logo

суханрониҳо

Суханронии Эмомалӣ Раҳмон, Президенти Ҷумҳурии Тоҷикистон, дар маросими ифтитоҳи корхонаи ресандагии "Олим-текстайлз", ноҳияи Мастчоҳ, 25 марти соли 2011

Ҳамватанони азиз!
Ҳозирини гиромӣ!

Дар ин рӯзҳои наврӯзӣ, ки мову шумо ба муносибати ифтитоҳи боз як самараи неки раванди созандагиву бунёдкории Тоҷикистони соҳибистиқлоли бистсола, яъне корхонаи муосири ресандагӣ ҷамъ омадаем, ҳамаи шумо ва тамоми сокинони заҳматписанду боғурури ноҳияи Мастчоҳро бо ин рӯйдоди муҳим ва ба ифтихори ҷашни ҷаҳонии Наврӯз табрику таҳният мегӯям.
Воқеан, Наврӯзро зодрӯзи ҷаҳон гуфтаанд ва дар оғози баҳор ифтитоҳи корхонаву муассисаҳо, мактабу бунгоҳҳои тиббӣ,  манзилҳои истиқомативу дигар иншооти иҷтимоӣ ва шурӯъ кардан ба корҳои саҳроиву бунёди боғу токзори нав, бешубҳа, яке аз суннатҳои неку писандидаи наврӯзӣ ва татбиқи пайгиронаи раванди ободонии Ватани азизамон мебошад.
Имрӯзҳо, ки мардуми шарифи Тоҷикистон ба таҷлили бистумин солгарди истиқлолияти давлатии худ омодагӣ мегиранд, ҳамчун натиҷаи солҳои соҳибихтиёрӣ метавон гуфт, ки дар кишварамон дар ин давра даҳҳо корхонаҳои нави саноатӣ бунёд гардиданд ва мо дар назди худ вазифа гузоштаем, ки бо вусъат додани ин раванд Тоҷикистонро аз кишвари содиркунандаи ашёи хом ба кишвари истеҳсолкунандаи молу маҳсулоти тайёр табдил диҳем.
Дар ҷараёни сафарҳои қаблии худ ба вилояти Суғд ба сохтору мақомоти дахлдор супоришҳои зарурӣ дода будам, ки ҷиҳати бунёд кардани корхонаҳои ресандагӣ ва татбиқи саривақтии барномаҳои давлатии рушди саноати сабук тадбирҳои иловагӣ андешанд.
Дирӯзу имрӯз мавриди истифода қарор гирифтани чор корхонаи нав натиҷаи заҳмати шабонарӯзии мардуми шарифи вилоят ва соҳибкорони бонангу номус буда, баёнгари он аст, ки сиёсати давлат дар самти рушди саноати сабук ва коркарди маҳсулоти кишоварзӣ муваффақона татбиқ шуда истодааст. Яъне солҳои охир дар қаламрави кишвар, аз ҷумла вилояти Суғд коркарди ашёи хоми ватанӣ, хусусан нахи пахта тадриҷан вусъат ёфта истодааст ва ин иқдоми нек татбиқи барномаҳои Ҳукуматро доир ба рушди саноати сабук барои солҳои 2006-2015 ва коркарди нахи пахта ба хубӣ ифода месозад.
Дар шаҳру ноҳияҳои Хуҷанд, Мастчоҳ, Зафаробод ва Спитамен корхонаҳои муосири ресандагӣ бунёд гардиданд, ки коркарди пурраи нахи пахта ва истеҳсоли маҳсулоти ниҳоӣ самти асосии фаъолияти онҳо ба ҳисоб меравад. Ин аз як тараф имкон медиҳад, ки ашёи хоми маҳаллӣ дар сатҳи зарурӣ коркард шавад ва аз ҷониби дигар ба рушди иқтисоди миллӣ такони ҷиддӣ мебахшад. Инчунин, дар баробари афзун гардидани иқтидори истеҳсоливу содиротии кишвар ҳазорҳо ҷойи нави корӣ таъсис мегардад, зеро дар шароити кунунӣ бо шуғл фаро гирифтани теъдоди ҳарчи бештари шаҳрвандон яке аз масъалаҳои муҳими сиёсати иҷтимоии давлат мебошад.
