлакат, ки роҳи тоҷиконро ба ояндаи нек боз намуд, омодагӣ мегиранд.


Баёни ақида (0)    Санаи нашр: 20.10.2017    №: 218    Мутолиа карданд: 950

19.02.2019


МАКТАБИ ДАВЛАТДОРИИ ЭМОМАЛӢ РАҲМОН. ЯК ҲАМОИШИ МУҲИМ

Баррасии масъалаҳои рушди сайёҳӣ

Вохӯрии Низомиддин Зоҳидӣ бо Мазен Шамия

Дурнамои рушди муносибатҳо матраҳ гардид

ҶОМИ КУШОДАИ АВРУПО. Муҳаммадризо Қувватов медали биринҷӣ ба даст овард

Авҷи ниҳолшинонӣ

Саҳми соҳибкорон дар ободии деҳот

Ҳамкории тиҷоратию иқтисодии Чин ва Россия густурдатар мегардад

Сарвар Дониш: «Музокироти сулҳ бидуни ҳукумат қурбе надорад»

«Туҳфаи шоҳона» - и Арабистони Саудӣ ба шаҳрвандони Покистон

Дар Қазоқистон маркази амнияти иттилоотӣ ифтитоҳ меёбад

Сокини навраси Шимкент ду нафарро аз сӯхтор наҷот дод

Ҷаҳон дар як сатр

18.02.2019


Боздиди Азим Иброҳим аз ҷараёни корҳои сохтмонӣ

ВКД Ҷиноятҳо 83,6 дарсад ошкор шуданд

Вазорати молия. Барои дастгирии буҷет маблағи бештар ҷалб хоҳад гашт

«BISHKEK OPEN – 2019». Дурахши каратэ-дочиёни навраси тоҷик

«МОҲИЯТ ВА ТАЪЙИНОТИ МАТБУОТИ МАҲАЛЛӢ»

РОҒУН. Ободонӣ вусъат меёбад

АНДОЗ. Нақша 100, 6 дарсад иҷро гардид

ТОҶИКИСТОНУ ӮЗБЕКИСТОН. Гардиши савдо ду баробар афзуд

Тоҷикистон миёни кишварҳои ИДМ ба афзоиши баландтарини ММД муваффақ гашт

Дар Тошканд конфронси байналмилалӣ оид ба Осиёи Марказӣ баргузор мегардад

Қасри сафед: "Музокироти тиҷоратӣ дар Пекин ба пешравӣ мусоидат кард"

Трамп мехоҳад ҷангиёни «Давлати исломӣ» - ро ба Аврупо барои суд кардан баргардонад

Кумитаи амнияти иттилоотии Қазоқистон беш аз 90 сомонаи хавфнокро ошкор сохт

Ҷаҳон дар як сатр

15.02.2019


ШАМШЕРБОЗӢ. ИШТИРОКИ ВАРЗИШГАРОНИ МО ДАР ЧЕМПИОНАТИ КУШОДИ ОСИЁИ МАРКАЗӢ

ҶАҲОН ДАР ЯК САТР

Дар Душанбе ташкили низоми муттаҳидаи мудофиаи зиддиҳавоӣ баррасӣ шуд

Дар чор сол муомилоти мол байни Тоҷикистону Ӯзбекистон 19 маротиба афзуд

Медведев: «Таҳримоти ИМА ба иқтисоди Россия таъсири чандон бузург расонда наметавонад»

Пентагон. ИМА аз Афғонистон ҳамроҳи иттифоқчиёнаш меравад

13.02.2019


2018. Сиёсати хориҷии Тоҷикистон пурбарор буд


Дар сомонаҳои дигари Тоҷикистон хонед