logo

сафарҳо

Гузориш аз сафари кории Эмомалӣ Раҳмон, Президенти Ҷумҳурии Тоҷикистон, ба ноҳияи Данғараи вилояти Хатлон

Рӯзҳои 24 ва 25 май Эмомалӣ Раҳмон, Президенти Ҷумҳурии Тоҷикистон, барои шиносоӣ бо вазъи соҳаи кишоварзӣ ва доир намудани маҷлиси машваратӣ бо фаъолони вилояти Хатлон, шаҳру ноҳияҳои тобеи ҷумҳурӣ, роҳбарияти Вилояти Мухтори Кӯҳистони Бадахшон ва вилояти Суғд ва ҳамчунин масъулони сатҳи ҷумҳуриявии ин соҳа дар  ноҳияи Данғараи вилояти Хатлон қарор дошт.
 Боздиди кории Эмомалӣ Раҳмон, Президенти кишвар, аз мавзеи Сайёди Ҷамоати деҳоти Себистони ноҳияи Данғара оғоз ёфт. Дар ин ҷо Сарвари давлат бо фаъолияти хоҷагии ёрирасони назди Дастгоҳи иҷроияи Президенти Ҷумҳурии Тоҷикистон аз наздик шинос шуд.

 Тибқи супоришҳои Эмомалӣ Раҳмон, Сарвари давлат, дар ин ҷо бояд дар майдони беш аз 2 ҳазор гектар боғу токзори намунавӣ бунёд карда, ин мавзеъ ба маҳалли дилкаши сайёҳӣ ва истироҳату фароғат табдил ёбад. То имрӯз бо риояи пешқадамтарин қоидаҳои агротехникӣ аллакай дар майдони 200 гектар боғу токзори намунавӣ бунёд шудааст.
Эмомалӣ Раҳмон, Президенти кишвар, зимни сӯҳбат бо деҳқонону боғпарварон ва мардуми деҳоти атроф онҳоро ба ободонии ин ва дигар мавзеъҳои атроф ҳидоят намуда, таъкид дошт, ки онҳо "оянда дар ин ҷо метавонанд муаррифону тарғибгарони фарҳанги волои заминдорӣ, зебоипарастӣ ва меҳмоннавозии тоҷикон бошанд, зеро ин мавзеъ дар ду паҳлӯи Шоҳроҳи бузурги абрешим қарор дорад". 
Дар  Ҷамоати  деҳоти  Себистон Эмомалӣ Раҳмон, Президенти кишвар, ҳамчунин бо ҷараёни барқарорсозии токзори кӯҳнаи хоҷагии деҳқонии Раҳима аз наздик шинос шуд. Тавре зикр гардид, хоҷагӣ майдони 18 гектар замини токзори кӯҳнаи аз нав барқароршударо дар ихтиёр дорад. Чунонки аён шуд, токзори аз кундаи ниҳолҳои сисола барқароршуда нашъунамои хуб дорад.
Аҳли хоҷагӣ дар як гӯшаи замин барои худ, ҳамчунин картошка кишт намудааст. Онҳо дар миёни қаторҳои картошка парвариши помидорро ба роҳ мондаанд, ки нишонаи истифодаи босамар аз замин аст.
Сипас Эмомалӣ Раҳмон, Сарвари давлат, ба Ҷамоати деҳоти Оқсу ташриф оварда, аз заминҳои кишти ғалла, пахта, сабзавоту полезӣ ва боғҳои хоҷагиҳои деҳқонии он дидан карда, деҳқонону боғпарваронро ба истифодаи босамари заминҳои обӣ, васеъ ба роҳ мондани кишти такрорӣ ва саҳмгузорӣ ба таъмини фаровонӣ дар бозори истеъмолӣ ҳидоят намуд.
Аз ҷамоати Оқсу Эмомалӣ Раҳмон, Президенти кишвар, ба ҷамоати Лолазор ташриф оварда, заминҳои ғаллазор, пахта, сабзавоту полезӣ ва боғутокзори хоҷагиҳои деҳқониро аз назар гузаронд ва бо деҳқонону мутахассисони пешқадами кишоварзӣ сӯҳбатҳои судманд анҷом дод.
Ба Эмомалӣ Раҳмон, Сарвари давлат ва мутахассисони соҳа фаъолияти хоҷагии деҳқонии Имоми Аъзам ва истифодаи босамари заминҳои обӣ аз ҷониби аҳли заҳмати он басо писанд омад. Ба иттилои Рустам Азимов, раиси хоҷагӣ, дар миёни қаторҳои ниҳолҳои боғи навбунёд парвариши сабзавоту полезӣ хуб ба роҳ монда шудааст ва дар як мавсим то 3 ҳосил ба даст оварда мешавад. Онҳо дар 3 марҳила кишти сабзиро ба роҳ монда, дар тамоми фаслҳои сол ба бозор маҳсулоти тару тоза пешниҳод менамоянд. Дар ин хоҷагӣ, ки 50 гектар замин дар ихтиёр дорад, 60 нафар деҳқону боғпарвар бо кори доимӣ ва маошу шароити хуби заҳмат таъмин гардидаанд.
