logo

иҷтимоиёт

ДАРВОЗ. ФАРДО АЗ ИМРӮЗ БЕҲТАР БОЯД БОШАД!

Дар ноҳияи Дарвози Вилояти Мухтори Кӯҳистони Бадахшон ба истиқболи Ҷашни 27 - солагии Истиқлолияти давлатӣ корҳои созандагию бунёдкорӣ бо суръату сифати баланд ҷараён доранд. Аз ҷумла, сохтмони биноҳои мақомоти иҷроияи маҳаллии ҳокимияти давлатии ноҳия ва шуъбаи маориф дар арафаи анҷомёбист.
БИНОИ НАВИ МАҚОМОТ
Бино ба гуфтаи Ҳамид Ҳоҷатов, директори ҶДММ «Болдинг Компания», сохтмони бинои мақомоти иҷроияи маҳаллии ҳокимияти давлатии ноҳия соли 2017 оғоз гардида, то имрӯз 90 дарсади корҳо сомон пазируфтаанд. Бино дорои 32 утоқи корӣ ва ду маҷлисгоҳ буда, барои сохтмон 80 коргар аз минтақаҳои гуногуни Тоҷикистон ҷалб шудаанд. Бо ёрмандии соҳибкорони маҳаллӣ дар атрофи иншоот боғу гулгашт ва фаввораҳо ҳам бунёд меёбанд. Дар ороиши иншоот усулҳои меъмории миллию аврупоӣ истифода шуда, дар арафаи Ҷашни Истиқлолияти давлатӣ мавриди истифода қарор мегирад.
САЙЁҲӢ
Бадахшон агар даврозаи тиллоии Тоҷикистон бошад, Дарвоз дарвозаи тиллоии Бадахшон аст. Қариб тамоми сайёҳоне, ки нияти сайри Бадахшон ва кӯҳҳои осмонбӯси онро доранд, ҳатман дар Дарвоз таваққуф намуда, дар меҳмонхонаҳои замонавӣ («Карон Плаза» ва хостелҳо дар шароити хона) бо суруди рӯди Хумбов шаберо рӯз мекунанд. Субҳ чашм кушода, аз мавзеъҳои таърихию тамошоии минтақа дидан мекунанд ва баъдан роҳи гардишгариро идома медиҳанд.
Чизе, ки таваҷҷуҳи моро ҷалб намуд, хостелҳо буданд. Сокинони ноҳия шахсан иқдом намуда, дар хонаву ҳавлиҳои хеш шароити пазироии сайёҳонро муҳайё намудаанд. Барои мо маълум аст, ки аксари гардишгарон дар хонаҳои мардум зиндагӣ кардан ва бадин восита аз рангорангии ҳаёти халқ огоҳ шуданро мехоҳанд.
Ҳоло расман дар ҳудуди ноҳияи Дарвоз 8 меҳмонхона, 11 хостел ва 10 ҳаммому нуқтаҳои ройгони хизматрасонӣ амал карда, мардумро бо кори доимӣ ва даромад таъмин кардааст.
- Хуб мебуд агар барои мо нақлиёти хизматӣ ҷудо шуда,  қад - қади роҳи асосӣ харитаҳои сайёҳӣ ва рекламаву овезаҳои тарғиботии минтақа насб карда шаванд. Зеро мо ҳамарӯза тавассути нақлиёти шахсию ҷамъиятӣ қариб 140 километр ҳудуди ноҳияро гашта, ба сайёҳон роҳбаладӣ мекунем, - изҳор дошт Олим Сангов, мудири бахши сайёҳии ноҳия, ки соли 2017 таъсис дода шуд.
Дар шаш моҳи соли ҷорӣ ба ноҳия зиёда аз 3000 сайёҳи хориҷӣ ворид шуда, аз ин ҳисоб ба буҷети маҳаллӣ 264 300 сомонӣ маблағ ворид гардидааст. Дар ноҳия ширкати сайёҳии «М - Сайёд» фаъолият намуда, хизматрасонии худро бо роҳи шикори бузи кӯҳӣ ва фото - сафар ба роҳ мондааст. Дар баробари ин, ширкат дар мавзеи Яхчи мобайн ба сохтмони меҳмонхонаи сеошёна шурӯъ намуда, ҷалби бештари сайёҳонро ба нақша гирифтааст.
