logo

сиёсат

ВАҲДАТИ МО - САОДАТИ МО

Ба имзо расидани Созишномаи умумии истиқрори сулҳ ва ризоияти миллӣ дилхоҳтарин армуғоне буд, ки онро 22 сол муқаддам, пас аз панҷ соли ҷанги фалокатбори дохилӣ, маҳрумияту нокомиҳо Пешвои муаззами миллат муҳтарам Эмомалӣ Раҳмон тақдими мардуми азияткашидаи Ватанамон намуданд.  27 июни соли 1997 фурудгоҳи шаҳри Душанбе аз пиру барно, марду зан, чеҳраҳои шукуфону дидаҳои пурнур мавҷ мезад. Майдонҳо, кӯчаю ҷодаҳо гӯё барои ин анбӯҳи бузурги одамони шоду масрур тангӣ мекарданд. Сарвари маҳбуби кишварамонро, ки баъди имзои Созишномаи умумии истиқрори сулҳ ва ризоияти миллӣ дар  Маскав ба Ватан баргаштанд, бо дилҳои моломоли фараҳ оғӯшҳои боз, гулборонҳо истиқбол мекарданд.

Бале, аз байн 22 сол мегузарад насле, ки он вақт нав ба дунёи ҳастӣ қадам ниҳода буд, имрӯз 22 - сола мешавад. Вай он ҷангу сулҳи насли калонсолтари моро бо чашми сар надидааст, намедонад, ки то чӣ ҳад ин воқеаҳо ба сарнавишти миллат таъсир гузошта, дар сарҳади ҳастию нестӣ қарор доданд. Барои ҳамин моҳияту оқибатҳои ин воқеаҳоро амиқан, тавре насли калонсол аз онҳо ёд дорад, дарк намекунад. Барои ҷавонону наврасони мо ҷанги шаҳрвандӣ як ҳодисае аз таърих асту бас. Ин ҷанг воқеан ҳам, фоҷиае буд, ки сари даҳҳо ҳазор нафар фарзандони ин сарзаминро хӯрд, зиндагиро дар кишвар хароб сохт, хатари  пошхӯрии давлату миллат ва аз байн рафтани истиқлоли навпои миллиро ба миён овард.
Ибтидои солҳои 90 - уми асри гузашта дар ҷомеаи мо қувваҳои сиёсие ба майдон омадаанд, ки аз пайи нуфуз, касби қудрат ва иҷрои ҳадафҳои пешгузоштаашон масъулияти хешро дар назди Ватан ва халқи он ба фаромӯшӣ доданд. Ҳамин тариқ,  замоне ки хатари терроризму ифротгароӣ дар ҷаҳон миқёси густардае надошт, Тоҷикистони мо яке аз нахустин озмоишгоҳҳои хунини ин дастаҳои ҷиноятпешаи «исломӣ» қарор  дода шуд.
Охирҳои соли 1992 алорағми ҳама нобасомониҳо ва нобовариҳо барои ором кардани вазъият, сулҳу салоҳ ба роҳ мондани ҳаёти иқтисодию хоҷагӣ иқдомҳои аввалин шурӯъ гардида буданд. Аммо, то оромии сартосарӣ дар Тоҷикистон, то имзои Созишномаи умумии истиқрори сулҳ ва ризоияти миллӣ ҳанӯз панҷ соли дигар роҳ буд. Панҷ соли ҷанг, панҷ соли бурдбориҳо фидокориҳо, даҳшат, ашк…  Панҷ соли гуфтушуниду мубоҳисаҳои тӯлонӣ бо мухолифини давлат дар Хосдеҳ, Кобул, Теҳрон, Ашқобод, Алмаато, Тошканд, Москва ва ғайра, ки ба думболи талошҳои пайгиронаи Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон оқибат сулҳу амниятро дар кишвар пирӯз гардонданд.
Маҳз қатъият, матонату бурдбории Сарвари давлатамон буд, ки гуфтушунидҳо пайгирона, аз соли 1994 оғоз шуда, се соли тамом идома карданд ва ҷонибҳоро қадам ба қадам ба мақсуди ниҳоӣ наздик оварданд. Гарчанде давоми ин муддат ҳолатҳое зиёд буданд, ки мубоҳисаҳо ба бунбаст рӯ ба рӯ гардида, ба идомаи онҳо умеде боқӣ намемонд.