Тавре аён гардид, яке аз беҳтарин хоҷагиҳои Ҷамоати деҳоти Лолазор хоҷагии Сомонҷон мебошад, ки дорои беш аз 1,5 ҳазор гектар заминҳои боғу токзор, ғаллазор ва сабзавоту полезӣ аст. Зимни боздид аз як қитъаи замини пиёзи барвақтӣ зикр гардид, ки аҳли заҳмати он аз ҳар гектари ин қитъаи 6,5 гектара то 500 - сентнерӣ ҳосил ба даст оварданианд.
Дар заминҳои хоҷагии Сомонҷон кишти тамоми зироатҳо ва парвариши боғу токзор ба таври намунавӣ ба роҳ монда шудааст, ки аз маҳорату таҷрибаи хуби заминдории аҳли заҳмати он гувоҳӣ медиҳад.
Аҳли заҳмати хоҷагӣ тасмим доранд, ки аз заминҳои ғаллаи обӣ то 40 -сентнерӣ ҳосил ба даст оварда, дар майдони беш аз 200 гектар кишти такрории сабзавоту полезиҳоро ба роҳ монанд ва дар таъмини фаровонӣ дар бозори истеъмолии кишвар саҳми намоён гузоранд.
 Нимаи дуюми рӯз Эмомалӣ Раҳмон, Президенти Ҷумҳурии Тоҷикистон, аз боғҳои Ҷамоати деҳоти Корез, ки аксари онҳо ба таври намунавӣ бунёд ёфтаанд, дидан карда, ба боғпарварон барои боз ҳам беҳтар ба роҳ мондани нигоҳубини ниҳолҳо ва ба даст овардани ҳосили дилхоҳ маслиҳатҳои муфид дод.
Дар мавзеи Маликобаи ҷамоати Корез Эмомалӣ Раҳмон, Сарвари давлат ва масъулони соҳаи кишоварзии кишвар шоҳиди кори намунавии боғпарварони маҳаллӣ шуданд. Дар ин ҷо парвариши себу нок, биҳӣ, токзор, гелос, бодом ва дигар меваҳои хушлаззат бо риояи беҳтарин усулу технологияҳои боғдорӣ ба роҳ монда шудааст. Яке аз сабабҳои асосии муваффақияти боғпарварони ин мавзеъ табиати биҳиштосо ва иқлими форами кӯҳӣ ва наздикӯҳӣ ба шумор меравад.
25 май Эмомалӣ Раҳмон, Сарвари давлат, ба мавзеи Чашмаи нуқраи ҷамоати деҳоти Оқсу ташриф оварда, бо натиҷаи фаъолияти намунавии боғпарварони он аз наздик шинос шуд. Тавре иттилоъ дода шуд, дар майдони 274 гектари ин мавзеи хушбоду ҳавои кӯҳӣ ва наздикӯҳӣ  беш аз 116 ҳазор бех ниҳоли гуногуни дарахтони мевадиҳанда, ороишию сояафкан ва гулу гулбуттаҳои зебою дилкаш шинонда шудааст. Дар заминҳои ин мавзеъ, аз ҷумла дар миёни қатори ниҳолҳо кишти ғалладонагиҳо ва полезӣ васеъ ба роҳ монда шудааст. Ҳоло дар ин ҷо 120 нафар бо кор ва маоши хуб таъмин гаштааст. Минбаъд бо вусъати бештар пайдо намудани майдони боғҳо дар ин ҷо то 200 нафар метавонад бо кор таъмин гардад.
Сипас Эмомалӣ Раҳмон, Президенти Ҷумҳурии Тоҷикистон, дар ноҳияи Данғара бо фаъолони вилояти Хатлон, шаҳру ноҳияҳои тобеи ҷумҳурӣ, роҳбарияти Вилояти Мухтори Кӯҳистони Бадахшон, вилояти Суғд ва масъулони сатҳи ҷумҳуриявӣ маҷлиси машваратӣ доир намуд.
Дар маҷлис рафти иҷрои буҷети давлатӣ, супоришҳои қаблан додашуда, барномаҳои давлатии соҳаи кишоварзӣ, масоили вобаста ба истифодаи босамари обу замин, омодагӣ ба зимистон ва таҷлили солгарди 20-умини Истиқлолияти давлатии Тоҷикистон баррасӣ шуд.
Таваҷҷӯҳи асосӣ ба ташкили корҳои судбахш барои истодагарӣ дар муқобили мушкилоти имрӯзаи ҷаҳонӣ, аз ҷумла болоравии нархи сӯзишворию ва маводи ғизоӣ ва камборишию камобии имсолаи Тоҷикистон зоҳир гардид.
