logo

сиёсат

Узри бадтар аз гуноҳ

Таъбири хуби мардумист, ки "дарро задам девор кафид". Мақолае навишта будам бо унвони "Ҷаноза бо телефон" ва он дар рӯзномаи "Ҷумҳурият" (№61 аз 12.05.12 с.) нашр гардид. Маънии аслӣ ва нуҳуфтаи матлаб маҳз таҷаллии ифлосиҳои сиёсат буд, ки чӣ навъ як писарро аз назди модари бемори дар дами марг кашида, фарсахҳо дур мебарад, пайи дарёфти имиҷу имтиёзот аз ҳамон ифлосӣ.
Дар ҳафтаномаи "Нигоҳ" (№ 19 аз 22-юми майи соли ҷорӣ)  ҷавобияе ба мақолаи болоӣ, бо қалами Иззат Амон зери сарлавҳаи "Кабирӣ дар Маскав чӣ кор мекард?" нашр шуд. Матлаи он  аз таърифи ифлосии сиёсат оғоз меёбад ва муаллиф шиква дорад, ки ифлосиҳои сиёсатро медонистаасту ин гунаашро аввалин бор мебинад. Ғофил аз он ки худаш баринҳо ин ифлосиро ба ҳадди ботлоқ расонидаанду талош доранд кулоҳи тазвирашонро бар сари мардум кашида, ба қаъри ин ботлоқ телааш диҳанд.
Сараввал мухтасар нисбати Иззат Амон, раиси ба истилоҳ Иттиҳоди ҷавонони Тоҷикистон дар Маскав. Чаро "ба истилоҳ"? Зеро дар Маскави имрӯза бо доштани як ойиномаи аз интернет рӯйбардоршуда, як протоколи ҷаласа, рӯйхати чанд нафари дар зеҳнатон бофта ва варақаҳои маблағи андоз роҳат метавонед ҳар марказу ҷамъияту ташкилотеро, ки дилатон хост, номнавис намоед ва худро раиси он эълон кунед.
Чанде пеш дар куҷое хонда будам, ки номбурда қаблан ба муллоӣ ҳавас доштааст. Ва ҳатто мехостааст, ки асосгузори ҷараёни "Аҳмадия" (яке аз равияҳои ислом аст, ки дар Покистон маъруф аст) дар Тоҷикистон гардад. Аммо чун натавонистааст онро аз қайд гузаронад, роҳ ҷониби Маскав гирифтааст. Муайян намудани сатҳу дараҷаи ваколат ва салоҳияти "раис"-ии имрӯзааш ишколе надорад. Як борак ба Фурудгоҳи шаҳри Душанбе рафта, аз мусофирони самти Душанбе-Маскав ва  Маскав-Душанбе дар хусуси шахсияти ин "раис"-и навбаромад суол кунед. Агар аз миёни 300 мусофир ақаллан нафаре ин "раис"-ро шиносад, ман номамро мегардонам.
Акнун дар бораи матлаби навиштаи "раис". Тавре аз муҳтавои он бармеояд, номбурда дар нишасте, ба таъбири худаш - дар "пурнуфузтарин" маркази илмию фарҳангии Карнегӣ, иштирок доштаасту нисбат ба Тоҷикистон таҳқири зиёде шунидааст. Хусусан аз таҳлилгар Аждар Куртов.  Ва маҷбур шудааст, ки Кабириро ба Маскав даъват намояд, барои ҳимояи Тоҷикистон. Сабаби сафари Кабирӣ низ дар рӯзҳои бемории модараш аслан ҳамин будааст. Яъне ин марказ - филиали фонди амрикоӣ маблағ ҷудо намудааст, ки  раиси ҲНИТ бо даъвати "раис" Иззати Амон ба Маскав рафта, манфиати Тоҷикистонро ҳимоя кунад, аниқтараш дар бораи вазъияти Тоҷикистон маълумот диҳад. Зеро дигар касе қодир набудааст, ки ин миссияро иҷро кунад. Ӯ менависад, ки "қаблан шоҳиди суҳбатҳояш дар марказҳои илмии Аврупо будаму медонистам, ки аз уҳдаи ин кор мебарояд".  Харҷи онҳо он қадар ҳам кӯчак набудааст. Худи Иззат Амон қойил аст, ки "… ба Кабирӣ занг задам, ӯ ба ман гуфт, ки модарам бемор аст ва ростӣ, хоҳиши рафтан надорам. Ман гуфтам, ки ин кор имкон надорад, зеро зиёда аз 100 меҳмон аз тамоми донишгоҳҳо ва марказҳои илмии Русия даъват шудаанду маблағи зиёде харҷ шудааст". Аз ин бармеояд, ки гап сари маблағ меравад ва ҳамаи баромаду вохӯрию муҳоҷиру ғайра баҳонае мебошанду бас! Ана инро ифлосӣ мегӯянд, ҷаноби "раис"! Расули Акрам ҷаннатро ба хоки қадамҳои модар баробар карда буданду шумо раисҳои навбаромадро барои харҷи кадом маблағе дилатон месӯзад, ҳатто онро аз модари бемор боло мегузоред. 
