logo

иҷтимоиёт

ИСФАРА. СИМОИ НАВИ ШАҲРИ КУҲАН

Исфара яке аз минтақаҳои қадимаи кишвар аст, ки ба шарофати соҳибистиқлолӣ ва заҳмати софдилонаи мардуми сарбаланду меҳнатдӯст ва илму адабпарвараш, беш аз пеш шукуфтан дорад. Сокинони ин шаҳри бостонӣ бо шукргузорӣ аз фазои орому осудаи Ватан баҳри боз ҳам ободтар шудани он камари ҳиммат бастаанд.
Тавре раиси шаҳр Сиҷоуддин Саломзода иброз дошт, мақомоти иҷроияи ҳокимияти давлатии шаҳр дар партави сиёсати ояндасози Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тамоми саъю кӯшиши худро барои таъмини рушди босуботи иқтисодию иҷтимоӣ, вусъати корҳои созандагию бунёдкорӣ, ҳифзи иҷтимоии аҳолӣ ва беҳтар намудани сатҳи некуаҳволии мардум равона кардааст.
Баҳри истиқболи сазовори  Ҷашни 30-солагии Истиқлолияти давлатӣ нақшаи чорабиниҳо таҳия ва тасдиқ шуд, ки дар доираи он 371 иншоот  бунёд ва таъмиру таҷдид мешавад. Ва дар ин замина, соли сипаригардида 64 иншоот мавриди баҳрабардорӣ қарор гирифта, дар 42 иншоот корҳои сохтмонӣ ҷараён дорад.
Тармиму навсозии роҳҳои байналмилалию шаҳрӣ ва маҳаллӣ аз масъалаҳоеанд, ки мақомоти иҷроияи ҳокимияти давлатии шаҳр ба он эътибори аввалиндараҷа медиҳад. Танҳо соли 2018 беш аз 173 километр роҳ таъмиру таҷдид гашт. Аз ҷумла, дар доираи лоиҳаи «Рушди роҳҳои алоқа дар Осиёи Марказӣ», ки Ҳукумати мамлакат дар ҳамкорӣ бо Бонки ҷаҳонӣ амалӣ намуда истодааст, навсозии роҳи автомобилгарди Хуҷанд – Исфара тибқи талаботи стандартҳои байналмилалӣ идома дорад. Дарозии роҳ 45 километр буда, 90 дарсади корҳо анҷом ёфтаанд. Ҳамчунин, тибқи фармоиши Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон 4,2 километр роҳи маркази шаҳр - осоишгоҳи Зумрад, 2,2 километр роҳи кӯчаи С. Абдуллоев ва аз ҳисоби буҷети вилоятӣ роҳҳои кӯчаҳои Н. Ҳаитови маркази шаҳру Н. Асадуллоеви Ҷамоати деҳоти Чоркӯҳ асфалтпӯш шуданд. Бо ибтикори соҳибкорони маҳаллӣ низ, зиёда аз 7 километр роҳҳои деҳот  мумфарш гардид. Ба ҷуз ин, то ҷашн таҷдиди роҳҳои Исфара - Боткен то сарҳади Қирғизистон, роҳи мошингарди Исфара - Нурафшон - Конибодом, Исфара - Шӯроб, Исфара - Нефтобод - Равот, Исфара - Зумрадшоҳ - Чорқишлоқ, Исфара – Моҳпарӣ, Исфара - Даҳана - сарҳади Ӯзбекистон дар назар дошта шуда, 52 километр роҳҳои дохилии деҳаҳо низ, таъмир хоҳанд гашт.