Ба андешаи Эмомалӣ Раҳмон роҳи асосӣ ва самарабахши коҳиш додани таъсири манфии омилҳои берунӣ ва пешгирӣ аз болоравии нархи маводи ғизоӣ ба роҳ мондани истифодаи босамар аз обу замин, кишти такрории сабзавоту полезӣ ва лӯбиёгиҳо ва таъмин намудани фаровонӣ дар бозори истеъмолӣ аст.
"Хушбахтона мардуми заҳматкаши Тоҷикистон дар ин самт таҷрибаи хуб дорад, ба хусус дар соли 2008 дар шароити хушксолии шадид маҳз тавассути васеъ ба роҳ мондани кишти такрорӣ фаровонӣ ва арзонӣ дар бозорҳои кишвар таъмин шуда буд", - ёдовар шуд Эмомалӣ Раҳмон, Сарвари давлат. 
Таъкид гардид, ки "вилояти Хатлон ва хусусан ноҳияи Данғара метавонанд дар таъмини амнияти озуқавории кишвар нақши намоён гузоранд, зеро имкону захираҳо дар ин ҷо хеле зиёданд ва мардуми заҳматдӯсти  шаҳру ноҳияҳои ин вилоят бояд ин масъулиятро бо сарбаландӣ бар дӯш гирифта, дар татбиқи ин ҳадафи стратегии давлат саҳми арзандаи худро гузоранд".
Тавре зикр гардид, имсол дар зиёда аз 53 ҳазор гектар заминҳои обии вилояти  Хатлон ғалладона кишт карда шудааст. Бо назардошти ин ҳолат Эмомалӣ Раҳмон, Сарвари давлат, дастур дод, ки ҳарчи зудтар ҳосили ғалладона, хусусан ғаллаи истеъмолӣ, ҷамъоварӣ карда шуда, дар ин заминҳо кишти такрорӣ ба роҳ монда шавад.
Таъкид гардид, ки барои захираи дусолаи маводи ғизоӣ ва ҳам хӯроки чорво тамоми тадбирҳои зарурӣ андешида шаванд.
Эмомалӣ Раҳмон, Сарвари давлат, аз болоравии нархи баъзе маҳсулоти ғизоӣ, аз ҷумла гӯшт дар бозорҳои кишвар изҳори нигаронӣ карда, таъкид дошт, ки ин кор, асосан, аз ҷониби баъзе қаллобону ҷаллобони беинсоф ба таври сунъӣ ташкил мегардад. Аз ин хотир бо муроҷиат ба онҳо ҳушдор дода шуд, ки агар корро аз роҳи адлу инсоф ташкил накунанд, бозоршинию савдогарӣ барои ҳамаи онҳое, ки худ истеҳсол намекунанд, манъ дошта мешавад, то ки худи истеҳсолкунандагон молу маҳсулоташонро бо нархҳои одилона ба фурӯш бароранд.
Эмомалӣ Раҳмон, Президенти кишвар, ҳамчунин барои васеъ намудани майдони боғу токзор, хуб ба роҳ мондани ниҳолпарварӣ, парвариши занбӯри асал ва дар маҷмӯъ афзун намудани ҳаҷми истеҳсолоти ватанӣ супоришҳои мушаххас дод. Барои зиёд намудани истеҳсолу ҷамъоварии меваю сабзавот ва саҳмгузорӣ дар таъмини фаровонӣ ба сохторҳои хоҷагии ҷангал низ супоришҳои қатъӣ дода шуд.
Дар робита ба омодагӣ ба таҷлили сазовори  ҷашни солгарди  20-умини Истиқлолияти давлатии  Тоҷикистон Эмомалӣ Раҳмон, Сарвари давлат, аз ҷумла таъкид дошт, ки мафҳуми «иншооти ҷашнӣ» бояд аз миён бардошта шавад, зеро тамоми ҳудуди кишвар ба истиқболи ин иди пурифтихор бояд дар маҷмӯъ ободу зебо ва сарсабзу хуррам шавад.
Сипас ахбори Ғайбулло Авзал, раиси вилояти Хатлон ва раисони шаҳру ноҳияҳои вилоят шунида шуд.
Ғайбулло Авзал аз ҷумла изҳор дошт, ки имсол дар майдони 90 ҳазор гектар заминҳои вилоят кишти такрорӣ ба роҳ монда мешавад.  Зикр гардид, ки дар майдони 12 ҳазор гектар полезиҳо кишт мегардад. Эмомалӣ Раҳмон, Сарвари давлат, дастур дод, ки дар тамоми заминҳои полезӣ баъди ҷамъоварии ҳосил кишти тирамоҳии ғалладона ба роҳ монда шавад ва таъкид дошт, ки аз ҳар гектари чунин заминҳо то 50-60 - сентнерӣ ғаллаи хушсифати тухмӣ рӯёндан мумкин аст.
