logo

иқтисод

ИҚТИСОД. МАРҲИЛАИ НАВИ ҲАМКОРИҲО

Гардиши мол байни Тоҷикистону Ӯзбекистон соли 2016 назар ба соли 2015 қариб 7 маротиба афзуда, беш аз 126 миллион доллари ИМА – ро ташкил дод ва соли гузашта ба 236 миллион доллар расид.  Содироти маҳсулот ба Ӯзбекистон яку ним маротиба зиёд шуд. Дар шаш моҳи соли равон гардиши мол нисбат ба ҳамин давраи соли гузашта 35 дарсад (69 миллион доллар) афзуд. «Ду кишвари дӯсту бародар имкон доранд, ки солҳои наздик ҳаҷми гардиши солонаи молро ба 1 миллиард доллар расонанд». Чунин андеша доранд иқтисоддонҳои варзидаи кишвар.
Ба қавли Неъматулло Ҳикматуллозода, вазири рушди иқтисод ва савдои Тоҷикистон, ҳоло пас аз барқарории робитаҳои дӯстию накуҳамсоягӣ барои рушди ҳамкориҳо тамоми шароит мавҷуд аст ва ягон монеа нест. Динамикаи афзоиши устувору босуръати тиҷорати мол худ гувоҳи рушди беназири муносибатҳои иқтисодию тиҷоратианд, ки маҳз ба шарофати талошҳои пайваста ва дӯстию бародарии ду абармарди хирадманди сиёсатмадор Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон муҳтарам Шавкат Мирзиёев имконпазир гардид.
Алҳол бо ёрии соҳибкорони тоҷик дар минтақаи ҳаммарзи Ӯзбекистон корхонаи бузурги истеҳсоли семент ва бо мадади ҷониби Ӯзбекистон дар вилояти Суғд мактаби замонавӣ барои 630 ҷойи нишаст дар як баст бунёд меёбанд.
Содироти танҳо семент тайи як соли охир ба Ӯзбекистон 16 маротиба афзуд. Корхонаҳои Тоҷикистон соли гузашта 3,1 миллион тонна семент истеҳсол намуда, имсол онро ба 3,5 миллион расонданианд. Дар Тошкент «Хонаҳои савдо» - и  соҳибкорони тоҷик фаъолият доранд. «Хонаи савдо» - и ширкати «Ғаюр» беш аз 30 намуд масолеҳи баландсифати сохтмонӣ, аз ҷумла семент, профилҳои металлию пластикӣ, савдо мекунад. Ҳоло «Ғаюр» ба бозори Ӯзбекистон моҳе беш аз 15 ҳазор тонна семент мебарорад ва ин рақам пайваста меафзояд, зеро, тибқи иттилои расонаҳои Ӯзбекистон, доираҳои соҳибкории шаҳру вилоятҳои Бухоро,  Самарқанд, Навоӣ ва Ҷиззах хостори ҳамкориҳо бо ин ширкатанд. Барои мардуми бародари ӯзбек бартарияти аз Тоҷикистон харидани семент сифати баланди он ва камии хароҷоти нақлиётӣ (охир ду кишвар ба ҳам наздиканд ва роҳҳои ҳамвор доранд) маънидод мешавад.
Тоҷикистон дар шаш моҳ ба Ӯзбекистон ба маблағи 75 миллион доллар маҳсулот фурӯхта, ба андозаи 53,3 миллион доллар мол харид.
Таъмир ва бозкушоии роҳи оҳани қитъаи Ғалаба – Амузанг, ки дар манзари дӯстию бародарии фарзандони фарзонаи ду миллат Эмомалӣ Раҳмон ва Шавкат Мирзиёев сурат гирифт, ба афзоиши ҳаҷми тиҷорати мол байни Тоҷикистону Ӯзбекистон мусоидат намуд.
Муносибатҳои Тоҷикистону Ӯзбекистон дар ҳама бахшҳои иқтисодию тиҷоратӣ куллан мустаҳкам мешаванд. Моҳи апрели соли равон низоми энергетикии Тоҷикистону Ӯзбекистон, ки аз соли 2009 гусаста буд, боз бо ҳам пайваст. Хати интиқоли барқ аз Тоҷикистон ба Ӯзбекистон мавриди баҳрабардорӣ қарор гирифт. Ҳатто дар марҳилаи аввал ҳаҷми содироти неруи барқ ба ин кишвари ҳамсоя дар фаслҳои баҳору тобистон бештар аз 1,5 миллиард кВт – соат пешбинӣ шудааст. Рушди ҳамкории энергетикии ду кишвар барои барқарории низоми ягонаи энергетикии Осиёи Марказӣ заминаи устувор гузошт.