Иззат Амон менависад, "Кабирӣ тавонист мардуми ҷаҳонро фаҳмонад, ки Тоҷикистон низ абармардоне дорад, ки аз минбарҳо сухан гӯянд" ва аз ин "мардуми ҷаҳон" испание ӯро барои суханронӣ ба Испания даъват кардааст. Чӣ корномае! Бо як осонӣ тамоми проблемаҳои Тоҷикистон ҳал шуданд. Ҳол он ки ин баромад "нақоранавозӣ баъди ҷанг" ё "муштафшонӣ баъди лату кӯб" номида мешавад. Он ҷо на Куртови моҷароҷӯю иғвоандоз ширкат дошту на дигар намояндагони доираҳои зиддитоҷикии Русия. Аз ин рӯ, судеро дар суханронии Кабирӣ дар назди чанд тоҷики муқими Маскав пайдо карда натавонистам, ҷуз он ки ӯро аз гусели модари азизаш ба роҳи охират маҳрум карданд.
Дар бораи вохӯрӣ ва баромади Муҳиддин Кабирӣ дар Маркази Карнегӣ дар Маскав, ҳадди ақал дар торномаи худи марказ хабаре пахш нашуд. Худи ҳамин  баёнгари сатҳи вохӯрӣ, аҳамияту муҳимияти сафару баромади сарвари наҳзат дар ин марказ аст.
Акнун каме дар бораи маркази илмӣ-фарҳангии Карнегӣ, аниқтараш Маркази Карнегӣ дар Маскав. Бидуни мушкилӣ  метавон дар интернет вобаста ба ин марказ маълумот касб кард. Маркази Карнегӣ дар Маскав як воҳиди Фонди амрикоии Карнегӣ мебошад, ки ташкилоти ғайридавлатии байналмилалӣ ҳисоб ёфта, ба тадқиқоти сиёсӣ ва ташкили мубоҳисаҳо аз рӯйи масоили доғи ҷамъиятӣ-сиёсии Русия ва кишварҳои Авруосиё машғул аст.  Ба Шӯрои назоратии он якчанд чеҳраи ошно аз соҳаҳои мухталифи ҳаёти ҷамъиятӣ-сиёсӣ вориданд. Аз ҷумла, чанд нафари онҳо аз қабили Борис Немтсов, яке аз роҳбарони ҳизби "Союз правых сил", Владимир Рижков, вакили Думаи давлатии Русия дар солҳои 1993-2007, Григорий Явлинский, доҳии якумраи "Яблоко", Евгений Ясин, президенти фонди "Либералная миссия" ва дигарон, ки аз фаъолони ташаббускору ташкилкунандаи митингу қадамзаниҳои зиддипутинии ахир дар Русия мебошанд. Тибқи маълумотҳои расмии Ҳукумати Русия, ин ашхос ва дигар ҳамфикронашон нияти гузаронидани инқилоби ранга ё "баҳори арабӣ"-ро дар Русия доштанд. 
Иззат Амон Маркази Карнегӣ дар Маскавро "пурнуфузтарин" маркази илмию фарҳангӣ муаррифӣ мекунад. Манзурам аз овардани чанд чеҳраи болоӣ танҳо ҳамин буд, ки доираи ҳақиқии вобастагии маркази мазкур бо илму фарҳанг равшантар ҷило диҳад. Қазоват аз Шумост.
Дар хусуси вохӯрии Муҳиддин Кабирӣ бо муҳоҷирони тоҷик, ки ба қавли Иззат Амон "ҷойи кории худро партофта омада буданд", андешаамро дафъаи аввал навишта будам, ҳоҷат ба такрор нест. Вале як ҷумлаи Иззат Амонро ҳеҷ фаҳмида натавонистам. Ӯ менависад: "Вақте субҳ шуд, падари эшон (манзураш Кабирист) занг заду ба писараш гуфт, ки ба ваъдааш вафо кунаду мардуми муҳоҷирро танҳо нагузорад. Ин амр аст. Ҳамин буд, ки оқои Кабирӣ дигар наметавонист Маскавро тарк кунад". Суоли боз мемонад, ки Кабирӣ бо даъвати Маркази Карнегӣ ба Маскав сафар карда буд, ё барои вохӯрӣ бо муҳоҷироне, ки тӯли ҳамин қадар солҳо "танҳо" будаанду ӯро интизор? Ва акнун Кабирӣ баргашту онҳо боз танҳо монданд?
Иззат Амон дар фарҷоми матлабаш байти олиеро аз пирони  хиради мо овардааст:
Ман аз беқадрии хори сари девор донистам,
Ки нокас кас намегардад, аз ин боло париданҳо.

