logo

сиёсат

ИШТИРОКИ ПЕШВОИ МИЛЛАТ ДАР ИҶЛОСИЯИ 77-УМИ КОМИССИЯИ ИҚТИСОДӢ ВА ИҶТИМОИИ СММ

26 апрел Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар иҷлосияи 77-уми Комиссияи иқтисодӣ ва иҷтимоии Созмони Милали Муттаҳид барои кишварҳои Осиё ва уқёнуси Ором оид ба татбиқи Ҳадафҳои рушди устувор дар мавзӯи  “Барқарорсозӣ пас аз буҳрон дар асоси усули “аз пештара ҳам хубтар” ва ҳамкориҳои минтақавӣ дар Осиё ва уқёнуси Ором”, ки дар шакли видеоӣ баргузор гардид, иштирок ва суханронӣ намуданд.
Дар ҷаласа, ҳамчунин, раиси Маҷмаи умумии СММ Волкан Бозкир, раиси Шӯрои иқтисодӣ - иҷтимоии СММ Мунир Акрам, котиби иҷроияи Комиссияи иқтисодӣ ва иҷтимоии СММ барои кишварҳои Осиё ва уқёнуси Ором Армида Алишахбону, президентҳои Афғонистон, Озарбойҷон, Индонезия, Кирибати, Қирғизистон, Ҷазираҳои Маршал, Муғулистон, сарвазирҳои Таиланд, Тувалу, Бангладеш, Бутан, Камбоҷа, Фиҷи, Покистон, Шри-Ланка, Ӯзбекистон иштирок ва сухан ронданд.
Иҷлосияи 77-ум ба масъалаҳои таҳлили таъсири иҷтимоию иқтисодии пандемияи коронавирус дар кишварҳои Осиё ва уқёнуси Ором, натиҷагирии тадбирҳои то ҳол дар ин самт андешидашуда, муҳайёсозии тасмимҳои сиёсӣ барои бозсозии беҳтар бар асоси ҳамкориҳои минтақавӣ дар чор бахши ҳаётии бо ҳам пайваста, густариши ҳамкориҳои иҷтимоӣ, сармоягузорӣ барои барқарорсозии устувор, таҳкими иттисол ва занҷираи таъминот ва эҳёи равобит бо табиат бахшида шуда буд.
Президенти мамлакат муҳтарам Эмомалӣ Раҳмон баргузории чорабиниро бо назардошти таҳдидҳои муосир ва таъсири пандемияи COVID – 19, ки дар аксари кишварҳои ҷаҳон ҳанӯз ҳам идома дорад, хеле муҳим ва саривақтӣ арзёбӣ карданд.
Таъкид гардид, ки имрӯз дар дунё давлат ва соҳае нест, ки аз таъсири пандемияи COVID – 19 эмин монда бошад. Рушди иқтисодӣ, Буҷети давлатӣ, гардиши тиҷорати хориҷӣ, қурби асъори миллӣ ва фаъолияти корхонаҳои саноативу муассисаҳои хизматрасонии тамоми кишварҳои дунё аз таъсири манфии он зарар мебинанд. Ҳамзамон, пандемияи коронавирус омили ба таври бесобиқа боло рафтани сатҳи бекорӣ дар ҷаҳон шудааст, ки метавонад кишварҳои гуногунро ба мушкилоти таъмини амнияти озуқаворӣ дучор гардонад.  
Тавре Сарвари давлат муҳтарам Эмомалӣ Раҳмон иброз доштанд, шиддат гирифтани пандемияи COVID – 19 дар ҷаҳон моро низ водор сохт, ки ҷиҳати пешгирии ин беморӣ, коҳиш додани зарари иҷтимоиву иқтисодӣ ва дастгирии соҳаҳои ҳаётан муҳими ҷомеа чораҳои мушаххас, аз ҷумла бознигарии Буҷети давлатӣ барои соли 2020, омода кардани беш аз 30 беморхона бо 7000 кат ва 5400 нафар табибону кормандони тиббӣ, ташкили 16 ҳазор кат дар 92 муассисаи тандурустӣ барои табобати саривақтии шахсони гирифтори бемории сироятии COVID – 19, ҷудо кардани маблағҳои иловагӣ ба соҳаи тандурустӣ барои харидани таҷҳизоти тиббӣ ва доруворӣ, бунёди беморхонаҳои муваққатӣ ва дастгирии кормандони тибро дар кишвар амалӣ созем.
Дастгирии бахши хусусӣ бо ҷорӣ кардани сабукиҳои зиёди андозиву қарзӣ ва имтиёзу ҷубронпулиҳо ба соҳибкорон ва корхонаҳои хурду миёнаи истеҳсолӣ, пардохти кумакпулиҳои иҷтимоӣ ба гурӯҳҳои осебпазири аҳолӣ дар давраи пандемияи коронавирус, ташкили зиёда аз 190 ҳазор ҷои кори доимӣ ва мавсимӣ, барои беҳтар намудани шароити иҷтимоии аҳолӣ дар ҳаҷми 15 фоиз зиёд кардани нафақа, музди меҳнати кормандони ташкилоту муассисаҳои буҷетӣ,  бахусус кормандони соҳаи тандурустӣ ва стипендияҳо, 10 фоиз маоши кормандони мақомоти ҳифзи ҳуқуқ ва хизматчиёни ҳарбӣ, 50 фоиз нафақаи маъюбоне, ки ба нигоҳубин ниёз доранд ва бо мақсади ҳифзи амнияти озуқавории кишвар ва боло бурдани ҳаҷми истеҳсоли маҳсулоти худӣ афзоиш додани масоҳати даҳҳо ҳазор гектар майдони кишти асосӣ ва такрории зироатҳои кишоварзӣ аз тадбирҳои дигари мушаххас ва арзишманди Ҳукумати Ҷумҳурии Тоҷикистон дар ин самт мебошад.