Имрӯз мамлакат давраи пуравҷи пешрафту созандагиро сипарӣ мекунад. Сатҳи камбизоатӣ миёни аҳолӣ аз 80 дарсади оғози давраи истиқлолият то 29 дарсад коҳиш ёфтааст. Ҳаҷми дастмузд дар ҳамаи соҳаҳо пайваста афзоиш меёбад. Ҳамаи ин ба он маъност, ки зиндагию рӯзгори мардуми мамлакат торафт беҳтар мегардад, созандагию бунёдкорӣ вусъат ёфта, симои шаҳру деҳоти мо дигаргун мешавад.
Дар оғози давраи соҳибистиқлолии кишвар аз ҷониби Пешвои миллат се ҳадафи стратегии рушд - таъмини истиқлолияти энергетикӣ, раҳоӣ аз бунбасти коммуникатсионӣ ва таъмини амнияти ғизоӣ ба миён гузошта шуда буданд. Мамлакат имрӯз дар роҳи ба вуҷуд овардани ин се заминаи пешрафт ва некуаҳволии мардум муваффақиятҳои чашмгире ба даст оварда аст. Як  силсила неругоҳҳои нав бунёд гардидаву неругоҳҳои мавҷуда таҷдид ва хатҳои нави интиқоли барқ кашида мешаванд. Дар натиҷа, норасоии ин василаи муҳими рушди иқтисодию иҷтимоӣ бартараф гардида, мамлакат аз воридкунандаи неруи барқ ба содиркунандаи он табдил ёфтааст. Бунёди шоҳроҳҳои нақлиётӣ бошад, тамоми минтақаҳои Тоҷикистонро ба таври устувор бо ҳам васл намуда, имкониятҳои транзитии кишвари моро бамаротиб афзоиш додаанд. Ҳаҷми истеҳсоли маҳсулоти кишоварзӣ низ афзуда, вобастагӣ ба маводи асосии ғизоӣ хеле кам ва содироти меваю сабзавот ба хориҷи мамлакат афзун мегардад. Акнун аз ҷониби Сарвари давлатамон муҳтарам Эмомалӣ Раҳмон ҳадафи чоруми миллӣ - саноатикунонии босуръати кишвар ба миён гузошта шудааст, ки бояд афзалияти саноатро бар ҳамаи соҳаҳои дигари истеҳсолот таъмин гардонад. Ҳадафи мазкур дар стратегияи миллии рушд, ки давраи то соли 2030 - ро дар бар мегирад, пешбинӣ шудааст. Иҷрои муваффақонаи он Тоҷикистони моро ба сафи кишварҳои пешрафта ворид намуда, сатҳи зиндагиро боз ҳам боло мебарад ва садҳо ҳазор ҷойҳои нави кор фароҳам хоҳанд шуд.
Ҳамаи ин дастовардҳо натиҷаи истиқлолияту озодии мардум ва натиҷаи он сулҳи пойдорест, ки баъди имзои Созишномаи умумии истиқрори сулҳ ва ризоияти миллӣ дар Тоҷикистон фароҳам омад. Сулҳу амният, ваҳдати миллӣ муҳимтарин омили бақои давлату миллат ва пойдории истиқлолияти давлатӣ барои имрӯзу фардост. Пешвои миллат муҳтарам Эмомалӣ Раҳмон инро борҳо таъкид карда, ваҳдати миллиро баъди истиқлолият дуюмин дастоварди бузурги халқи тоҷик арзёбӣ намудаанд: «Ваҳдати миллӣ барои мо дастоварди ниҳоят пурарзиш, шарти асосии некуаҳволии халқамон ва таҳкурсии боэътимоди пешрафту ободии Ватани маҳбубамон мебошад. Аз ин лиҳоз, вазифаи ҳар фарди худшиносу худогоҳ, ватандӯсту ватанпарвар аз он иборат аст, ки ваҳдати миллиро чун гавҳари бебаҳо ва дастоварди ниҳоят азиз ҳифз намояд ва онро дар радифи дигар муқаддасоти миллиамон пос ва гиромӣ дорад!».
Бале, ҳифз ва гиромидошти ваҳдати миллӣ вазифаи ҷонии ҳар яки мо, ҳар як соҳибватан аст. Таҷрибаи талхи ҷанги шаҳрвандӣ баръало нишон дод, ки беэътиноӣ ба ин вазифаи муқаддас чи оқибатҳои вазнинеро ба бор меорад.
Мирзошоҳрух АСРОРӢ,
раиси Кумитаи  иҷроияи Ҳаракати
ваҳдати миллӣ  ва эҳёи Тоҷикистон


