logo

паёмҳо

Паёми табрикии Эмомалӣ Раҳмон, Президенти Ҷумҳурии Тоҷикистон, ба шарафи 66 - умин солгарди Ғалаба бар фашизм, 9 майи соли 2011

Ҳамватанони азиз!
Ветеранҳои арҷманд!

Ҳамаи шуморо ба шарафи санаи бузург ва муқаддас - Рӯзи Ғалаба, ки 66 сол муқаддам ба яке аз ҷангҳои даҳшатноктарин ва фоҷиабори асри ХХ хотима гузошт, самимона табрик гуфта, бароятон сулҳу оромӣ ва саломативу хушбахтӣ орзу менамоям.
 Ин Ғалаба озодиву истиқлолро натанҳо барои собиқ халқи шӯравӣ ҳифз намуд, балки тамоми мардуми Аврупоро аз вабои фашизм наҷот бахшид.
 Нӯҳуми майи соли 1945 дар таърихи мардуми сулҳпарвару озодихоҳи тоҷик ҳамчун натиҷаи корнамоиҳои беназир ҳам дар ҷабҳаи набард ва ҳам дар ақибгоҳ арзёбӣ мегардад. Зеро хурду бузурги кишвар ба хотири ҳифзи Ватан ва таъмини ҳарчи зудтари пирӯзӣ дар ҷанг қаҳрамониҳои бемислу монандеро нишон доданд. Дар асарҳое, ки ба ин ҷанги фоҷианоки таърихи башарият бахшида шудаанд, ба корномаҳои ҷангиву меҳнатии мардуми сарбаланди мо саҳифаҳои зиёде бахшида шудаанд.
 Дар ин ҷанги ҷаҳонӣ Тоҷикистон даҳҳо ҳазор фарзандони худро талаф дод. қисме аз онҳо дар қабристонҳои бародарӣ дар хоки Русия, Украина, Беларус, кишварҳои соҳили Балтика, Молдова, Аврупо ва дигар ҷойҳое, ки муҳорибаҳо барпо гашта буданд, дафн шудаанд.
 Корнамоиву диловариҳои ҳамватанони мо дар таърихи Ҷанги Бузурги Ватанӣ бо ҳарфҳои заррин сабт гардидаанд. Тоҷикистон дар солҳои Ҷанги Бузурги Ватанӣ барои мардуми зиёди собиқ Иттиҳоди Шӯравӣ хонаи дуюм гардид. Ҷумҳурии мо аз тамоми гӯшаву канори наздик ба хати ҷабҳа -  шаҳрҳои Ленинград, Киев, Москва ва дигар шаҳрҳои мамлакат зиёда аз 40 ҳазор нафар, аз ҷумла 9500 кӯдакро дар паноҳи худ гирифт. Халқи тоҷик онҳоро бо муҳаббати хоса ва тамоми шароити зарурии зиндагӣ фаро гирифта буд.
Ҳарчанд, ки ҷанг аз Тоҷикистон хеле дур буд, вале таъсири он дар ҳама ҷо ва дар ҳар як хонавода эҳсос мегардид. Бо вуҷуди тамоми мушкилоту маҳрумиятҳо мардум дар он замон бо шиори "ҳама чиз барои фронт, ҳама чиз барои ғалаба" заҳмат мекашид.
Агар дар солҳои ҷанг ақибгоҳи мустаҳкаму тавоно намебуд ва фидокориву қаҳрамониҳои меҳнатии заҳматкашон намешуд, ҳаргиз мо ба ғалаба намерасидем.
Қувваи асосии корӣ дар ақибгоҳ занону наврасон ва пиронсолон буданд. Онҳо, сарфи назар аз шароити сангини замони ҷанг, супоришҳои давлатиро барзиёд иҷро мекарданд. Худ гуруснаву бараҳна буданд, вале ба хотири таъмини ғалаба ва ояндаи нек ҳамаи дороиашонро ба ҷабҳа мефиристоданд. Танҳо дар се моҳи аввали ҷанг 30 корхонаи бузурги саноатӣ ба Тоҷикистон кӯчонида шуд.
Корхонаҳои саноати бофандагӣ, хӯрокворӣ, саноати сабук ва саноати маҳаллии Тоҷикистон ба истеҳсоли маҳсулоти барои ҷабҳа зарурӣ пардохтанд. Дар солҳои душвори ҷанг Тоҷикистон инчунин дар масъалаи таъмини аҳолии кишвар бо ғалла низ саҳми назаррас дошт.
Корномаву диловарии фарзандони баору номуси он солҳо намунаи ибрати наслҳои зиёди имрӯзаву оянда хоҳад буд. Омӯзиши таҷрибаи зиндагӣ, маслиҳату машваратҳои муфид, кору пайкор ва зиндагиву фаъолияти собиқадорони ҷангу меҳнат ба наслҳои имрӯзу фардои халқи тоҷик барои эъмори давлати демократӣ, ҳуқуқбунёд, дунявӣ ва пешрафта ҳамеша дастури зиндагиву фаъолият мебошад.
 Қавӣ гардондани ирода ва рӯҳи сарбозону афсарон, ҳифзи ормонҳои абадзиндаи ватандӯстӣ, эҳтиром ба муқаддасоти Ватан ва таҳкими ифтихори миллӣ самтҳои асосӣ ва муҳими кори тарбиявӣ мебошанд, ки шумо, ветеранҳои мӯҳтарам, дар амалӣ гардонидани ин амали хайр нақши арзанда гузоштаед ва ҳоло ҳам тимсоли ибрат мебошед.
 Итминони комил дорам, ки шумо бо истифода аз таҷрибаи бузурги ҳаётӣ ва бо панду насиҳатҳои судманди худ ба наврасону ҷавонон роҳбалад шуда, барои устувор намудани аркони давлатдорӣ, иқтидори мудофиавии мамлакат, рушди иқтисодиву иҷтимоии он, боз ҳам баланд бардоштани ҳисси ватандӯстии ҷавонон, ифтихори миллӣ ва хештаншиносӣ саҳми арзанда мегузоред. Мо ҳеҷ гоҳ корнамоиҳои диловаронаи шуморо фаромӯш нахоҳем кард.
 Ҳамчунин сабақҳои талхе, ки ин ҷанги хонумонсӯз ба сари тамоми инсоният оварда буд, ҳаргиз фаромӯш нахоҳанд шуд. Ҳамаи ин моро водор месозад, ки сулҳу оромиро ҳифз намоем, ба қадри он расем ва насли ҷавонро дар рӯҳияи сулҳу субот, ватанпарастиву башардӯстӣ тарбия намоем.
Дар баробари ин мехоҳам хотирнишон созам, ки беҳтар намудани шароити зисту зиндагии собиқадорони ҷангу меҳнат ва ғамхорӣ дар ҳақи онҳо ҳамеша дар маркази диққати давлат ва Ҳукумати Тоҷикистон қарор дорад, зеро шумо собиқадорони азиз, посдори анъанаҳои пуршарафи гузашта, тимсоли мардонагӣ ва меҳанпарастӣ барои насли имрӯзаи Ватани маҳбуби мо - Тоҷикистон ҳастед.
 Бори дигар ҳамаи шумо ва тамоми халқи азизи Тоҷикистонро бо Иди ғалаба табрик гуфта, ба ҳамагон саломативу хушбахтӣ, рӯзгори обод ва сулҳу осоиш орзу дорам.
Иди Ғалаба муборак, ҳамватанони азиз!