Сайёҳӣ бахши дигари ҳамкориҳоест, ки ба таври бесобиқа рӯ ба рушд дорад. Тибқи иттилои хабаргузории «УЗА», танҳо тайи шаш моҳи соли равон бештар аз 387 ҳазор ӯзбекистониҳо ба Тоҷикистон ва қариб ҳамин қадар тоҷикистониҳо ба Ӯзбекистон сафар намуданд. Ҳоло байни ду кишвар роҳҳои оҳан, нақлиёти заминӣ ва ҳавоӣ кушодаанд. Сайрхатҳои ҳавоии Душанбе – Тошкент, Душанбе – Самарқанд ва Душанбе – Бухоро (парвози техникӣ – санҷишӣ  муваффақ гузашт) ва бо нақлиёти заминӣ сайрхатҳои Панҷакент – Самарқанд, Хуҷанд – Тошкент, Душанбе – Деҳнав, Душанбе – Самарқанд ва Душанбе – Бухоро торафт фаъолтар мешаванд. Кушодани сайрхатҳои нав мавриди тарҳрезӣ қарор дорад.
Кушода шудани роҳҳо, гузаргоҳҳои сарҳадӣ ва бозорҳои наздимарзӣ, бешубҳа, барои боз ҳам наздиктар шудани ду халқи дӯсту ҳамсоя ва тақвияти ҳамкориҳои тиҷоратию иқтисодӣ мусоидат менамояд.
Солҳои 2017 ва 2018 дар Душанбе ва Тошкент ҷаласаҳои Комиссияи байниҳукуматии Тоҷикистону Ӯзбекистон оид ба робитаҳои иқтисодӣ, иҷтимоӣ ва фарҳангӣ, вохӯриҳои сарвазирон, роҳбарони вазорату идораҳо ва бахшҳои соҳавӣ баргузор гардиданд, ки барои муайян кардани имконоти рушди ҳамкориҳо нақши муҳим гузоштанд. Дар шаҳрҳои Душанбе, Хуҷанд, Тошкент ва Самарқанд намоишгоҳҳои маҳсулоти миллӣ ва ҳамоишҳои соҳибкорони ду кишвар баргузор гардида, қарордоду шартномаҳои зиёди ҳамкорӣ ба имзо расиданд ва соҳибкорон бо ҳамдигар робитаҳои мустақими корӣ пайдо намуданд. Дар намоишгоҳи «Молҳои истеҳсоли Тоҷикистон», ки дар шаҳри Тошкент баргузор шуд, намояндагони қариб 160 ширкату корхонаҳои калонтарини Тоҷикистон, аз ҷумла минтақаҳои озоди иқтисодии «Данғара» ва «Суғд», ширкат варзида, ба мардуми Ӯзбекистон ва меҳмонон намунаи беҳтарини маҳсулот, номгӯйи хизматрасониҳо ва имконоти сармоягузориро муаррифӣ карданд. Байни соҳибкорон ба маблағи беш аз 50 миллион доллар паймонҳои корӣ ба имзо расиданд. Дар намоишгоҳи «Молҳои Ӯзбекистон» дар Душанбе низ соҳибкорон байни ҳам  ҳамин миқдор паймонҳои корӣ бастанд.
Айни ҳол байни ду кишвар Шӯрои кории тиҷоратию иқтисодӣ амал мекунад, ки барои тақвияти ҳамкориҳои мустақими соҳибкорон ёрӣ мерасонад. Ҳоло дар Тоҷикистон 9 корхонаи муштараки соҳибкорони тоҷику ӯзбек, дар Ӯзбекистон 24 корхона бо сармоягузории муштарак ва 1 корхона пурра бо сармоягузории соҳибкорони тоҷик фаъолият доранд. Нассоҷони ӯзбек, аз ҷумла ассотсиатсияи «Узтестилпром», тибқи иттилои Агентии миллии иттилоотии Ӯзбекистон, дар Душанбе корхонаю коргоҳҳои муштараки дӯзандагию бофандагӣ таъсис доданианд, ки ин ба зиёд шудани ҷойҳои нави кор мусоидат менамояд.
Ва ин, албатта, ҳанӯз оғози кор аст. Мардум умед дорад, ки бо сафари Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон ба Ӯзбекистон дӯстию бародарии анъанавии ду халқ, ки онро ду марди бузург аз нав барқарор намуданд, боз ҳам устувор, муносибатҳои ҳамкорӣ фарохтар ва зиндагии тоҷикону ӯзбекон боз ҳам хушу рангинтар мешавад.
С. АЗИЗӢ, «Ҷумҳурият»


