logo

сиёсат

РАШТ. ЗИНДАГӢ РАНГИ ДИГАР МЕГИРАД

Мардуми меҳнатдӯсти ноҳияи Рашт бо шукргузорӣ аз фазои орому осудаи Ватани азизамон ва сиёсати хирадмандонаю башардӯстонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати расидан ба натиҷаҳои боз ҳам баланди иҷтимоию иқтисодӣ талош меварзанд.
Тавре Лоиқзода Қаноатшо, раиси ноҳияи Рашт, узви Маҷлиси миллии Маҷлиси Олии Ҷумҳурии Тоҷикистон, зимни суҳбат бо хабарнигори «Ҷумҳурият» гуфт, тавассути дастгирии бевоситаи Пешвои муаззами миллат ва тадбирҳои андешидашуда симои ноҳия рӯз ба рӯз дигар мегардад. Соҳаҳои иқтисодию иҷтимоӣ батадриҷ рушд ёфта, барои таъмини зиндагии шоистаи сокинони маҳал шароити мусоид фароҳам меояд.
Шуғли асосии қисми зиёди аҳолии ноҳия кишоварзист. Соли ҷорӣ дар мавсими киштукори баҳорӣ дар 2826 гектар ғалладона, 1802 гектар картошка, 430 гектар сабзавот  ва 248 гектар  зироатҳои техникӣ кишт гардида, 73 гектар боғи нав бунёд шуд.  Ҳаҷми истеҳсоли маҳсулоти кишоварзӣ то имрӯз ба 386 миллиону 408 ҳазору 400 сомонӣ расид, ки дар қиёс ба ҳамин давраи соли сипаришуда 23 миллиону 129 ҳазор сомонӣ зиёд аст.
Фаъолияти корхонаҳои саноатӣ рӯ ба беҳбудӣ ниҳодааст, ки ин барои бо ҷойи кори доимӣ таъмин намудани шаҳрвандон ва нигоҳдории нархи дастраси маҳсулот дар бозорҳо мусоидат менамояд. Корхонаи ордбарории ноҳия, ки бо дастгирии бевоситаи Сарвари давлат аз ҳисоби Агентии захираҳои моддии давлатии назди Ҳукумати Ҷумҳурии Тоҷикистон фаъолият дорад, ба масъалаи дастрасии нархи арзони маҳсулоти озуқа на танҳо барои аҳолии ноҳия, балки барои мардуми ноҳияҳои минтақа низ, хизмат менамояд.
Ҳаҷми истеҳсоли маҳсулоти саноатӣ якҷоя бо хизматрасонии неруи барқ ва обтаъминкунӣ ба андозаи 42 миллиону 727 ҳазору 300 сомонӣ расонда шуд, ки нисбат ба ҳамин давраи соли сипаришуда 3 миллиону 734 ҳазор сомонӣ зиёд мебошад. Корҳои таъмирию сохтмонӣ  имсол дар 28 иншоот роҳандозӣ гардид.
Нақши ҷавонон дар рушди соҳаҳои гуногуни хоҷагии халқи ноҳия назаррас аст. Соли ҷавонон эълон гардидани соли 2017 ҷавонони ноҳияи моро низ рӯҳбаланду болидахотир гардонда, онҳоро муваззаф намуд, ки баҳри рушду шукуфоии кишвар масъулияташонро дучанд намоянд. Вобаста ба нақшаи таҳияшуда, ҳоло дар байни ҷавонон тадбирҳои гуногуни оммавии ободонӣ, ташкилию фарҳангӣ ва варзишӣ  роҳандозӣ гардидаанд. Саҳмгузории ҷавонон дар рушди иқтисодию иҷтимоии ноҳия бори дигар собит сохт, ки ҷавонони мо ҳамчун пайравони Пешвои миллат дар корҳои ободонию созандагӣ ва таъмини амнияти кишвар фаъолона ширкат меварзанд.
Соҳибкасб намудани занону духтарон ва ба корҳои давлатию ҷамъиятӣ ҷалб намудани онҳо дар меҳвари таваҷҷуҳи Президенти кишвар, Ҳукумати мамлакат ва мақомоти иҷроияи маҳаллии ҳокимияти давлатии ноҳия қарор дорад. Дар ноҳия шумораи занону духтарон 59343 нафарро ташкил медиҳад, ки аз ин шумора дар соҳаи маориф 314, фарҳанг 56, тандурустӣ 387 ва корҳои мавсимӣ, аз ҷумла кишоварзӣ беш аз 5000 нафар фаъолият менамоянд.
 Бо мақсади ҷалби бонувон ба ҳунарҳои мардумӣ беш аз 30 нафар занону духтарон дар корхонаҳои дӯзандагии «Чевар», «Бону»  ва «Зуҳал» бо кори доимӣ таъмин шуданд. Ҳамчунин, дар ин давра, беш аз 250 нафар занону духтарон тавассути филиали муассисаи давлатии «Маркази таълимии калонсолони Тоҷикистон» дар ноҳияи Рашт, литсейи касбӣ - техникии ноҳия дар маркази шаҳраки Ғарм ва ҷамоатҳои шаҳраку деҳот ба омӯзиши ҳунарҳои мардумӣ ва технологияи навин фаро гирифта шуда,  соҳибкасб гардиданд. 
Бо талошҳои Ҳукумати ҷумҳурӣ ва дастгириҳои бевоситаи Сарвари давлат муҳтарам Эмомалӣ Раҳмон офатҳои табиат, аз қабили фаромадани сел дар 6 деҳа ва хатари зериобмонии заминҳои соҳили дарёи Сурхоб дар Ҷамоати деҳоти Ҷафр сари вақт бартараф шуданд.
Дар 11 моҳи соли равон қариб ҳамаи нақшаҳо ва ҳадафҳо бо нишондодҳои хуб ҷамъбаст гардиданд. - Бо боварии комил гуфта метавонам, ки сокинони меҳнатқарини ноҳияи Рашт бо ҳисси баланди ватандӯстӣ  ва масъулиятшиносӣ заҳмату дастгирӣ ва ғамхориҳои бемисли Пешвои миллатро қадр карда, баҳри таҳкими ваҳдати миллӣ ва ободию шукуфоии кишвар талош меварзанд, - гуфт дар хотимаи суҳбат Лоиқзода Қаноатшо.