Баёни ақида (0)    Санаи нашр:    №:    Мутолиа карданд: 1280

22.07.2019


МЕЪМОРӢ ВА СОХТМОН. Қонуншиканиҳо ҳанӯз зиёданд

ТАҲСИЛОТИ САЛОҲИЯТНОК ТАТБИҚ МЕГАРДАД

ЗАМИН. Камбуди оби полизӣ мушкили ҳалталаб боқӣ мемонад

Гилерми: «Тоҷикон соҳиби кишвари афсонавианд»

Швейтсария дар Тоҷикистон бонк мекушояд

Ҷаҳон дар як сатр

19.07.2019


ПАЛАТАИ ҲИСОБ. 88,З миллион сомонӣ зарари молиявӣ ошкор гашт

УМЕД БОБОЗОДА: "Аксари муроҷиатҳо оид ба адолати судиянд"

Кӯдакони аз Ироқ овардашуда ба зиндагии муқаррарӣ бармегарданд

"EXPO 2019 BEIJING". Гӯшаи Тоҷикистонро беш аз як миллион нафар тамошо кард

НИГАРОНӢ. Ҷудошавии 6065 оила дар ним сол

18.07.2019


ХАДАМОТИ ЗИДДИИНҲИСОРӢ. Болоравии нархи барқ ба қарзи он марбут аст

Азим Иброҳим Ким Тэ Сонгро ба ҳузур пазируфт

Ба ташкили корхонаҳои муштарак ҳавасмандӣ зоҳир гардид

Ҳамоиши «Ваҳдат – омили ягонагӣ ва суботи ҷомеа» доир шуд

Ҳамкорӣ бо Қатар густариш меёбад

Саридораи геология. 2810 харитаи геологӣ рақамӣ шуд

121 шахси масъул ба ҷавобгарии маъмурӣ кашида шуд

Роҳи нави сесатҳаи Душанбе ба истифода дода мешавад

Президенти Қазоқистон Шӯрои миллии эътимоди ҷомеаро созмон дод

Дар Ӯзбекистон аввалин IT-технопарк бунёд мегардад

Ҷаҳон дар як сатр

17.07.2019


Музокироти ҳайатҳои расмии Тоҷикистон ва Корея

КУМИТАИ МУҲИТИ ЗИСТ. Нигаронӣ аз набудани партовгоҳҳо дар деҳот

ПРОКУРАТУРАИ ГЕНЕРАЛӢ. 5774 гектар қитъаи замин ба ҳолати аввала баргардонда шуд

ИЗЗАТУЛЛО САТТОРӢ: "Истеҳсоли гӯшти мурғ 9 маротиба зиёд мегардад"

ВАЗОРАТИ АДЛИЯ. Хулосаи ҳуқуқӣ ба 1936 лоиҳаи санадҳои меъёрии ҳуқуқӣ

ТАЭКВОН – ДО. Муниса медали тилло ба даст овард

Суръати рушди ММД Тоҷикистон миёни кишварҳои ИДМ баландтарин шуд

Тоҷикистон ба сохтмони лӯлаи гази «Осиёи Марказӣ — Чин» шурӯъ мекунад

Дар ҷанубу ғарби Чин аз хушксолӣ 7,4 миллион нафар зарар дид

Ҷаҳон дар як сатр

Нашрияи расмии Ҷумҳурии Тоҷикистон – рӯзномаи «Ҷумҳурият» якҷо бо мақомоти иҷроияи ҳокимияти давлатии вилояти Хатлон бахшида ба Ҷашни 30 - солагии Истиқлолияти давлатии Ҷумҳурии Тоҷикистон таҳти унвони «ТОҶИКИСТОН – ХОНАИ УМЕДИ МО» озмун эълон менамояд.

16.07.2019


ХАДАМОТИ АЛОҚА. Корти ID симкорти муштариро ба расмият медарорад


Дар сомонаҳои дигари Тоҷикистон хонед