logo

сиёсат

ТАРТИБИ ГУЗАРОНДАН ВА ҲАЙАТИ КОМИССИЯИ ҶУМҲУРИЯВИИ ОЗМУНИ КУШОД ҶИҲАТИ ОФАРИДАНИ БЕҲТАРИН ЛОИҲАИ АНГОРАВИИ МАҶМААИ МЕЪМОРИИ РАМЗИ "ИСТИҚЛОЛИЯТ ВА ОЗОДӢ"

25 январи соли 2018 бо ташаббуси Асосгузори сулҳу ваҳдати миллӣ -  Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади ҳифзи арзишҳои фарҳангӣ, таҷассуми рукнҳои муҳими давлатдорӣ, боз ҳам баланд бардоштани ҳисси худшиносии миллӣ ва дар қалби шаҳрвандони мамлакат ҷой додани ғояҳои истиқлолият ва озодӣ, инчунин, ба муносибати  30 - солагии Истиқлолияти давлатии Ҷумҳурии Тоҷикистон озмуни кушод барои офаридани беҳтарин лоиҳаи маҷмааи меъмории рамзи «Истиқлолият ва Озодӣ» дар пойтахти мамлакат - шаҳри Душанбе эълон гардид.

Шартҳои ин озмун аз чӣ иборатанд? Он дар кадом муҳлат ва чӣ тавр доир карда мешавад?  Дар озмун киҳо  ва бо чӣ гуна асарҳо  иштирок карда метавонанд?
Барои ба ин суолҳо посух пайдо кардан хоҳишмандон метавонанд бо тартиби гузарондан ва ҳайати Комиссияи ҷумҳуриявии озмун, ки 8 феврали ҳамин сол аз ҷониби Сарвазири Ҷумҳурии Тоҷикистон  Қоҳир Расулзода тасдиқ гардидаанд, шинос шаванд.
 
ТАРТИБИ
гузарондани озмуни кушод байни шахсони воқеӣ ва ҳуқуқии ватанию хориҷӣ доир ба интихоби беҳтарин лоиҳаи ангоравии маҷмааи меъмории рамзи «Истиқлолият ва Озодӣ» дар шаҳри Душанбе бахшида ба Ҷашни 30 - солагии Истиқлолияти давлатии Ҷумҳурии Тоҷикистон
 
1. Муқаррароти умумӣ
1. Тартиби мазкур шартҳои гузарондани озмунро барои муайян намудани беҳтарин лоиҳаи ангоравии маҷмааи меъмории рамзи «Истиқлолият ва Озодӣ» дар шаҳри Душанбе бахшида ба Ҷашни 30 - солагии Истиқлолияти давлатии Ҷумҳурии Тоҷикистон муқаррар менамояд.
2. Озмун дар асоси Фармони Президенти Ҷумҳурии Тоҷикистон  аз 19 декабри соли 2017, № 968 «Дар бораи Ҷашни 30 - солагии Истиқлолияти давлатии Ҷумҳурии Тоҷикистон» барои дарёфти беҳтарин лоиҳаи ангоравии маҷмааи меъмории рамзи «Истиқлолият ва Озодӣ» дар шаҳри Душанбе баргузор мегардад.
3. Дар озмун  шахсони  воқеӣ ва ҳуқуқии ватанию хориҷӣ метавонанд  иштирок намоянд. Шакли озмун кушода ва озод буда, дар як давр гузаронда мешавад.
4. Баргузории озмунро Комиссияи ҷумҳуриявии озмун (минбаъд — Комиссия) ташкил ва назорат менамояд.

2. Ҳадаф ва мақсади озмун
5. Ҳадафи озмун амалӣ намудани Фармони Президенти Ҷумҳурии Тоҷикистон - Пешвои миллат муҳтарам Эмомалӣ Раҳмон «Дар бораи Ҷашни 30 - солагии Истиқлолияти давлатӣ» буда, бо ин мақсад бунёди маҷмааи меъмории рамзи «Истиқлолият ва Озодӣ» дар шаҳри Душанбе дар назар аст.
Аз ин рӯ, барои дарёфти беҳтарин лоиҳа, ки муаррифгари таъриху фарҳанг, худшиносии миллӣ, арзишҳои миллӣ, дастовардҳои даврони Истиқлолияти давлатӣ, ваҳдати миллӣ, ҳуқуқу озодиҳои сиёсӣ ва рушди минбаъдаи устувори иқтисодӣ буда, ҷиҳати зебо ва ҷолиб намудани симои пойтахти Ҷумҳурии Тоҷикистон - шаҳри Душанбе мусоидат менамояд, озмун эълон карда мешавад.
Дар лоиҳаи ангоравӣ бояд мазмуну муҳтаво ва моҳияти рамзи «Истиқлолият ва Озодӣ» ифода ёбад. Тамоми маҷмаа бояд бо ҳамин ду мафҳум алоқаманд бошад ва онҳоро ифода ва такмил диҳад.