Баёни ақида (0)    Санаи нашр: 01.07.2019    №: 125    Мутолиа карданд: 220

03.01.2020


 БАЙНИ ТОҶИКИСТОН ВА АФҒОНИСТОН РОҲИ ОҲАН БУНЁД МЕГАРДАД

 ДАР ХОРУҒ КӮДАКИСТОН МАВРИДИ БАҲРАБАРДОРӢ ҚАРОР ГИРИФТ

 ХОВАЛИНГ. БЕМОРХОНАИ РАҚАМӢ БА ИСТИФОДА ДОДА ШУД

 AIRBUS БОРИ НАХУСТ АЗ СОЛИ 2011 АЗ BOEING ПЕШ ГУЗАШТ

 ОБХЕЗӢ ДАР ИНДОНЕЗИЯ БОИСИ ҲАЛОКАТИ 26 НАФАР ГАШТ

 НИДЕРЛАНД РАСМАН АЗ "ГОЛЛАНДИЯ" ДАСТ КАШИД

 ДАР ҚАЗОҚИСТОН МУСОФИРИ ҲАВОПАЙМОИ СУҚУТКАРДАРО МУКОФОТОНДАНД

ДАР ӮЗБЕКИСТОН ТӮЙҲОИ ПУРДАБДАБАРО МАНЪ НАМУДАНД

25.12.2019


"RIAS Ingineering" телевизору яхдонҳои тоҷикӣ месозад

Қазоқистон ҳукми қатлро пурра бекор карданист

Дар Австралия аз сӯхтори ҷангал шаҳр ба коми оташ рафт

Сарвари Индонезия тарҳи пойтахти нави кишварро интихоб намуд

Чин боҷи қариб ҳазор моли хориҷиро кам месозад

Ҷаҳон дар як сатр

24.12.2019


"ПЕШВОИ МИЛЛАТ ПОЯГУЗОРИ СУЛҲ ВА МЕЪМОРИ ВАҲДАТ"

Баррасии густариши ҳамкориҳо дар соҳаи сайёҳӣ

Қурбон Ҳакимзода ҳайати шаҳри Вэйнанро ба ҳузур пазируфт

Нуробод. Пешгирии шомилшавии ҷавонон ба ҳаракатҳои ифротгаро

Ҷаҳон дар як сатр

Арчаи солинавии Тоҷикистон рамзи Истиқлолияти давлатӣ

Лавров: Трамп ба муколама бо Россия доир ба масоили ҳалталаб омода аст

Москва ва Киев шартномаи таҳвили газро барои панҷ сол имзо мекунанд

Комиссияи Аврупо таҳримоти ИМА зидди «Маҷрои шимолӣ - 2»-ро маҳкум намуд

Дар Тошканд маркази рушди «ҳукумати электронӣ» ифтитоҳ меёбад

23.12.2019


Путин: «Соли гузашта дар Россия 33 амали террористӣ пешгирӣ гардид»

Минск ба ҳамгироӣ бо Россия дар асоси баробарӣ омода аст

Комиссияи интихоботии Афғонистон Ашраф Ғаниро президенти кишвар эълом дошт

Дар Қазоқистон хароҷоти соҳаи тандурустӣ то 5 дарсади ММД боло меравад

Ҷаҳон дар як сатр

БОКС. Ду медали тиллои варзишгарони тоҷик

20.12.2019


Дурнамои густариши ҳамкориҳо матраҳ гардид

Шиносоии Раҷаббой Аҳмадзода бо ҷараёни сохтмони муассисаҳои таълимии нав

Мулоқоти Акрамшо Фелалиев бо Эмилио Певида Пупо

19.12.2019


Шиносоии Қоҳир Расулзода бо ҷараёни сохтмони як қатор иншооти шаҳри Кӯлоб


Дар сомонаҳои дигари Тоҷикистон хонед