Худодод ЗАЙНИДДИН, «Ҷумҳурият»


Баёни ақида (0)    Санаи нашр: 21.12.2017    №: 257    Мутолиа карданд: 387

15.11.2019


Ҳамоиш бахшида ба Рӯзи Президент

Вохӯрии Ҷамшед Нурмаҳмадзода бо ҳайати Фонди қарзии кафолатии Тоҷикистон

Хонандагони тоҷик дар озмуни «Роботтехника» сазовори ҷойи дуюм шуданд

Талаби Си Ҷинпин аз ҳукуматдорони Ҳонконг

Фоҷиа. 90 дарсади Венетсия зери об монд

Дар Франсия таҷдиди Нотр - Дам боиси ҷанҷол шуд

Дар Ӯзбекистон лоиҳаи маърифатии «Як миллион барномасоз» роҳандозӣ мешавад

Ҷаҳон дар як сатр

14.11.2019


Мулоқоти Ҷамолиддин Нуралиев бо намояндагони «Moody’s Investors Service»

Оид ба имконоти рушди кӯдакон форуми байналмилалӣ доир мешавад

Тақвияти робитаҳои иқтисодию тиҷоратӣ бо музофоти Ҳубэй

Таэквондо. 22 медали варзишгарони тоҷик аз Бухоро

"Тулӯи ҳақиқат" дар Рӯзи Президент

Шумораи сайёҳон дар Россия беш аз 20 дарсад афзудааст

Ашқобод мизбони нишасти зиддитеррористии ниҳодҳои дипломатии кишварҳои ҳамсуд

Сарвазири Ҳиндустон вохӯрияш бо Путинро олиҷаноб номид

Сесад ҷангии «Давлати исломӣ» дар Афғонистон таслим шуд

Коломойский ба Украина рӯ ҷониби Россия оварданро пешниҳод намуд

Ҷаҳон дар як сатр

13.11.2019


Дар Осетия пайкараи Абулқосим Фирдавсӣ гузошта шуд

Назарбоев: "Зеленский ба мулоқот бо Путин дар Қазоқистон ризоият дод"

Дания аз бозгашти террористони «худӣ» ба кишвар шод нест

Ҷаҳон дар як сатр

“Бункер” ба Фаронса меравад

12.11.2019


Ифтитоҳи маҷмааи тиҷоратии «Масири олӣ»

Таҳкими ҳамкориҳои байнипарлумонӣ матраҳ гардид

Баррасии масоили рушди қонунгузорӣ оид ба моликияти зеҳнӣ

САЙЁҲӢ. Баргузории Форуми II илмии донишҷӯёни муассисаҳои олии таълимӣ

Ҷаҳон дар як сатр

Теъдоди қурбониёни тӯфони «Булбул» дар Бангладеш ба 26 нафар расид

Туркия ба истирдоди ҷангиёни «Давлати исломӣ» шурӯъ намуд

Нигаронии Лигаи кишварҳои араб аз идомаёбии зӯроварӣ дар Ироқ

Ҳиндустон дар 10 - 15 сол ММД - ро 4 маротиба боло бурданист

11.11.2019


Фаронса ба «ТАЛКО» таҷҳизот ва ба «Сомон Эйр» панҷ чархбол таҳвил медиҳад


Дар сомонаҳои дигари Тоҷикистон хонед