logo

иҷтимоиёт

ГАҲВОРАҶУНБОНИ МИЛЛАТ. ҚИССАИ ЯК МЕҲМОНИИ ҒАЙРИОДИИ САРВАРИ ДАВЛАТ ДАР МУРҒОБ

«Нива» - е бозмонда аз замони шӯравӣ, ки қариб корношоям буд, зери ғарами коҳ мехобид. Чанд хаймаву хоначаҳои ба ҳам пайвасти пасту куҳна менамуд. Як сӯ ғарами ҳезум, сӯи дигар ғарами коҳ меистоду боди сард омехта ба борон баргу коҳҳоро бозӣ медоронд. Чунин буд манзараи умумии ҳавлии Чорубай (Ҷӯрабой),  ки дар хона ҳамроҳи дӯсти ҷониаш Қурбонбой чойи гарм нӯшида менишаст. Аммо онҳо намедонистанд, ки айнан дар чунин як рӯзи боронӣ Президенти кишвар дар кулбаи Қурбонбой меҳмон мешаванд ва Чорубай дар «Нива» - и худ, ки ягона воситаи нақлиёт дар водии Аличур маҳсуб меёфт, Сарвари давлатро нишонда, то маркази Мурғоб мебарад.

БО ЧАРХБОЛ БА АЛИЧУР КӢ ОМАД?
Моҳи июни соли 1995. Дар Аличури Мурғоб, аз сабаби боришот ва сардӣ ҳама ба хаймаҳои худ панаҳ бурда буданд. Чорубай дар баландтарин нуқтаи Помир, дар оғӯши биёбони Мурғоб бо писаронаш мезист. Манбаи даромад чорво буд, аммо ҳамон сол бар асари боришоти шадид ва сардии тоқатрабо бештари чорво нобуд шуда, халқ аз пӯшокиву хӯрданӣ танқисӣ мекашид.
Дар чунин як рӯзи сарди июн фазои Аличурро садои ғуриши чархбол фаро гирифт. Он дар осмони пур аз гирдбоду борон намоён шуду баъди чанде печу тоб хӯрдан бо душворӣ ба замин нишаст. Чорубай ва Қурбонбой низ аз хайма баромада, ҷониби он шитофтанд. Мардум чун ҳамешагӣ тахмин карданд, ки боз гурӯҳе аз шикорчиён омадаанд. Аз чархбол нахуст чанд тан берун шуду баъд як ҷавонмарди хушсурату баландқомат бо чеҳраи гарм фуруд омад. Пирони деҳа диданд, ки онҳо ба шикорчиён тамоман монандӣ надоранд.
Меҳмонон сӯи бинои Ҷамоати деҳоти Аличур роҳ гирифтанд. Назди бинои ҷамоат суҳбат сурат гирифт. Вақте яке аз меҳмонон Президенти Ҷумҳурии Тоҷикистон Эмомалӣ Раҳмонро ба пирамардон муаррифӣ кард, ҳама ангушти ҳайрат газиданд. Зеро ба ин тарафҳо то ҳол паи қадами ягон вазир ҳам нарасида буд.
Давоми воқеаро собиқ корманди Телевизиони Тоҷикистон Шералӣ Мустафоқулов чунин нақл кард: «Гуфтугӯи самимӣ ба охир расиду Сарвари давлат бояд ба маркази ноҳия мерафтанд, ки он ҷо мардум интизорашон буданд. Вале боду ҳаво ҳанӯз низ ба парвози чархбол номусоид буд. Ҳама Президентро ба меҳмонӣ мехонданд. Сарвари давлат ба хонае, ки аз дудбарояш дуд мебаромад, ишора карда, бо зарофати ба худашон хос гуфтанд: «Ман ҳамаатонро дӯст медорам, аммо ана ба ҳамон хона меравем. Маълум, ки он ҷо ҳам гарм асту хӯрок ҳам дорад». Бобои Қурбонбой аз шодӣ дар курта намегунҷид, зеро он кулба манзили ӯ буд.