Бояд гуфт, ки барои сохтмон ва таҷҳизонидани ин корхонаи саноатӣ қариб 140 миллион сомонӣ (зиёда аз 31 миллион доллари амрикоӣ) сарф гардидааст. Иқтидори солонаи ин корхонаи ресандагӣ, ки бо технологияи муосир муҷаҳҳаз гардидааст, коркарди 7 ҳазор тонна нахи пахта мебошад ва дар ин коргоҳ 400 нафар мутахассис ва коргари маҳаллӣ бо ҷойҳои кори доимӣ  таъмин мегардад.
Муассисони корхона ният доранд, ки дар ояндаи наздиктарин дар баробари сехҳои ресандагӣ, инчунин сехҳои бофандагӣ, рангуборкунӣ ва дӯзандагӣ бунёд карда, шумораи коргаронро ба 1400 нафар расонанд.
Пешбинӣ шудааст, ки баъди ба кор оғоз кардани навбати дуюми корхона гардиши солонаи маҳсулоти он 270-280 миллион сомониро ташкил хоҳад кард. Барои чунин иқдоми ватандӯстона ба муассисон, мутахассисону коргарон ва ба ҳамаи онҳое, ки дар ташкили ин корхонаи нави замонавӣ ҳиссаи арзандаи худро гузоштаанд, арзи сипосу миннатдорӣ баён карда, барои амалӣ шудани нақшаҳои минбаъдаашон ба ҳамаи онҳо комёбӣ ва барори кор мехоҳам.
Ҳамчунин, ба роҳбарияти Бонки Рушди АврОсиё, ки сармоягузори асосии корхона мебошад, изҳори сипос менамоям ва итминон дорам, ки ҳамкориҳои созандаи мо минбаъд низ идомаи нек хоҳанд ёфт.
Вобаста ба ин, ба сохтору мақомоти дахлдор супориш дода мешавад, ки ҷиҳати рушди соҳаи саноати сабук ва иҷрои барномаҳои қабулшудаи давлатӣ дар ин самт ва бо ҷалби имкониятҳои соҳибкорони баландҳиммату ватандӯст ба бунёди корхонаҳои нави истеҳсоли матоъҳои пахтагӣ, трикотажӣ ва шоҳибофӣ вусъат бахшида, барои тақвияти иқтидори истеҳсолии корхонаҳои саноатии мавҷуда чораҳои зарурӣ андешанд.
Имрӯз зарурати истеҳсоли матоъҳои хушсифати анъанавӣ, аз қабили атласи тоҷикӣ, адрас ва алоча ба миён омадааст, зеро мо ба ин васила метавонем фарҳанги истеҳсоли матоъ ва дӯхти либоси миллии тоҷикиро бо истифода аз матоъҳои абрешиму пахтагӣ, ки ҳам зебо ва ҳам барои саломатӣ судманд аст, густариш диҳем.
Мо барои рушди соҳа ашёи хоми  асосӣ - пахтаро худамон истеҳсол мекунем, ки ин омил дар шароити зуд тағйирёбандаи вазъи бозори ҷаҳонӣ бисёр муҳим мебошад.
Пахтакорӣ яке аз соҳаҳои асосии иқтисоди миллии мост, вале то ба ҳол пахтаи мо асосан ҳамчун ашёи хоми саноатӣ ба кишварҳои дигар содир мешавад, ки ба манфиати иқтисодии давлат нест. Яъне ҳанӯз ҳам дар кишвар коркарди нахи пахта ва истеҳсол кардани маҳсулоти ниҳоӣ дар сатҳи зарурӣ ба роҳ монда нашудааст.
Ин яке аз масъалаҳои асосии соҳаҳои кишоварзӣ ва саноати мамлакат мебошад, зеро дар сурати ҳарчи бештар коркард шудани пахтаи истеҳсолгардида дар дохили мамлакат аксари мушкилоти соҳаи пахтакорӣ низ ҳаллу фасли худро ёфта, он ба яке аз соҳаҳои сердаромади соҳаи кишоварзӣ табдил мегардад.