Роҳбарияти шаҳр, бо истифода аз сарчашмаҳои гуногуни маблағгузорӣ, барои таъмини аҳолии деҳот бо оби тозаи ошомиданӣ тадбирҳои зарурӣ андешида истодааст. Дар доираи амалигардонии лоиҳаи “Обтаъминкунӣ ва санитарияи деҳоти водии Фарғона”, то имрӯз қисми зиёди аҳолии деҳоти Кӯлканд ва Чилгазӣ бо оби нӯшоӣ таъмин гашта, татбиқи лоиҳаи обтаъминкунии деҳоти Лаккон оғоз ёфт ва бо амалишавии он беш аз 51 ҳазор нафар ба оби тоза дастрасӣ пайдо менамояд. Ҳамзамон, бо маблағгузории Бонки таҷдид ва рушди Аврупо навсозии хатҳои об ва канализатсияи шаҳр ба маблағи 3,5 миллион сомонӣ идома дошта, канали “Мастчоҳӣ”, ки барои обёрии заминҳои кишоварзӣ истифода мешавад, аз таъмири асосӣ бароварда шуд. Тибқи нақша, то соли 2021 дар аксари деҳот иншоот ва шабакаҳои обтаъминкунию ҳавзҳои нигаҳдории оби нӯшоӣ бунёд шуда, пойгоҳи обкашии “100 - солагии В. И. Ленин” дар деҳоти Лаккон барқарор мегардад.
Дар баробари ин, соли сипаригардида бо мақсади беҳтар намудани дастрасии аҳолӣ ба хизматрасонии тиббӣ ва, умуман, тақвияти вазъи инфрасохтори соҳаи тандурустӣ, шуъбаи бемориҳои асаби беморхонаи марказӣ бо харҷи 345 ҳазор сомонӣ навсозӣ шуда, бо ҷалби соҳибкорону шахсони саховатпеша таъмири шуъбаҳои таваллудхонаву бемориҳои сироятӣ бо маблағи 306 ҳазор сомонӣ анҷом ёфт. Бо маблағгузории «Агентии Швейтсария оид ба рушд»  бо харҷи 300 ҳазор сомонӣ беморхонаи минтақавии деҳаи Чилгазӣ аз таъмири асосӣ баромад. Марказҳои саломатии деҳоти Чоркӯҳ, Нефтобод, Чилгазӣ, Кӯлканд, Хонобод ва шуъбаи тибби оилавии маркази саломатии шаҳрӣ таъмир ва бо таҷҳизоти зарурӣ муҷаҳҳаз гаштанд.
Бунёд ва таҷдиду навсозии муассисаҳои таълимӣ низ аз бандҳои муҳими нақшаи чорабиниҳо ба шумор меравад. То ин давра, маҷмааи варзишии замонавии литсеи № 1-и шаҳр бо 400 ҷойи нишаст, майдончаҳои хурди футболи муассисаҳои таҳсилоти миёнаи умумии  №№ 18, 46 ва  се синфхонаи иловагӣ дар муассисаи таҳсилоти миёнаи умумии № 70 мавриди баҳрабардорӣ қарор гирифта, китобхонаи муассисаи таҳсилоти миёнаи умумии № 12 таъмир гардид. Айни замон бо ҷалби соҳибкорону кумитаи падару модарон бунёди синфхонаҳои иловагӣ дар як қатор муассисаҳои таҳсилотӣ ба роҳ монда шуда, то соли 2021 бинои нави маъмурии раёсати маориф, кӯдакистони хусусӣ бо 100 ҷой дар маркази шаҳр, боғча барои 50 кӯдак дар маҳаллаи Зебунисо, муассисаҳои таълимӣ дар маҳаллаи Моҳпарии шаҳр барои 1150 хонанда ва дар деҳаи Сангтӯдаи деҳоти Ворух барои 500 нафар хонанда бунёд мегарданд.
Боиси қаноатмандист, ки дар баробари мақомоти иҷроияи ҳокимияти давлатии шаҳр, соҳибкорон низ барои расидан ба ҳадафи чоруми миллӣ – саноатисозии мамлакат, ки Президенти кишвар зимни ироаи Паёми навбатӣ иброз доштанд, кӯшиш намуда истодаанд. Ҳамаи кӯшишҳо ба он равона шудаанд, ки дар татбиқи сиёсати созандаи Ҳукумати мамлакат саҳмгузор бошему зиндагии арзандаи сокинонро таъмин созем. 
Меҳрангез ҚОДИРОВА,
Лола РИЗОӢ,
“Ҷумҳурият”