Дар ахбори Қоҳир Расулзода, раиси вилояти Суғд, аз ҷумла зикр гардид, ки тайи чанд соли охир дар вилоят 81 корхонаи нави саноатӣ бо 7 ҳазор ҷойи корӣ ва дар 4 моҳи соли равон 16 корхона бо 1100 ҷойи корӣ сохта ба кор дароварда шуд. Иҷрои буҷети давлатӣ дар 4 моҳи соли равон дар  ҳаҷми 112,2% таъмин шудааст. Тибқи иттилои раис, имсол дар вилояти Суғд майдони кишти картошка ҳазор гектар афзуд ва бояд то 300 ҳазор тонна ҳосили ин зироат ҷамъоварӣ шавад. Кишти такрорӣ дар майдони 35,2 ҳазор гектар бояд ба роҳ монда шавад.
Қодири Қосим, раиси Вилояти Мухтори Кӯҳистони Бадахшон, дар гузориши худ иброз дошт, ки ҳосили зироатҳо ва боғот дар вилоят нисбат ба соли гузашта беҳтару бештар аст. Дар 4 моҳи соли равон 10 корхонаи хурди саноатии аз кор бозмонда дубора ба кор дароварда шуд. Саршумори қутос ба 20 ҳазор сар расонда шуд. Дар 1,5 ҳазор гектар замини ноҳияҳои Ванҷу Дарвоз кишти такрорӣ ба роҳ монда мешавад. Корҳои ободонию созандагӣ ба истиқболи ҷашни 20-солагии Истиқлолияти Тоҷикистон муташаккилона идома доранд.
Доир ба натиҷаҳои кор ҳамчунин Қосим Қосимов, вазири кишоварзӣ, Сироҷиддин Валиев, раиси ҷамъиятҳои Тоҷикматлубот ва раисони шаҳру ноҳияҳои тобеи ҷумҳурӣ гузориш доданд.
Майдони кишти картошка дар ноҳияи Ҷиргатол имсол ба 3 ҳазор гектар расонда мешавад ва ҳосили интизории ин зироат дар ноҳия 30 ҳазор тонна аст. Дар ноҳияи Рашт майдони кишти картошка бояд ба 2 ҳазор гектар расонда шавад. Чунонки айён гардид, ҳамаи ноҳияҳои картошкапарвар, аз ҷумла ноҳияҳои водии Рашт, барои зиёд намудани майдони кишти картошка талош доранд.
Тибқи супоришҳои Эмомалӣ Раҳмон, Сарвари давлат ва бо назардошти афзоиши талабот ба картошка дар дохил ва хориҷи кишвар истеҳсоли ин маҳсулот бояд 2 баробар зиёд карда шавад. Таъкид гардид, ки иҷрои босамари ин супориш метавонад боиси болоравии иқтидори содиротии Тоҷикистон гардад.
Ба раисони шаҳру ноҳияҳои водии Ҳисор ва Рӯдакию Ваҳдат барои ҷамъоварии саривақтии ғалладонагиҳо, васеъ ба роҳ мондани кишти такрорӣ, афзун намудани истеҳсоли меваю сабзавот ва шолӣ супоришҳои мушаххас дода шуд.
Дар маҷлиси машваратӣ ҳамчунин роҳбарони як қатор хоҷагиҳои пешқадами деҳқонӣ, ки кори намунавӣ доранд, аз таҷрибаҳои ибратбахши худ ҳикоят намуданд.
Маҳмадулло Сайдалиев, раиси ноҳияи Данғара, дар гузориши худ аз ҷумла изҳор дошт, ки аҳли заҳмату кишоварзони ноҳия омодаанд, ки ба шаҳру ноҳияҳои дорои имконоти маҳдуди ғаллакорӣ ва ҷамъоварии хӯроки дурушти чорво дасти кӯмак дароз намоянд, зеро ин ноҳия заминҳои зиёд ва имкону захираҳои фарох дорад.
Дар охир Эмомалӣ Раҳмон, Сарвари давлат, аз маҷлиси машваратӣ натиҷагирӣ намуда, масъулони маҳаллӣ ва ҷумҳуриявии соҳаи кишоварзӣ ва дигар соҳаҳои марбут ба таъмини фаровонӣ дар бозори истеъмолӣ ва ҳар як фарди ба ин кор алоқамандро ба масъулияти баланди ватандорӣ ва саҳмгузории арзанда дар ин раванди басо муҳим ҳидоят намуд. Изҳори боварӣ карда шуд, ки мардуми шарифи кишвар ҷашни пурифтихори солгарди 20-умини Истиқлолияти давлатии Тоҷикистони азизро бо фаровонию арзонӣ дар бозор, дастурхони пур аз нозу неъмат ва нишондодҳои арзишманди ободонӣ ва бунёдкорию созандагӣ истиқбол мегиранд.