Ба андешаи мо, иқдоми масъулону сокинони ноҳия дар бобати рушди сайёҳӣ намунаи ибратанд ва аз он дар миқёси ҷумҳурӣ метавон васеъ истифода бурд.
ТАНДУРУСТӢ
Ноҳияи Дарвоз дорои як беморхонаи марказӣ, ду минтақавӣ бо фарогирии 150 кат, ҳафт маркази саломатӣ дар деҳот, 25 бунгоҳи  тиббӣ, як маркази ВНМО, пойгоҳи ёрии таъҷилӣ, маркази бемориҳои сил, маркази тропикӣ, стансияи эпидемиологӣ - санитарӣ ва маркази иммунопрофилактикӣ мебошад. Дар ин муассисаҳо дар маҷмӯъ 286 табибу корманд фаъолият доранд.
- Дар доираи «Барномаи рушди иҷтимоию иқтисодии ноҳияи Дарвоз барои солҳои 2015 - 2019» аксари муассисаҳои тандурустӣ азнавсозӣ гардида, бо таҷҳизоти муосири тиббӣ ва дигар шароити замонавӣ таъмин шуданд. Дар ин давра барои иҷрои барномаи мазкур корҳо ба маблағи 3 миллиону 600 ҳазор сомонӣ иҷро гардид, - иброз дошт сардухтури беморхонаи марказӣ Иматшо Давлатшоев.
Бино ба гуфтаи ӯ, беморхонаи марказӣ бо тамоми технологияҳои ҳозиразамон муҷаҳҳаз аст.  Дар беморхона утоқи «Телемост» амал мекунад, ки табибону беморон тавассути он метавонанд ба таври фосилавӣ (онлайн) бо мутахассисони дохилу хориҷи кишвар машварат намоянд. Ин имкон медиҳад, ки касалиҳо ва сабабҳои хуруҷи он зудтар муайян шуда, беморон сари вақт ба беморхонаҳои вилоятӣ, ҷумҳуриявӣ ва хориҷӣ интиқол ёбанд. 
Барои такмил додани дониши табибон ҳашт компютери бо шабакаи интернет пайваст ва китобхона дар хидмати табибон қарор дорад. Инчунин, дар шуъбаи кӯдакони беморхонаи марказӣ ба маблағи 20 ҳазор сомонӣ утоқи дилхушии кӯдакон бунёд ёфт, ки тифлони бистаришуда аз он истифода мекунанд.
«КОХИ БОНУВОН»
Корхонаи дӯзандагии ҶДММ «Кохи бонувон» дар Ҷамоати деҳоти Қалъаи - Хумб бо дӯхтани сарулибоси мактабӣ барои хонандагони муассисаҳои таълимии ноҳия саҳми арзанда мегузорад. Ин корхона бо шуъбаи маорифи ноҳия шартнома дошта,  хонандагонро бо либоси мактабӣ таъмин менамояд.
«Кохи бонувон» соли 2015 бо дастгирии Пешвои миллат муҳтарам Эмомалӣ Раҳмон ба фаъолият шурӯъ намуда, дорои 90 дастгоҳи либосдӯзӣ мебошад. Коргоҳ дар ҳолати рушд буда, дар он 88 нафар занону духтарони маҳаллӣ бо ҷойи кори доимӣ таъминанд. Дар шаш моҳи соли ҷорӣ корхона дар ҳаҷми 94,3 ҳазор сомонӣ маҳсулоти саноатӣ истеҳсол намудааст.
Бузургмеҳри БАҲОДУР,
Маҳмуд ҶӮРАЕВ,
«Ҷумҳурият»