3. Ваколатҳо, вазифаҳо ва тартиби фаъолияти Комиссия
6. Ҳайати Комиссия дар доираи Тартиби мазкур фаъолият намуда, вазифаҳои зеринро амалӣ менамояд:
— ташкил ва ҷамъбасти озмун;
— аз байни лоиҳаҳои пешниҳоднамудаи иштирокчиёни озмун интихоби беҳтарин лоиҳаҳои таҳияшуда ва муайян намудани сатҳи он;
— ҳангоми зарурат барои интихоби беҳтарин лоиҳаҳо ҷалб намудани коршиносони соҳа;
— мукофотонидани ғолибон;
— баррасии ҳолатҳои баҳсӣ ва муроҷиатҳои иштирокчиёни озмун.
7. Комиссия дар доираи ваколатҳои худ дар асоси нишондиҳандаҳои Тартиби мазкур бо роҳи омӯзиши ҳуҷҷатҳои лоиҳавӣ ва гузарондани ҷаласаҳо фаъолият менамояд.
8. Ҷаласаҳои Комиссия дар сурати иштироки на камтар аз 2/3 ҳиссаи аъзои он салоҳиятдор ҳисобида мешаванд. Қарорҳои Комиссия бо роҳи овоздиҳии пинҳонӣ бо овозҳои аксарияти иштирокчиёни он (беш аз 50 фоиз) қабул мегардад. Дар ҳолати баробар будани овозҳо овози раиси Комиссия ҳалкунанда мебошад. Протоколи ҷаласаи ҷамъбастии Комиссия аз тарафи раис ва котиби он ба имзо расонда мешавад.
9. Бо мақсади дар сатҳи баланд баргузор намудани озмун Комиссия дар доираи ваколатҳои вогузоршуда метавонад ҳангоми зарурат гурӯҳи кории аз ҳисоби коршиносони варзидаи соҳа, вазорату идораҳо, иттиҳодияҳои ҷамъиятӣ ва ҷомеаи шаҳрвандӣ ташаккулёфтаро ба кори Комиссия ҷалб намояд.

4. Ваколатҳои раиси Комиссия
10. Раиси Комиссия дорои ваколатҳои зерин мебошад:
— ба кори Комиссия роҳбарӣ намуда, вазифаҳоро байни муовини раиси Комиссия ва аъзоёни Комиссия муайян ва тақсим менамояд;
— рӯзҳои баргузории ҷаласаҳои Комиссияро таъйин мекунад;
— аз рӯи зарурат аз ҳисоби коршиносони варзида гурӯҳи корӣ таъсис медиҳад;
— оид ба ҷараёни баргузории озмун, баррасӣ ва ҳалли мушкилоти бамиёномада бо тартиби муқарраргардида тадбирҳо меандешад;
— тавсияҳоро оид ба баргузории озмун қабул ва тасдиқ менамояд;
— ҳуҷҷатҳои  расмии Комиссияро (протоколҳо, санадҳо, қарорҳоро) тасдиқ менамояд;
— оид ба ҷараён ва натиҷаҳои баргузории озмун ба Президенти Ҷумҳурии Тоҷикистон маълумот  пешниҳод менамояд.