Баёни ақида (0)    Санаи нашр: 23.01.2019    №: 18    Мутолиа карданд: 371
26.05.2020


ТОҶИКИСТОН. АЗ БЕМОРИИ COVID – 19 1395 НАФАР ШИФО ЁФТ

НОҲИЯИ ЛАХШ. МУБОРИЗА АЛАЙҲИ COVID-19 ТАҲКИМ МЕЁБАД

КУМАКИ ЧИН БАРОИ ПЕШГИРӢ АЗ ПАҲНШАВИИ COVID – 19

БЕЭҲТИЁТИИ МУХЛИСОН - МӮҶИБИ ГИРИФТОРӢ БА КОРОНАВИРУС

ОЛИМОНИ РУС ВАКСИНАИ ЗИДДИ КОРОНАВИРУСРО МУВАФФАҚОНА ОЗМУДАНД

ҶАҲОН ДАР ЯК САТР

22.05.2020


ЁРИИ БАШАРДӮСТОНАИ ТОҶИКИСТОН БА ӮЗБЕКИСТОН

КУМАКИ ПРЕЗИДЕНТ БА ВИЛОЯТИ СУҒД

1008 НАФАР АЗ БЕМОРИИ COVID – 19 ШИФО ЁФТ

ВМКБ. ЁРИИ САРВАРИ ДАВЛАТ ФАЪОЛИЯТИ МУАССИСАҲОИ ТАБОБАТИРО БОЗ ҲАМ БЕҲТАР НАМУД

21.05.2020


ОЛИМИ ТОҶИК БОБОҶОН НАЗАРОВ ДАР БРИТАНИЯ ДОРУИ COVID-19 МЕСОЗАД

МИШУСТИН: «АФЗОИШИ ПАҲНШАВИИ КОРОНАВИРУС ДАР РОССИЯ БОЗДОШТА ШУД»

ЧИН БА КИШВАРҲОИ АЗ КОРОНАВИРУС ЗАРАРДИДА $2 МИЛЛИАРД МЕДИҲАД

МЕРКЕЛ: «ЯГОН ДАВЛАТ БА ТАНҲОӢ ИН ЭПИДЕМИЯРО УҲДА КАРДА НАМЕТАВОНАД»

МУЗОКИРОТИ БРИТАНИЯ ВА ФРАНСИЯ ОИД БА ЛАҒВИ КАРАНТИНИ МУСОФИРОНИ ВОРИДШУДА

ТАЙСОН ВА ҲОЛИФИЛД БА РИНГ БАРМЕГАРДАНД

ҶАҲОН ДАР ЯК САТР

19.05.2020


407 НАФАРИ ДИГАР АЗ КОРОНАВИРУС ШИФО ЁФТ

ВМКБ. ИСТИФОДАИ САМАРАНОКИ ЗАМИН ДАР МАДДИ АВВАЛ

ИҚДОМИ ЯК ДОНИШКАДА

ХУҶАНД. ВЕБ-СЕМИНАР ОИД БА ТАШХИС ВА ТАБОБАТИ COVID – 19

САНОАТ. ҲАҶМИ ИСТЕҲСОЛ 15,3 ДАРСАД ЗИЁД ШУД

СУҒД.РОҲАНДОЗИИ ТАЪТИЛИ САМАРАНОК

ПАЙРАВӢ АЗ ИҚДОМИ ПЕШВОИ МИЛЛАТ

РАФАЭЛ НАДАЛ БЕҲТАРИН ВАРЗИШГАР ДАР ТАЪРИХИ ИСПАНИЯ

МАСТЧОҲ СИМОИ ИДОНА МЕГИРАД

18.05.2020


СУҒД. МУБОРИЗА АЛАЙҲИ БЕМОРИҲОИ СИРОЯТӢ ПУРЗӮР МЕГАРДАД

НУРОБОД ҲУСНИ НАВ МЕГИРАД

ФУТБОЛ. ЧЕМПИОНАТИ БЕЛГИЯ НИЗ ПЕШ АЗ МУҲЛАТ АНҶОМ ЁФТ

ТОҶИКИСТОНУ БЕЛАРУС ДАР МУБОРИЗА БО КОРОНАВИРУС ҲАМКОРӢ МЕКУНАНД

ҶАҲОН ДАР ЯК САТР

15.05.2020


МАШВАРАТИ КОРИИ МУОВИНИ САРВАЗИРИ МАМЛАКАТ ДАР ШАҲРИ БӮСТОН

ТОҶИКИСТОН. БОЗ 403 МУБТАЛОИ КОРОНАВИРУС ШИФО ЁФТ

ДАР ИСФАРА МАКТАБИ БАЙНАЛМИЛАЛИИ «ОРИОН» БУНЁД МЕШАВАД

КӮДАКОН. КОРОНАВИРУС ҚУДРАТИ "ЗАБТ" - И ОРГАНИЗМИ ОНҲОРО НАДОРАД


Дар сомонаҳои дигари Тоҷикистон хонед