 

 

 

 


Баёни ақида (0)    Санаи нашр: 30.08.2018    №: 171    Мутолиа карданд: 323

22.01.2020


Лигаи чемпионҳо. Ғалабаи "Истиқлол" бар "Локомотив"

ОЗМУН БАХШИДА БА РӮЗИ ҚУВВАҲОИ МУСАЛЛАҲ

Гутерреш: «Ҷамъомади кумитаи муштарак оид ба Либия мумкин аст 28 январ баргузор гардад»

Трамп бо Лондон созишномаи тиҷоратиро муҳокима кардан мехоҳад

Барои офаридани ваксинаи русӣ бар зидди коронавируси чинӣ ним сол зарур аст

Дар Лубнон бори нахуст зан вазири мудофиа шуд

Дар Чин собиқ сарвари Интерпол барои пора 13,5 сол паси панҷара меравад

Ҷаҳон дар як сатр

Маъюбон. Махзани ягонаи электронӣ таъсис ёфт

21.01.2020


"ҶОМИ РУШД – 2020". Тоҷикистон тими Исландияро шикаст дод

Россия ва Франсия ба музокирот дар чорчӯбаи «2+2» тайёрӣ мебинанд

Баҳои коршиноси Амороти Муттаҳидаи Араб ба конфронси Берлин оид ба қазияи Либия

Салиби сурх: «Ҷанги Яман боиси фирори се миллион нафар гашт»

Шарқи Канада зери барф монд

Соли гузашта дар Италия ҳар ним соат замин ҷунбид

Ҷаҳон дар як сатр

03.01.2020


 БАЙНИ ТОҶИКИСТОН ВА АФҒОНИСТОН РОҲИ ОҲАН БУНЁД МЕГАРДАД

 ДАР ХОРУҒ КӮДАКИСТОН МАВРИДИ БАҲРАБАРДОРӢ ҚАРОР ГИРИФТ

 ХОВАЛИНГ. БЕМОРХОНАИ РАҚАМӢ БА ИСТИФОДА ДОДА ШУД

 AIRBUS БОРИ НАХУСТ АЗ СОЛИ 2011 АЗ BOEING ПЕШ ГУЗАШТ

 ОБХЕЗӢ ДАР ИНДОНЕЗИЯ БОИСИ ҲАЛОКАТИ 26 НАФАР ГАШТ

 НИДЕРЛАНД РАСМАН АЗ "ГОЛЛАНДИЯ" ДАСТ КАШИД

 ДАР ҚАЗОҚИСТОН МУСОФИРИ ҲАВОПАЙМОИ СУҚУТКАРДАРО МУКОФОТОНДАНД

ДАР ӮЗБЕКИСТОН ТӮЙҲОИ ПУРДАБДАБАРО МАНЪ НАМУДАНД

25.12.2019


"RIAS Ingineering" телевизору яхдонҳои тоҷикӣ месозад

Қазоқистон ҳукми қатлро пурра бекор карданист

Дар Австралия аз сӯхтори ҷангал шаҳр ба коми оташ рафт

Сарвари Индонезия тарҳи пойтахти нави кишварро интихоб намуд

Чин боҷи қариб ҳазор моли хориҷиро кам месозад

Ҷаҳон дар як сатр

24.12.2019


"ПЕШВОИ МИЛЛАТ ПОЯГУЗОРИ СУЛҲ ВА МЕЪМОРИ ВАҲДАТ"

Баррасии густариши ҳамкориҳо дар соҳаи сайёҳӣ

Қурбон Ҳакимзода ҳайати шаҳри Вэйнанро ба ҳузур пазируфт

Нуробод. Пешгирии шомилшавии ҷавонон ба ҳаракатҳои ифротгаро


Дар сомонаҳои дигари Тоҷикистон хонед