ДАСТИ МЕҲРРО КӮДАК ҲАМ ЭҲСОС МЕКУНАД
Дар кулбаи бобои Қурбонбой боз як воқеаи аҷибе рух додааст, ки ёд оварданаш касро фараҳманд мекунад. Шералӣ Мустафоқулов ба хотир меорад: «Мо ҳама лаҳзаҳои ин сафарро то қадри имкон ба навор мегирифтем. Дар хонаи бобои Қурбонбой Пешвои миллатро бо эҳтиром садрнишин карданд. Дар гӯшаи хона тифле дар гаҳвора мехуфт. Баробари даромадани меҳмонон тифл гирист. Пешвои миллат бо меҳрубонӣ гаҳвораро ҷунбонданд. Дар як дам кӯдак оромиш ёфту хобаш бурд».
Вақте ин воқеа тавассути телевизион ба намоиш рафт, ҳазорон одамон мутаассир шуда, ашки чашм дошта натавонистанд. Ба лутфу меҳрубонии Сарвари давлат аҳсант гуфтанд. Шоири халқии Тоҷикистон Саидалӣ Маъмур дар шеъри «Гаҳвораҷунбони миллат» Тоҷикистони он замон нооромро ба ҳамин тифли гирён монанд карда, Пешвои миллатро наҷотбахши давлати тозаистиқлол хонда буд:
То шавад аз ҳоли кишвар бохабар,
Кард ҳар ҷо Сарвари давлат сафар.
Гар сафар шуд аз барояш пурхатар,
Барнагашт аз ҷодаи худ безафар.
Сӯи водию куҳистон раҳ гирифт,
Меҳри халқаш тӯша шуд, ҳамраҳ гирифт.
Рафт бар Мурғоб, бар Помир рафт,
Баҳри дидори ҷавону пир рафт.
Раҳбари Мурғобро то ӯ надид,
Пои Сарвар бар Аличур ҳам расид.
Гашт чун бар хонадоне меҳмон,
Дид дар гаҳвора тифле дар фиғон.
Дасти худ бар дастаи гаҳвора бурд,
Даст бар гаҳвора дигарбора бурд.
Тифлаки гирён яке ором шуд,
Хоби ширин баҳри ӯ инъом шуд…
Тоҷикистон тифли Истиқлол буд,
Бенасиб аз бахту аз иқбол буд.
Тифли гирён зору гирён монда буд,
Пешво гаҳворааш ҷунбонда буд.

ЧӢ ТАВР «НИВА» - И ЧОРУБАЙ ТАЪРИХӢ ШУД?
Вақте масъалаи ёфтани нақлиёт ба миён омад, ҳама чашми умед ба Чорубай дӯхтанд. Зеро дар Аличури дурдаст танҳо вай мошин дошту халос.
Писари калонии Чорубай Иброҳим, ки он замон хонандаи мактаб буд, воқеаро чунин ба ёд меорад: «Аз мактаб омадаму падарам фармуд, ки мошинро омодаи сафар намоям, аммо мошин аккамулятор ва сӯзишворӣ надошт. ”Нива” - ро аз таги ғарами коҳ бароварда, аз чангу ғубори чандинсола тоза кардам. Вақте фаҳмидам, ки дар он Президенти мамлакат сафар мекунанд, тамоми вуҷудам ларзид. Дар ҳаяҷон будам, ки дар ин роҳи тӯлонӣ онҳо чӣ хел бо ин мошини валангор ба манзил мерасида бошанд.
Сокинони деҳа ҷамъ омада, мошини ягонаи Аличурро ба сафари маркази ноҳия бо Президенти мамлакат омода карданд. Яке аккамулятори “ЗиЛ-130” - ашро оварда дар мошин насб карду дигаре аз пайи дарёфти сӯзишворӣ рафт. Падарам паси чамбарак нишасту хурсандона мошинро ҷониби марказ ронд. Ман дар курсии паҳлуяш ҳанӯз дар андеша будам, ки акнун чӣ мешуда бошад. Вале падарам ниҳоят шод буд, ки Президенти мамлакат маҳз ба мошини ӯ савор мешавад. Вақте ба ҷои мулоқот расидем, ба чеҳраи ороми Сарвари давлат нигоҳ кардаму тамоми тарсу ташвишам якбора аз байн рафт ва ҷои онро ифтихору фараҳмандӣ гирифт.