5. Шарт ва талаботи озмун
11. Озмун дар асоси принсипҳои баробарии ҳуқуқ ва эҷоди озодона, нигоҳ доштани урфу одат, тарғиб ва ташвиқи арзишҳои миллӣ ва рушди санъати меъморӣ баргузор мегардад.
12. Озмун бо истифодаи нишондиҳандаҳое, ки Тартиби мазкур пешбинӣ намудааст, бо дар назар доштани таҳлили натиҷаҳо ва омӯзиши лоиҳаҳои пешниҳодшуда ва мувофиқат ба меъёрҳои муқарраргардида сурат мегирад.
13. Дар ҷараёни баргузорӣ ва ҷамъбасти озмун истифодаи усулҳои муосири санъати баланди меъморӣ аввалиндараҷа арзёбӣ гардида, фикру андешаҳои гурӯҳи корӣ, ки аз ҳисоби коршиносони варзидаи соҳа, вазорату идораҳо, иттиҳодияҳои ҷамъиятӣ ва ҷомеаи шаҳрвандӣ ҳангоми зарурат ҷалб карда мешаванд, ба инобат гирифта мешаванд.
14. Лоиҳа бояд фарогири арзишҳои таърихию фарҳангӣ ва таҷассумгари нишонаҳои давлатдорӣ бошанд, ҳамчун маҷмааи нодиру таъсирбахш мавриди коркарди бисёр дақиқ бо диду назари хоссу фарқкунандаи зебоишиносии фарҳанги таърихию муосири тоҷик ва санъати баланди хосси шаҳрсозию меъморӣ таҳия карда шавад.
15. Ободонии майдон ва атрофи он бо истифодаи гулу буттаҳо ва дарахтони ороишии ҳамешасабзи нодир тарҳрезӣ карда шуда, майдон ва роҳравҳои он бо услуби хос аз сангҳои табиии маҳаллӣ кошинкорӣ карда шаванд.
16. Дар ин замина рукнҳои давлатдории миллӣ, ташаккули тафаккури таърихии халқ аз даврони бостон то замони Сомониён ва аз замони Сомониён то расидан ба Истиқлолияти давлатӣ ва озодии комил бояд ба инобат гирифта шавад. Махсусан тавассути ҳофизаи таърихӣ ифода намудани баъзе рӯйдодҳое, ки унсури такмилдиҳии худшиносии халқ гардидаанд, бояд ба инобат гирифта шавад.
17. Дар тасвирҳои ороишӣ, девору рамзҳои интихобшаванда, инчунин, худи муҷассама ва силсилаҳое, ки онро иҳота менамоянд, рӯҳи шикастнопазирии халқи тоҷик, тавоноиву бузургии он, симои ҷовидона ва корнамоиҳои фарзандони далери он бо ғуруру ҷавонмардие, ки доранд, ифода бояд шавад. Инчунин, фарҳангсолорӣ, таърихнигорӣ, қадимияти халқи тоҷик, рамзҳои миллӣ, мардумсолорӣ, инсондӯстӣ ва ҳимматбаландии ин миллати фарҳангдӯст тасвир карда шаванд.
18. Истифодаи баъзе ишораҳои таърихи бостон, сарчашмаҳои таърихи ёдгориҳои бостонӣ ва нигораҳое, ки дар он шуҷоату матонати халқи тоҷик ифода шудаанд, ба инобат гирифта шавад.
19. Дар лоиҳа барои боз ҳам муҳташаму зеботар шудани фазои ландшафти меъморӣ бо истифода аз суннатҳои шаҳрсозӣ бояд аз унсурҳои таърихию фарҳангии шаҳрҳои тамаддунофари бостонии тоҷикон эҷодкорона  баҳрабардорӣ шаванд.
20. Дар як самти майдон деворанигораи муҳташами бо санъати хеле баланд аз сангҳои табиии Тоҷикистон бо номи «Нигористон» бо саҳнаи ба андозаи майдон мутаносиб пешбинӣ гардад, ки он чун саҳна минбари баргузории тантанаҳои расмии давлатӣ (Ҷашни Истиқлолияти давлатӣ, Наврӯз, Ваҳдати миллӣ ва ғайра) мавриди истифода қарор дода мешавад. Девори «Нигористон» аз сангҳои дурру лоҷувард, фирӯза, лаъл ва дигар сангҳои ороишии Суғду Бохтар ва Бадахшон ороиш ёфта, дар марказ нақшҳои барҷастаи мурғи ҳумо бо фарри ориёӣ, ҳафт гунбад (ситора), ки ин яке аз шоҳкориҳои меъморию санъати меъмории ниёгони мо буда, инчунин, дар он дигар рамзҳои давлатдорӣ акс ёфтаанд, тасвир карда шавад.
21. Эъмору барқарор намудани девори «Нигористон» бо рамзҳои таърихии давлатдорӣ, озодихоҳӣ ва дастёб шудан ба Истиқлолияти миллӣ дар марҳилаи нави таърихист ва масъулият, хотираи таърихии мардум ва ҷомеаро нисбат ба таърих, арзишҳои фарҳангии дирӯзу имрӯз дучанд хоҳанд афзуд.
22. Бо мақсади интихоб намудани ғолиби озмуни лоиҳаи беҳтарин талаботи зерин ба инобат гирифта мешаванд:
— шакл, симо ва ҳалли меъмории беҳтарин;
— дар лоиҳа пешниҳод намудани ободонии ҳудуд (майдон), қисмати техникию хизматрасонии муҳандисӣ ва нишондодҳои техникию иқтисодии маҷмааи меъмории рамзи «Истиқлолият ва Озодӣ».