Сарвари давлат таъкид карданд, ки бо назардошти самти иҷтимоӣ доштани Буҷети давлатӣ, соли гузашта барои соҳаи иҷтимоӣ 48 фоизи қисми хароҷоти буҷет ҷудо гардид.Илова бар ин, ҷиҳати бартараф кардани пайомадҳои пандемияи COVID – 19 ва бо мақсади татбиқи барнома ва лоиҳаҳои дахлдор, Ҳукумати Тоҷикистон ҳамкории судмандро бо шарикони рушд, бахусус бо Хазинаи байналмилалии асъор, Бонки ҷаҳонӣ, Бонки осиёии рушд ва дигар институтҳои байналмилалии молиявӣ, густариш бахшид. 
Президенти мамлакат муҳтарам Эмомалӣ Раҳмон, бо истифода аз фурсат, ба тамоми кишварҳо ва созмонҳои байналмилалӣ, аз ҷумла Созмони Милали Муттаҳид ва сохторҳои тахассусии он, бахусус Созмони ҷаҳонии тандурустӣ, шарикони рушд ва ниҳодҳои молиявии байналмилаливу минтақавӣ, барои дастгирии Тоҷикистон дар давраи пандемияи коронавирус изҳори сипос карданд.
Зимни суханронӣ дар иҷлосияи 77-уми Комиссияи иқтисодӣ ва иҷтимоии Созмони Милали Муттаҳид барои Осиё ва уқёнуси Ором, Сарвари давлат муҳтарам Эмомалӣ Раҳмон таъкид карданд, ки давоми соли 2020, сарфи назар аз чораҳои андешидашуда, афзоиши ниҳоии маҷмӯи маҳсулоти дохилии кишвар дар қиёс ба соли 2019 се фоиз коҳиш ёфт. Сатҳи таваррум дар ин давра аз 7,9 фоизи соли 2019 ба 9,4 фоиз расид. Нархи хӯрокворӣ низ, ба мисли тамоюли болоравии нархи маводи хӯрокворӣ дар саросари ҷаҳон, 13 фоиз боло рафт. Арзиши маҳсулоти ғайрихӯрокворӣ аз аввали сол 5,8 фоиз ва тарифҳои хизматрасонӣ 4 фоиз афзуданд.
Зикр гашт, ки бо вуҷуди тадбирҳои андешидаи Ҳукумат, иқтисоди Тоҷикистон ҳанӯз ҳам зери таъсири манфии оқибатҳои пандемияи COVID – 19 қарор дорад. Ҳарчанд ки ибтидо аз аввали соли равон дар Тоҷикистон ҳолатҳои сироятшавӣ бо бемории COVID – 19 ба қайд гирифта нашудааст. Аз ин лиҳоз, барқарорсозии иқтисодиёт пас аз давраи COVID – 19, ҳавасмандгардонии соҳибкории хурду миёна, дастгирии гурӯҳҳои осебпазири аҳолӣ, татбиқи чораҳои зидди эпидемиологӣ, алалхусус барномаи эмкунӣ, аз тамоми кишварҳо, аз ҷумла кишварҳои минтақаи Осиё ва уқёнуси Ором, ҷалби захираҳои иловагии молиявиро талаб мекунад. 
Сарвари  давлат зарур шумурданд, ки  дар чунин вазъият  кишварҳои  минтақаи мо, дар баробари тавсеаи ҳифзи иҷтимоии аҳолӣ, ба сармоягузорӣ ҷиҳати  барқарорсозии устувори иқтисодиёт, нигоҳ доштани гардиши молу маҳсулот, таъмини ҳамлу нақли  бемамонияти молҳои ниёзи аввалиндараҷа, бахусус маводи ғизоӣ ва доруворӣ, ҳамчунин, ҳифзи муҳити зист таваҷҷуҳи хоса зоҳир намоянд.
Дар охири суханронӣ Президенти мамлакат муҳтарам Эмомалӣ Раҳмон вобаста ба пандемияи коронавирус ва давраи пас аз он бо назардошти таъсиру пайомадҳои тӯлонии он дар ҷаҳон аз кишварҳои минтақаи Осиё ва уқёнуси Ором даъват намуданд, ки ҳамкории минтақавиро дар самтҳои зикргардида, инчунин, барои муқовимат ба таҳдиду буҳронҳои эҳтимолии оянда, таъмини гуногунсамтии иқтисодиёт, густариши раванди рақамикунонӣ, мутобиқшавӣ ба пайомадҳои тағйирёбии иқлим ва гузариш ба “иқтисоди сабз” тақвият бахшанд, зеро дар ин давраи ҳассосу мушкил барои тамоми ҷомеаи ҷаҳонӣ амалҳои ҳамоҳангшуда ва дастгирии ҳамдигар басо муҳиму зарур мебошад.
 