ТУҲФАИ ПРЕЗИДЕНТӢ БА ИБРОҲИМ
Ин сафари аввалини Пешвои миллат муҳтарам Эмомалӣ Раҳмон ба водии Аличур буд. Ин сафар ба пешрафти водии баландкӯҳи Аличур оғози нек бахшид. Баъди чанд ҳафта ба водӣ ёрии аввалини Сарвари давлат иборат аз маводи хӯрданӣ ворид гардид. Сипас, бо ёрмандиҳои Ҳукумат аличуриён бо батареяҳои офтобӣ таъмин шуда, хонаҳояшон чароғон шуданд. Имрӯз аҳли деҳа соҳиби хонаи фарҳанг, мактаби замонавӣ, интернати наздимактабӣ, бунгоҳи тиббӣ, меҳмонхона, мағозаву ошхона ва дигар нуқтаҳои хизматрасонӣ мебошанд.
Соҳибкорӣ дар ин ҷо ривоҷ ёфтааст. Аз ҳама муҳимаш Шоҳроҳи бузурги абрешими навэҳёгашта аз ҳамин деҳа мегузарад. Шабу рӯз мошинҳои калони боркаш, ки тавассути гузаргоҳи байналмилалии Кулма бор мекашонанд, дар Аличур таваққуф мекунанд ва аз ин ҳисоб ошхонаву мағозаҳо ва меҳмонхона сермизоҷанду даромадашон меафзояд ва ҳам барои мардуми маҳал ҷойҳои нави корӣ пайдо мешаванд.
Соли 2008 аз тарафи Сарвари давлат мошини ёрии таъҷилӣ ва дигар мавод ба бунгоҳи тиббии Аличур тақдим гардид. Дар ҳамин бунгоҳи тиббӣ писари Чорубай Иброҳим табиб мебошад. Табибест, ки бо «Нива» - и нав, бо мошине, ки армуғони Пешвои миллат аст, ба кор меояд. 
Дар сафари навбатӣ мардум бо шодмонии зиёд Сарвари давлаташонро пешвоз гирифта, аспи сапед тақдим намуданд. Дуо карданд, ки роҳашон сапеду аспи нияту орзуҳояшон бодпо бод.

Бузургмеҳри БАҲОДУР, «Ҷумҳурият»


Баёни ақида (0)    Санаи нашр: 26.11.2019    №: 222 - 223    Мутолиа карданд: 290
06.08.2020


ТОҶИКИСТОН. 6 ҲАЗОРУ 399 ГИРИФТОРИ БЕМОРИИ COVID-19 ШИФО ЁФТ

СУҒД. МАҲСУЛОТИ АРЗОН ЗИНДАГИРО БАРАКАТ МЕБАХШАД

АГЕНТӢ. ШУМОРАИ ХИЗМАТЧИЁНИ ДАВЛАТӢ АЗ ҲИСОБИ ЗАНОН КОҲИШ ЁФТААСТ. ЧАРО?