Намедонам мавсуф худаш то кадом дараҷа ба умқи ин ҷавҳари дар мӯҳраҳои назм кашида расидааст. Ба эҳтимоли зиёд,  нарасидааст. Агар мерасид, гоҳе думболи "Аҳмадия" намегашту гоҳе аз пушти наҳзат намепарид. Худро "раис"-и итиҳодияи рӯйи коғаз эълон намекарду пушти чанд пайса ва "кофебрейк"-ҳои карнегиҳою соросҳову садҳо марказу институтҳои ба истилоҳ "озод"-у пӯшида кафш намедаронид. Агар мерасид, кайҳо дарк мекард, ки ин кофе ҳаргиз барои зебоии қаду баст ва ақлу дониши расояш ба пиёлааш рехта намешавад ва ҳатман рӯзе гардонидани баҳояшро хоҳанд пурсид, танҳо на бо пул!

Сиёвуши ЁДГОР


Баёни ақида (0)    Санаи нашр: 14.06.12    №: 74    Мутолиа карданд: 3764

13.07.2018


Мулоқоти Сироҷиддин Муҳриддин ва Ясмин Гуедар

Баррасии Барномаи дастгирии рушди неруи инсонӣ

Баргузории конфронси «Ҳунарҳои мардумӣ: эҳё, ҳолат, рушд ва дурнамо»

Пирӯзии теннисбози тоҷик дар ИМА

ҶАҲОН ДАР ЯК САТР

Дар СҲШ зарурати тақвияти мубориза алайҳи терроризмро таъкид карданд

Трамп: «Путин рақиби ман аст, лек метавонад дӯст гардад»

Русия сазовори ҷоми макроиқтисодии ҷаҳон шуд

Бонки ҷаҳонӣ: «Бесаводии духтарҳо $30 триллион зарар меорад»

12.07.2018


Мулоқоти Сироҷиддин Муҳриддин ва Чари Атаев

Боздиди Прокурори генералӣ аз Бадахшон

Форуми ҷумҳуриявӣ дар Хоруғ ҷавононро ба ҳам меорад

Озмун бахшида ба Соли рушди сайёҳӣ ва ҳунарҳои мардумӣ

ДАНҒАРА. Ҷамъоварии ҳосили фаровони ғалла

Ҷаҳон дар як сатр

Дар Чин аз хавфи тӯфони «Мария» қариб 400 ҳазор нафар кӯчонда шуд

Созмони ҳамкории исломӣ ба музокироти сулҳ дар Афғонистон даъват мекунад

Чин бори нахуст ба раддаи 20 инноватсионитарин кишвар роҳ ёфт

Қазоқистон истеҳсоли гӯшти мурғро чор маротиба зиёд карданист

11.07.2018


Иштироки Музаффар Ҳусейнзода дар Муколамаи сатҳи баланд

Гулистон. Мактаби санъат сохта мешавад

Шуъбаи бемориҳои сироятии кӯдакона таҷдиду азнавсозӣ шуд

Аввалин толори намоиш ва фурӯши маҳсулоти ҳунарҳои мардумӣ ташкил гардид

БОХТАР. Озмуни "Намоиши ҳунарҳои мардумӣ"

Тайёрӣ ба Чемпионати Осиё оид ба қаиқронӣ

ҶАҲОН ДАР ЯК САТР

Помпео мавзӯъҳои асосии музокироти Путин ва Трампро ном гирифт

Дар ҳамоиши НАТО маблағгузории неруҳои амнияти Афғонистонро ҷонибдорӣ мекунанд

Аҳолии Замин дар як сол 83 миллион нафар афзуд

Қазоқистон истихроҷи нафтро зиёд мекунад

10.07.2018


Ҷаласа таҳти раёсати Сарвазири мамлакат

Баррасии пешгирии амалҳои коррупсионӣ

Дар арафаи Ҷашни 27 - солагии Истиқлолияти давлатӣ аввалин эстакада ба истифода дода мешавад

Пирӯзии навбатии Дилшод


Дар сомонаҳои дигари Тоҷикистон хонед