Ҳарчанд дар даврони истиқлолият 22 корхонаи коркарди нахи пахта таъсис ёфта, иқтидори солонаи истеҳсолии онҳо ба 65 ҳазор тонна нах расонида шуд, вале ҳоло ҳам дар масъалаи таҷдиди корхонаҳо бо технологияи муосир ва беҳтар кардани сифати нахи пахта ва истеҳсоли газвору матоъҳои баландсифати пахтагӣ аҳамияти ҷиддӣ додан зарур аст.  Аз ин лиҳоз, вазоратҳои рушди иқтисод ва савдо, энергетика ва саноат, мақомоти иҷроияи ҳокимияти давлатии вилояти Суғд ва дигар мақомоту сохторҳои дахлдор вазифадоранд, ки доир ба истифодаи  ҳарчи пурра ва самарабахши иқтидорҳои истеҳсолии корхонаҳои мавҷудаи саноатӣ, ташкили корхонаҳои нав ва бо ҳамин роҳ афзоиш додани ҷойҳои нави корӣ мунтазам чораҷӯӣ намоянд.
Давлат ва Ҳукумати Тоҷикистон аз ҷониби худ барои рушди соҳибкорӣ, бахусус соҳибкории истеҳсолӣ тамоми шароити заруриро фароҳам оварда, бо мақсади ҳавасманд намудани сармоягузорон ва суръат бахшидан ба раванди сохтмони корхонаҳои нави коркарди нахи пахта ва истеҳсоли маҳсулоти ниҳоӣ аз он бисёр имтиёзҳо муқаррар кардааст.
Ҳадафи асосии мо аз ин тадбирҳо ҳарчи бештар истифода бурдани ашёи хоми маҳаллӣ ва коркарди саноатии он, афзун намудани ҳаҷми истеҳсоли маҳсулоти ватанӣ, содироти он ба бозорҳои ҷаҳонӣ ва муҳимтар аз ҳама, таъсис додани ҷойҳои нави корӣ мебошад. 
Анҷом додани ин корҳо аз як ҷониб татбиқи Стратегияи миллии рушди Ҷумҳурии Тоҷикистонро барои давраи то соли 2015 таъмин менамояд ва аз тарафи дигар имкон медиҳад, ки даромади аҳолӣ афзуда, сатҳу сифати зиндагии мардуми кишварамон боз ҳам беҳтар гардад.
Барои муваффақ шудан ба ин ҳадафҳо, пеш аз ҳама, ба ҳар кадоми мову шумо лозим аст, ки кору фаъолияти худро дар сатҳи зарурӣ ба роҳ монем, ташаббуси соҳибкорони ҳимматбаланд ва афроди бонангу номуси ҷомеаро дастгирӣ кунем ва ба хотири ободии Ватани маҳбубамон-Тоҷикистон, ки имсол бистумин солгарди истиқлоли онро таҷлил мекунем, бо азму иродаи қавӣ, дили поку нияти нек ва содиқонаву софдилона заҳмат кашем.
Лозим ба ёдоварист, ки бо мақсади ҳалли мушкилоти иқтисодиву иҷтимоии ноҳия ва таъмини минбаъдаи пешрафту тараққиёти он Ҳукумати мамлакат санади махсус -  "Барномаи рушди иҷтимоиву иқтисодии ноҳияи Мастчоҳи вилояти Суғд барои солҳои 2008 - 2015" - ро қабул намуда, онро амалӣ карда истодааст. Илова бар ин, танҳо дар доираи татбиқи лоиҳаи таҷдиди роҳи Душанбе - Чанак дар ҳудуди ноҳияи Мастчоҳ бо сарфи қариб 50 миллион сомонӣ 28 километр роҳ дар сатҳи баланд сохта, ба истифода супурда шуд.
Дар асоси Қарори Ҳукумати Ҷумҳурии Тоҷикистон аз 31 октябри соли 2009 "Доир ба  тадбирҳои беҳтар намудани вазъи мелиоративии заминҳои обёришавандаи кишоварзии Ҷумҳурии Тоҷикистон барои солҳои 2010 - 2014" дар ноҳияи Мастчоҳ беҳсозии вазъи қариб 1700 гектар ба маблағи миллионҳо сомонӣ оғоз гардида, ҳоло ин кор идома дорад.