www.president.tj


Баёни ақида (0)    Санаи нашр:    №:    Мутолиа карданд: 801

21.02.2019


ХУҶАНД. Оғози сохтмони бинои нави «Тоҷикстандарт»

ФУТБОЛ. Тақвими бозиҳои тими мунтахаби олимпии кишвар муайян гардид

Табибон аз Тотористон бо ҳампешаҳои тоҷики худ мубодилаи таҷриба мекунанд

Роҳандозии лоиҳаҳои инноватсионӣ дар Қазоқистон

Дар Ҳиндустон 13 иштирокдори тӯй зери чархи мошини боркаш монд

Сӯхтор сабабгори марги ҳафт кӯдак дар Канада

Ҷаҳон дар як сатр

19.02.2019


МАКТАБИ ДАВЛАТДОРИИ ЭМОМАЛӢ РАҲМОН. ЯК ҲАМОИШИ МУҲИМ

Баррасии масъалаҳои рушди сайёҳӣ

Вохӯрии Низомиддин Зоҳидӣ бо Мазен Шамия

Дурнамои рушди муносибатҳо матраҳ гардид

ҶОМИ КУШОДАИ АВРУПО. Муҳаммадризо Қувватов медали биринҷӣ ба даст овард

Авҷи ниҳолшинонӣ

Саҳми соҳибкорон дар ободии деҳот

Ҳамкории тиҷоратию иқтисодии Чин ва Россия густурдатар мегардад

Сарвар Дониш: «Музокироти сулҳ бидуни ҳукумат қурбе надорад»

«Туҳфаи шоҳона» - и Арабистони Саудӣ ба шаҳрвандони Покистон

Дар Қазоқистон маркази амнияти иттилоотӣ ифтитоҳ меёбад

Сокини навраси Шимкент ду нафарро аз сӯхтор наҷот дод

Ҷаҳон дар як сатр

18.02.2019


Боздиди Азим Иброҳим аз ҷараёни корҳои сохтмонӣ

ВКД Ҷиноятҳо 83,6 дарсад ошкор шуданд

Вазорати молия. Барои дастгирии буҷет маблағи бештар ҷалб хоҳад гашт

«BISHKEK OPEN – 2019». Дурахши каратэ-дочиёни навраси тоҷик

«МОҲИЯТ ВА ТАЪЙИНОТИ МАТБУОТИ МАҲАЛЛӢ»

РОҒУН. Ободонӣ вусъат меёбад

АНДОЗ. Нақша 100, 6 дарсад иҷро гардид

ТОҶИКИСТОНУ ӮЗБЕКИСТОН. Гардиши савдо ду баробар афзуд

Тоҷикистон миёни кишварҳои ИДМ ба афзоиши баландтарини ММД муваффақ гашт

Дар Тошканд конфронси байналмилалӣ оид ба Осиёи Марказӣ баргузор мегардад

Қасри сафед: "Музокироти тиҷоратӣ дар Пекин ба пешравӣ мусоидат кард"

Трамп мехоҳад ҷангиёни «Давлати исломӣ» - ро ба Аврупо барои суд кардан баргардонад

Кумитаи амнияти иттилоотии Қазоқистон беш аз 90 сомонаи хавфнокро ошкор сохт

Ҷаҳон дар як сатр


Дар сомонаҳои дигари Тоҷикистон хонед