Баёни ақида (0)    Санаи нашр: 27.04.2021    №: 84    Мутолиа карданд: 410
23.06.2021


Ҷаласаи Ситоди ҷумҳуриявӣ оид ба пурзӯр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID – 19

«Толибон» гузаргоҳи асосии марзи Афғонистону Тоҷикистонро тасарруф намуданд

Ҷаҳон дар як сатр

«ДАР СУҲБАТИ ЛОИҚ»

ШАҲРИ ИСТИҚЛОЛ. Корхонаи бузурги металлургӣ барқарор шуд

Рӯйдодҳои илмӣ

ХУҶАНД. ВУСЪАТИ КОРҲОИ ОБОДОНӢ

ВАНҶ: ҶАШНИ МИЛЛӢ ТАНТАНА ХОҲАД ДОШТ

22.06.2021


Путин: «Таҳдиди коронавирус боқист, аммо зарбаи сахти он баргардонда шуд»

Ҷаҳон дар як сатр

ЛИГАИ ОЛӢ

21.06.2021


«TOUR DE TAJIKISTAN». Мусобиқае, ки дастовардҳои кишварро муаррифӣ мекунад

МИНТАҚАИ РАШТ. 51 МИЛЛИОН ҚАРЗИ ИСТИФОДАИ БАРҚ

ШАҲРИ ТУРСУНЗОДА. ДАСТГИРИИ КИШОВАРЗОН БАРОИ СОДИРОТИ АНГУР

ТОҶИКОБОД. САМАРИ ЯК ҲАМКОРӢ

КАЙФАР

70 СОЛ ДАР РОҲИ ОМӮЗИШИ ТАЪРИХ ВА ФАРҲАНГИ МИЛЛАТ

НУРОБОД. ВАҚТЕ КИ ЗАМИН МАҚСАДНОК ИСТИФОДА МЕШАВАД...

11.06.2021


СУҒД. НАПАРДОХТАНИ ҲАҚҚИ ИСТИФОДАИ ОБ МУШКИЛИ ҲАЛТАЛАБ БОҚӢ МЕМОНАД

08.06.2021


ҲИСОР. Муовини Сарвазир аз иншооти ҷашнӣ дидан кард

КИТОБХОНАҲОИ ХУРДИ САЙЁР ТАҶРИБАИ НАВ ДАР РОҲИ ДОНИШАНДӮЗӢ

САЙЁҲӢ. БАРРАСИИ МАСОИЛИ РУШД МИЁНИ ҶУМҲУРИҲОИ ТОҶИКИСТОН ВА ӮЗБЕКИСТОН

ИҶТИМОИЁТ. НИЁЗМАНДОН ҲАМЕША МАВРИДИ ТАВАҶҶУҲАНД

ТОҶИКИСТОН ВА ӮЗБЕКИСТОН. УФУҚҲОИ НАВИ ҲАМКОРӢ

МАРАФОНИ ВЕЛОСИПЕДРОНӢ БАРГУЗОР МЕШАВАД

«ҶУМҲУРИЯТ» ДАР КОБУЛ. СИПОСИ ЛАШКАРӢ БА РӮЗНОМАИ № 1- И ТОҶИКИСТОН

04.06.2021


ФУТЗАЛ

Путин бори дигар шаҳрвандонро ба эмгузаронӣ даъват намуд

Ҷаҳон дар як сатр

10 ДОВТАЛАБИ БЕҲТАРИН

03.06.2021


ВКХ Чин: «Муносиботи Чин бо Россия дар сатҳи олӣ қарор дорад»

КИТОБИ КОРМАНДИ «ҶУМҲУРИЯТ» БА ЗАБОНИ ӮЗБЕКӢ НАШР ШУД

МИНТАҚАИ КӮЛОБ. ГУРӮҲИ ТАБЛИҒОТӢ НАЗДИКИ 50 ВОХӮРӢ АНҶОМ ДОД

02.06.2021


Лавров: «Россия ба иқдомҳои муғризонаи ИА аксуламал нишон медиҳад»

ҶАҲОН ДАР ЯК САТР


Дар сомонаҳои дигари Тоҷикистон хонед