Боиси қаноатмандист, ки маҳз бо заҳмату талошҳои мардуми меҳнатдӯст ва мушкилнописанду ободкори ноҳия то имрӯз корҳои зиёди созандагиву бунёдкорӣ ба анҷом расонида шудаанд ва сокинони Мастчоҳ сарбаландона собит карда истодаанд, ки давомдиҳандаи кори наслҳои ободгару бунёдкори гузашта, яъне падарони боғурури худ мебошанд.
Заҳматкашони асили ноҳия дар қатори кишоварзони дигар ноҳияҳои мамлакат манфиатнокии афзоиш додани маҳсулоти кишоварзӣ ва вазъи талаботи бозори ҷаҳониро ба инобат гирифта, соли гузашта истеҳсоли пахта ва дигар зироатҳои кишоварзиро нисбат ба нақшаи дурнамо барзиёд иҷро карданд, ки ин аз меҳнатдӯстиву заҳматписандии шумо - сокинони  воқеан ободкори ноҳия шаҳодат медиҳад.
Дар баробари ин, Ҳукумат минбаъд низ ташкилу ба истифода додани корхонаҳои нав, таъмиру сохтмони роҳҳову дигар иншооти муҳим, тармиму азнавсозии мактабҳо, бунгоҳҳои тиббиву марказҳои тиҷоратӣ ва бунёди боғҳои наву барқарорсозии боғҳои кӯҳна, шодобгардонии заминҳои бекорхобидаи кишоварзӣ ва дигар корҳои ободониро идома медиҳад ва дар ин раванд, мо умедворем, ки мардуми боғайрати ноҳияи Мастчоҳ, соҳибкорон ва фарзандони бонангу номуси ин диёр дар ин кори хайр чун ҳарвақта фаъолона саҳм мегузоранд.
Аз фурсати муносиб истифода бурда, ба мардуми заҳматписанду меҳмоннавози вилоят, аз ҷумла сокинони сарбаланди ноҳияи Мастчоҳ муроҷиат менамоям, ки аз ҳар як рӯзи баҳор самаранок истифода карда,  корномаи бузурги падарону бобоёни худ - кишоварзони шӯҳратёри Дилварзинро идома дода, барои ободу зебо гардонидани Ватани азизамон саъю талош намоянд.
Ман ба нангу номуси баланди миллӣ, ватандориву ватандӯстӣ ва мардонагиву ғурури мардуми Мастчоҳ итминони комил дорам ва хуб медонам, ки онҳо ин хислатҳои неку писандидаро дар замири фарзандони худ - наврасону ҷавонон парвариш медиҳанд ва онҳоро ҳамчун насли сазовори номи неки гузаштагон ва давомдиҳандаи суннатҳои волои тоҷикон ба камол мерасонанд.
Дар охир бори дигар ҳамаи шумо - ҳозирини гиромӣ ва мардуми заҳматписанду меҳмоннавози Мастчоҳро ба ифтихори Наврӯзи оламафрӯз - Соли нави аҷдодиамон ва ифтитоҳи корхонаи нав самимона табрик гуфта, ба ҳамаатон рӯзгори хушу осуда, ба муассисон ва кормандони муҳандисиву техникии коргоҳ барои дар мӯҳлати муқарраршуда омода намудани навбати дуюми он ғайрату ҳиммат ва барори кор орзу менамоям.
Бисёр хушҳолам, ки дар оғози фасли зебои баҳор ва хусусан айёми наврӯзӣ бистумин баҳори ҷашни муқаддаси истиқлоли давлатии Тоҷикистони азизу маҳбубамонро ҳамроҳи шумо пешвоз мегирем.
Наврӯзи имсола - баҳори умеду ормонҳои ҳазорсолаи миллати куҳанбунёди тоҷик, баҳори ҳувияту андешаи созандаи миллӣ ва баҳори озодиву истиқлол мебошад.
Бистумин баҳори истиқлол ва ҷашни Наврӯзи Аҷам ба ҳар хонаводаи тоҷик муборак бод!
Ҳамеша сарсабз ва комгору пирӯз бошед, ҳамватанони азиз!