Баёни ақида (0)    Санаи нашр: 16.08.2018    №: 162    Мутолиа карданд: 179

21.11.2018


Аз таркиш дар Кобул беш аз 50 нафар ҳалок шуд

Ӯзбекистон нахустин намоишгоҳ-ярмаркаи байналмилалии содиротӣ мегузаронад

Могерини: «Иттиҳоди Аврупо «артиши аврупоӣ» ташкил карданӣ нест»

Табобати гепатити С дар Беларус аз арзонтарин дар Аврупост

Ҷаҳон дар як сатр

ДУШАНБЕ. Таҷлили нахустин ҷашни занони соҳибкор

ДЕВАШТИЧ. Тантанаи Рӯзи Президент

Иштироки мунтахаби футболи бонувон дар CAFA

20.11.2018


СУҒД. Оғози сохтмони раёсати маориф

ЛЕВАКАНТ. Конфронси илмӣ - назариявӣ ба ифтихори Иҷлосияи XVI

"Парасту" дар Тоҷикобод

Сарони кишварҳои Осиёи Марказӣ барои машварат дар Тошканд ҷамъ меоянд

Финляндия ҷонибдори ҳузури Россия дар Шӯрои Аврупо

Вазорати маорифи Афғонистон 30 ҳазор занро ба кор мегирад

Баррасии рушди инклюзивии иқтисоди қитъа дар Гвинея Папуаи Нав

Ҷаҳон дар як сатр

АНВАР ЮНУСОВ СОҲИБИ КАМАРБАНДИ WBF

"СОРО КОМПАНИЯ" ҒОЛИБИ ЛИГАИ КАСБИИ ФУТЗАЛИ ТОҶИКИСТОН

19.11.2018


ДЕВАШТИЧ. Авҷи созандагиҳо дар Ҷамоати деҳоти Яхтан

Артиши Сурия охирин истеҳкоми «ДИ» дар ҷануби кишварро зери назорат гирифт

Дар ҳама минтақаҳои Ӯзбекистон «мактаби президентӣ» месозанд

Роҳандозии барномаи махсуси давлатии ипотекӣ барои дӯзандагони Қирғизистон

Киштии зериобии «Сан Хуан» - ро дар уқёнуси Атлантика ёфтанд

Ҷаҳон дар як сатр

Кулишов: «Марзҳои ИДМ бо таҷҳизоти муосир таъмин карда мешаванд»

Дар Тоҷикистон омӯзгори забони англисӣ барои таблиғи «ДИ» 19 сол гирифт

Қазоқистон мубориза бо машруботро сахттар мекунад

Фоидаи туризм ба кадом шаҳри дунё бештар аст?

Ҷаҳон дар як сатр

"ИСТИҚЛОЛ" бори аввал барои Ҷоми чемпионҳои КФО мубориза хоҳад бурд

Омодагии тими миллӣ ба марҳилаи интихобии Ҷоми ҷаҳон – 2022

УСМОН ТОШЕВ САРМУРАББИИ НАВИ ДАСТАИ МУНТАХАБ

15.11.2018


Ҳамоиш бахшида ба Рӯзи Президент

Нурдинҷон Исмоилов ба Тоҷикистон меояд


Дар сомонаҳои дигари Тоҷикистон хонед