СЕРИЯ ПРО. МУБОРИЗАИ "СОРО - КОМПАНИЯ" ВА "СИПАР" ШИДДАТ МЕГИРАД

05.08.2020


ТОҶИКИСТОН. 6 ҲАЗОРУ 356 ГИРИФТОРИ БЕМОРИИ COVID – 19 ШИФО ЁФТ

АЗ «АМОНАТБОНК» СИПОСГУЗОРЕМ

ЛИГАИ ОЛӢ. МАРҲИЛАИ ДУЮМ 8 АВГУСТ ОҒОЗ МЕЁБАД

04.08.2020


ТОҶИКИСТОН. 6 ҲАЗОРУ 317 БЕМОРИ COVID – 19 ШИФО ЁФТ

ОМОДАГИҲО ҶИҲАТИ БАРӮЙХАТГИРИИ АҲОЛӢ ВА ФОНДИ МАНЗИЛ ИДОМА ДОРАНД

АГЕНТИИ СОДИРОТ. СОДИРОТИ МАҲСУЛОТИ КИШОВАРЗӢ АФЗУД

83 КОРХОНАИ НАВИ САНОАТӢ МАВРИДИ БАҲРАБАРДОРӢ ҚАРОР ГИРИФТ

ВКД. САТҲИ ҶИНОЯТ КОҲИШ ЁФТ

SARS – CoV – 2. ТАДҚИҚОТИ ОЛИМОН ХАТАРИ НАВИ ОНРО ОШКОР СОХТ

ФАЙЗРЕЗ Ё СЕСАД ХАРБУЗА АЗ ЯК КАФ ЗАМИН

ҶОМИ ТОҶИКИСТОН – 2020. ҶУФТҲОИ ДАВРИ 1/4 - ФИНАЛӢ МУАЙЯН ГАРДИДАНД

03.08.2020


ТОҶИКИСТОН. АЗ КОРОНАВИРУС 83,7 ДАРСАДИ СИРОЯТЁФТАГОН СИҲАТ ШУДАНД

АКАДЕМИЯИ ИДОРАКУНИИ ДАВЛАТӢ ДОНИШҶӮЁНИ ХОРИҶИРО БА ТАҲСИЛ ҶАЛБ КАРДАНИСТ

ҲИСОР. БУНЁДИ ИНШООТИ ҶАШНӢ ИДОМА ДОРАД

ГУМРУК. СОДИРОТИ МОЛУ МАҲСУЛОТИ ВАТАНӢ 19,1 ДАРСАД АФЗУД

КУМИТАИ АНДОЗ. ПАНДЕМИЯ БА ИҶРОИ НАҚША БЕТАЪСИР НАМОНД

ТОҶИКИСТОН. 6 ҲАЗОРУ 103 БЕМОРИ COVID - 19 СИҲАТ ШУД

СУҒД. РӮНАМОИИ КИТОБНОМАИ ҲАШТҶИЛДАИ “ПЕШВОИ МИЛЛАТ - ЭМОМАЛӢ РАҲМОН”

САРҲАД. ДАР НОҲИЯИ МИР САЙИД АЛИИ ҲАМАДОНӢ 127 ҶИНОЯТ БА ҚАЙД ГИРИФТА ШУД

ИҶРОИ НАҚШАИ АНДОЗИ ИҶТИМОӢ 101 ДАРСАД ТАЪМИН ГАШТ

БАЛҶУВОН. ҲАҶМИ ИСТЕҲСОЛИ МАҲСУЛОТИ КИШОВАРЗӢ КОҲИШ ЁФТ

МАҲАЛ. ҶАЛБИ НИЁЗМАНДОН ВА ТИҶОРАТИ КИШОВАРЗӢ

ВМКБ. БОЗДИДИ РАМАЗОН РАҲИМЗОДА АЗ РАФТИ БУНЁДИ ИНШООТИ ҶАШНӢ

МОЛИЯ. МАБЛАҒГУЗОРИИ СОҲАҲОИ ИҶТИМОӢ АФЗУД

ФУТБОЛ. ТИМИ МИЛЛӢ МОҲИ СЕНТЯБР ДУ БОЗИИ САНҶИШӢ МЕГУЗАРОНАД

ЧИН ВАКСИНАИ АЛАЙҲИ КОРОНАВИРУСРО ДАР БРАЗИЛИЯ ВА АМА МЕОЗМОЯД

ҶАҲОН ДАР ЯК САТР

29.07.2020


ТОҶИКИСТОН. АЗ КОРОНАВИРУС 6065 КАС ШИФО ЁФТ

ДДСТДТ. БА ДОВТАЛАБОН ИМТИЁЗҲО ПЕШБИНӢ ШУДААСТ

ДДФСТ. СИФАТИ ТАЪЛИМ ДАР МЕҲВАРИ ТАВАҶҶУҲ

КОНСЕРВАТОРИЯИ МИЛЛӢ БА ШЎРОИ ДИФОЪ НИЁЗ ДОРАД


Дар сомонаҳои дигари Тоҷикистон хонед