6. Ҷойгиршавӣ
23. Ҷойгиронии майдони нав бо рамзи «Истиқлолият ва Озодӣ» дар қисмати марказии шаҳри Душанбе, дар қитъаи замини масоҳаташ 8,5 гектар, воқеъ дар буриши дарёи Душанбе бо дарёчаи Лучоб, дар қисмати ҷанубии Донишгоҳи миллии Тоҷикистон, кӯчаи Низомии Ганҷавӣ банақшагирӣ карда шавад (нақшаи ҷойгиршавӣ замима мегардад).

7. Номгӯи ҳуҷҷатҳои зарурӣ барои пешниҳод
Ҳуҷҷатҳои зерин барои озмун пешниҳод карда мешаванд:
— мактуби ёддошт на зиёда аз 4 саҳифа (дар 2 нусха) бо зикри масоили асосии меъморӣ, сохтмонӣ ва техникии иншоот;
— нақшаи генералӣ дар миқёси 1:1000;
— лоиҳаҳо дар шакли А0 (800 см х 1200см);
— нақшаҳои намо дар миқёси 1:100, 1:200;
— нақшаҳои ошёнаҳо ва бурришҳо дар миқёси 1:100, 1:200;
— таҳияи маводи графикӣ, 3D (навор) ва мактуби ёддоштӣ дар сатҳи озод;
— шиор дар болои кунҷи чапи лоиҳа ва мактуб бо калима навишта мешавад (баландии навиштаҷот -10 мм);
— дар мактуби даруни лифофа маълумоти зарурӣ доир ба муаллифон — ном, насаб, номи падар ё номи корхона (ташкилот), суроға ва рақами телефон нишон дода мешавад.
25. Дар лоиҳаи аз ҷониби як гурӯҳ таҳияшуда иловатан бо шиор дар варақи алоҳида имзои муаллифон гузошта мешавад;
— дар мавриди таҳияи ҳуҷҷатҳои озмун аз графикаи компютерӣ ва амсила (макет) истифода намудан мумкин аст.
26. Лоиҳаҳое, ки ба озмун бо вайрон кардани шартҳои мазкур ва пас аз муҳлати пешбинигардида пешниҳод мегарданд, баррасӣ карда намешаванд.

8. Муҳлати пешниҳоди лоиҳа
27. Ҳуҷҷатҳои довталабон барои иштирок дар озмун аз санаи 1 феврал то 30 апрели соли 2018 ба Ҳукумати Ҷумҳурии Тоҷикистон бо қайди «Барои озмун» ба суроғаи ҶумҳурииТоҷикистон, шаҳри Душанбе, кӯчаи Ҳусейнзода-36 пешниҳод карда мешаванд.
28. Ҳуҷҷатҳои озмунии пешниҳодшуда дар китоби алоҳида бо санаи дохил шуданашон ба қайд гирифта мешаванд.

9. Мукофот барои ғолибони озмун
29. Мукофот барои ғолибони озмун ба шакли зерин муайян карда мешавад:
— барои ҷойи якум: мукофот ба маблағи 15000 сомонӣ;
— барои  ҷойи дуюм:  мукофот ба маблағи 10000 сомонӣ;
— барои ҷойи сеюм: мукофот ба маблағи 7000 сомонӣ;
— барои ҳавасмандгардонии иштирокчии дигари озмун ифтихорнома дода мешавад.
30. Комиссия инъикоси васеи Тартиби мазкурро бо натиҷаи баргузории озмун тавассути воситаҳои ахбори оммаи электронию чопӣ таъмин менамояд.
 
ҲАЙАТИ
Комиссияи ҷумҳуриявии озмуни кушод байни шахсони воқеӣ ва ҳуқуқии ватанию хориҷӣ доир  ба интихоби беҳтарин лоиҳаи ангоравии маҷмааи меъмории рамзи «Истиқлолият ва Озодӣ» дар шаҳри Душанбе бахшида ба Ҷашни 30 - солагии Истиқлолияти давлатии Ҷумҳурии Тоҷикистон
1. Сарвазири Ҷумҳурии Тоҷикистон, раиси Комиссия;
2. Раиси шаҳри Душанбе, муовини раиси Комиссия;
3. Муовини Сарвазири Ҷумҳурии Тоҷикистон Азим Иброҳим, муовини раиси Комиссия;
4. Раиси Кумитаи меъморӣ ва сохтмони назди Ҳукумати Ҷумҳурии Тоҷикистон, муовини раиси Комиссия;
5. Сардори раёсати рушди инфрасохтори Дастгоҳи иҷроияи Президенти Ҷумҳурии Тоҷикистон, котиби масъули Комиссия.