Баёни ақида (0)    Санаи нашр:    №:    Мутолиа карданд: 695

11.12.2019


Баррасии масоили тақвияти ҳамкориҳо

Бахтиёр Худоёрзода бо ҳайати Дафтари ниҳодҳои демократӣ ва ҳуқуқи инсони САҲА мулоқот намуд

Намоиши филмҳои тоҷикӣ дар Бангладеш

“МАҲБУБИ ВАТАН”

Трамп: «Бо Лавров вохӯрии хубе гузарондем»

Зеленский гуфт, ки бо Путин гуфтушунид кардан мураккаб аст

Сарвазири Эфиопия соҳиби Ҷоизаи сулҳи Нобел шуд

«Толибон» дар шимоли Афғонистон 40 куҳансолро рабуданд

МУСОБИҚАИ СИТОРАҲОИ ДЗЮДО. Бори нахуст кишварро 4 гӯштигир намояндагӣ мекунад

Ҷаҳон дар як сатр

10.12.2019


Мулоқоти Қоҳир Расулзода бо Хуан Тсзян Жун

Шиносоии Азим Иброҳим аз ҷараёни корҳои сохтмонии роҳҳои Душанбе

Дар доираи Озмуни ҷумҳуриявии «Сайри гули лола» машварати корӣ баргузор гардид

Дар Париж, Москва ва Киев оид ба муовизаи асирон ба мувофиқа омаданд

Туркия ба рафъи хатари «Давлати исломӣ» дар Афғонистон мусоидат мекунад

Сарвазири нави Финляндия - ҷавонтарин дар ҷаҳон сарвари ҳукумат

Disney дар остонаи рекорди нави ҷаҳонӣ

Ҷаҳон дар як сатр

09.12.2019


Боз як майдончаи нави варзишу бозии кӯдакон кушода шуд

Сохтмони гузаргоҳи зеризаминӣ бо дарозии 260 метр

Чемпионати осиё. Тоҷикистон дар гурӯҳи "А"

Сӯхтор дар фабрикаи Деҳлӣ боиси марги беш аз 40 нафар шуд

Медведев шартҳои бастани шартномаи газ бо Киевро гуфт

Ёрии ҷаҳонӣ ба Афғонистон 46 дарсад коҳиш ёфт

Аморати Муттаҳидаи Араб кайҳоннавард интихоб мекунад

Ҷаҳон дар як сатр

06.12.2019


Боздиди Рустами Эмомалӣ аз варзишгоҳи «Миллий»

Хуҷанд. Бунёди корхонаи истеҳсоли телевизор, яхдон ва кондитсионер

Масъалаи моҳияти сармояи инсонӣ дар рушди инноватсионӣ мавриди баррасӣ қарор гирифт

Пекин аз Вашингтон кам кардани боҷи молҳои чиниро дархост намуд

ОПЕК истихроҷи нафтро метавонад кам созад

Дар мактабҳои Қазоқистон гузариш ба алифбои лотиниро мавқуф гузоштанд

Коррупсияро дар Қирғизистон тавассути рақамисозӣ бартараф карданианд

Ҷаҳон дар як сатр


Дар сомонаҳои дигари Тоҷикистон хонед