Аъзои Комиссия
1. Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, муовини раиси Комиссия;
2. Вазири фарҳанги Ҷумҳурии Тоҷикистон;
3. Раиси Кумитаи давлатии идораи замин ва геодезии Ҷумҳурии Тоҷикистон;
4. Раиси Кумитаи ҳифзи муҳити зисти назди Ҳукумати Ҷумҳурии Тоҷикистон;
5. Президенти Академияи илмҳои Ҷумҳурии Тоҷикистон;
6. Директори Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон;
7. Муовини якуми раиси шаҳри Душанбе;
8. Директори Институти таърих, бостоншиносӣ ва мардумшиносии Академияи илмҳои Ҷумҳурии Тоҷикистон;
9. Сардори раёсати илму маърифати Дастгоҳи иҷроияи Президенти ҶумҳурииТоҷикистон;
10. Раиси Федератсияи иттифоқҳои касабаи мустақили Тоҷикистон;
11. Раиси Иттифоқи нависандагони Тоҷикистон.


Баёни ақида (0)    Санаи нашр: 20.02.2018    №: 38    Мутолиа карданд: 429

06.12.2019


Боздиди Рустами Эмомалӣ аз варзишгоҳи «Миллий»

Хуҷанд. Бунёди корхонаи истеҳсоли телевизор, яхдон ва кондитсионер

Масъалаи моҳияти сармояи инсонӣ дар рушди инноватсионӣ мавриди баррасӣ қарор гирифт

Пекин аз Вашингтон кам кардани боҷи молҳои чиниро дархост намуд

ОПЕК истихроҷи нафтро метавонад кам созад

Дар мактабҳои Қазоқистон гузариш ба алифбои лотиниро мавқуф гузоштанд

Коррупсияро дар Қирғизистон тавассути рақамисозӣ бартараф карданианд

Ҷаҳон дар як сатр

05.12.2019


Беш аз ду тонна доруворӣ ба коми оташ рафт

Фестивали филм ва мусиқии Руминия дар Тоҷикистон

Боздиди Рустами Эмомалӣ аз шаҳри Самарқанд

Дар Афғонистон шоҳасари Бобоҷон Ғафуров “Тоҷикон” чоп шуд

Макрон изҳороти НАТО оид ба «таҳдиди русӣ» - ро зери шубҳа гузошт

Боздошти муовини собиқ сарвари «ДИ» Ал - Бағдодӣ дар Ироқ

Андрей шевченко дар мураббигӣ низ муваффақ аст

Ҷаҳон дар як сатр

04.12.2019


Тақвияти ҳамкориҳо дар мубориза бар зидди терроризму экстремизм матраҳ гардид

Ҷаласаи гурӯҳи корӣ оид ба таҳияи намоишгоҳ бахшида ба мероси муштараки фарҳангии Роҳи абрешим баргузор шуд

Китоби Президенти Тоҷикистон Эмомалӣ Раҳмон дар Теҳрон рӯнамоӣ мешавад

Мирзиёев раиси шаҳри Душанбе Рустами Эмомалиро ба ҳузур пазируфт

Департаменти давлатӣ: «ИМА Россияро маблағгузори терроризм намешуморад»

Ҳукумати Албания хисороти заминҷунбии мудҳишро ҳисоб намуд

Москва ва Киев созишномаи 10 – солаи таҳвили нафтро ба имзо расонданд

Ҷаҳон дар як сатр

03.12.2019


Дар пойтахт барӯйхатгирии аҳолӣ ва фонди манзил гузаронда мешавад

Дар майдони «Дӯстӣ» арчаи солинавӣ қомат меафрозад

«Лолаи тиллоӣ» синамогарони тоҷикро ба ҳам овард

Дар Британия намояндагии маҳфили “Ҷавонони дар хориҷи кишвар таҳсилдошта” ифтитоҳ ёфт

Россия ва Беларус қисме аз ваколатҳоро ба ҳукумати ягона медиҳанд

Олимон суду зиёни қаҳванӯширо ном бурданд

Ҷаҳон дар як сатр

САМБО. Медали биринҷии Сорбон дар Қазоқистон

02.12.2019


Дар Бишкек кишварҳои аъзои СААД 15 санад ба имзо расонданд

Эрдуғон кишварҳои арабро ба ёрии Албания даъват намуд


Дар сомонаҳои дигари Тоҷикистон хонед